Anton Petrus/Moment via Getty Images
MANTULTULOY A MANBANTAY!
Kasin Asingger Lan Man-guerra so Interon Mundo?—Antoy Ibabaga na Biblia?
Legan na 30 taon ya linmabas, pakalikna na dakel ya totoo et balibali relasyon na nanduruman bansa tan mas ondarakep ni ingen. Balet base ed saray agano nin agawa, singa alingo ra ed iisipen da.
“Aburido iray totoo ya ompan apektaen na guerra ed Gaza so arum ni ran bansa ta ginmapo lan manlaban so Israel tan Hezbollah diad ketegan na Lebanon.”—Reuters, Enero 6, 2024.
“Onaataki ed nanduruman pasen iray grupon kontrolado na Iran tan ginmapo lamet ya manggawa na saray nuclear weapon so Iran. Problema iya natan na saray bansan walad West, lalo la ta kaalyado la na Iran so Russia tan China.”—The New York Times, Enero 7, 2024.
“Tuloytuloy nin napapairap ya maong so Ukraine tan dakdakel lay aderal lapud iyaataki na Russia.”—UN News, Enero 11, 2024.
“Onaasenso so ekonomya na China tan ombibiskeg so pakayari to ed militar, mas onaatagey so pakanengneng na Taiwan ed bansa to, tan naiirita so Beijing tan Washington ed sakey tan sakey. Ompan biglan onggapoy gulo lapud saratan ya situasyon.”—The Japan Times, Enero 9, 2024.
Wala kasi ibabaga na Biblia nipaakar ed magulon kipapasen na mundo natan? Man-guerra kasi so interon mundo lapud satan?
Impasakbay la na Biblia iray nagagawa natan
Ag-impasakbay na Biblia iray espisipikon guerra ya nanenengneng tayo natan. Balet impasakbay to iray agnakontrol ya guerra ya mabetbet lan nagagawa ed panaon tayo tan mangeekal na “kareenan ed dalin.”—Apocalipsis 6:4.
Imbaga na libro na Daniel ya “diad panaon na anggaan” et “mantulakan” odino manlaban iray pakayari ed mundo no siopay magmaliw ya mas atagey ed sikara. Kaibad satan ya panlalaban da so pangipapasirayew da ed saray mabiskeg ya armas da ed militar tan say panguusar da na dakdakel ya “kayamanan” odino kuarta parad saratan.—Daniel 11:40, 42, 43.
Walay nagawan guerra
Ipapanengneng na Biblia ya onggrabe ni situasyon na mundo antis ya ondakep. Impasakbay nen Jesus ya “wala naani so baleg a kairapan ya agni agawa manlapud inggapo na mundo.” (Mateo 24:21) Satan ya “baleg a kairapan” et manampot ed sakey a guerra ya tatawagen ya Armagedon, ya adeskribe bilang “guerra a nagawa ed baleg ya agew na Dios a Makapanyarin-amin.”—Apocalipsis 16:14, 16.
Balet agderalen na Armagedon so katooan, noagta isalba to ra. Diad satan ya guerra, panampoten la na Dios so uley na too ya sengegan na dakdakel ya makaderal ya guerra. Pian naamtaan yo no panon ya manresulta ed tuloytuloy ya kareenan so Armagedon, basaen irayan artikulo: