Manilalo ed Si Jehova

“Manilalo ed si Jehova tan tontonen so dalan to, tan sikayo so itandoro to a mangayarian na dalin. Sano saray marelmeng so napegpeg, sikato so nanengneng yo.”​—SALMO 37:34.

1, 2. Iner so ompatnag ya akaalageyan na katooan, tan panon a say Nasyones Unidas so nalalanor?

DIAD katudioan, say atooan a pamilya so akarateng ed sankaabantian a balitang na aligwas to. Lapud sagpot to, arapat to ed kaunoran so panaon na nuklar. Say biskeg na atomika so ompatnag a makayarin mangiter na daakan ya enerhya tan sirin et lukasan toray engranden bengatla ed sankagloboan. Ontan met, pinaalindaway to met so dalan a para ed alablabas a kasakitan na atooan a rasa.

² Anto so akatalindeg ed dalan na kaderal na atooan a pamilyan mismo diad palaspas-manderal a nuklar? Ompatnag a say Nasyones Unidas, a mangipapangta ed 159 membron nasyones a walaan na saray dakel a porma na gobierno. Diad pulitika, sarayan gobierno so agmanpapakna ed balang sinansakey, a balang sakey so manisia a say dili ton porma na uley so superyor, on, say sankaabigan. Diad inkasikaton dili, sirin, say NU so sakey ya akusokuson ulop. Laganap so kinon ed nasyon tan pilalek ed panindependente. Nagkalalo ni, dakel a nasyones so angitalirak na pananisia ed Dios, a nagmaliw iran ateistiko.

3. Panon a say panmoria na Kakristianoan ed Dios so miduma a manlapud Dios a mismo?

³ Say ngaran a Kakristianoan so siansia nin onaplika ed saray nasyones ya agmalabay a nidasig a bilang andi-dios noagta mangibabagan mananisia ed si Jesu-Kristo a mitunosan ed “Dios ya Ama” ed nankatlon koneksion ed si Jesus tan diad sakey a nipersonan “holy ghost,” odino espiritu santo. Saray membro na Trinidad so nibagan nampapara. Balet say Ama nen Jesus so amaisulat ed si propeta Isaias ed sarayan salita na pakabidbiran: “Siak si Jehova. Satan so ngaran ko; tan agko iter so dilin gloriak ed siopaman, nisay dayew ko ed saray imbulik a talintao.” (Isaias 42:8) Sayan Jehova, odino Yahweh (The Jerusalem Bible), so nanggawa na agnaparengan a kuritan na awaran a para ed inkasikaton dili.

4. Say Nasyones Unidas so mangiduduplit ed katooan a manlapud anto?

⁴ Anggapo ed galang to, say Nasyones Unidas so agmangisasaklang ed ngaran na Dios na manepeg a galang tan panamidbir. Agto papasesegen so katooan, a natan et aarapen to so sankasinageman a pansumpalan to, a manilalo ed manangitarok ed satan a ngaran. Ingen, satan a sakey so manepenepeg a nibagan “say Dios na ilalo,” unong ta inggaton to so letnegan a para ed mogmon makanan ilalo a nayarin akuen natan na katooan. (Roma 15:13, King James Version) Say ilalon iter to so amabiskeg tan amagunaet ed saray dakel a lalaki tan bibii.

Asasakbay​—Ilalo!

5. Kapigan so inkilira na letnegan ed ilalo?

⁵ Say letnegan na panangawat ed satan ya ilalo so nigaton ya asasakbay ed awaran na atooan a pamilya. On, sikato so niliran tampol diad sakbay na inkapabtik na saray inmunan atateng tayo a manlapud ayaman dan hardin na Eden ed Pegley Bukig. Say kuritan a nisulat ed Hebreon lenguahe nipaakar ed saman a hardin, odino Paraiso, so aliwan pabula, aliwan mito na saray totoon ombebeneg a manlapud panagdayew ed Manamalsa ra.​—Genesis 2:7–3:24.

