“Say Silew so Linmadia ed Mundo”
“Sikatoya so pakaukoman, a say silew so linmadia ed mundo ingen inaro na saray totoo so kabilungetan nen say silew.”—JUAN 3:19.
1. Akin a manepeg ed balang sakey so sinononot nipaakar ed panangukom na Dios?
KASLAKAN a totoo natan so agmapagan tuloy nipaakar ed panangukom na Dios. Ipasen na arum a paborablen tuloy iran ukomen na Dios no sikaray maparanay ya onla ed simbaan tan agmanlalames ed saray kaabay da. Parad dakel, saray bangat na Kakristianoan nipaakar ed impiernon-apuy tan purgatoryo so amakilot ed interon ideya na madibinon panangukom. Balet say nikasmak ya agpananginenen tan panamalikdo na Kakristianoan so agmanguman ed katuaan a balang too diad kaunoran et ukomen na Dios. (Roma 14:12; 2 Timoteo 4:1; Apocalipsis 20:13) Tan dakel so mandepende ed sayan panangukom. Saramay paborablen tuloy a naukom so mangawat na langkap na Dios ya andi-anggaan a bilay, bangta saramay agpaborablen tuloy a naukom so mangawat ed sigpot a bayar na kasalanan: say patey.—Roma 6:23.
2. Anto so letnegan parad panangukom na Dios?
2 Kanian, saray puron Kristianos so sinononot nipaakar ed panangukom na Dios, tan sigugunaet dan panpipilalekan so pamaliket ed sikato. Panon dan gawaen so saya? Diad Juan 3:19, inter nen Jesus ed sikatayo so tombok. Inkuanto: “Sikatoya so pakaukoman, a say silew so linmadia ed mundo ingen inaro na saray totoo so kabilungetan nen say silew, ta saray gawa ra so mauges.” On, say panangukom na Dios so nibase ed no balanglan inaro tayo so silew imbes a say kabilungetan.
“Say Dios so Liwawa”
3. Anto so kabilungetan, tan anto so liwawa?
3 Diad espiritual a pantalos, say kabilungetan so manutukoy ed agpikakabat tan inkaandi-ilalo a walad mundo nen Satanas—anggaman mabetbet ya omparungtal si Satanas a bilang “anghel na liwawa.” (2 Corinto 4:4; 11:14; Efeso 6:12) Diad biek a dapag, say liwawa so manutukoy ed pakatalos tan impormasyon a manlalapud si Jehova a Dios. Sinalita nen Pablo so liwawa sanen insulat to: “Ta say Dios so angikuan: ‘Onsindag komon so liwawa ed kabilungetan,’ tan sikatoy sinmindag ed saray kapusoan tayo pian mangisindag ed sikara na maglorian pikakabat ed Dios ed lupa nen Kristo.” (2 Corinto 4:6) Say espiritual a silew so maapapit a tuloy a nisiglaot ed si Jehova a Dios a si apostol Juan so nansulat: “Say Dios so silew.”—1 Juan 1:5; Apocalipsis 22:5.
4. (a) Panon so impangitarya nen Jehova ed liwawa? (b) Diad anton dalan a nayarian tayon ipatnag so panangaro ed silew?
4 Walan intarya nen Jehova so silew diad panamegley na salita to, a sikato natan so bulos a niwala ed nisulat a nengneng diad Masanton Biblia. (Salmo 119:105; 2 Pedro 1:19) Kanian, peteg ya ibabalikas na salmista so panangaro to ed silew sanen insulat to: “Alay panangarok ed ganggan mo! Sikato so pimorekdek ko ed amin ya agew. Inunor na kamarerwak iray panonot mo, tan aroen ko ra a mapalalo.” (Salmo 119:97, 167) Kasin inaro yo so silew a mipadparan mabitabitar a ginawa na salmista? Kasin maparanay yon babasaen so Salita na Dios, dadalepdepen, tan pambabanikelan ya iyaplika iray ibabaga to? (Salmo 1:1-3) No ontan, aanapen yo so pakaawat na paborablen panangukom ed si Jehova.
