Nalabanan Moy Ermen no Tulongan Moy Arum​—No Antoy Ibabaga na Biblia

Dakel ya totoo ed interon mundo so naeermenan tan singa naiirapan iran mikaaro ed arum. Ibabaga na arum ya doktor ya say itulong ed arum so sakey ed saray paraan pian nalabanan itan ya liknaan.

• “No tulongan tayoy arum, nawalaan na direksion so bilay tayo tan ontulong itan pian nalabanan tayoy ermen tan samay liknaan ya singa bukbukor tayo.”—U.S. National Institutes of Health.

Wala ray praktikal ya bilin na Biblia no anto ray gawaen tayo pian natulongan tayoy arum. No gawaen tayoy ibabaga na Biblia, makatulong itan ed sikatayo pian nalabanan tayoy ermen.

No antoy nagawaan mo

Mabulos ya mangiter. Manggawa kay paraan pian naikdan moy panaon so piulop ed arum, tan mas maong no diad personal. Mabulos mon iyapag ed arum no antoy walad sika. No gawaen mo itan, seguradon misatsalamat ira tan ontulong itan pian magmaliw kayon sankaaro.

• Prinsipyo na Biblia: “Iyugali yo so mangiter, pian saray totoo et mangiter ed sikayo.”—Lucas 6:38.

Usar moy biskeg mo pian tulongan so arum. Mananap kay paraan no panon mon tulongan iramay ondadalan ed mairap ya situasyon. Kaiba lad satan so mapangasin idengel ed sikara odino panggawa ed saray kimey da pian nalemewan ira.

• Prinsipyo na Biblia: “Say tuan kaaro et . . . nailaloan diad panaon na gonigon.”—Proverbio 17:17.

Parad kaaruman ya impormasyon no panon mon napansiansia so maong ya relasyon mo ed arum, basaen so artikulon “Relasyon ed Pamilya tan Kakaaro.”