Si Jehova say Dios na Gagala
“Petepeteg, singa ninonot ko, ontan so nagawa; et singa pinegdat ko, ontan so mansiansia naani.”—ISAIAS 14:24.
1, 2. Anto so ibabaga na dakel nipaakar ed gagala na bilay?
SARAY totoo ed inerman so manetepet: “Anto so gagala na bilay?” Sakey a pulitikon lider ed Sagur so nankuan: “Mas dakel a totoo ed kapiganman so manetepet, ‘Siopa itayo? Anto so gagala tayo?’” Sanen nansurbey so sakey a peryodiko ed saray kalangweran nipaakar ed tepet ya anto so gagala na bilay, kaslakan iran ebat so: “Pian gawaen so antokaman a pilalek na pusom.” “Manbilay a sig-sigpot ed kada bekta.” “Panbilay a masayaksak tan mapasirayew.” “Pian nawalaay ananak, manliket tan kayari to et ompatey.” Liknaen na maslak ya onia labat so bilay. Anggapo so anaglawi na antokaman a manbayag a gagala na bilay ed dalin.
2 Sakey ya iskolar nen Confucius so nankuan: “Say ultimon kabaliksan na bilay so naromog ed kaslakan a kiwawala tayo bilang too.” Unong ed saya, saray totoo so mantultuloy a niyanak, mipuligesgesan ed loob na 70 odino 80 a taon, insan ompatey tan agla niwala ed kapiganman. Sakey ya ebolusyonaryon sientista so angikuan: “Nayarin panpirawatan tayo so ‘mas atagey’ ya ebat—balet anggapo iya.” Para’d sarayan ebolusyonista, say bilay so pipupuligesgesan para’d kililiktar, a naynay a mansusumpal ed ipapatey. Saratan a pilosopya so mangipaparungtal na andiay-ilalon panmoria ed bilay.
3, 4. Panon a mangaapekta iray kipapasen na mundo ed panmoria na dakel ed bilay?
3 Dakel so manduaruwa a walaay gagala so bilay sano nanenengneng da a say kiwawala na too so napno na ontanlan inkamiserable. Diad panaon tayo, sano ipapasen so too ya akadampot la ed kapantokan na iyaaligwas ed industriya tan siensia, ngalngalin sakey bilyon a totoo ed sankamundoan so walaay sakit odino onkulang ed nakakaukolan a tagano. Minilyon ya ugugaw so ompapatey a tinaon lapud saratan a sengegan. Niarum ni, diad sayan koma-20 et mamipat a danay so karakel na ompapatey ed bakal no ipareng ed dagup na apalabas ya apatalasus a taon. Say krimen, karawalan, panangabuso ed druga, kabubuyak na pamilya, AIDS tan arum niran seksual a makaalis a sakit—say listaan na negatibon sengegan so ondarakel. Saray lider na mundo so andian na saray solusyon para’d sarayan problema.
4 Nisesengeg ed saratan a kipapasen, imbalikas na sakey a too so sisiaen na dakel: “Anggapoy gagala na bilay. No amin na sarayan mauges a bengatla so nagagawa, anggapoy tanton kabaliksay bilay.” Tan sakey a masiken so nankuan: “Siak so manetepet no akin a wadia ak ed baleg a kabiangay bilay ko. No wala so antokaman a gagala, agla importanti ed siak.” Kanian lapud agkabat na dakel no akin ya aabuloyan na Dios so kairapan, saray makapaaburidon kipapasen ed mundo so sengegan no akin ya anggapoy peteg ya ilalo ra para’d arapen.
5. Akin a saray relihyon ed sayan mundo so sakey nin sengegan na inkawetwet nipaakar ed gagala na bilay?
5 Anggan saray relihyoson pangulo so naapag-apag, tan agmaseguro no nipaakar ed gagala na bilay. Sakey a datin dean na St. Paul’s Cathedral ed London so nankuan: “Diad interon bilay ko et siak so akipuligesgesan pian anapen so gagala na panagbilay. . . . Sinmaew ak.” Tua, dakel a klero so mangibabangat a diad ipapatey et say maong so onla’d tawen tan say mauges so onla’d mangapuy-apuy ya impierno ed ando lan ando. Balet sayan panmoria so siansian manaynan ed katooan diad dalin a manpatuloy ira ed makapairap a kurang to. Tan no gagala met na Dios a diad tawen manbilay iray totoo, akin ya agto lara ginawa ed inmuna a mangatatawen a pinalsa, a singa ginawa to’d saray anghel, tan diad ontan et agla akasagmak iray totoo na agaylan irap? Kanian say inkawetwet nipaakar ed gagala na bilay ed dalin odino say pangikaindan ed panisia a walaan itan na antokaman a gagala so kaslakan la.
