Manmatalek ed si Jehova a Sumpalen so Gagala To

“Say matunong tawiren to so dalin tan manayam diman lawas.”​—SALMO 37:29.

1. Anto so gagala nen Jehova para’d totoo tan para’d sayan dalin?

SANEN pinalsa nen Jehova so inmunan atateng tayo, si Ada2n tan si Eva, sikara so ginawa ton ayadyari. Tan pinalsa to ira ta pian makapanbilay ya ando lan ando ed sayan dalin​—no tinulok daray ganggan to. (Genesis 1:26, 27; 2:17) Ontan met, sikaray impasen na Dios ed malaparaison kaliberliber. (Genesis 2:8, 9) Inkuan nen Jehova ed sikara: “Manbunga kayo, tan ondakel kayo, tan makmakan yo so dalin, tan sikato so patoloken yo.” (Genesis 1:28) Diad ontan, diad kaunoran et saray anak da so onlaknab ed sankadalinan, tan sayan planeta so magmaliw a sakey a paraison napno na ayadyari, maliket a rasa na katooan. Agaylan maabig a gapo so inter ed atooan a pamilya! “Say Dios anengneng to so amin a bengatla a ginawa to, et nia maong iran toloy.”​—Genesis 1:31.

2. Antoran tepet so onlelesa lapud kipapasen na saray kurang na too?

² Ingen, say kipapasen na saray kurang na too a niwala ed loob na nilibon taon so aliwan unong ed orihinal a gagala na Dios. Say katooan so arawin tuloy ed inkayadyari tan mapekder ya agmaliket. Makapagonigon iray kipapasen ed mundo, tan unong a nipropesiya et saraya so onuuges ed panaon tayo. (2 Timoteo 3:1-5, 13) Kanian panon itayon makapanmatalek a say gagala na Dios para’d totoo so nasumpal ed magano lan arapen? Nagkalalo ta nin andukey iran panat na panaon so onlabas tekep na mantultuloy a makapagonigon iran kipapasen?

Akin a Pinmalalo?

3. Akin ya agtampol a pinangangga nen Jehova so rebelyon na katooan?

³ Saramay walaay suston pikakabat ed impuyan a Salita na Dios so makaamta no akin ya aabuloyan nen Jehova irayan mauges a kipapasen ed dalin. Amta ra met no anto so gawaen to ed saraya. Manlapud salaysay na Biblia, naaralan da ya ag-inusar ed suston paraan na inmunan atateng tayo so makapakelkelaw a langkap na bulos a panpili ya inter na Dios ed totoo. (Ipareng so 1 Pedro 2:16.) Sililingon pinili ra so kurang na panbukbukor a biig ed Dios. (Genesis, kapitulo 2 tan 3) Say impanrebelde ra so amalesa na tepetepet na sankabalgan a salisalan, a singa say: Kasin say Soberano na Sankatalbaan so walaan na kanepegan a manguley ed totoo? Kasin say uley to so sankaabigan para’d sikara? Ontalona kasi so uley na too ya anggapoy panangasikaso na Dios? Say seguradon paraan ed pakaromog na saray ebat ed sarayan tepet et say pamalabas nin ununa ed nilasus taon ya uley na too. Saray resulta so mangipanengneng ya anggapoy duaruwa no kasin saray totoo so ontalona a biig ed Manamalsa ra.

4, 5. (a) Anto so resulta na impangipulisay na too ed uley na Dios? (b) Anto so anggapoy duaruwan impanengneng na inlabas na panon?

⁴ Sanen impulisay nen Adan tan si Eva so Dios, sikaray agto la sinustine pian mansiansian ayadyari. Sanen anggapo la so pananuporta to, sikaray nantultuloy a kinmapuy. Say resulta et say​—ag-inkayadyari, itatatken, tan diad kaunoran et ipapatey. Diad panamegley na saray ganggan na tawir, saratan a kaleteyan so nipasa na inmunan atateng tayo ed amin a kailalakan da, pati sikatayo. (Roma 5:12) Tan komusta met so resulta na nilibon taon ya uley na too? Satan so nagmaliw a makadesyang, a singa ed simamatuan sasalitaen na Eclesiastes 8:9: ‘Say too so walaan na pakayari ed sananey ed kaugsan to.’