“Siak so Silew na Mundo”
5. Diad siopa so akasentroan na madibinon silew?
5 Say manangiter-bilay a silew a manlalapud si Jehova so nipaarap ed persona nen Jesu-Kristo. Diad manangilukas iran salita na Ebanghelyo nen Juan, nabasa tayo: “Diad panamegley nen [Jesus] so kawalaan na bilay, tan say bilay so silew na totoo. Tan say silew so sinminag ed kabilungetan, balet ta ag-atalonaan na kabilungetan itan.” (Juan 1:4, 5) Peteg, si Jesus so walaan na ontan a maapit a koneksyon ed silew a sikatoy tinawag a “say tuan silew a manisindag ed amin a nengneng na too.” (Juan 1:9) Inkuan nen Jesus a mismo: “Lapud wadia ak ed mundo, siak so silew na mundo.”—Juan 9:5.
6. Antoy nepeg a gawaen na sakey a too pian nagamoran so paborablen panangukom a mangipaarap ed andi-anggaan a bilay?
6 Sirin, saramay mangaro ed silew so mangaro ed si Jesus tan walaan na pananisia ed sikato. Imposible so pakagamor na paborablen panangukom no anggapo so panaglawi ed si Jesus. On, diad inengneng lambengat ed sikato bilang say tinuro nen Jehova parad kilalaban a nagamoran tayo so paborablen panangukom. Inkuan nen Jesus: “Say mangagamil na pananisia ed Anak so walaan na andi-anggaan a bilay; balet say agmangunor ed Anak agmakanengneng ed bilay, balet say sanok na Dios so mansiansia ed sikato.” (Juan 3:36) Anggaman kuan, anto so kabaliksan na pangagamil na pananisia ed si Jesus?
7. Say pananisia ed si Jesus so mangisakup ni na pananisia ed siopa?
7 Ununa, inkuan nen Jesus a mismo: “Say manisia ed siak so manisia, aliwan diad siak lambengat, noagta ontan met ed saman so angibaki ed siak; tan say makanengneng ed siak nanengneng to met so angibaki ed siak. Sinmabi ak a bilang silew na mundo, pian siopaman a manisia ed siak so agmansiansia ed kabilungetan.” (Juan 12:44-46) Saramay mangaro ed si Jesus tan mangagamil na pananisia ed sikato so nepeg met a nawalaan na aralem ya aro tan pananisia ed Dios tan Ama nen Jesus, si Jehova. (Mateo 22:37; Juan 20:17) Siopaman a mangusar ed ngaran nen Jesus ed panagdayew da balet onsaew a mangiter na babaleg a galang ed si Jehova so agmangipapatnag na puron panangaro ed silew.—Salmo 22:27; Roma 14:7, 8; Filipos 2:10, 11.
Say “Manunan Ahente” na Dios
8. Panon a say madibinon silew so nisentro ed si Jesus anggan diad sakbay na inkianak to bilang too?
8 Say pangagamil na pananisia ed si Jesus et mankabaliksan met na nagnap a tuloy a pangawat ed betang to ed saray gagala nen Jehova. Say inkamakana na sayan betang so nipabitar sanen inkuan na anghel ed si Juan: “Say panagtasi ed si Jesus so amuyan ed propesiya.” (Apocalipsis 19:10; Gawa 10:43; 2 Corinto 1:20) Manlapud sankaunaan a propesiya ed Eden, amin na saray impuyan a madibinon propesiya so mogmon manutukoy ed si Jesus tan say biang to diad panumpal ed saray gagala na Dios. Mipadpara, imbaga nen Pablo ed saray Kristianos ed Galacia a say Ganggan na sipanan so sakey a “managbangat a mangitonton ed si Kristo.” (Galacia 3:24) Satan a kadaanan a Ganggan na sipanan so adisenyo pian niparaan so nasyon ed isasabi nen Jesus bilang Mesias. Sirin anggan diad sakbay na inkianak to bilang too, say silew a nanlapud si Jehova so nipaarap ed si Jesus.
