Akin et Daiset La ray Totoon Desente Natan?—Antoy Ibabaga na Biblia?

Ondadaiset la ray totoon desente natan. Eeyag-eyagan na saray pasyente iray doktor; anggapoy respeto na saray kustomer ed saray empleyado na restawran; wala ray magulon pasahero na eroplano ya bubuntalan da ray flight attendant; wala ray estudyanten makalasian ya tataktakoten, babalawen, tan sasakitan da ray maestro o maestra da; tan wala ray politiko ya kaiba ed saray makapabaing ya kagagawa, say arum balet ya politiko et masyadoy pangipapasirayew da ed saray maong ya nagagawaan da.

Say Biblia et napantiwalaan ya giya pian naamtaan tayo no anto so tuan inkadesente. Ipapaliwawa met na satan no akin ya dakel la natan so totoon aliwan desente so kabibilay da.

Akin et daiset la ray totoon desente natan?

Sankanengneng ed interon mundo ya ondaraiset la ray totoon desente so kabibilay da​—saramay totoon maomaong, malinis ed moral, tan labalabay na arum so kakikiwas da.

• Base ed napantiwalaan ya survey ya agano nin ginawa, ibabaga na saray Amerikano ya inmabeba natan so moralidad na saray totoo ed United States no ikompara ed linmabas ya 22 a taon.

• Diad sakey nin impan-survey ed masulok ya 32,000 ya totoo ed 28 ya bansa, 65 porsiento ed sikara so angibaga ya sankaraisetan la natan so totoon desente so kabibilay da.

Impasakbay la na Biblia iray ugali na totoo ya nanenengneng tayo natan.

• “Diad kaunoran iran agew et onsabi iray mapeligro tan mair-irap a panaon. Ta saray totoo et magmaliw a maaro ed sarili ra, maaro ed kuarta, mapasirayew, mapaatagey, managmudmora, agmatulok ed atateng da, agda amtay misalamat, . . . anggapoy kontrol da ed sarili ra, [tan] masesebeg ira.”​—2 Timoteo 3:1-3.

Parad kaaruman ya impormasyon no panon tayon nibaga ya nagagawa la natan itan ya propesiya, basaen so artikulon “Inihula Ba ng Bibliya na Magiging Ganito ang Ugali ng mga Tao sa Ngayon?”

Say napantiwalaan ya giya no panon so manbilay ya desente

Diad sayan mundon ondaraiset la ray totoon desente, adiskobre na minilyon ya totoo ya say Biblia et balibalin giya no panon so manbilay ya desente. Saray bilin na satan nipaakar ed moral et ‘naynay a napandependian, natan tan diad andi-anggaan.’ (Salmo 111:8) Nia ray pigaran alimbawa:

• No antoy ibabaga na Biblia: “Amin a labay yon gawaen na totoo ed sikayo, ontan met so nepeg yon gawaen ed sikara.”​—Mateo 7:12.

  Say labay ton ibaga: Nepeg ya maomaong tan marespeto tayon tratoen so arum ya singa labay tayon pantrato da ed sikatayo.

• No antoy ibabaga na Biblia: “Natan ta nilakseb yo lay katilaan, kada sakey ed sikayo so mansalita na katuaan ed kapara ton too.”—Efeso 4:25.

  Say labay ton ibaga: Nepeg ya matua tayo ed amin ya ibabaga tan gagawaen tayo.

Parad kaaruman ya impormasyon ed satan ya topic, basaen so:

• Say Panag-bantayan ya “Duga tan Aliwa—Say Napantiwalaan Mon Giya.”

• Say artikulo ya “Kasin Makatulong so Biblia Pian Magmaliw Tayon Makonsidera?”