⁵ Say ilalabas na panaon so peteg a mamapaneknek ya agnayarian na totoo a matalonan mangiwanwan ed saray kurang da a biig ed Manamalsa ra. Inyabawag na pinuyanan a managsulat ed Biblia a si Jeremias: “O Jehova, amtak a say dalan na too angapo ed sikato lanlamang; aliwa ya wala ed too a manakar a mangitonton ed saray kurang to.”​—Jeremias 10:23; Deuteronomio 32:4, 5; Eclesiastes 7:29.

Ag-anguman so Gagala na Dios

6, 7. (a) Kasin say inlabas na nilibon taon na awaran so anguman ed gagala nen Jehova? (b) Anto so nilaktip ed gagala nen Jehova?

⁶ asin say inlabas na nilibon taon na awaran na too​—a napnapno na karelmengan tan kairapan​—so anguman ed gagala na Dios? Kuan na Salita to: “Onia so kuan nen Jehova ya amalsa ed saray tawen, say Dios ya anibukel tan nangawa na dalin, sikato ya angiletneg ed sikato tan sikato so pinalsa to ya aliwa a kibalatar, ya tinibukel to ta pian sikato so panayaman. Siak si Jehova; et angapo la so sananey.” (Isaias 45:18) Kanian tinibukel na Dios so dalin pian panayaman na totoo, tan siansian satan so gagala to.

⁷ Aglambengat pinalsa nen Jehova so dalin pian panayaman noagta ginagala to met a satan so magmaliw a sakey a paraison pangayagaan na ayadyari, maliket a totoo. Satan so rason no akin ya impropesiya na Biblia a niwala so “tawen a balo,” sakey a balon sosyedad na too, a “pana-ayaman na katunongan.” (2 Pedro 3:13) Tan diad Apocalipsis 21:4, ibabaga ed sikatayo na Salita na Dios a diad balon mundo to, “punasen to so amin a lua ed kamataan da; tan andi gapo la naani ipatey; tan angapo la naani onnangis o dageyem, o ot-ot: ta saray ona a bengatla sikara so linmabas la.” Diad saratan a rason a nayarian nen Jesus a tukoyen so onsasabin balon mundo ed dalin a bilang “Paraiso.”​—Lucas 23:43.

8. Akin a makapanseguro tayo a sumpalen nen Jehova so gagala to?

⁸ Lapud si Jehova so makapanyarin-amin tan makabat-ed-amin a Manamalsa na talba, anggapo so makaamper ed gagala to. “Si Jehova na saray ejercito insamba to, a kuan to, Petepeteg, singa ninonot ko, ontan so nagawa; et singa pinegdat ko, ontan so mansiansia naani.” (Isaias 14:24) Kanian, sano ibaga na Dios a sayan dalin so gawaen ton sakey a paraiso a panayaman na ayadyarin totoo, ontan so nagawa. Inkuan nen Jesus: “Mapalar iray maoyamo, ta tawiren da’y dalin.” (Mateo 5:5; ipareng so Salmo 37:29.) Nailaloan tayo so kasumpalan na satan a sipan. Diad tua, niiyan tayo ed kaatapan so bilay tayo nisesengeg ed satan.

Sikaray Nanmatalek ed si Jehova

9. Anto so ginawa nen Abraham a mangipapanengneng na panagmatalek to ed si Jehova?

⁹ Diad loob na awaran dakel a walaay takot ed Dios so angiyan na bilay da ed kaatapan nisesengeg ed gagala na Dios para’d dalin lapud sikaray kumbinsido a sumpalen to iratan. Anggaman say pikakabat da so nayarin limitado, nanmatalek ira ed Dios tan inyapasakey da so bilay da ed panggawa na linawa to. Alimbawa, wadtan si Abraham a nambilay na ngalngali 2,000 a taon sakbay a niwalad dalin si Jesus​—abayag ni sakbay na inkisulat na Biblia. Sikato so nanmatalek ed si Jehova a sumpalen iray sipan To. Maseguron akabatan nen Abraham so nipaakar ed Manamalsa to manlapud matoor ya ateng ton si Shem, ya imbangat nen Noe. Kanian sanen imbaga na Dios ed si Abraham a taynan so maaligwas ya Ur na saray Caldeo tan sikatoy onalis ed sankaili tan mapeligron dalin na Canaan, kabat na satan a patriarka a sikatoy makapanmatalek ed si Jehova, kanian sikatoy linma’d man. (Hebreos 11:8) Asabi panaon, imbaga nen Jehova ed sikato: “Dia ed sika so pangawaan ko na sakey a baleg a nacion.”​—Genesis 12:2.