Say Dios na Gagala
6, 7. Anto so ibabaga ed sikatayo na Biblia nipaakar ed Sankatalbaan a Soberano?
6 Ingen, say sankalaknaban a nibunog a libro ed interon awaran, say Masanton Biblia, a mangibabaga ed sikatayo a si Jehova, say Soberano na talba, et Dios na gagala. Ipapanengneng na saya ed sikatayo a sikatoy walaan na manbayag, diad tua et andi-geter a gagala para’d sankatooan ed dalin. Tan sano ginagala nen Jehova so sakey a bengatla, anggapoy saew a nagawa itan. No panon a patoboen na uran so bini, kuan na Dios, “ontan met naani so salitak ya ompaway ed sangik; sikato naani ag ompawil ed siak a paoypaoy, no ag ingen sumpalen to naani so kaliktan ko, tan onaliguas naani ed bengatla a pangyakaran ko ed sikato.” (Isaias 55:10, 11) Antokaman so ibaga nen Jehova a sumpalen to “so mansiansia naani [ontua, NW].”—Isaias 14:24.
7 Sikayon totoo so sigpot a makapanmatalek a say Makapanyarin-amin so manumpal ed saray sipan to, ta say Dios so “ag to nayari manburi.” (Tito 1:2; Hebreos 6:18) Sano ibaga to ed sikatayo a gawaen so sakey a bengatla, say salita to so sakey a garantiya a saman so nagawa. Singano asumpal la iman. Iyaabawag to: “Ta siak so Dios, et angapo la so sananey; Dios ak, et angapo so mipara ed siak; Ya ipaliwawak so pangangaan a manlapu ed gapo, tan nanlapu nen inmuna a panaon ipaliwawak so saray bengatla ya ag ni agawa; a kuanko, Say simbawak mansiansia naani, tan gawaen ko naani so amin a labay ko; A tawagen ko so sakey . . . on sinalitak, gawaen ko naani ya onlabas met; ninonot ko, sikato naani met so gawaen ko.”—Isaias 46:9-11.
8. Kasin saraman so masimoon a malabay a mangamta ed Dios so makaromog ed sikato?
8 Nagkalalo ni, si Jehova “ag to labay ya wala so siopaman a natawtaw no ag ingen amin komon nagegemtan da so panagsibkel.” (2 Pedro 3:9) Lapud sayan rason, agto labay a siopaman so magmaliw ya ignoranti nipaakar ed sikato. Sakey a propetan manngaran na Azarias so nankuan: “No sikato so anapen yo, sikato so naromog yo; balet no sikato so ikaindan yo, sikayo so ikaindan to.” (2 Awaran 15:1, 2) Kanian, saramay masimoon a malabay a mangamta ed Dios tan saray gagala to so maseguron makagawa ed satan no panggunaetan dan anapen.
9, 10. (a) Anto so intarya para’d saray malabay a mangamta ed Dios? (b) Anto so amasarag ed sikatayon nagawaan so panagsukimat ed Salita na Dios?
9 Balet iner so pananapan? Para’d saramay talagan manaanap ed Dios, intarok to so Salita to, say Biblia. Diad panamegley na masanton espiritu, say parehon aktibon puersan inusar to ed impamalsa na talba, inwanwan na Dios so matoor a lalaki pian isulat so kaukolan dan amtaen nipaakar ed saray gagala to. Alimbawa, nipaakar ed propesiya na Biblia, inkuan nen apostol Pedro: “Ta angapo so profecia a nanlapu ed linawa na too, no ag saray totoo nansalita ra nanlapu ed Dios, diad inpanenieg ed sikara na Espiritu Santo.” (2 Pedro 1:21) Mipadpara, si apostol Pablo so angiyabawag: “Amin a Sulat ya inpuyan na Dios, sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan, pian say too na Dios angapo komon so pankulangan to, a nabangatan a maong ed amin a gawa a maabig.”—2 Timoteo 3:16, 17; 1 Tesalonica 2:13.
