Saray Balitan Napantiwalaan tan Makapabiskeg na Pananisia

Inar-aro na saray Tasi nen Jehova iray kaagian da. (1 Pedro 2:17) Miparay liknaan na dakel ed sikatayo ed si Tannis, sakey ya sister ed Kenya. Kuan to: “Labalabay kon naamtaan no antoy nagagawad saray pinabpablin agagik diad nanduruman pasen na mundo.” Panon ya mansiasiansian updated si Tannis tan saray minilyon nin Tasi? Manlapu la nen 2013, naaamtaan tayo no anto ray nagagawa ed saray agagi tayo panamegley na Newsroom ya seksion diad website tayon jw.org.

Diad Newsroom, wala ray napantiwalaan ya report nipaakar ed saray Tasi nen Jehova diad saray topic ya singa saray impangi-release na Biblia, disaster relief work, saray construction project, tan arum nin importantin nagagawa. Naamtaan tayo ditan so nipaakar ed saray agagi tayon napripriso lapud pananisia ra. Wala ra met so nabasa tayod Newsroom ya makapaseseg iran eksperiensya na saray preaching campaign tan impanselebra na Memoryal. Siopay manri-research pian nagawaan iray artikulo ya ibalita, tan panon da irayan ipaparaan?

Pampili tan Pangibalita ed Saray Istorya

Say Newsroom et aasikasoen na Office of Public Information (OPI). Sayan department et walad world headquarters tan idadaulo na Coordinators’ Committee na Mananguley ya Ulop. Masulok ya 100 ya agagi so mankikimey ed OPI—dakel ed sikara et remote volunteer—kaiba la ray writer, researcher, visual artist, tan translator. Say arum so mitotongtong ed saray opisyal na gobierno, saray propesor tan managbangat, tan diad media. Say OPI et tutulongan na 80 ya Public Information Desk (PID) diad saray branch ed nanduruman pasen na mundo.

Pian niparaan so sakey a balita, mikikimeyan so OPI ed saray PID. No akapili la ray agagi na istoryan marakep ya ibalita, man-research ira nipaakar ed satan tan mantipon iray napantiwalaan ya impormasyon. Kaiba ed saya so panginterbyu tan pitongtong ed saray eksperto. Kayari dan natipon iray impormasyon, isulat day artikulo, i-edit, i-proofread, kargaan na saray litrato, insan da ipawit ed Coordinators’ Committee pian naaprobaan.

Saray Pisasalamat na Agagi

Antoy nibaga na saray agagi tayo nipaakar ed Newsroom? Oniay imbaga nen Cheryl, sakey ya sister diad Pilipinas: “Labalabay kon igapoy agew ko diad pambasa na saray balita nipaakar ed organisasyon nen Jehova tan saray totoo to.”

Ibabaga na dakel ya manbabasa iray pidumaan na saray balitan nababasa da diad Newsroom na jw.org tan saray balita diad media. Oniay inkuan nen Tatiana ya tagad Kazakhstan: “Maong labat ta napantiwalaan ko ray balita diad jw.org. Napanmatalkan tan tua iray impormasyon ditan.” Oniay imbaga nen Alma, sakey ya sister diad Mexico: “Aliwan singa saray aliwliwan balita ya narerengel tayod media, makapaseseg iray balita diad Newsroom.”

Balet aglabat napantiwalaan iray balita diad Newsroom, makapabiskeg met na pananisia iratan. Oniay imbaga nen Bernard ya tagad Kenya: “Akatulong ed siak so Newsroom pian ipasen kon pamilya iray agagi diad interon mundo, iner man so kawalaan da. Sarag kon bitlaen iray ngaran da tan saray espisipikon situasyon da diad saray pikakasik.” Oniay imbaga nen Bybron, sakey ya sister ya tagad Kenya met: “Lanang ak ya eksayted no makakanengneng ak na artikulo nipaakar ed impangi-release na Biblia diad nanduruman lenguahe! Ipapanonot ed siak na sarayan artikulo ya anggapoy lalabien nen Jehova.”

Anggan saray balita nipaakar ed saray agagin napapasegsegang et walaan na positibon epekto. “No nononoten koy pakpel da, napapabiskeg ya maong so pananisiak,” so imbaga nen Jackline ya tagad Kenya. “Lanang kon tatalaranan no antoy makakatulong ed sikaran makapan-anos. Naaralan ko ya anggan saray simplin bengatla, singa say pikakasi, panagbasa na Biblia, tan anggan say pangansion et baleg so nagawaan to pian mansiansian mabiskeg iray agagi tayo.”

Tatalaranan nen Beatriz, sakey ya sister diad Costa Rica, iray balita nipaakar ed saray kalamidad. Kuan to: “Diad Newsroom, nanenengneng ko panon ya maples, epektibo, tan maaron itatarya na organisasyon tayo iray pankaukolan na saray agagi tayo. Lapud satan, nakokombinse ak ya aya so organisasyon nen Jehova.”

Talagan misalsalamat tayo ta makakaawat tayo ray sankabaloan ya balita nipaakar ed saray agagi tayo ed interon mundo! Ag-iya magmaliw ya posible no anggapo ray donasyon yo parad sankamundoan ya kimey, ya dakel ed saratan et iiter yo panamegley na donate.jw.org. Salamat ed saray mabulos ya kontribusyon yo.