6. Panon so insabi na katooan a mankaukolan na ilalo?

⁶ Masulok ya 4,000 taon ed saginonor, say Kristianon apostol Pablo so apuyanan a mangisulat: “Diad panamegley na sakey a too et say kasalanan so linmoob ed mundo tan say patey lapud kasalanan, tan sirin say patey so linmaknab ed amin a totoo lapud amin da so nankasalanan.” (Roma 5:12) Diad sananey ed saray sulat to, impabidbir to so sakey a toon nankasalanan: “A singa dia ed si Adan et amin so ompapatey, sirin ontan met ed si Kristo et amin so nagawan mabilay.” (1 Corinto 15:22) Sakey a doktor a manngaran na Lucas, ed komatlon kapitulo na Ebanghelyo to, so anuysoy ed linya na kapolian nen Jesus a mamapawil ya anggad si Adan, a, sakbay a sikato so pinapaway ed Eden, nadngel to so mensahe na ilalo nen Jehova.​—Lucas 3:23-38.

7. Anton makapaseseg a bengatla so ginawa na Dios legan a si Adan so mabilay ni?

⁷ Siempre, labay yon amtaen so karga na saman a mensahe. Balet sakbay a satan so basaen, imanoen so katuaan a diad andukey a panaon et si Jehova so sakey a manangiter na ilalo. Diad gapo et si Adan so mangaraldalin ya anak na Dios, tan sikato so inabuloyan na Dios a mamawala na saray anak. No anengneng yo lan asakbay so maudiem a kipapasen, nayarin labay yon ipaseseg odino ikdan na ilalo so ananak yo. Ontan so ginawa na Dios. Kayari na impakadngel nen Adan ed panangondena na Dios ed sikaton mismo, nadngel toray salita na ilalo a para ed saray kapolian to.

8. Panon so pangiter na Genesis 3:15 na letnegan na ilalo?

⁸ Anto raman a salita a manlapud sayan manangisagyat-ilalo a Dios? Diad sakey ya “uleg” ya alanor ed kasalanan nen Adan, imbaga na Dios: “Mangyan ak na gulaan ed baetan mo tan say bii tan ed baetan na binim tan bini [ilalak] to. Mekmekan to ka ed ulo tan sikato so sugaten mo ed mukor.” (Genesis 3:14, 15) Nayarin morekdeken yo no panon a saratan a salita so nibagan mamalesa na ilalo. Ununa, naaralan tayo a “say uleg” so namekmek ed ulo.

9. Siopa so “uleg” ya atukoy ed Geneses 3:14, 15?

⁹ Diad Apocalipsis 12:9 et nisulat: “Sirin say baleg a dragon so nibantak, say daan ya uleg, say sakey a tinawag na Diablo tan Satanas, a mamapalikdo ed interon panaayaman a dalin; sikato so nibantak ed dalin tan saray angheles to so nibantak a kaiba to.” On, “say uleg” ya alanor ed Eden so anggapoy arum noag say marelmeng ya espiritun pinalsa ya akabatan a Satanas ya Diablo. Aliwa lambengat a saman ya simbolikon uleg so sinmabin awalaan na saray angheles ed tawen noagta sikato so walaan na sakey a “bini” dian mismo ed dalin, sakey a “bini” a diad inggeter a panaon et sikato so namekmek a naandi ed kiwawala a kaiba to.

10. Panon so impamekder nen Jesus na pakabidbiran “ed uleg”?

¹⁰ Pepekderan to ’yan pakabidbiran ed Diablo a bilang “say uleg” ed benegan na inkaplag na inmunan atateng tayo, imbaga nen Jesu-Kristo ed saray Judion relihyoson papangulo nen inmunan siglo: “Sikayo so nanlapud ama yon Diablo, tan kaliktan yon gawaen iray pilalek na ama yo. Satan a sakey so managpatey sanen ginmapo tan agtinmalindeg a malet ed katuaan . . . Sano sikato so mansalita na tila, sikato so mansalita unong ed dilin linawa to, lapud sikato so matila tan say ama na tila.” (Juan 8:44) Saraman a relihyoson sumusumpa so tinawag met nen Jesus ya “ilalak na saray tadioko.”​—Mateo 12:34; 23:33.

Apansiansian Mabilay So Ilalo

11. Anton kaaruman a rason ed panilalo so iter na Genesis 3:15?

¹¹ Say madibinon sipan ed kamekmek ed ulo na simbolikon uleg so peteg ya angigeter na makapaligsay-puson ilalo ed arap na amin ya atooan a pamilyan onsabi ni ed kiwawala. Anengneng tayo no akin diad panamegley na pangusisa ed arum iran kipaakaran na Genesis 3:15. Say “bini” na bii so asalambit. Say pakabidbiran ed satan a “bini” so abayag ya akulabotan ed misteryo. Balet malinlinew a si Jehova a Dios so angipasen ed satan ya agni abidbir a “bini” a migulaan ed simbolikon uleg tan say sumpa-ed-Dios a “bini” to. Nisipan so pambiktorya, on, agarantiyaan, ed “bini” na “bii”! Say pambiktorya to so niletneg a bilang sakey ya ilalo ed arap na katooan. Sirin saray membro na atooan a pamilya so makapanilalo ed isabi na satan a “bini” na “bii.”