10 Imanoen a say Salita na Dios so manggawa ed sikatayon magmaliw ya “anggapo komon so pankulangan to, a nabangatan a maong,” imbes a kabiangan lambengat odino agkumpleto. Saya so mamakayari ed sakey a naseguro no siopa so Dios, antoray gagala to, tan anto so kakaukolanen to ed ariripen to. Saya so nailaloan manlapud libro a say Dios so autor. Tan satan labat so nasukimat tayo pian mangamor na suston pikakabat ed Dios. (Uliran 2:1-5; Juan 17:3) Diad panggawa na ontan, sikatayo la so ‘ag la manugaw-ugawan, a nipalpalig dia tan diman tan nitektekiab ed antokaman a dagem na bangat, onong ed saray kasiliban na totoo, dia ed asaolan da, onong ed panamalingo na kalingo.’ (Efeso 4:13, 14) Imbalikas na salmista so dugan panmoria: “Say salitam sikato so sakey a silewan ya onkana ed saray sali-salik, tan sakey a liwawa ya onkana ed basbas ko.”—Salmo 119:105.
Progresibon Imparungtal
11. Panon ya imparungtal nen Jehova iray gagala to ed katooan?
11 Diad gapo lambengat na sankaabungan na too et imparungtal la nen Jehova iray gagala to nipaakar ed sayan dalin tan saray totoon wadia. (Genesis 1:26-30) Balet sanen impulisay na inmunan atateng tayo so inkasoberano na Dios, say too so naplag ed espiritual a kabilungetan tan ipapatey. (Roma 5:12) Anggaman kuan, kabat nen Jehova a walaramay mankaliktan a manlingkor ed sikato. Kanian, diad ilalabas na nilasus a taon, progresibo ton imparungtal iray gagala to ed matoor ya ariripen to. Arum ed saray akitalosan to et sikara di Enoc (Genesis 5:24; Judas 14, 15), Noe (Genesis 6:9, 13), Abraham (Genesis 12:1-3), tan si Moises (Exodo 31:18; 34:27, 28). Say propeta na Dios a si Amos so nansulat: “Petepeteg angapo naani gawaen nen Katawan a Jehova, ya ag naani nipuyan so inamot to ed saray aripen to a profeta.”—Amos 3:7; Daniel 2:27, 28.
12. Panon ya angiter si Jesus na nagkalalon liwawa nipaakar ed saray gagala na Dios?
12 Sanen say Anak na Dios, si Jesu-Kristo, so wadiad dalin ngalngali 4,000 a taon kayari na rebelyon diad Eden, imparungtal niray dakel a detalye na saray gagala nen Jehova. Saya so nagkalautla nipaakar ed gagala na Dios a mangiletneg na mangatatawen a Panarian a manguley ed sankadalinan. (Daniel 2:44) Satan a Panarian so ginawa nen Jesus a pinagkatema na bangat to. (Mateo 4:17; 6:10) Imbangat to tan saray babangatan to a diad silong na satan a Panarian et say orihinal a gagala na Dios para’d dalin tan para’d katooan so nasumpal. Say dalin so gawaen a sakey a paraiso a panayaman na ayadyarin totoo, a manbilay ed ando lan ando. (Salmo 37:29; Mateo 5:5; Lucas 23:43; 2 Pedro 3:13; Apocalipsis 21:4) Nilikud ed satan, indemostra nen Jesus tan saray babangatan to iray nagawa ed satan a balon mundo diad panamegley na saray milagro ya impakayari na Dios a nagawaan da.—Mateo 10:1, 8; 15:30, 31; Juan 11:25-44.
13. Nipaakar ed saray pidedeneng na Dios ed sankatooan, anton pananguman so agawa nen Pentecostes 33 K.P.?
13 Nen Pentecostes 33 K.P., 50 agew kayari na inkioli nen Jesus, say espiritu na Dios so nikalbo ed kongregasyon na saray patumbok nen Kristo. Saya so analat ed agmatoor ya Israel bilang kasipanan nen Jehova a totoo. (Mateo 21:43; 27:51; Gawa 2:1-4) Say panangikalbo na masanton espiritu ed saman ya okasyon so sakey a paneknek a, nanlapulad saman a panaon a manpatuloy, say Dios so mangiparungtal na saray katuaan nipaakar ed saray gagala to diad panamegley na sayan balon ahensya. (Efeso 3:10) Legan na inmunan siglo K.P., ya inletneg so organisasyonal ya inkasangal na Kristianon kongregasyon.—1 Corinto 12:27-31; Efeso 4:11, 12.
