6 Milyon so Inatey ed COVID—Antoy Ibabaga na Biblia?

Ibabaga na World Health Organization (WHO) ya say bilang na inatey ed COVID-19 anggad Mayo 23, 2022 et 6.27 milyon la. Balet base ed report ya im-publish nen Mayo 5, 2022, say tantiya na WHO ya talagan bilang na inatey et mas dakel ni. Imbaga na satan ya legan na 2020 tan 2021, “say kabuoan ya bilang na inatey balanglan direkta odino aliwan direkta ya resulta na COVID-19 pandemic . . . et onabot ed ngalngali 14.9 milyon.” Wala kasi ibabaga na Biblia ed ontan iran makapaermen ya nagagawa?

Impasakbay na Biblia iray makapatey ya pandemic

• Impasakbay nen Jesus ya wala ray nagawan “salot,” odino epidemya na makapatey iran sakit, legan na panaon ya tatawagen ya “kaunoran iran agew.”—Lucas 21:11; 2 Timoteo 3:1.

Nagagawa la iyan impropesiya nen Jesus natan. Pian naaruman ni antam, basaen so artikulon “Anto so Tanda na ‘Kaunoran Iran Agew,’ odino ‘Panaon na Anggaan’?”

Mangiiter na ligliwa so Biblia

• “Say Dios na amin a ligliwa, [so] manliligliwa ed sikatayo diad amin a subok a dadalanen tayo.”—2 Corinto 1:3, 4.

Dakel ed saray naandian na inaro ed bilay so naliligliwa ed mensahe na Biblia. Naaruman ni antam no basaen mo iray artikulon “No Panon ya Nasarag so Ermen—No Antoy Nagawaan Mo Natan” tan “Say Sankaabigan a Tulong Parad Saray Inateyan.”

Ipapaamta na Biblia so permanentin solusyon

• “Onsabi la komon so Panarian mo. Nagawa komon so linawam, a singa ed tawen, ontan met diad dalin.”—Mateo 6:10.

No manuley lay “Panarian na Dios” diad dalin, seguroen na satan ya “anggapoy manaayam ditan a mangibagay: ‘Mansasakit ak.’” (Marcos 1:14, 15; Isaias 33:24) Bantayan so video ya Anto so Panarian na Dios? pian naamtaan mo so nipaakar ed sayan gobierno ed tawen tan no antoy gawaen na satan.

Pian naaruman ni antam, papasesegen mi kan aralen so ibabaga na Biblia pian nagunggonaan ka tan say pamilyam ed saray makabat ya bilin tan saray balibalin promisa ya nabasa ditan.