10, 11. Akin a mabulos si Abraham a mangisaklang ed bogbogtong ya ilalak to, si Isaac?

¹⁰ Anto so agawa kayari inkiyanak nen Isaac tan nagmaliw ya ilalak nen Abraham? Impaamta nen Jehova ed si Abraham a diad panamegley nen Isaac et ondakel iray kapolian to anggad magmaliw itan a sakey a baleg a nasyon. (Genesis 21:12) No ontan, ompatnag a sakey a baleg a pansumlangan sanen imbaga nen Jehova ed si Abraham, a bilang sakey a subok na pananisia to, ya ibagat to so ilalak ton Isaac. (Genesis 22:2) Ingen, tekep na sigpot a panagmatalek ed si Jehova, kinmiwas si Abraham pian ontulok, aktual ya inala to so punyal pian pateyen si Isaac. Diad kaunoran a bekta, imbaki na Dios so anghel a mamukpok ed si Abraham.​—Genesis 22:9-14.

¹¹ Akin ya ontanlan matulok si Abraham? Ipaparungtal itan na Hebreos 11:17-19: “Lapu ed pananisia, si Abraham, sanen sikato so asali, insaklang to si Isaac: salanti, say angawat a sililiket ed saray sipan, sikaton insaklang to wari so bogbogtong ya anak to; A sikato so angibagaan ed sikato na saya: Dia ed Isaac natawag naani so kailalakan mo: A momotekteken to ya angan dia ed saray inatey ni, nayarian na Dios so mamaalagey ed sikato; diman met so pinawilan to ya angawat ed aliling.” Sasalitaen met na Roma 4:20, 21: “Angan ontan, dia ed panaalagar to ed sipan na Dios, ag to nanduarua ed panamegley na ag pananisia, . . . tan sinisia to a peteg ya ganagana ya insipan to, makapanyari met a manungpal.”

12. Panon ya atumangan si Abraham lapud pananisia to?

¹² Atumangan si Abraham lapud pananisia to aliwa lambengat ed impangiliktar ed si Isaac tan diad pakawalaan na sakey a “baleg a nacion” a manlapud sikato noagta diad sananey nin paraan. Imbaga na Dios ed si Abraham: “Dia ed ilalak mo so pakapikapalaranan na saray amin a nacion dia; lapu ed tinolok mo so voces ko.” (Genesis 22:18) Panon? Say Ari na mangatatawen a Panarian na Dios so manlapud kapolian nen Abraham. Satan a Panarian so manmekmek ed sayan mauges a mundon nisilong ed si Satanas. (Daniel 2:44; Roma 16:20; Apocalipsis 19:11-21) Insan, diad sakey ya alinisan a dalin ed silong na uley na Panarian, say Paraiso so napalaknab ed interon globo, tan “amin ya wala ed mundo,” saray totoon mangagawa na linawa na Dios so makapangayaga na ayadyarin bunigas tan bilay ya andi-anggaan. (1 Juan 2:15-17) Tan anggaman limitado labat so pikakabat nen Abraham nipaakar ed Panarian, sikatoy nanmatalek ed Dios tan maniilalo ed kiletneg na satan.​—Hebreos 11:10.

13, 14. Akin a nanmatalek ed Dios si Job?

¹³ Pigaran nilasus a taon ed saginonor, wadtan si Job, a nambilay ed baetan na koma-17 tan koma-16 iran siglo K.K.P. ed lugar natan ya Arabia. Sikato met so nambilay sakbay a gapoan ya isulat so Biblia. Si Job so “naskey tan matunong, tan sakey ya walaay takot ed Dios, tan pinmaliis a nanlapu ed mauges.” (Job 1:1) Sanen dinapoan nen Satanas si Job na sakey a makapadimla, makapaot-ot a sakit, sayan matoor a laki so “ag-angibalikas labat na sakey a mauges a salita” ed interon impanirap to. (Job 2:10, The New English Bible) Si Job so nanmatalek ed Dios, tan anggaman agto amta iray detalye no akin a sikato so napapairap na onman la, inyan to so bilay to ed kaatapan nisesengeg ed Dios tan ed saray sipan To.