9. Anto so lalanoren na pangaro ed silew nanlapulad 33 K.P.?
9 Nen 29 K.P., imparungtal nen Jesus so inkasikato ed bautismo tan nilanaan na masanton espiritu, sirin nagmaliw a say nisipan a Mesias. Nen 33 K.P. sikatoy inatey ya ayadyarin too, pinaoli, sinmegep ed tawen, tan diman inter to so balor na bilay to a nisesengeg ed saray kasalanan tayo. (Hebreos 9:11-14, 24) Sayan nangegendanan ya agawgawa so mananda na basiyan diad pidedeneng na Dios ed saray totoo. Natan si Jesus so “Manunan Ahente na bilay,” ‘say Manunan Ahente na kilalaban,’ “say Manunan Ahente tan Manamayadyari na pananisia tayo.” (Gawa 3:15; Hebreos 2:10; 12:2; Roma 3:23, 24) Manlapud 33 K.P. a manpatuloy, saray manangaro ed silew so walan amidbir, tan angawat, a likud ed si Jesus “anggapo so arum a kilabanan, ta anggapo so arum a ngaran ed leksab na tawen a niiter ed saray totoo a kilabanan tayo.”—Gawa 4:12.
10. Akin ya ontanlan importanti so italineng ed saray salita nen Jesus tan tuloken iratan?
10 Say pangagamil na pananisia ed si Jesus so mankabaliksan met na pangawat ed sikato bilang “say Salita” tan say “Makapakelaw a Mananimbawa.” (Juan 1:1; Isaias 9:6) Amin a sinalita nen Jesus so lawas mangipatnag na madibinon katuaan. (Juan 8:28; Apocalipsis 1:1, 2) Say italineng ed sikato so mankabaliksan na bilay tan patey. Inkuan nen Jesus ed saray Judios nen agew to: “Say ondengel ed salitak tan manisiad saman so angibaki ed siak so nawalaan na maandon bilay, tan sikatoy agniakar ed panangukom noagta linmabas ed ipapatey a mamaarap ed bilay.” (Juan 5:24) Nen inmunan siglo K.P., saramay kinmiwas ed saray salita nen Jesus so niliktar a manlapud ambilunget a mundo nen Satanas tan binmilay, a singa ontan. Sikaray niyabawag a matunong ed panmorian magmaliw iran kaiban mananawir diad mangatatawen a Panarian. (Efeso 1:1; 2:1, 4-7) Natan, say itutulok ed saray salita nen Jesus so mangilulukas na dalan parad dakel pian niyabawag a matunong tekep na ilalo ed kiliktar ed Armagedon tan pakagamor na ayayadrin atooan a bilay ed balon mundo.—Apocalipsis 21:1-4; ipareng so Santiago 2:21, 25.
“Ulo na Saray Amin a Bengatla”
11. Anton atagey a pakauley so niiter ed si Jesus nen 33 K.P.?
11 Kayari na inkioli to, say sananey a nengneng na silew so imparungtal nen Jesus ed saray patumbok to. Inkuanto: “Amin a pakauley so niiter ed siak ed tawen tan diad dalin.” (Mateo 28:18) Sirin si Jesus so nitandoro ed sakey a matalonggaring a kipapasen diad sankatalbaan a muyongan nen Jehova. Inter nen Pablo so kaaruman iran detalye sanen inkuanto: “Pinaoli na [Dios] si [Jesus] a manlapud saray inaatey tan pinayurong to ed nikawanan a lima to ed mangatatawen iran pasen, a sangkatalonggaringan nen say amin ya uley tan manuley tan pakayari tan nanarian tan ed amin a ngaran ya abitla, aliwa lambengat a diad sayan sistema na bengabengatla, noagta dia ed onsabi. Impauleyan to met so amin a bengatla ed leksab na saray sali to, tan ginawa ton ulo ed saray amin a bengatla ed kongregasyon, a sikato so laman to.” (Efeso 1:20-23; Filipos 2:9-11) Nanlapulad 33 K.P., say pangaro ed liwawa so angisakup ed pamidbir na atagtagey a kipapasen nen Jesus.
12. Anto so sililiket ya inawat na saray alanaan a Kristianos nanlapulad gapo, tan panon dan impanengneng iya ed praktikal a dalan?