12. Asabi panaon, anto ni niparungtal nipaakar ed “bini” na “bii”?

¹² Diad saray siglos, imparungtal na Dios a sayan “bini” et say bogbogtong ya Anak to, a nibaki ed dalin pian magmaliw a Mesias tan isaklang to so bilay to a bilang sakey a dondon bagat. (Genesis 22:17, 18; Galacia 3:16; 1 Juan 2:2; Apocalipsis 5:9, 10) Nisengeg ed sayan rason et say ilalo na saray Tasi nen Jehova so ag-onsasaral ed Nasyones Unidas. Sikato so onsasaral ed sakey a mabilay a Jesu-Kristo, Manunan Sangiyan nen Jehova a Dios. Makapanmatalek itayo a si Kristo so mabilay, lapud sikato so binmangon a nanlapud saray inaatey pian onyurong ed nikawanan nen Jehova ed tawen. A singa ibabaga nen Pablo: “No diad sayan bilay lambengat [a say bilay et isasakup to so koma-20 siglo] no nanilalo itayo ed Kristo, sikatayo ed amin a totoo so sankapakaskasiyan. Anggaman kuan, natan si Kristo so apaoli a manlapud saray inaatey, say ununan-bunga na saraman so naugip ed patey.” (1 Corinto 15:19, 20) A singa mabetbet a niletneg ed Biblia diad saray pahina na sayan magasin, si Jesu-Kristo natan so nitandoro a bilang mangatatawen ya Ari.​—Apocalipsis 11:15.

13, 14. Iner so pangipasenan na saray Tasi nen Jehova na ilalo, tan anto so gagawaen da nipaakar ed satan?

¹³ Siempre, agsinandian nen Jesus si Jehova a bilang say ilalo na katooan. Say Salmo 37:34 so siansia nin onaplika: “Manilalo ed si Jehova tan tontonen so dalan to, tan sikayo so itandoro to a mangayarian na dalin. Sano saray marelmeng so napegpeg, nanengneng yo.” Siansia nin nakaukolan so pantultuloy a manilalo ed si Jehova tan pasesegen so amin a totoon manaynan la diad panilalo ed saray ginaway-toon paalagey.

¹⁴ Mitukoyan ed sayan katuaan, saray Tasi nen Jehova so aktibo ed 208 daldalin, a mangipupulong ed maong a balita na Panarian. Sikara so agnapatunda diad panggagawa ed saya. Saray institusyon a pulitikal, a tutulongan tan itatandoro na saray relihyoson organisasyon, so andian na madibinon kanepegan diad panalin pamatunda ed sikara. Nayarian tayo so mantultuloy a magmaliw a tastasi nen Jehova tan manilalo ed sikato, a singa ginawa nen David ed Bethlehem, ya angisulat:

15. Anton nengneng na ilalo so wala ed si David ed si Jehova?

¹⁵ “Si Jehova so pastol ko; agak onkulang. Siak so parukolen to ed saray mabunan pastolan; itonton toak ed gilig na saray danum. Ipawil to so kamarerwak: Iwanwan toak ed saray basbas na inkatunong nisesengeg ed ngaran to. On, anggaman siak so manakar ed lawak na anino na patey, siak so ag-ontakot ed mauges; a sika so wala ed siak; say tayukor tan say baston mo, ligligwaen da ak. Sika so mangiparaan na sakey a lamisaan ed arap ko diad imaton na saray kakabusol ko: Nilanaan mo so ulok na larak; say kopak so manlippua. Peteg a say kaabigan tan say maaron-panangasi so ontumbok ed amin na saray agew na bilay ko; tan siak so manayam ed abung nen Jehova ed ando lan ando.”​—Salmo 23, American Standard Version.

16. Akin a nibagan si Jesus so walaan na parehon liknaan a singa si David?

¹⁶ Si Arin David so espiritual a pastol nen Jehova ed saray tribu na kadaanan ya Israel, tan imparaan to so Jerusalem a magmaliw a kabisera na nasyon, a nanuleyan na anak ton Solomon ed 40 taon. Tekep na maabig a rason, si Jesu-Kristo so asalita a bilang say “anak nen David.” (Lucas 1:31; 18:39; 20:41) No si David so nanilalo ed si Jehova a Dios, ontan met so gawaen na mangaraldalin a kapolian ton Jesu-Kristo. Tan ginawa to.

