Saray Manangakbibit na Liwawa—Parad Anton Gagala?

“Tinuro ta kayo bilang silew na nasyones.”​—GAWA 13:47, NW.

1. Panon a si apostol Pablo so naimpluensyaan na ganggan ya atukoy ed Gawa 13:47?

“IPAPASAKBAT nen Jehova so ganggan ed sikatayo diad sarayan salita, ‘Tinuro ta kayo bilang silew na nasyones, pian onkanan kilabanan ya angga ed kasampotan na dalin,’” kuan nen apostol Pablo. (Gawa 13:47, NW) Agto labat inkuan itan noagta binidbir to so inkaseryoso na satan. Kayari impagmaliw [ton] Kristiano, intalaga nen Pablo so bilay to diad panumpal ed satan a ganggan. (Gawa 26:14-20) Kasin satan a ganggan so nipapasakbat met ed sikatayo natan? No ontan, akin ya importante itan ed agew tayo?

Sanen ‘Saray Silew so Narep’ Parad Katooan

2. (a) Unong a say mundo so linmoob ed panaon na anggaan to, anto so agawa a matalonan angapekta ed espiritual tan moral a kipapasen to? (b) Panon so inkiwas na sakey ya embahador diad Britanya ed anengneng ton nagagawa nen Agosto 1914?

² Sakbay a niyanak so maslak a totoon manbibilay natan, linmoob iyan mundo ed panaon na anggaan to. Maples a nantutumbokan ya agawa iray manunan ebento. Si Satanas a Diablo, say hepen promotor na espiritual tan moral a kabilungetan so nibasileng ed dalin. (Efeso 6:12; Apocalipsis 12:7-12) Nimedmer la so mundo ed inmunan guerra mundial to. Asasakbay nen Agosto 1914, sanen aseguradon wala lay bakal, si Sir Edward Grey a sekretaryo na estado na Britanya parad foreign affairs, sanen tinmandag ed opisina to diad London: “Saray silewan so naeerep ed interon Europa; saratan so agtayo la nanengneng lamet ya onsilew ed kasampotan na bilay tayo.”

3. Anto so walan aligwas ed papangulo na mundo diad panggugunaet a pasindagen so panmoria parad katooan?

³ Diad gunaet a saraman so pasilewen lamet, nipakurang so Liga na Nasyones nen 1920. Balet saray silew so mankuddiem. Diad sampot na komaduan guerra mundial, sinali lamet na minumundon papangulo, natan diad panamegley na organisasyon a Nasyones Unidas. Aminsan lamet, saray silew so agsinminag. Anggaman ontan, nisesengeg ed agano niran ebento, saray pangulo na mundo so mantotongtong nipaakar ed “oksuy na balon mundo.” Balet agnibaga ya antokaman a “balon mundo” a gawa ra so mangitatarok na tuan kareenan tan kaligenan. Diad kasuniyan to, say di-armas a kolkolan, pansesepakan ed saray tribu, krimen, kaandian na trabaho, inkaduka, polusyon ed kaliberliber, tan sakisakit so amin et mantutultuloy a mamokpok ed panliket na totoo ed bilay.

4, 5. (a) Kapigan tan panon a sinmabi so kabilungetan ed atooan a pamilya? (b) Anto so nakakaukolan ta pian nitarok so inawa?

⁴ Diad kapetegan et sakbay ni na 1914 a narep iray silew parad katooan. Agawa itan ed apalabas lan 6,000 taon ed Eden, sanen say inmunan atooan ya ateng tayo et pinili da so panggawa na saray dili ran desisyon ya andiay-panangimano ed nibalikas a linaway Dios. Saray makapaot-ot ya eksperiensia na atooan a rasa nanlapulad saman so drama lambengat diad silong na tutukoyen na Biblia a “pakauley ed kabilungetan.” (Colosas 1:13) Diad silong na impluensya nen Satanas a Diablo a say inmunan too, si Adan so angimedmer ed mundo diad kasalanan; tan manlapud si Adan, say kasalanan tan ipapatey so linmaknab ed amin a katooan. (Genesis 3:1-6; Roma 5:12) Kanian, abalang na katooan so panangabobon nen Jehova, say Subol na liwawa tan bilay.​—Salmo 36:9.