¹⁴ Kabat nen Job ya anggano sikatoy ompatey, onsabi agew ya ipawil ed sikato na Dios so bilay to diad panamegley na kioli. Impanengneng to iyan ilalo sanen inkuanto ed si Jehova a Dios: “O komon ta yamot moak dia ed Sheol, . . . pian toroen mo ed siak so sakey a tinandaan a panaon, tan nonoten moak! No say sakey a too ompatey, ombilay ta lamet? . . . Ontawag ka, et onebatak ed sika: manpilalek ka ed gawa na saray limam.” (Job 14:13-15) Anggaman walad kairapan, indemostra nen Job so pananisia to ed inkasoberano nen Jehova, diad impangibagan: “Anga ed ompatey ak agko ekalen so inkaskey ko a manlapu ed siak.”​—Job 27:5.

15. Panon ya imbalikas nen David so panagmatalek to ed gagala nen Jehova?

¹⁵ Ngalngali anemiran siglo kayari nen Job tan ngalngali sanlibon taon sakbay a linmad dia si Jesus ed dalin, imbalikas nen David so panagmatalek to ed sakey a balon mundo. Inkuanto diad salmos: “Saray manalagar ed Jehova tawiren da so dalin. Ta wala ni so daiset, et say bagel onandi. . . . Ingen ta saray maoyamo tawiren da naani dalin: tan manliket ira a dili ed inka daakan na kareenan. Say matunong tawiren to so dalin tan manayam diman lawas.” Lapud maligen ya ilalo to, insimbawa nen David: “Manmatalek ka ed Jehova . . . Manliga ka a dili met ed Jehova: et iter to ed sika so saray pirawat na pusom.”​—Salmo 37:3, 4, 9-11, 29.

16. Anton ilalo so wala ed “sankabalgan a lurem na saray tasi”?

¹⁶ Diad inlabas na nilasus taon, saray matoor a lalaki tan bibii so awalaan met na onian ilalo a manbilay ya andi-geter ed dalin. Diad tua, sikaray manitibukel na “sankabalgan a lurem na saray tasi” a literal ya angiyan na bilay da ed kaatapan nisesengeg ed saray sipan nen Jehova. Dakel ed saraman ya akaunan tasi nen Jehova so pinairap tan pinatey lapud pananisia ra, “pian makagamor ira na magmaong a kioli ed bilay.” Panon? Diad balon mundo, tumangan ira nen Jehova na sakey a magmaong a kioli tan say ilalo na andi-anggaan a bilay.​—Juan 5:28, 29; Hebreos 11:35; 12:1.

Manmamatalek ed Dios Iray Kristianon Tastasi

17. Kaunongan kapekder so panagmatalek na inmunan-siglon Kristianos ed si Jehova?

¹⁷ Nen inmunan siglo K.P., imparungtal nen Jehova ed kapkapangiletneg a Kristianon kongregasyon iray nagkalalo nin detalye nipaakar ed Panarian tan say panguley to dia ed dalin. Alimbawa, pinuyanan na espiritu to si apostol Juan pian isulat so bilang na nakaiba nen Jesu-Kristo ed panarian ed tawen ya 144,000. Saraya so matoor ya ariripen na Dios ya “asaliw ira dia ed saray totoo.” (Apocalipsis 7:4; 14:1-4) Uleyan da so dalin “a miari ra” a kaiba nen Kristo ed tawen. (Apocalipsis 20:4-6) Ontanlan mapekder so panagmatalek na saraman ya inmunan-siglon Kristianos ed si Jehova a sumpalen to so gagala to para’d mangatatawen a Panarian tan say mangaraldalin a sakop to a sengegan na inkamabulos dan ompatey nisesengeg ed pananisia ra. Dakel ed sikara so talagan nanggawa na ontan.

18. Panon ya aaligen na saray Tasi nen Jehova iray kapara ra ed inmuna ran panaon?

¹⁸ Natan, ngalngali limaran milyon na Tastasi nen Jehova so walaan na parehon panagmatalek ed Dios a singa ed saray kapara a nambilay na nilasus taon sakbay da. Sarayan Tasi ed kaplesan a panaon so angiyan met na bilay da ed kaatapan nisesengeg ed saray sipan na Dios. Intalaga ra ed sikato so bilay da tan walaan ira na interon Biblia a mamabiskeg ed pananisia ra. (2 Timoteo 3:14-17) Sarayan modernon-agew a Tastasi nen Jehova so mangaalig ed saray patumbok nen Jesus ed inmunan siglo ya angiyabawag ya ‘nakaokolan dan onuren so Dios, nen saray totoo.’ (Gawa 5:29) Diad sayan siglo dakel ed sarayan Kristianon Tastasi so siruruksan pinasegsegang, pigara so pinatey ni ingen lapud pananisia ra. Say arum so inatey lapud sakit, aksidente, odino inkatatken. Balet, singa saray matoor a tasi ed apalabas a panaon, sikaray nanmatalek ed Dios lapud kabat da a sikaray ipawil to ed bilay ed balon mundo to diad panamegley na kioli.​—Juan 5:28, 29; Gawa 24:15; Apocalipsis 20:12, 13.

