Saray Kansion ya Makakatulong Pian Onapit Tayod Dios

Say musika et balibalin regalo ya nanlapud si Jehova. Walay epekto na satan ed nonot tan mood tayo, tan mangiiter itan na inspirasyon ed sikatayo. Ontan so epekto na saray orihinal a kansion tayo. Diad tua, mas ni so nagawaan na sarayan kansion: makatulong iraya pian onapit tayod si Jehova.

Manlapu la nen 2014, masulok lan 70 ya orihinal a kansion so agawaan, tan sakey ed saratan ya kansion et available natan ed masulok ya 500 a lenguahe. Pero ompan iisipen mo, ‘Siopay manggagawa ed sarayan kansion, tan panon da irayan gagawaen?’

No Panon ya Gagawaen Iray Kansion

Saray orihinal a kansion et gagawaen na music team diad Audio/Video Services ya idadaulo na Teaching Committee na Mananguley ya Ulop. Walay 13 ya agagi ed satan ya music team ya mantutulongan ed pan-compose, panggawa tan pan-edit na musika, pan-eskedyul, tan arum ni. Ontan met, wala ray inaprobaan na Teaching Committee ya remote volunteer ed nanduruman bansa ya ontulong ed sayan kimey, kaiba la ray composer, musician, tan singer. Mapaabeban uusaren na sarayan agagi so talento da tan agda labay ya sikaray narayew.

Panon ya gagawaen so sakey ya orihinal a kansion? Unona, manpipili so Teaching Committee na teksto ya pangibasiyan ed kansion tan mandedesisyon ira no antoy labay dan nalikna na saray ondengel ed satan. Insan iyasain na music team so pan-compose na musika tan panggaway lyrics. Mangirekord ira na sample na kansion. Dengelen itan na Teaching Committee insan ira mangiter na kaaruman iran suhestion. I-adjust na music team so kansion insan ira mangirekord na final version na satan. Irerekord irayan kansion ed nanduruman pasen, nayarin diad branch odino diad abung na saray agagin walay equipment da ed panagrekord.

No manko-compose tan manrerekord na saray orihinal a kansion iray agagi tayo, manguusar ira na saray digital audio workstation, music notation program, audio library, tan arum nin computer program. Kaukolan met iray musical instrument, mixing console, amplifier, speaker, tan microphone. Say presyo na kada microphone et onabot ed $100 ya anggad $1,000 (U.S.). Nen 2020, akagastos tayo na $116,000 (U.S.) ed saray equipment ed panrekord na musika.

Anto ray gagawaen pian nausar ed sankaabigan iray donasyon na agagi? Imbes ya manbuo na baleg ya music team diad Bethel, nauusar iray dakel ya remote volunteer. Ontan met imbes ya mantawag na dakel ya musician pian makabuo na orchestra ya manggawa tan manrekord na musika, kaslakan et manguusar iray agagi na computer program ya mamapawala na tanol na nanduruman instrumento.

“Napapabiskeg so Pananisiak”

Labalabay na agagi ya dengelen iray orihinal ya kansion. Oniay imbaga nen Tara ya tagad Germany: “No nanaaburido ak, makakatulong iratan ya kansion pian narelaks ak. Singa ak lalakapen nen Jehova no narerengel ko iratan diad mismon lenguahek.” Oniay imbaga nen Dmitry, sakey ya brother diad Kazakhstan: “Labalabay ko iratan ya kansion ta agko la kaukolan ya isipen no kasin kontra iratan ed saray prinsipyo na Biblia odino andi. Sakey ni, makakatulong iratan ya kansion pian makapampokus ak ed saray espiritual a bengatla.”

Oniay imbaga nen Delia ya tagad South Africa nipaakar ed saray orihinal a kansion: “Napapabiskeg so pananisiak ed saratan. No naeermenan ak odino no walay problemak, walan walay kansion ya ombagay ed situasyon ko. Kaslakan, tono ni labat na kansion, nauman lay liknaan ko!”

Wala ray orihinal a kansion ya paborito na agagi. Oniay imbaga nen Lerato ya taga met ed South Africa: “No narengel ko la ra may kansion ya ‘Asingsingger La’ tan ‘Diad Balon Mundo,’ naiimadyin ko la may panaon ya abeten koy nanay ko. Kada no narengel ko la iratan ya kansion, singak nanenengneng ya nitan lan onlakap ed siak.”

Walay sakey ya orihinal a kansion ya talagan akatulong ed sakey ya tinedyer ed Sri Lanka. Kuan to: “Nampasnokan ak na teacher kod science ed arap na interon klase lapu labat ta Tasi nen Jehova ak. Ataktakot ak, tan agko amtay ibagak. Kasempet kod abung, pinaseseg ak nen nanay ko ya dengelen ko may kansion ya ‘Study Makes You Strong.’ Akatulong ed siak iman ya kansion pian na-realize ko ya kaukolan koy man-research tan mangiparaan na ebat. Diad tinmumbok ya agew, akitongtong ak ed samay teacher ko. Dinengel to ak tan imbaga ton natan et mas natatalosan to la ray papanisiaan na saray Tasi nen Jehova. Misatsalamat ak ed organisasyon nen Jehova diad panggagawa ra na makapaseseg iran kansion.”

Iner so pangaalaan na pundo pian napawala irayan kansion? Manlalapu iratan ed saray donasyon parad sankamundoan a kimey ya dakel ed saratan et iiter panamegley na saray paraan ya abitlad donate.jw.org. Salamat ed saray mabulos ya kontribusyon yo.