⁵ Say dalan lambengat pian say silew so onsinag lamet parad siopaman ed katooan et no nagamoran da so abobon nen Jehova a Dios, say Manamalsa na katooan. Insan, “say belo ya amalkot ed amin a too,” say inkakondena lapud kasalanan, so naekal. Panon a posibli iya?​—Isaias 25:7.

Say Sakey a Niiter “Bilang Silew na Nasyones”

6. Antoran engranden iilaloan so ginawa nen Jehova a posibli parad sikatayo diad panamegley nen Jesu-Kristo?

⁶ Anggan sakbay a pinapaway si Adan tan si Eva ed Paraiso, impasakbay nen Jehova so sakey a “bini” a magmaliw a manangiliktar ed saray manangaro na inkatunong. (Genesis 3:15) Kasumpal a tuloy na atooan a kiyanak na satan a nisipan a Bini, pinakiwas nen Jehova si masiken lan Simeon diad templo na Jerusalem, a mangipabidbir ed saman bilang say “sakey a silew a panagkapuyan ed saray Gentiles.” (Lucas 2:29-32) Diad panamegley na pananisia ed inkibagat na ayadyarin atooan a bilay nen Jesus, nibulos iray totoo ed panangondena nisesengeg ed atawir a kasalanan. (Juan 3:36) Mitunosan ed linawa nen Jehova, makapanilalo ra natan ed andi-anggaan a bilay diad inkayadyari a bilang kabiangan na mangatatawen a Panarian odino bilang uuleyan na satan a Panarian diad paraison dalin. Agaylan makapakelkelaw a probisyon itan!

7. Akin a namparan saray sipan diad Isaias 42:1-4 tan say kasumpalan da ed inmunan-siglo so mamano ed sikatayo na ilalo?

⁷ Si Jesu-Kristo a mismo so garantiya ed kasumpalan na sarayan engranden ilalo. Mitukoyan ed impantambal nen Jesus ed apairap a totoo, inyaplika nen apostol Mateo ed sikato so nisulat ed Isaias 42:1-4. Kuan na satan a kasulatan, diad kabiangan: “Nia, say aripen ko, a sikato so ampayaen ko; say pinilik; a panliketan na kamarerwak: inyan ko so Espirituk ed sikato: sikato yakar to naani inkatunong ed saray Gentil.” Tan agta saya so nakakaukolan na totoo ed amin a nasyones? Ituloy na propesiya: “Sikato ag naani onakis, tan agto met itagey so voces to, tan agto met gawaen a narengel ed polong. Say sakey a kawayan ya abalbal agto naani poteren, tan say sakey a pabilo a mandarlang a makuyep agto naani erepen.” Mitunosan ed saya, agmaruksa so impantrato nen Jesus ed saray apairap lan totoo. Sikatoy angipanengneng na panangabagey ed sikara, sikaray imbangat to nipaakar ed saray gagala nen Jehova, tan tinambal tora.​—Mateo 12:15-21.

8. Diad anton pantalos a si Jesus so initer nen Jehova “bilang sakey a sipanan ed balbaley” tan “bilang silew na naciones”?

⁸ Ipapabidbir na Manangiter ed sayan propesiya so inkasikato ed Aripen ton Jesus, tan kuanto: “Siak, si Jehova, tinawag ta ka ed inkatunong, tan egnaan ko naani limam, tan kawaloen ta ka naani, tan iter to ka naani a nipaakar a sakey a sipan ed saray totoo, nipaakar a sakey a silew na saray Gentil; Pian lukasan mo so saray bulag a mata, pian ipaway mo so saray pinangaw ed mainget a panangipangawan, tan saray manyorong ed kabilungetan ipaway mora ed panangipangawan.” (Isaias 42:6, 7) On, initer nen Jehova si Jesu-Kristo bilang sakey a sipanan, bilang sakey a matoor a pinagkagarantiya. Agaylan makapaseseg itan! Impanengneng nen Jesus so peteg a paga to parad katooan sanen sikatoy wadiad dalin; ya inter to ni ingey bilay to nisesengeg ed katooan. Saya so angimatalkan nen Jehova na pananguley ed amin a nasyon. Agpankelawan a sikatoy tinukoy nen Jehova bilang silew na nasyones. Inkuan a mismo nen Jesus: “Siak so silew na mundo.”​—Juan 8:12.

