Saray Maruksan Nagagawa Lapud Politika—Antoy Ibabaga na Biblia?

Diad interon mundo dakel so maruksan nagagawa lapud politika.

• Diad Mexico, abiglan maong iray totoo lapud 39 ya kandidato ed politika so pinatey legan na 2023-2024 ya eleksion, tan dakel ni arum ya maruksan nagagawa lapud politika.

• Diad Europe, dakdakel so maruksan nagagawa ed politika kaiba lad satan so impamaltog ed prime minister na Slovakia nen Mayo 15, 2024.

• Diad United States, ataktakot iray totoo nen wala lamet so nansalin mamaltog ed datin presidente ya si Donald Trump nen Setyembre 15, 2024.

Akin et dakdakel so maruksan nagagawa ed politika? Naandi ni kasi iratan? Antoy ibabaga na Biblia?

Impasakbay la ya naapag-apag iray totoo lapud politika

Impasakbay la na Biblia ya diad “kaunoran iran agew,” ya ontutukoy ed panaon tayo, say ugali na dakel ya totoo et panlapuan na inkaruksa tan pankokontraan.

• “Balet amtaen mo iya, a diad kaunoran iran agew et onsabi iray mapeligro tan mair-irap a panaon. Ta saray totoo et . . . agda amtay misalamat, aliwa ran matoor, . . . agda labay so mipaknaan, . . . masesebeg ira, . . . traidor ira, anawet so ulo ra, makinon ira.”​—2 Timoteo 3:1-4.

Impropesiya na Biblia ya nagawa ed panaon tayo iray gulo ya singa saray panrerebelde na totoo ed gobierno tan saray gulo ed politika. (Lucas 21:9, paimanod leksab) Pero agmantultuloy iray maruksan nagagawa ed politika tan inkaapag-apag na totoo.

Naandi la iray maruksan nagagawa ed politika

Ipapaliwawa na Biblia ya salatan na Dios so amin ya gobierno na too tan say isalat to et say mismon gobierno to ya walad tawen.

• “Diad saray agew na saratan ya arari, say Dios na tawen et mangiletneg na panarian ya . . . buyaken tan panganggaen to irayan amin a panarian, tan saya labat so mansiansia ed andi-anggaan.”—Daniel 2:44.

Pankasakeyen na Panarian na Dios so amin ya totoo tan gawaen ton mareen so interon mundo.

• Say Manuley et si Jesu-Kristo, ya tinawag ya “Prinsipe na Kareenan,” kanian seguroen to ya “say kareenan et agmangangga.”—Isaias 9:6, 7.

• Natan ni labat et aaralen la na saray sakop na Panarian no panon so manbilay ya mareen. Kanian ibabaga na Biblia ya: “Pitpiten da ray espada ra pian gawaen a tarem na lukoy tan saray gayang da et gawaen dan palot. Anggapo lay nasyon a mangitagey na espada sumpad sananey a nasyon, agmet la ra manaral a miguerra.”—Isaias 2:3, 4.

Pian dakel ni naaralan mo, basaen so artikulon “Ano ang Gagawin ng Kaharian ng Diyos?” tan bantayan so video ya Anto so Panarian na Dios?