Akin et Ompapatey so Totoo?

Say ebat na Biblia

Natural labat ya isipen no akin ya ompapatey so totoo, lalo la no sikatayo so inateyan na inaro ed bilay. Ibabaga na Biblia: “Say maditan ketket a pansesengegan na ipapatey et say kasalanan.”​—1 Corinto 15:56.

Akin ya mankakasalanan tan ompapatey so amin ya totoo?

Say inmunan totoo, si Adan tan Eva, et inatey lapud nankasalanan irad Dios. (Genesis 3:17-19) Say patey labat so posiblin pansumpalan na panrebelde da ed Dios, lapud sikato so “subol na bilay.”​—Salmo 36:9; Genesis 2:17.

Impatawir nen Adan ed amin ya ananak to so makapuy ya epekto na kasalanan. Ibabaga na Biblia: “Diad panamegley na sakey a too et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo lapud nankasalanan iran amin.” (Roma 5:12) Amin ya totoo et ompapatey lapud amin da et mankakasalanan.​—Roma 3:23.

No panon ya naandi so ipapatey

Impromisa na Dios ya onsabi panaon et “akmonen to so patey ya anggad angga.” (Isaias 25:8) Pian naandi so ipapatey, kaukolan ton ekalen so manunan sengegan na satan, say kasalanan. Gawaen iya na Dios panamegley nen Jesu-Kristo, a “mangekal ed kasalanan na mundo.”​—Juan 1:29; 1 Juan 1:7.