9. Akin ya ag-intalaga nen Jesus so inkasikato diad pamaaligwas ed walan sistema na bengabengatla nensaman?

⁹ Diad anton gagala a si Jesus so kinmana bilang silew na mundo? Seguradon aliwan lapud antokaman a sekular odino materyalistikon gagala. Agto sinalin peteken so walan mapulitikan sistema nensaman tan agmangawat ed inkaari balanglan manlapud si Satanas, say manuley na mundo, odino manlapud saray mibabaley. (Lucas 4:5-8; Juan 6:15; 14:30) Impanengneng nen Jesus so baleg a panangabagey ed saramay napapairap tan inikdan tora na pakainawaan diad saray paraan ya agnayarian ya iter na arum. Ingen amta to a say magnayon a pakainawaan et agnadampot diad balangkas (framework) na sosyedad na too a nisilong ed madibinon panangondena lapud atawir a kasalanan tan imamaneobra na agnanengneng iran marelmeng ya espiritun puersa. Tekep na maridios ya aralem a pakatalos, inyapasakey nen Jesus so interon bilay to diad panggaway linaway Dios.​—Hebreos 10:7.

10. Diad antoran dalan tan para ed anton gagala a si Jesus so kinmana bilang silew na mundo?

¹⁰ Diad antoran dalan tan ed anton gagala, sirin, a kinmana si Jesus bilang silew na mundo? Intalaga to so inkasikato ed panangipulong na maong a balita na Panarian na Dios. (Lucas 4:43; Juan 18:37) Diad impantasi [to’d] katuaan nipaakar ed gagala nen Jehova, apasantos met nen Jesus so ngaran na mangatatawen ya Ama to. (Juan 17:4, 6) Niarum ni, bilang silew na mundo, si Jesus so angiparungtal ed saray relihyoson katilaan tan diad ontan et nitarok so espiritual a kawayangan parad saramay relihyoson nipangaw. Inwalwal toy Satanas bilang say agnanengneng a manangimaneobra’d saramay mangiyabuloy ed inkasikaran usaren to. Si Jesus met so malinew ya angipabidbir ed saray kimey na kabilungetan. (Mateo 15:3-9; Juan 3:19-21; 8:44) Manuna ed amin, pinaneknekan ton sikatoy silew na mundo diad impangibagat ed ayadyarin atooan a bilay to bilang dondon, sirin angilukas na dalan parad saramay mangagamil na pananisia ed sayan probisyon a naperdona iray kasalanan, sakey a naabobonan a relasyon ed Dios, tan say ilalo ed andi-anggaan a bilay bilang kabiangan na sankatalbaan a pamilya nen Jehova. (Mateo 20:28; Juan 3:16) Tan kaunoran, diad impamasiansia na ayadyarin maridios a debosyon ed interon bilay to, si Jesus so angitandoro ed inkasoberano nen Jehova tan pinaneknekan [ton] matila so Diablo, sirin ginawa ton posibli iray magnayon a gungguna parad saray manangaro ed inkatunong. Balet, kasin si Jesus lambengat so manangakbibit na silew?

“Sikayo so Silew na Mundo”

11. Pian sikara so magmaliw a manangakbibit na liwawa, anto so nepeg a gawaen na saray babangatan nen Jesus?

¹¹ Diad Mateo 5:14, imbaga nen Jesus ed saray babangatan to: “Sikayo so silew na mundo.” Kaukolan a tumboken daray bakat to. Namparan diad dalan na panagbilay tan panagpulong da, kaukolan ya iwanwan da so arum ed si Jehova bilang say Subol na tuan pakaliwawaan. Diad pangalig ed si Jesus, kaukolan dan ipakabat so ngaran nen Jehova tan itandoro so inkasoberano To. Singa ginawa nen Jesus, kanian sikaray kaukolan a mangiyabawag ed Panarian na Dios bilang mogmon ilalo na katooan. Kaukolan ya iwalwal da met so relihyoso iran katilaan, saray gawa na kabilungetan, tan say marelmeng a walad benegan na sarayan bengatla. Saray patumbok nen Kristo so kaukolan a mangibaga ed totoo diad inerman nipaakar ed maaron probisyon nen Jehova parad kilalaban diad panamegley nen Jesu-Kristo. Tan alay seseg a ginawa na asasakbay a Kristianos itan a kimey, ya inmunan ginmapo ed Jerusalem tan Judea tan insan amaarap ed Samaria, unong ed inganggan nen Jesus!​—Gawa 1:8.

