Impriso Lapud Pananisia Ra—South Korea

Nen Oktubre 26, 2020 first time ed South Korea ya naikday pankanawnawa ya manggawa na alternative civilian service, odino alternatibon serbisyo ya anggapoy koneksion to ed militar, iray agda labay so mansundalo lapud agnaako na konsiensia da. Balet ibabaga na saray autoridad ya mangilalaban ed karapatan na totoo ya say alternatibon serbisyo na South Korea et aliwan patas tan ambelbelat lapud andukdukey tan mair-irap itan. Say panggaway alternatibon serbisyo ed loob na 36 ya bulan et doble so karukey to ed aktual ya panserbi ed militar tan kontra itan ed saray estandarte ya tutumboken na dakel ya bansa. Base ed saratan ya estandarte, say karukey na alternatibon serbisyo et agnepeg ya onsobra na sakey tan kapalduan beses ed karukey na aktual ya panserbi ed militar, puera labat no walay makatunongan ya rason.Ag-inawat na pigaran brother ed South Korea iyan programa na alternatibon serbisyo, tan wala ray angisegep na reklamo ed korte. Nen Mayo 30, 2024 imbasura na Constitutional Court na South Korea so amin ya reklamo ed alternatibon serbisyo, say desisyon et 5 kontra ed 4. Balet anggaman ontan so desisyon, nidanet ed korte ya masyadon maruksa so programa na alternatibon serbisyo, oniay imbaga na saramay agmiabobon ed satan: “Say ontan ya alternatibon serbisyo et singa lanlamang dusa ya kontra ed karapatan na saray totoon agnaako na konsiensia da so mansundalo.”

Si Woo-jin Byeon so sankaunaan ya apriso ed South Korea lapud agto inawat so alternatibon serbisyo, 29 so taon to tan walay asawa to. Sarilin desisyon nen Woo-jin Byeon ya marespeton ag-awaten so alternatibon serbisyo. Imbaga tod korte ya no walay alternatibon serbisyo ya aliwan maruksa et mabulos ton awaten itan. Pero nen Hulyo 24, 2024 senentensiaan na korte ya napriso na sakey tan kapalduan taon.

Natan, 13 lan Tasin lalaki so ag-angawat na alternatibon serbisyo kaiba lay Mr. Byeon, tan 11 ed sikara so peles ya lilitisen. Depende ed resulta na panlitis ed sikara, nayarin nasentensiaan met ira bilang kriminal insan ira napriso. Anggaman ontan, nandesisyon so dakel ed saramay agnaako na konsiensia ra so mansundalo ya awaten so alternatibon serbisyo anggano marukruksa itan.

Time Line

1. Hulyo 24, 2024

   Asentensiaan na 18 bulan ya pakapriso si Woo-jin Byeon lapud agto inawat so alternatibon serbisyo.

2. Nobyembre 10, 2022

   Nen akaawat na sulat si Woo-jin Byeon ya tatawagen dan mansundalo, nansulat met ed Military Manpower Administration ya agto awaten so pansundalo tan alternatibon serbisyo lapud ag-iratan naako na konsiensia to.

3. Oktubre 26, 2020

   Ginmapon angiter so gobierno na South Korea na alternatibon serbisyo parad saramay agnaako na konsiensia ra so pansundalo.

4. Nobyembre 1, 2018

   Nandesisyon so Korte Suprema na South Korea, 9 kontra ed 4, ya aliwan krimen so agpansundalo no ag-itan naako na konsiensia na sakey ya too.

5. Hunyo 28, 2018

   Indeklara na Constitutional Court na South Korea ya kontra ed batas so sakey ya seksion na Military Service Act ta ag-itan mangiiter na alternatibon serbisyo ed saray agnaako na konsiensia ra so mansundalo.

6. Oktubre 18, 2016

   First time ya nandesisyon so Gwangju Appellate Court ya aliwan guilty so taloran Tasi ya inmapela ta agnaako na konsiensia ra so mansundalo.

7. Agosto 30, 2011

   Sinuportaan lamet na Constitutional Court so batas ya nepeg ya dusaen iray agnaako na konsiensia ra so mansundalo.

8. Agosto 26, 2004

   Imbaga na Constitutional Court ya walad batas so pandusa ed saray agnaako na konsiensia ra so mansundalo.

9. 1975

   Ingganggan na gobierno so puersaan ya pansundalo.

10. 1973

    Ginmapon pinairap na gobierno iray akaprison Tasi tan nantultuloy itan anggad kapegleyay 1990’s.

11. 1953

    Inkulong na gobierno so sankaunaan ya Tasi ya agnaako na konsiensia to so mansundalo.