19, 20. Anto so bidbiren tayo nipaakar ed propesiya ed Biblia para’d agew tayo?

¹⁹ Papablien na saray Tasi nen Jehova a say ipapaway da manlapud amin a nasyon pian magmaliw a sakey a sankagloboan a sanaagi so abayag lan nipropesiya ed Biblia. (Isaias 2:2-4; Apocalipsis 7:4, 9-17) Tan gagawaen nen Jehova a gawaen da so sankamundoan a panagpulong a kimey pian tiponen ed pabor tan salimbengan to so arum nin matuan impanpuson totoo. (Uliran 18:10; Mateo 24:14; Roma 10:13) Amin na saya so sigpot a manmamatalek ed si Jehova, diad pakaamta ya agla manbayag et itarok to so makapakelkelaw a balon mundo to.​—Ipareng so 1 Corinto 15:58; Hebreos 6:10.

²⁰ Ipapanengneng na saray propesiya ed Biblia a say mundo nen Satanas so wala lad kaunoran ya agew ed loob na ngalngalin 80 a taon natan, nanlapulad importantin taon na 1914. Manasingger lay anggaan na sayan mundo. (Roma 16:20; 2 Corinto 4:4; 2 Timoteo 3:1-5) Kanian saray Tasi nen Jehova so walaan na tepel tan determinasyon lapud namomoria ra ya agla manbayag et panganggaen na Panarian na Dios so sigpot a mamanlong ed amin a kurang na dalin. Diad angaan na sayan mauges a mundo tan pangiparungtal ed matunong a balon mundo to, kumpleton ekalen na Dios so mauges a kipapasen a niwawala ed dalin ed loob na dakerakel a siglo.​—Uliran 2:21, 22.

21. Akin a makapangayaga itayo antokaman so kaplesan iran problema tayo?

²¹ No ontan, diad panaon ya anggapoy anggaan, ipanengneng na Dios so baleg a panalima to ed sikatayo diad panamegley na pamauran to na bendisyon a labas nin makabayar ed saray sakit ya asagmak ed apalabas. Dakel a tuloy a maabig a bengatla so nagawa ed sikatayo ed balon mundo a saray datin problema tayo so nalingwanan. Agaylan makapaligliwa a naamtaan a diad satan a panaon et ‘buskagen [nen Jehova] so lima to tan peneken to iray pilalek na ami bengatlan mabilay.’​—Salmo 145:16; Isaias 65:17, 18.

22. Akin a manmatalek tayo ed si Jehova?

²² Diad balon mundo, say matoor a katooan so makapantasi ed kasumpalan na Roma 8:21: “Say pinalsa a dili niliktar ed inkaaripen na kabolokan a onloob ed kawayangan na gloria na saray anak na Dios.” Naimatonan da so kasumpalan na sayan pikakasin imbangat nen Jesus ed saray patumbok to: “Onsabi komon so panarian mo. Nagawa komon so linawam, onong ed tawen, ontan met ed dalin.” (Mateo 6:10) Kanian sigpot a manmatalek kayo ed si Jehova lapud say anggapoy-saew a sipan to so: “Say matunong tawiren to so dalin tan manayam diman lawas.”​—Salmo 37:29.

Panon Mon Ebatan?

◻ Anto so gagala nen Jehova para’d totoo tan para’d sayan dalin?

◻ Akin ya inabuloyan na Dios so mauges iran kipapasen ed dalin?

◻ Panon ya impanengneng na matoor a totoo so panagmatalek da ed si Jehova?

◻ Akin a manmamatalek iray ariripen nen Jehova natan?

[Litrato ed pahina 16]

Pinalsa na Dios iray totoo ta pian makapanbilay ed ando lan ando ed paraison dalin

[Litrato ed pahina 18]

Nanmatalek si Abraham ed abilidad nen Jehova a manpaoli ed saray inatey