12. (a) Panon kaarawi so kilaknab na espiritual a liwawa? (b) Anto so agawaan na espiritu nen Jehova diad impakatebek nen Pablo nipaakar ed Isaias 42:6, tan panon a satan a propesiya so mangapekta ed bilay tayo?

¹² Anggaman ontan, say panangipulong na maong a balita so aglimitado labat ed saman a lawak. Binilin nen Jesus iray patumbok ton “mangawa na saray babangatan ed amin a naciones.” (Mateo 28:19) Diad saman a panaon na inkakumberte nen Saulo a taga-Tarsus, espisipikon impanengneng na Katawan a si Saulo (a nagmaliw ya apostol Pablo) so kaukolan a manpulong aliwa labat ed saray Judio noagta ontan met ed saray Hentil. (Gawa 9:15) Diad tulong na masanton espiritu, naapresya nen Pablo no antoy lalanoren na satan. Kanian, atebek ton say propesiya ed Isaias 42​:6, a direktan asumpal ed si Jesu-Kristo so nipapatnag a ganggan ed amin met na mangagamil na pananisia ed Kristo. Kanian, diad Gawa 13:47, sanen inaon to manlapud Isaias et inkuan nen Pablo: “Ta ontan so ingangan na Katawan [Jehova, NW] ed sikami, a nankuan; Ingaton ta ka a sakey a silew na saray Gentiles. Pian sika so onkanan kilabanan ya anga ed kasampotan na dalin.” Komusta kayo? Kasin impapuso yo itan ya obligasyon a magmaliw a manangakbibit na liwawa? Singa si Jesus tan Pablo, kasin isesentro yo so bilay yo ed panggaway linaway Dios?

Say Liwawa tan Katuaan Manlapud Dios a Mangiwanwan ed Sikatayo

13. Mitunosan ed Salmo 43:3, anto so sankaseetan a pikakasi tayo, tan sumpa ed anto a sasalimbengan itayo na saya?

¹³ No diad saray dilin paraan tayo et salien tayon ‘selselan iray silew tayo,’ pian pasindagen so arapen na katooan, sikatayoy seryoson onsaew ed punto na Salita na Dios. Antokaman so inheneral a gagawaen na mundo, anggaman kuan, saray puron Kristianos so onnenengneng ed si Jehova bilang say tuan Subol na liwawa. Say pikakasi ra so singa say nirekord diad Salmo 43:3, a kuanto: “Ipaway mo so liwawam tan say katuaan mo; ta sikara ibasbasda ak: yakarda ak ya anga ed masanto a pokdol mo, tan dia ed saray abung-abung mo.”

14, 15. (a) Diad antoran dalan a si Jehova so mangibabaki natan na liwawa tan katuaan? (b) Panon tayon nipanengneng a say liwawa tan katuaan na Dios so peteg a mangitotonton ed sikatayo?

¹⁴ Itutultuloy nen Jehova ya ebatan itan a pikakasi na matoor ya ariripen to. Mangibabaki na liwawa diad pangiyabawag ed gagala to, diad panggawa ed ariripen ton talosan itan, tan diad pangitarok ed kasumpalan na iyaabawag to. Sano sikatayoy manpikasi’d Dios, satan so aliwan basta pormalidad, a gagawaen pian ipanengneng labat a masanto itayo. Say magunaet a pilalek tayo et say pangitonton ed sikatayo na liwawan manlalapu’d si Jehova, a singa kuan na salmo. Aawaten tayoy responsabilidad ya itekep ed panangawat na liwawan itatarok na Dios. Singa si apostol Pablo, natetebek tayo a say kasumpalan na Salita nen Jehova et ilalaktip to so nipapatnag a ganggan ed amin a mangagamil na pananisia’d satan. Liknaen tayon singa . . . umuutang ed arum a totoo angga’d pakapangiter tayo’d sikara na maong a balitan inmatalek na Dios ed sikatayo parad satan a gagala.​—Roma 1:14, 15.

