Akin et Aglabay na Atateng Ko ya Man-enjoy Ak?

Inimbitaan ka na kakaarom ed party no weekend. Tinepetan mo ray atateng mo no sarag moy onla pero say ebat da, “Andi.” Agka la abigla ta ontan met lay inyebat da nen imbeneg ya nampatanir ka.

Diad sayan artikulo

• Akin et lanang ak lan agpapayagan na atateng ko?

• Panon kon napapayag iray atateng ko?

• No antoy ibabaga na arum ya kabataan

Akin et lanang ak lan agpapayagan na atateng ko?

No singa lanang lan agka papayagan na atateng mo kada no manpatanir ka, ompan isipen mo ya agda ka labat labay ya man-enjoy.

Oniay imbaga na tinedyer ya si Marie nen awalaan na cell phone: “Amayamay so patakaran nen papak ed no anto ran app so sarag kon i-download, no siopa ray sarag kon i-chat o tawagan, tan no anggad anton oras ko ra nayarin katongtongen. Saray kakaarok balet sarag dan gawaen no antoy labay da!”

Isipen pa: Talaga kasin aglabay na papa nen Marie ya man-enjoy si Marie? Anto ni ra kasi rason na papa to no akin ya agpinmayag?

Salien iya: Kunwari sika so ateng tan walay tinedyer ya anak mo ya first time toy nawalaan na cell phone. Anto ray posiblin pampagaan mo? Anto ran patakaran so ibagam pian naprotektaan moy anak mo? Antoy ibagam no ibaga na anak mo ya agmo kuno labay ya man-enjoy?

“Lanang ya ibabaga nen daddy ed siak ya, ‘Sika pay ompasen ya ateng.’ Tinmulong itan pian natalosan ko no akin ya importante iray patakaran ya imbaga da tan no akin ya kaukolan iratan. No bilang ta wala ray anak ko, labay kon unoren da met iray patakaran ya labay nen daddy’k ya unoren ko.”—Tanya.

Panon kon napapayag iray atateng ko?

Agmo gagawaen iya: Ombarong, manreklamo, odino miebatan.

“Anggapoy nagawaan na iyeyag odino iyurangal mo​—nakesawan ka labat pati saray atateng mo. No miebatan ka ed saray atateng mo, isipen da ya talagan ugaw ka ni tan agka ni nayarin payagan ed saray labay mo.”​—Richard.

“Walan walay maabig ya rason ed amin ya patakaran. Aliwan say aglabay na atateng ko ya man-enjoy ak, noagta labay da ya no man-enjoy ak, amay anggapoy kaiba ton problema.”​—Ivy.

Prinsipyo na Biblia: “Say makulangkulang et ibebesngaw toy amin a nalilikna to, balet samay marunong et kalmadon mangokontrol ed satan.”​—Proverbio 29:11.

Agmo gagawaen iya: Pasekretom ya ag-uunoren iray atateng mo.

“Agko ipapahalata ya agko uunoren iray patakaran nen papak nipaakar ed pangusar koy cell phone. Manggagawa ak na paraan pian ni-message ko ray kakaarok anggano lablabi la odino i-download ko ray app ya aglabay nen papak. Pero naamtaan da lanlamang kanian mas inistriktoan da ak ta anengneng dan agda ak napantiwalaan. Seguradon ompalpak ka no agmo unoren iray patakaran.”​—Marie.

“Anosan mo labat. Ompan agtampol umanen na atateng mo iray patakaran ya imbaga da, pero no nanengneng da ya uunoren mo iratan, ompan mas payagan da ka la ed onsublay.”​—Melinda.

Prinsipyo na Biblia: “Magmaliw kayon maunor ed atateng yo diad amin a bengatla.”​—Colosas 3:20.

Agmo gagawaen iya: Piliten iray atateng mo ya payagan da ka tan ibagam ya pinayagan met na atateng da iray arum ya kaedaran mo.

“No ipilit mo lan ipilit so labay mo, diad tua ag-itan makatulong pian naalam so labay mo.”​—Natalie.

“Labay ya nanengneng na sakey ya ateng ya antam so mandesisyon na duga. Kanian no mitotongtong ak ed saray atateng ko, malinew kon ipapaliwawa iray rason ko tan agko ipapakana so emosyon ko. No ontan so gagawaen ko, mas papayagan da ak ed ipapatanir ko.”​—Joseph.

Prinsipyo na Biblia: “Igalang moy amam tan inam.”​—Efeso 6:2.