Jeremias

34 Saya so mensahe nen Jehova a sinmabi ed si Jeremias, sanen si Arin Nabucodonosor* na Babilonia tan say interon armada to tan say amin a panarian ed dalin a walad silong na pakauley to tan amin a totoo et milalaban ed Jerusalem tan ed amin a syudad to:+

2 “Oniay inkuan nen Jehova a Dios na Israel, ‘La ka, mitongtong kad si Arin Zedekias+ na Juda tan ibagam ed sikato: “Inkuan nen Jehova, ‘Iyawat ko iyan syudad ed ari na Babilonia, tan poolan to iya.+ 3 Tan agka makaliktar, lapud seguradon naerel ka tan niyawat kad sikato.+ Tan onarap kan mismo ed ari na Babilonia, tan sikatoy mitongtong ed sika ya arap-arapan, tan onla kad Babilonia.’+ 4 Balet dengel moy salita nen Jehova, O Arin Zedekias na Juda, ‘Oniay inkuan nen Jehova nipaakar ed sika: “Agka ompatey ed espada. 5 Ompatey kan mareen,+ tan manggawa ra na panagpool a seremonya parad sika a singa ginawa ra ed saray kaamaan mo, saray ararin akadkauna nen say sika, tan ibaga ray, ‘O katawan!’ lapud manermen ira parad sika, ta ‘siak a mismo so angibaga ed sayan salita,’ so imbaga nen Jehova.”’”’”

6 Kanian linmay propeta Jeremias ed Jerusalem pian ibaga to iyan amin a salita ed si Arin Zedekias na Juda, 7 sanen saray armada na ari na Babilonia et milalaban ed Jerusalem tan ed amin a nakekeraan a syudad na Juda,+ salanti, say Lakis+ tan Azeca;+ ta saratan labat so apadiran a syudad ya akeraan ed saray syudad na Juda.

8 Saya so mensahe nen Jehova a sinmabi ed si Jeremias kayari na impisipanan nen Arin Zedekias ed amin a totoo a walad Jerusalem pian iyabawag ed sikara so kibulos,+ 9 pian ibulos na balang sakey iray Hebreon aripen to, laki tan bii, tan anggapoy siopaman a pansiansiaen ton aripen so kapara ton Judio. 10 Kanian tinmulok so amin a prinsipe tan amin a totoo. Akisipanan ira ya ibulos na balang sakey ed sikara iray aripen dan lalaki tan bibii, tan agda la ra aripenen. Tinmulok ira tan imbulos da ra. 11 Balet agnambayag et inala ra lamet iray aripen dan lalaki tan bibii ya imbulos da la, tan pinuersa da ran magmaliw ya aripen lamet. 12 Kanian oniay mensahe nen Jehova a sinmabi ed si Jeremias a nanlapud si Jehova:

13 “Oniay inkuan nen Jehova a Dios na Israel, ‘Akisipanan ak ed saray inmuunan atateng yo+ diad samay agew ya impaway ko ra ed dalin na Ehipto, diad abung ya akaaripenan da,+ ya inkuan ko: 14 “Diad panampot na pitoran taon et nepeg ya ibulos na balang sakey ed sikayo so Hebreon agi to, a nilako ed sikayo tan nanlingkor ed sikayo na anem taon; sikatoy nepeg yon ibulos.”+ Balet agdinmengel odino tinmalineng ed siak iray inmuunan atateng yo. 15 Diad agano ni* et pinmawil kayo tan ginawa yoy maptek ed pakanengneng ko diad impangiyabawag yoy kibulos na kapara yon totoo, tan akisipanan kayod siak diad abung ya atawag ed ngaran ko. 16 Balet tampol kayon anguman tan pinabanday yoy ngaran ko+ tan inala yo lamet iray aripen yon lalaki tan bibii, ya imbulos yo la unong ed panlabayan* da, tan pinuersa yo ran magmaliw ya aripen lamet.’

17 “Kanian oniay inkuan nen Jehova: ‘Agyo ak tinulok diad pangiyabawag yo komon na kibulos, ed agi yo tan kapara yon too.+ Kanian sayan kibulos so iyabawag kod sikayo natan,’ so imbaga nen Jehova, ‘ompatey kayo ed espada, salot,* tan eras,+ tan pagmaliwen ta kayon sengegay pakataktakotan na amin a panarian ed dalin.+ 18 Tan oniay nagawad saray totoon anumlang ed impisipanan ko lapud agda tinoor iray salita na impisipanan dad siak sanen pinaldua ra so kilaw a baka tan dinmalan irad pegley na satan,+ 19 salanti, saray prinsipe na Juda, saray prinsipe na Jerusalem, saray opisyal na palasyo, saray saserdote, tan amin a totoo ed sayan dalin a dinmalan ed pegley na apalduan kilaw a baka: 20 Iyawat ko rad saray kakabusol da tan ed saramay malabay a mamatey ed sikara,* tan saray bangkay da et kanen na saray manok tan saray ayayep.+ 21 Tan iyawat koy Arin Zedekias na Juda tan saray prinsipe to ed saray kalaban da tan ed saramay malabay a mamatey ed sikara* tan ed saray armada na ari na Babilonia+ ya onaatras lad pilalaban dad sikayo.’+

22 “‘Siak so mangiganggan,’ so imbaga nen Jehova, ‘tan papawilen ko ra ed sayan syudad, tan milaban ira tan sakopen da iya tan poolan da;+ tan saray syudad na Juda et pagmaliwen kon dalin ya agnapanayaman.’”+