17. Anton ebidensya so wala a si Jesus so nanilalo ed si Jehova?

¹⁷ A singa nipatnag a say sankabantogan a mangaraldalin a kapolian nen David, si Jesu-Kristo, so anumbok ed simbawa ed Salmo 37:34 sanen ultimo lan panlinawa to ed panamairapan a kiew, imbaga nen Jesus: “Ama, diad limam so pangimatalkan ko na espirituk.” (Lucas 23:46) Sikato so mangaaon tan manusumpal ed saray salita nen David ed Salmo 31:5, a nipaarap ed Dios: “Diad limam so pangimatalkan ko na espirituk.” Say ilalo nen Jesus so ag-asaew, a singa ed si Arin David. Si Kristo so apaoli a nanlapud saray inaatey diad komatlon agew. Apataplon agew ed saginonor et sikato so pinmawil ed mangatatawen ya Ama to. Diad sampot na Panaon Hentil nen 1914, intandoro nen Jehova so Anak to pian magmaliw a Manuley ed dalin.

Sakey a Panaon na Ilalo Natan

18. Akin a natan so matukotukoy a panaon ed panilalo?

¹⁸ Natan, legan a say balon taon a 6,014 A.M. (ed Taon na Mundo) so mangitarok ed pamilya na too a mamaarap ed arapen, anton ilalo so nayarin awaten na atooan a pamilya? Satan a tepet so sankamatukoyan natan lapud sikatayo la so ngalngalin 1,900 taon ed kayari-na-Biblian panaon. Sikato so andukey lan panaon nanlapulad impangisulat nen David ed Salmo 37:34.

19. Anto so ginawa nen Jehova ed si Jesus, ya angiter ed sikatayo na ilalo?

¹⁹ Si Jehova a Dios, say Makapanyarin-amin a Dios ya amaoli ed si Jesus a nanlapud saray inaatey, so walaan na mas nagkalalon baleg a betang ed sikato a nayarin isipen na saray makisir-impannonot a totoo. Diad impamaoli tan impangitandoro to ed bogbogtong ya Anak to ed nikawanan a lima to ed katawenan, si Jehova a Dios so walaan na niarum a rason ed sikatayon onnengneng ed sikato a tekep na ag-onsaew ya ilalo, say ultimon ilalo tayo. Kabaliksan to so andi-anggaan a bilay tayo diad liket, a singa ibabaga nen apuyanan a managsulat a Pablo: “Sikatayo [so] niliktar ed sayan ilalo.”​—Roma 8:24.

20. Akin a nibaga tayon si Jehova so siansia nin “say Dios na ilalo”?

²⁰ Ituloy na apostol ya ibaga: “Balet say ilalon anengneng so aliwan ilalo, ta sano nanengneng na sakey a too so sakey a bengatla, kasin sikato so manilalo ed satan? Balet no sikatayo so manilalo ed agtayo nanengneng, satan so itultuloy tayon alagden a tekep na panagsungdo.” (Roma 8:24, 25) Tan sirin satan ya orihinal ya ilalo so siansia nin mabilay, on, manasingger la ed maglorian kasumpalan to diad rasa na katooan. (2 Pedro 3:13; Apocalipsis 21:4, 5) Nisengeg ed mismon rason a sikato so sakey ya ilalo a para ed amin a katooan, kanepegan to so nipakabat ed amin. Sikatoya so kanonotan na “Dios na ilalo” tayo.

21, 22. Anto so nailaloan tayo a gawaen na saray nasyones diad asingger ya arapen?

²¹ Natan ed amin a panaon so panaon to diad panumpal ed sayan kanonotan. Anggan diad panaon tayo sano arum iran nasyones na NU so akagegemtan ed sientipikon pakayari ed mismon pugnel na amin a pamaakaran, saray papangulo na sarayan gobierno so agmanlikna ed pankaukolan na pangipaarap ed atagtagey ya intelihensya diad panresolbe ed saray problema.​—Ipareng so Genesis 11:6.