14. Panon a nabidbiran na saray manaanap ed katuaan so tuan Kristianon kongregasyon?
14 Natan, nabirbiran na saray manaanap na katuaan so tuan Kristianon kongregasyon diad panamegley na agmanguman a panangipatnag to ed manunan kalidad na Dios, say aro. (1 Juan 4:8, 16) On, say inaagin aro so sakey a pakabidbiran a marka na tuan Inkakristiano. Inkuan nen Jesus: “Lapu ed saya amin a too nabirbiran da’ya sikayo ray babangatan ko, no wala so aro yo ed sakey tan sakey.” “Saya so gangan ko, a manaaroan so sakey tan sakey ed sikayo, salanti singa inpangarok ed sikayo.” (Juan 13:35; 15:12) Tan pinanonotan nen Jesus iray dumerengel to: “Sikayo so kakaarok, no gawaen yo so saray bengatla ya ingangan ko ed sikayo.” (Juan 15:14) Kanian saray tuan ariripen na Dios et saramay manusumpal ed ganggan na aro. Agda lambengat tongtongen itan, ta “say pananisia ya andi gawa inatey.”—Santiago 2:26.
Kaliwawaan
15. Diad anto a saray ariripen na Dios so napaseguroan?
15 Impropesiya nen Jesus a diad ilabas na panaon, say tuan Kristianon kongregasyon so naliwawaan lan naliwawaan nipaakar ed saray gagala na Dios. Insipan to ed saray patumbok to: “Say Managligliwa, salati say Espiritu Santo, a sikato so ibaki dia na Ama ed ngaran ko, ibanga’to ed sikayo so amin a bengabengatla.” (Juan 14:26) Inkuan met nen Jesus: “Nia, walaak a naynay ed sikayo, ya anga ed kasampotan na mundo.” (Mateo 28:20) Kanian, say kaliwawaan a mitukoyan ed katuaan nipaakar ed Dios tan saray gagala to so mantultuloy ya ondaak ed limog na ariripen na Dios. On, “say basbas na matunong sikato so singa liwawa na kabuasan, ya onsinag ya onsinag anga ed nagnap ya agew.”—Uliran 4:18.
16. Anto so ibabaga ed sikatayo na espiritual a pakaliwawaan nipaakar ed no antoy talindeg tayo ed saray gagala na Dios?
16 Natan, satan ya espiritual a liwawa so lalon onliliwawa ed kapiganman, ta wala itayo la ed panaon a dakel a propesiya ed Biblia so nasusumpal odino asingger lay kasumpalan da. Saraya so mangipapanengneng ed sikatayo a sikatayoy manbibilay ed “kaonoran iran agew” na sayan mauges a sistema na bengabengatla. Saya so panat na panaon a tinawag a “say konklusyon na sistema na bengabengatla, NW”; saya so tumbokan na balon mundo na Dios. (2 Timoteo 3:1-5, 13; Mateo 24:3-13) A singa impropesiya nen Daniel, say mangatatawen a Panarian na Dios so asingger lan onkiwas pian “buyakbuyaken to naani tan opoten to naani so saraya ya amin a panarian, et sikato so mansiansia lawas.”—Daniel 2:44.
17, 18. Antoray engraden propesiyan nasusumpal la natan?
17 Kabiangan na saray propesiyan nasusumpal la natan et say nirekord ed bersikulo 14 na Mateo kapitulo 24. Ditan et inkuan nen Jesus: “Saya ya evangelio na panarian nipulong naani ed sankamundoan ya onkanan pamintuaan ed saray amin a naciones; et saman la onsabi angaan.” Diad sankadalinan, satan a panangipulong-na-Panarian so gagawaen na minilyon a Tastasi nen Jehova. Tan nilasus nilibon totoo so niyaarum ed sikara ed tinaon. Saya so mitunosan ed propesiya ed Isaias 2:2, 3, a nankuan a “ed saray kaonoran ya agew” na sayan mauges a mundo, saray totoon manlapud dakel a nasyon so onla ed tuan panagdayew ed si Jehova, tan ‘ibangat tora ed saray dalan to, tan manakar ira ed saray basbas to.’
18 Sarayan balo ni so ondadagsa ed panagdayew ed si Jehova “a singa lurem,” unong ed impangipasakbay na Isaias kapitulo 60, bersikulo 8. Iyarum ni na bersikulo 22: “Say daiset magmaliw naani a sanlibo, et say melag magmaliw naani a mabiskeg a nacion. Siak si Jehova, sikato naani gawaen ko a mangano ed panaon to.” Satan a panaon, unong ed ipapanengneng na ebidensya et natan la. Tan saray balo ni so makapanmatalek a diad pilimog ed saray Tasi nen Jehova, sikaray akapiarap ed tuan Kristianon kongregasyon.
