Pangipatalos ed Programa na 2020 ‘Manliket Kan Naynay’! ya Regional a Kombension

No Hulyo tan Agosto 2020, diad sankaunaan ya pankanawnawa, bantayan na saray Tasi nen Jehova ed interon mundo so programa na regional a kombension diad parehon petsa. Pian nagawaan iya, kaukolan ya ipatalos so programa ed masulok ya 500 a lenguahe. Maslak, say ontan ya proyekto et nasabi toy sakey taon odino onsulok ni pian niplano tan nasumpal. Balet lapud sayay coronavirus pandemic, saray managpatalos na 2020 ‘Manliket Kan Naynay’! ya Regional a Kombension et kaukolan dan sumpalen iyan proyekto diad loob labat na ag-onkulang ed apatiran bulan.

Tinmulong so Translation Services tan Global Purchasing diad World Headquarters na Saray Tasi nen Jehova ed sayan balbaleg ya proyekto. Imbaga na Translation Services ya kaukolan na saray translation team so kaaruman iran equipment pian nasumpal da iyan proyekto, lalo la ray high-quality ya microphone. Kanian say Global Purchasing et angaliw na 1,000 ya microphone tan impawit da iratan ed ngalngali 200 ya lokasyon.

Pian makatipid tayo, bultoan ya angaliw tayo na saray microphone, impawit iratan ed sentro ya lokasyon, tan in-repack pian ni-deliver ed nanduruman lugar diad interon mundo. Lapud bultoan so impangaliw tayo ed saray microphone, ya say sakey et manbili na $170 U.S., kaiba lay shipping fee​—akatipid tayo na masulok ya 20 porsiento nen say no saliwen iratan ya sansakey.

Kaukolan ya nasaliw tan nipawit iratan na Global Purchasing legay bulan na Abril tan Mayo 2020​—atan may panaon ya dakel so nansaran negosyo lapud pandemic. Anggaman ontan, diad sampot na bulan na Mayo, maslak ed saray remote translation office, branch office, tan arum nin lokasyon parad panagpatalos et awalaan la na saratan ya equipment.

“Nanengneng so maabig ya kooperasyon na saray department ed Bethel tan saray negosyo diad sayan proyekto,” so imbaga nen Jay Swinney, ya mangidadaulo ed Global Purchasing. “Lapud tulong na masanton espiritu nen Jehova, agawaan tayo irayan tampol tan diad paraan ya akatipid so organisasyon.”

Oniay imbaga nen Nicholas Ahladis, ya walad Translation Services: “Talagan malikeliket iray translator ya agmakaalis lapud lockdown nen naawat da irayan equipment. Anggano nibiig irad arum ya kaiba da ed translation team, nituloy da so kimey da ed pangipatalos tan pangirekord na saray paliwawa, drama, tan kansion ed masulok ya 500 a lenguahe.”

Sayan proyekto et sakey labat ed dakel nin ginawa pian napawala so 2020 ‘Manliket Kan Naynay’! ya Regional a Kombension parad agagi diad interon mundo. Lapud maliket yon pandodonasyon panamegley na donate.jw.org tan diad arum nin paraan, akasaliw tayo na sarayan kaukolan ya bengatla.