²² Agnin balot agawa nensaman, say popular a relihyon so wala ed depensiba, a say beneg to so akatarangka ed bakor. Saray manangapag-apag ya impluensya to so nepeg a naandi. Ipapanengneng na Biblia a saray manuley ya elemento so mangipaskar na inkasuperyor da tan isian da so inkasikara a manlapud saray masisiban relihyon a manasali ed abayaglan panaon a mamikler ed minumundon sistema na bengabengatla ed amin a nayarian dan gegemtanen. Agpankelawan, sirin, a saray mapulitikan elemento so mangala ed sayan kurang. Say iyarawi ran maligen ed sayan panangataki ed relihyon so mangipatnag, manlapud punto de bista, ya anggapo so Dios a manepeg a dayewen tan panlingkoran. Say mapropetikon pamatnagan et sikara ed satan so ombuelta ed saray tastasi na Dios, ya atilak. Sikara so mananap na sankainomayan a pananalo ed saray Tasi nen Jehova a bilang kasampotan na sumpa-ed-Dios a kampanya ra.​—Apocalipsis 17:12-17; Ezequiel 38:10-23.

23, 24. Panon so ikiwas nen Jehova ed pangataki na nasyones ed totoo to?

²³ Anggaman kuan, sikara ed kaunoran so makaamta ed makapabaing a katalo ya onsabi ed sakey ya onloob diad pilaban ed saray armada nen Jehova, ya agnin balot atalo ed bakal. Satan so manggawan agbalot nalingon malinew a sikara so manseserbi ed gagala na manunan kalaban na sakey a tuan Dios, salanti, “say uleg,” si Satanas, “say dios na sayan sistema na bengabengatla.”​—2 Corinto 4:4.

²⁴ Agaylan kipabpaabeba so kabaliksan na saya ed sikara! Say inilaloan dan iparungtal so mansumpal ed alablabas a kibabaing, a managyat ed mismon Dios na tawen tan dalin ed matunong a sanok. Diad maletey a katooan et nayarian ton ibaga: “‘Ta saray kanonotan yo a totoo so aliwa ’ran kanonotan ko, nisay saray dalan ko so daladalan yo,’ so kuan nen Jehova. ‘Ta unong a saray katawenan so atagtagey nen say dalin, sirin saray dalan ko so atagtagey nen saray dalan yo, tan saray kanonotan ko nen saray kanonotan yo. Ta unong a say uran so napelag, tan say niebe, a manlapud katawenan tan ag-ompawil ed satan a pasen, noagta peteg a salogen to so dalin tan pambungaen to tan patuboen to, tan say bini so peteg a niiter ed managtanem tan say tinapay ed manangan, sirin say salitan ompaway ed sangik so mansumpal ya ontan. Ag-ompawil ed siak a paoypaoy, noagta peteg a gawaen to so nanliketan ko, tan peteg a nawalaan na peteg ya aligwas ed saman so angibakian ko.’”​—Isaias 55:8-11.

25. Akin, sirin, a sikatayo natan so walaan na maabig a rason diad inengneng ed si Jehova a bilang say “Dios na ilalo” tayo?

²⁵ Sayan Amalsa ed too so angikarga ed puso na too na makden ya inkasensitibo, a singa sikaton mismo. “Ta saya so imbaga nen Jehova na saray ehersito, ‘Ontumbok ed kayari na gloria et siak so imbaki to ed saray nasyones a nansamsam ed sikayon totoo; ta say maniwit ed sikayo so manidiwit ed bukel na matak.’” (Zacarias 2:8) Kanian, sirin, saray Tasi nen Jehova so nakaukolan a manilalo ed si Jehova. Sikato so onsukat ed satan ya ilalo ed sankarakepan a kalimgasan na sankatalbaan ya inkasoberano to. Sikato so napaneknekan ya aglan balot nasuppiat a sikato so sankatageyan, makapanyarin-amin, maando a Dios, a nambilay a tukoy ed sankatalonaan iran ilalo na pinalsa to ed tawen tan dalin. Hallelujah!​—Salmo 150:6.

Panon So Iyebat Yo?

◻ Akin a say ilalo na nasyones so makapalikdo?

◻ Panon so pangiter na Dios na letnegan na ilalo ed Genesis 3:15?

◻ Anto so talindeg nen Jesus nipaakar ed Salmo 37:34?

◻ Akin a sikatayo natan so walaan na rason ed panilalo?

[Litrato ed pahina 10]

A singa saray karnero et tumboken da so pastol, si David so ninmengneng tan nanilalo ed si Jehova

[Credit Line]

Pictorial Archive (Near Eastern History) Est.