Kaukolan tayo so tulong na masanton espiritu na Dios pian tuloytuloy tayon manbilay “bilang ananak na liwawa.” Talagan kaukolan tayo itan ta aliwan mainomay so mansiansian malinis ed sayan imoral ya mundo. (1 Tes. 4:​3-5, 7, 8) No walad sikatayo so masanton espiritu, mainomay tayon nibiig tan nalabanan iray pilosopiya tan opinyon na sayan mundo ya kontra ed panagnonot na Dios. Say masanton espiritu met so manpakilos ed sikatayo ya manggaway “kamaongan tan inkatunong.” (Efe. 5:9) Ipapaseguro na Biblia ya si Jehova et “mangiter na masanton espiritu ed saramay onkekerew ed sikato.” Kanian imbaga nen Jesus ya agtayo nababaingan ya ipikasi ed si Jehova ya ikdan to tayo na masanton espiritu. (Luc. 11:13) Makakaawat tayo met na masanton espiritu kada no idadayew tayo si Jehova ed saray aral tayo. (Efe. 5:​19, 20) No walad sikatayoy masanton espiritu na Dios, sankanonot tayo no antoy makapaliket ed sikato. w24.03 23-24 ¶13-15

Kasin kaukolan moy magmaliw ya mas maanos? No on, ipikasim itan ed si Jehova. Say anos et kaiba ed bunga na masanton espiritu na Dios. (Gal. 5:​22, 23) Kanian pian magmaliw tayon maanos, ipikasi tayod si Jehova ya ikdan to tayo na masanton espiritu to. No wala ray situasyon ya nasubok so inkaanos tayo, ‘itultuloy tayoy onkerew’ na masanton espiritu. (Luc. 11:13) Ipikasi tayo met ed si Jehova ya tulongan to tayo pian naalig tayoy inkaanos to. Tan siempre, man-effort tayo pian nipanengneng tayoy inkaanos kada agew. No mabetbet tayon ipikasi ed si Jehova ya tulongan to tayon mananos tan gawaen tayo met so betang tayo, mas mainomay tayo lan naipanengneng iyan ugali. Dalepdepen tayo met iray alimbawa ed Biblia. Dakel so nabasa tayod Biblia ya lingkor na Dios ya makapabilib so inkaanos da. No dalepdepen moy alimbawa ra, makaaral ka no panon mo met ya nipanengneng so inkaanos. w23.08 22 ¶10-11

Nen inmoli si Jesus, walay ginawa to pian ipaseguro ed si apostol Pedro ya sikatoy agbalot paulyanan nen Jehova. Nanmilagro lamet si Jesus pian makarel na dakel ya sira si Pedro tan saray kaiba ton apostol. (Juan 21:​4-6) Lapud sayan milagro, tinmatak ed isip nen Pedro ya main-inomay nen Jehova ya iter iray materyal ya pankaukolan to. Seguro anonotan to may imbaga nen Jesus ya taryaan nen Jehova iramay ‘iyuuna da so Panarian.’ (Mat. 6:33) Akatulong iratan ya panamaseguro pian tuloytuloy ya iyuna nen Pedro so panagpulong ya kimey, aliwan say panagsigay. Nen Pentecostes 33 C.E., makmakpel ya nansalita si Pedro tungkol ed Kristo, kanian manga 3,000 so angawat ed maong a balita tan abautismoan. (Gawa 2:​14, 37-41) Tan ag-abayag, tinulongan to met iray Samaritano tan arum ni ran lahi pian magmaliw iran Kristiano. (Gawa 8:​14-17; 10:​44-48) On, inusar nen Jehova si Pedro pian naamtaan na amin a klase na totoo so katuaan tan magmaliw iran parte na Kristianon kongregasyon. Balbaleg iyan pribilehyo! w23.09 20 ¶1; 23 ¶11