¹⁵ Say liwawa tan katuaan ya isisindag nen Jehova ed agew tayo so mangipapatnag a si Jesu-Kristo so aktibon manguuley la’d mangatatawen a trono to. (Salmo 2:6-8; Apocalipsis 11:15) Impasakbay nen Jesus a kaleganan na maarin kiwawala to, sayan maong a balita na Panarian so nipulong ed amin a panaayaman a dalin parad pantasi. (Mateo 24:3, 14) Nagagawa la itan a kimey natan, a nagkalalon ontan, diad interon globo. No gagawaen tayo itan a kimey a sankaimportantian a bengatla ed bilay tayo, peteg a say liwawa tan katuaan na Dios so mangitotonton ed sikatayo, unong ya inkuan na salmista.

Say Mismon Gloria nen Jehova so Onsisindag

16, 17. Panon nen Jehova a pinasindag so gloria to ed singa-biin organisasyon to nen 1914, tan anto so inganggan to ed sikato?

¹⁶ Diad makapasagyat-kamarerwan lenguahe, dedeskribien na Kasulatan so paraan no panon a nilalaknab so madibinon liwawa diad totoo ed inerman a pasen. Say Isaias 60:1-3, a nipapaarap ed “bii” a kien nen Jehova, odino say mangatatawen ya organisasyon na matoor ya ariripen to, kuanto: “Onalagey ka, onsinag ka; ta say liwawam onsabi; et say gloria nen Jehova ompelnak ed sika. Ta, nia say kabilungetan sakbongan to so dalin, tan say makapal a kabilungetan so saray balbaley; balet si Jehova onalagey naani ed tapew mo, et say gloria to nanengneng mo naani ed tapew mo. Et saray nacion ondago ra naani ed liwawam, tan saray ar-ari ed sinag na kapepelnak mo.”

¹⁷ Say gloria nen Jehova so sinminag ed mangatatawen a singa-biin organisasyon to nen 1914 sanen, kayari na andukey a panaon na inpanalagar et inyanak to so Mesianikon Panarian, diad panamegley nen Jesu-Kristo bilang Ari. (Apocalipsis 12:1-5) Say maglorian liwawa nen Jehova so onsisindag tekep na panangabobon ed satan a gobiernon walaay makanepegan parad sankadalinan.

18. (a) Akin a nasasakbongan na kabilungetan so dalin, unong a nipasakbay ed Isaias 60:2? (b) Panon a saray indibidual so niliktar manlapud kabilungetan na dalin?

¹⁸ Diad kasuniyan to, sasakbongan na kabilungetan so dalin tan say makapal a kabilungetan so saray balbaley. Akin? Lapud ipupulisay na nasyones so gobierno na inadaron Anak na Dios a pabor ed uley na too. Iisipen dan diad pangikaindan ed sakey a porma na gobierno na too tan pangadapta na sananey et naresolbi daray problema ra. Balet agmangitatarok iya na inawan iilaloan da. Agda iimanoen no siopa so walad benegan na saray eksena a mangimamaneobra ed nasyones manlapud espiritun pasen. (2 Corinto 4:4) Ipupulisay da so Subol na tuan liwawa, kanian, sikaray wala’d kabilungetan. (Efeso 6:12) Antokaman so gawaen na nasyones, anggaman ontan, saray sinansakey so niliktar manlapud satan a kabilungetan. Diad anton dalan? Diad pangiter na sigpot a pananisia ed Panarian na Dios tan panpasakup ed satan.

19, 20. (a) Akin tan panon a say gloria nen Jehova so nisisindag ed saray alanaan a patumbok nen Jesus? (b) Nisengeg ed anton rason a gagawaen nen Jehova iray nilanaan to a manangakbibit na liwawa? (c) Unong a nipasakbay, panon a “saray arari” tan “bal-baley” so natatangguyor ed inter-Dios a liwawa?

