Kawigi: Yasser Qudaih/Anadolu via Getty Images; kawanan: RONALDO SCHEMIDT/AFP via Getty Images
MANTULTULOY A MANBANTAY!
Kapigan Ontunda so Panlalaban?—Antoy Ibabaga na Biblia?
“Panaon la pian onkalma tan agla palooren so situasyon. Panaon la pian pigilan so sarili,” so imbaga na United Nations Secretary-General ya si António Guterres nipaakar ed inyataki na Iran ed Israel nen Sabado, Abril 13, 2024.
Say panlalaban ed Middle East et sakey labat ed saray dakdakel ya nagagawan maruksan panlalaban ed nanduruman parte na mundo.
“Manlapu la nen World War II, natan so sankarakelan ya nagagawan panlalaban ed interon mundo tan 2 bilyon ya totoo so apektado—kakapat itan na interon populasyon na mundo.”—United Nations Security Council, Enero 26, 2023.
Saray lugar ya wala ray panlalaban et say Israel, Gaza, Syria, Azerbaijan, Ukraine, Sudan, Ethiopia, Niger, Myanmar, tan Haiti.a
Kapigan ontunda so panlalaban? Sarag kasin iter na saray lider ed mundo so kareenan? Antoy ibabaga na Biblia?
Say mundo ya napnoy guerra
Ipapanengneng na saray panlalaban ed interon mundo natan ya magano lan manampot so amin ya guerra. Sarayan guerra so kasumpalan na propesiya na Biblia nipaakar ed panaon ya pambibilayan tayo natan. Tinawag itan na Biblia ya “say kaunoran a parte na sistema na mundo.”—Mateo 24:3.
“Makarengel kayo na saray guerra tan balita nipaakar ed saray guerra. . . . Manlalaban iray bansa ontan met ed saray panarian.”—Mateo 24:6, 7.
Basaen so artikulon “Anto so Tanda na “Kaunoran Iran Agew,” odino “Panaon na Anggaan”?” pian naamtaan yo no panon ya nasusumpal so propesiya na Biblia lapud saray guerra ya nagagawa natan.
Say guerra ya panampoten toy amin ya guerra
Ibabaga na Biblia ya manampot iray panlalaban na totoo. Panon itan ya nagawa? Aliwan saray totoo so manggawad satan noagta say Armagedon, say “guerra a nagawa ed baleg ya agew na Dios a Makapanyarin-amin.” (Apocalipsis 16:14, 16) Kayari na satan ya guerra, tooren na Dios so imbaga to ya manbilay ed kareenan iray totoo diad andi-anggaan.—Salmo 37:10, 11, 29.
Pian naaruman ni amta yo nipaakar ed guerra ya usaren na Dios pian panampoten so amin ya guerra, basaen so artikulon “Anto so Guerra ya Armagedon?”
a Base ed ACLED Conflict Index, “Pinantutumbokan iray bansa ed interon mundo ya sankagrabian so nagagawan panlalaban,” Enero 2024