Sakey a Nikadkaduman Uusaren ed Panangiyaral na Biblia

Nen Enero 2021 inyanunsio na Mananguley ya Ulop so pangi-release ed balon uusaren ed panangiyaral na Biblia, say Panliketan so Bilay ya Anggapoy Anggaan!a Antoy nibagam ed saman ya anunsio? Oniay imbaga nen Matthew ya tagad Canada: “Excited ak! Tan mas lalo ak ya na-excite nen abantayan ko ray paliwawa tan saray video ya mangipapaliwawa no akin ya ginawa iyan publikasyon tan saray resulta nen sinali dan usaren itan. Excited ak lan nanengneng tan usaren itan.”

Imbangat itayo na Panliketan so Bilay ya Anggapoy Anggaan! na balon paraan na panangiyaral na Biblia. Balet aliwan satan labat so pandumaan na balon libro tan saramay dati tayon uusaren ed panangiyaral. No manguusar ka na printed ya Panliketan so Bilay ya Anggapoy Anggaan! ompan nalikas mo met ya duma iya. Akin kasi? Nengnengen tayo no panon ya ginawa so libro.

Balon Libro ya Dumay Apis To

Mas makapal so papel to. Akin et importante iya? Say Panliketan so Bilay ya Anggapoy Anggaan! et walaan na masulok a 600 ya makolor iran litrato, ngalngali samploran beses a mas dakel nen saray litrato na libron Antoy Ibabangat. Mas dakel met so amputin parte na kada pahina ed balon libro—saray parte ya anggapoy akasulat odino litrato to. Lapud satan et walay problema: no maimpis so papel, mankaninag iray litrato ya walad beneg na papel. Pian naiwasan itan, sinali na saray agagi ed International Printing Department (IPD) diad Wallkill, New York, U.S.A. so apatiran klase na papel ya uusaren ti la natan ed saray printery tayo. Inaral a maong na Writing Committee na Mananguley ya Ulop so kada sample tan apili da so makapal a papel. Anggano mas mabli iyan papel na manga 16 porsiento kompara ed saray papel ya uusaren tayo ed maslak a publikasyon tayo, akatulong itan ed saray iyaaralan na Biblia pian ag-ira na-distract ed saray litrato ed beneg na papel sano babasaen da so Panliketan so Bilay ya Anggapoy Anggaan!

Dumay impan-laminate ed apis to. Nalikas mon duma so apis na balon libro no ikompara ed arum ya libro tayo ta duma so impan-laminate ed saya. Imbes ya samay datin masileng (gloss), say inusar ed balon libro et aliwan masileng (matte) kanian mas sankaimano so litrato ed apis. Lapud sayan laminate, naproprotektaan met so libro pian agtampol ya naderal anggano lanang ya uusaren. Balet mas mabli na limaran beses iyan klase na laminate komparad samay masileng ya laminate. Kanian nantutulongan so pigaran branch pian makasaliw na mas mamuran laminate ya aliwan masileng.

Akin et sarayan mablin materyales so apili? Impaliwawa na sakey a brother ya mantratrabaho ed IPD: “Iilaloan mi ya usaren a maong iyan libro, kanian labay mi ya mansiansia iyan presentable anggano naynay iyan usaren.” Oniay imbaga nen Eduardo ya mantratrabaho ed Printery Office diad Brazil Branch: “Malikeliket kami ta angusar so organisasyon nen Jehova na mabli iran materyales ta pian magmaliw ya marakdakep, matibay, tan balibalin bembenan iyan libro, balet siansia nin nauusar ed sankaabigan iray donasyon na agagi.”

Panag-imprinta Legan na COVID-19 Pandemic

Ginapoan ya iyimprinta so Panliketan so Bilay ya Anggapoy Anggaan! nen Marso 20, 2021. Legan iya na COVID-19 pandemic kanian wala ray subok. Lapud aka-lockdown so Bethel, anggapo ray Bethel commuter ya makatulong diad saray printery tayo, agmet ira makapangimbita na agagi ya magmaliw a balon Bethelite. Kanian say resulta, kinmulang so mankimey ed arum ya printery, say arum balet et temporaryon insara lapud saray restriksion na gobierno.

Panon ya asolusyonan irayan problema? Nen nayari lan usaren so printery, temporaryon inyasain ya ontulong ed pangimprinta iray agagi ya nanlapud nanduruman department na Bethel. “Lapud masakripisyo ira tan mabulos iran manaral na balon asainmin, baleg so nitulong da pian nasumpal iyan kimey,” so kuan nen Joel ya mantratrabaho ed IPD.

Anggano wala irayan subok, akapan-imprinta tayo la na minilyon ya kopya na Panliketan so Bilay ya Anggapoy Anggan! Pian nagawaan itan, kaukolan so nanduruman materyales kaiba la ray printing plate, laminate film, papel, tinta, tan adhesive. Diad loob labat na limaran bulan ya impangimprinta, masulok lan $2.3 milyon (U.S.) so agastos diad materyales ni labat. Pian makatipid, seseguroen tayo ya say iyimprinta tayo labat et no pigaran talagay kaukolan na saray kongregasyon.

“Balibali Iyan Libro”

Antoy nibaga na saray mangiyaaral na Biblia tan saray iyaaralan da nipaakar ed sayan balon uusaren ed panangiyaral na Biblia? Oniay inkuan nen Paul, sakey a brother ya tagad Australia: “Balibalin usaren iyay libron Panliketan so Bilay ya Anggapoy Anggaan! kanian excited ak kada no mangikokondukta ak na Bible study. Balibali layout na libro tan talagan interactive. Balibali impanlaok na saray malinew ya impormasyon, tepet ya onsasabid puso, video, litrato, tsart, tan saray goal ya nayarin salien na saray iyaaralan. Balibali iyan libro kanian napapaseseg ak ya paaligwasen ni so panagbangat ko.”

Oniay imbaga na sakey ya iyaaralan na Biblia ed United States: “Talagan alabayan ko iyan balon libro. Makakatulong ed siak iray artwork pian natalosan ko iray manunan punto. Makapa-touch iray video tan napapakiwas ak na saraya.” Mamidua ed sakey simba so panaaral to na Biblia tan regular met lan onaatendi ed saray aral na kongregasyon.

Minilyon ya kopya na Panliketan so Bilay ya Anggapoy Anggaan! so kaukolan nin iyimprinta ed dakel ya lenguahe. Diad katuaan to, inaprobaan na Mananguley ya Ulop ya i-publish iyan libro ed 710 ya lenguahe, mas dakel ni na 340 komparad inaprobaan ya lenguahe parad libron Antoy Ibabangat!

Iner so pangaalaan na pundo parad pangimprinta ed saraya? Manlalapu iratan ed saray donasyon parad sankamundoan a kimey ya dakel ed saratan et iiter panamegley na donate.jw.org. Salamat ed inkamabulos yon mangiter, lapud satan et apawala irayan uusaren ed panagbangat parad saramay labay day makaaral nipaakar ed si Jehova tan ‘panliketan so bilay ya anggapoy anggaan.’—Salmo 22:26.