¹⁹ Say Kakristianoan so andian na pananisia ed Panarian na Dios tan agmanpapasakup ed satan. Balet saray alanaan-ed-espiritun patumbok nen Jesu-Kristo so walaan na pananisia. Bilang nansumpalan, say madibinon liwawa na panangabobon nen Jehova so onsisindag ed sarayan nanengneng a manangilaman na mangatatawen a biin kien to, tan say gloria to so nipapatnag ed sikara. (Isaias 60:19-21) Pangagayagaan da so espiritual a liwawan agnaekal diad panguman na makapulitika odino ekonomikon kipapasen na mundo. Naeeksperiensia ra so panangiliktar nen Jehova manlapud Babilonia a Baleg. (Apocalipsis 18:4) Pangagayagaan da so imis na abobon to lapud aawaten da so disiplina to tan sitotoor dan itatandoro so inkasoberano to. Walaan ira na masnag iran iilaloan parad arapen, tan panliliketan da so ilalon ipapaarap to ed sikara.

²⁰ Balet diad anton gagala a si Jehova so midedeneng ed sikara diad sayan dalan? Unong ya inkuanton mismo ed Isaias 60:21, ta pian sikato so “napagayaga,” ta pian say ngaran to so nidaydayew tan saray arum so natangguyor ed sikato bilang say alenleneg a tuan Dios​—a mansumpal ed magnayon a kagunggunaan da. Mitunosan ed saya, nen 1931 sarayan managdayew na tuan Dios so angadapta ed ngaran a saray Tasi nen Jehova. Bilang resulta ed impantasi ra, kasin “saray arari” so atangguyor ed liwawan insindag da, unong ya impasakbay nen Isaias? On! Aliwan saray mapulitikan manuley na dalin, noagta say nakekeraan a bilang na saramay nilinyan manguley bilang ararin kaiba nen Kristo diad mangatatawen a Panarian to. (Apocalipsis 1:5, 6; 21:24) Komusta met so “balbaley” odino nasyones? Kasin sikara so naiingganyo ed sayan liwawa? Peteg ya ontan! Anggapo ed mapulitikan nasyones so naiingganyo, balet sakey a baleg ya ulop na totoo a nanlapud amin a nasyon so ondadapag ed Panarian na Dios, tan sililigsan iilaloan da so kililiktar ed balon mundo na Dios. Satan so tuan balon mundo a ditan et say inkatunong so ontalona.​—2 Pedro 3:13; Apocalipsis 7:9, 10.

21. Panon tayon nipanengneng ya agtayo nasaew so gagala na agkanepegan a panangasi nen Jehova diad pangipapagamor [to] ed sikatayo na pakatalos ed linawa to?

²¹ Kasin sakey kayo ed satan ya ombabaleg ya ulop na saray manangakbibit na liwawa? Ipapagamor nen Jehova ed sikatayoy pantalos ed linawa to pian magmaliw itayo met a manangakbibit na liwawa, a singa si Jesus. Diad pangidemostra na seseg ed kimey ya imamatalek nen Jehova ed ariripen to ed agew tayo, amin tayo so mangipanengneng komon ya agtayo nasaew so gagala na agkanepegan a panangasin inanabang na Dios ed sikatayo. (2 Corinto 6:1, 2) Anggapo lay kimey a mas importante ed agew tayo. Tan anggapoy babaleg a pribilihyon nakayarian tayo nen say pangigloria ed si Jehova diad pangisindag tayo’d arum na maglorian liwawan manlalapud sikato.

Panon Yon Ebatan?

◻ Antoray manunan sengegan na grabe iran problema na katooan?

◻ Diad antoran dalan a namparan si Jesus tan saray patumbok to so “silew na mundo”?

◻ Panon a sikatayoy itotonton na liwawa tan katuaan nen Jehova?

◻ Panon so pamapasindag nen Jehova ed gloria to diad organisasyon to?

◻ Parad anton gagala a gagawaen nen Jehova iray totoo to a manangakbibit na liwawa?

[Saray litrato ed pahina 9]

Tutulongan itayo na ebento ed Eden a talosan so grabe iran problema na katooan natan

[Credit Lines]

Tom Haley Sipa

Paringaux/Sipa