Siopay Napantiwalaan Mo?—Antoy Ibabaga na Biblia?

Nadidismaya iray totoo no nanenengneng dan agmanaya napantiwalaan iray totoon pantitiwalaan da. Dakel so nakalan lay tiwala ed . . .

• saray politiko ya iyuuna day sarili da nen say pankaukolan na totoo.

• saray managbalita ya aliwan patas tan aliwan susto so ibabalita da.

• saray sientista ya agda ikokonsidera so pankaabigan na totoo.

• saray lider na relihyon ya imbes ya irepresenta day Dios et mas aktibo iran onsusuporta ed politika.

Duga labat ya manalwar iray totoo ed no siopay pantiwalaan da, ta oniay ibabaga na Biblia:

• “Ag ka manmamatalek ed saray totoon pangulo; anggapoy toon makapangilaban ed sika.”—Salmo 146:3, Maung a Balita.

Say napantiwalaan mo

 Ipapaamta na Biblia no siopay napantiwalaan mo: si Jesu-Kristo. Aliwa labat ya basta maong ya too si Jesus ya nambilay nilasus taon lay apalabas. Noagta tinuro na Dios si Jesus ya “manuley ya andi-anggaan bilang Ari . . . , tan agmangangga so Panarian to.” (Lucas 1:32, 33) Si Jesus so Ari na Panarian na Dios, say gobierno ya manuuley la natan ed tawen.—Mateo 6:10.

• Pian naamtaan mo no akin ya napantiwalaan moy Jesus, basaen iray artikulo ya “Siopa so Ari ed Panarian na Dios?” tan “Antoy Gawaen na Panarian na Dios?”