19. Akin ya ibabaga tayo a saray balo nin mililimog ed Tastasi nen Jehova so oonla ed tuan Kristianon kongregasyon?
19 Akin a nibaga tayo iya tekep na inkamaseguro? Lapud sarayan balo ni, pati ed minilyon lan wala’d loob na organisasyon nen Jehova, so angitalaga ed saray bilay da ed Dios tan manggagawa na linawa to. Lalaktipen na saya so panbilay a mitunosan ed ganggan na maridios ya aro. Bilang sakey ya ebidensya na saya, saray Kristiano so ‘amitpit ed saray kampilan da a pinagmaliw a dingding na lokoy tan saray gayang da a komkompay tan aglanbalot manaaral na bakal.’ (Isaias 2:4, NW) Amin a Tasi nen Jehova ed sankamundoan so nanggawa na ontan lapud aagamilen da so aro. Saya so mankabaliksan a sikaray agbalot mangawit na saray armas ed bakal sumpa ed balang sinansakey odino ed siopaman. Diad onian paraan a sikaray nikadkaduma—aliwan singa saray relihyon na mundo. (Juan 13:34, 35; 1 Juan 3:10-12, 15) Sikaray agmibabali ed nasyonalismo a mamapalesa na inkaapag-apag, lapud sikaray mamoporma na sakey a sankagloboan ya impanaagi a pinaelet na aro, “singer yo ed inkayadyari.”—Colosas 3:14; Mateo 23:8; 1 Juan 4:20, 21.
Maslak et Gagalaen Dan Agkabaten
20, 21. Akin a saray karaklan na katooan so walad espiritual a kabilungetan? (2 Corinto 4:4; 1 Juan 5:19)
20 Bangta say espiritual a liwawa so onliliwawa ed leet na ariripen na Dios, say nakekeraan a kabiangan na totoo ed dalin so onlelereg ed lalon-babaleg ya espiritual a kabilungetan. Agda kabat si Jehova odino saray gagala to. Deneskribe na propeta na Dios iyan panaon sanen inkuanton: “Ta, nia say kabilungetan sakbongan to so dalin, tan say kabilungetan so saray balbaley.” (Isaias 60:2) Onia iya lapud saray totoo so ag-angipatnag na masimoon ya interes nipaakar ed Dios, nisay ipapanengneng da so pilalek a panggunaetan a sikatoy paliketen. Inkuan nen Jesus: “Et sikato ya so pakaokoman, a say silew linmadia ed mundo, et saray totoo inaro ra so kabilungtan nen say silew; ta saray gawa ra mauges. Ta balang sakey a mangawa na mauges gulaen to so silew et ag ondago ed silew, ompan nabalaw so saray gawa to.”—Juan 3:19, 20.
21 Saratan ya indibidual so aliwan talagan interesadon mangamta no anto so linawa na Dios. Imbes, say bilay da so akasentro ed panggawa na dili ran linawa. Diad pangibabaliwala ed linawa na Dios, sikaray nipapasen ed sakey a mapeligron kipapasen, ta iyaabawag na Salita to: “Say mangyarawi ed layagto manlapu ed pandengel ed tunong, angan say pikakasi to sikato so makapadimla.” (Uliran 28:9) Sikara so mangebat ed saray pansumpalan na pilien dan kurang. Insulat nen apostol Pablo: “Ag kayo nalingo; Say Dios ag nayarin naludlurey: ta say antokaman ya itanem na too satan met so anien to.”—Galacia 6:7.
22. Anto so gagawaen na dakel a totoo a malabay a mangamta ed Dios?
22 Anggaman ontan, dakel so malabay a mangamta ed linawa na Dios, a sisimoon a mananap ed sikato, tan niyaasingger ed sikato. “Singer kayo ed Dios, et sikato so onsinger naani ed sikayo,” kuan na Santiago 4:8. Nipaakar ed saratan, inkuan nen Jesus: “Say mangawa na tua ondago ed silew, pian saray gawa to niparongtal ira ya sikara so agawa dia ed Dios.” (Juan 3:21) Tan agaylan makapakelkelaw ya arapen so ginagala na Dios para’d saramay onasingger ed liwawa! Say ontumbok ya artikulo tayo so maningbat ed sarayan makapaliket ya ilalo.
Panon Mon Ebatan?
◻ Anto so ibabaga na dakel nipaakar ed gagala na bilay?
◻ Panon ya ipaparungtal nen Jehova so inkasikato bilang Dios na gagala?
◻ Anto so baleg ya inkaliwawaan ya agawa ed inmunan siglo K.P.?
◻ Panon a nabidbir natan so tuan Kristianon kongregasyon?