MANTULTULOY A MANBANTAY!

Makapabigla Iran Panagpaltog Diad Interon Mundo—Antoy Ibabaga na Biblia?

UPDATE: Abril 27, 2023

Tuloytuloy so graben panagpaltog tan dakel so naaapektoan ed interon mundo. Nia ray pigaran agano nin agawa.

“Diad America, say tinaon ya report ed graben panagpaltog et manga sakey ya kaso kada simba.”—Abril 21, 2023, The Guardian.
“Samploran mankakapamilya—pitora et bibii tan sakey ya 13 años ya laki—so inatey lapud graben impamaltog diad sakey ya abung ed South Africa.”—Abril 21, 2023, AP News.
“Antis ya pinatey na sakey ya gunman ed Germany so sarili to, pinaltog toy anemiran totoo ed sakey ya hall ya pandadayewan na Saray Tasi nen Jehova diad Hamburg.”—Marso 10, 2023, Reuters.

Mangiiter na ligliwa so Biblia ed saramay naaapektoan na singa onia ran graben trahedya. Pian naamtaan so sakey ya tuan agawa, bantayan so video ya DeJanerio Brown: Asaki-sakitan Balet Aga Naandian na Ilalo.

Makatulong met so Biblia pian natalosan tayo no akin ya nagagawa irayan graben trahedya. Parad kaaruman ya detalye ed sayan topic, bantayan so video ya Akin et Aabuloyan na Dios so Paniirap?

Legan na Hulyo 2022, wala ray makapabiglan panagpaltog ya agawa diad interon mundo:

“Abiglan maong so bansa tan ataktakot so interon mundo lapud impamaltog ed kabkabat ya politiko ed Japan [si datin Prime Minister Shinzo Abe], lalo la ta dagdaiset so nagagawan krimen ed satan ya bansa tan istrikto iray ley da ed panag-usar na paltog.”—Hulyo 10, 2022, The Japan Times.
“Abiglan maong iray totoo ed Denmark ed impamaltog na sakey a laki ed taloran totoo ed shopping mall diad Copenhagen.”—Hulyo 4, 2022, Reuters.
“South Africa: 15 so inatey ed impamaltog na saray lalaki diad sakey ya bar ed Soweto township.”—Hulyo 10, 2022, The Guardian.
“Masulok ya 220 so apaltog tan inatey diad U.S. legan na weekend na July 4 ya holiday.”—Hulyo 5, 2022, CBS News.

Wala ni kasi pag-asa ya naandi irayan maruksan nagagawa? Antoy ibabaga na Biblia?

Naandi Lay Inkaruksa

Ibabaga na Biblia ya manbibilay tayo la ed “kaunoran iran agew,” ya saray totoo et masesebeg, brutal, tan anggapoy panangasi ra. (2 Timoteo 3:1, 3) Lapud saratan ya inkaruksa, natatakot laingen iray totoo. (Lucas 21:11) Balet impromisa na Biblia ya onsabi panaon et naandi so inkaruksa tan ‘manayam iray totoo diad mareen a pasen, diad saray maligen ya ayaman tan mareen a pasen a painawaan.’ (Isaias 32:18) Panon ya naandi so inkaruksa?

Ekalen na Dios iray mauges tan deralen toy amin ya armas.

“Balet saray mauges et naandi diad dalin, tan saray agmatoor et naekal ditan.”—Proverbio 2:22.
“Papatundaen [na Dios iray] guerra diad interon dalin. Puputeren to ray pana tan dederalen to ray gayang; popoolan to ray kariton a parad guerra.”—Salmo 46:9.

Bangatan na Dios iray totoo ya manbilay a mareen pian naekal so amin ya panlalapuan na maruksa iran kagagawa.

“Anggapo lay gawaen dan makapasakit odino makaderal ed interon masanton palandey ko, lapud say dalin et napano na kakabatan ed si Jehova a singa saray danum a mamapano ed dayat.”—Isaias 11:9.
Natan ni labat et babangatan la na Dios iray totoo ed interon mundo ya arawian day inkaruksa tan panag-usar na saray armas, ya “pitpiten da ray espada ra pian gawaen a tarem na lukoy tan saray gayang da et gawaen dan palot.”—Miqueas 4:3.

Pian naaruman ni antam ed ipro-promisa na Biblia ya mundon anggapo lay takot, basaen so artikulon “Wala Nang Takot—Posible Kaya Ito?”

Pian naaruman ni antam ed permanentin solusyon ed inkaruksa, basaen so artikulon “Kapayapaan sa Lupa sa Wakas!”