12 Diad kaunoran, amin a katooan so mamidbir ed atagtagey a pakauley nen Jesus. (Mateo 24:30; Apocalipsis 1:7) Anggaman kuan, saray manangaro ed silew, so walan sililiket ya angawat ed satan nanlapulad gapo. Binidbir na saray alanaan a membro na Kristianon kongregasyon si Jesus a bilang “ulo na laman, say kongregasyon.” (Colosas 1:18; Efeso 5:23) Sanen nagmaliw ira a kabiangan na satan a laman, sikaray ‘nipaway manlapud pakayari na kabilungetan tan niyalis ed panarian na Anak na aro na Dios.’ (Colosas 1:13) Manlapulad satan, pambabanikelan da a tumboken so inkapangulo nen Jesus ed kada nengneng na bilay da, tan diad panaon tayo a walan imbangat daray “arum a karnero” a manggawa met na ontan. (Juan 10:16) Say pamidbir ed inkaulo nen Jesus so sakey a makanan nakakaukolan diad pakaawat na paborablen panangukom.
13. Kapigan so inggapo nen Jesus ya angagamil na pakauley ed Panarian, tan anto so tinmumbok ya agawa ed dalin?
13 Diad insegep to ed tawen nen 33 K.P., agtampol inagamil nen Jesus so pakauley to ed sankasigpotan a laknab. Anggaman Ulo na Kristianon kongregasyon, inalagar to so manepeg a panaon pian agamilen so sigpot a pakauley ed amin a katooan. (Salmo 110:1; Gawa 2:33-35) Sinmabi itan a panaon nen 1914, sanen si Jesus so nitrono a bilang Ari na Panarian na Dios tan ginmapo so “kaunoran iran agew” na sayan mundo. (2 Timoteo 3:1) Nanlapulad 1919, say katitipon na nakekeraan iran alanaan so mamapaarap ed kakompleto to. Nagkalautlan nanlapud 1935, a panbibiiganen nen Jesus so katooan ed “karnero,” a manawir na “panarian ya imparaan a parad [sikara],” tan “kanding,” a “mamaarap ed andi-anggaan a kadederal.”—Mateo 25:31-34, 41, 46.
14. Panon ya angipatnag so baleg ya ulop na panangaro ed silew, tan anto so resulta to ed sikara?
14 Makapaliket, say karnero so apaneknekan a dakerakel ed sarayan kaunoran iran agew. Sakey a baleg ya ulop da a manbilang na nilaksalaksa so pinmatnag ed eksena na mundo “a nanlapud amin a nasyones tan tribu tan totoo tan pansasalita.” Singa saray kakaiba ra, say alanaan, sarayan malakarnero so mangaro ed silew. “Inurasan daray kawes da tan pinaputi da ra ed dala na Kordero,” tan sikaray inmakis ed maksil a boses: “Say kilalaban so utang tayo ed Dios, a walan akayurong ed trono, tan dia ed Kordero.” Nisengeg ed saya, awaten na baleg ya ulop bilang sakey a grupo so paborablen panangukom. Saray membro ra a “pinmaway ed baleg a kairapan,” so naliktar ed kadederal na saramay mangaro ed kabilungetan diad Armagedon.—Apocalipsis 7:9, 10, 14.
“Ananak na Silew”
15. Diad anton dalan a saray kiwas tayo so mangipanengneng na panagpasakup ed Ari, si Jesu-Kristo?
15 Anggaman kuan, panon ed praktikal a dalan a saray manangaro ed silew, balanglan alanaan odino arum a karnero, so pasakup ed si Jesus a bilang say introno na Dios ya Ari tan onaakton Ukom? Sakey a dalan et say pagmaliw na nengneng na toon abobonan nen Jesus. Legan a wadiad dalin impanengneng nen Jesus so panamabli ed ontan iran kalidad a singa inkasimoon, inkasigpot-puso, tan inkaseseg ed katuaan, tan sikaton mismo so angipanengneng na alimbawa ed sarayan kalidad. (Marcos 12:28-34, 41-44; Lucas 10:17, 21) No pilalek tayo so paborablen panangukom, nepeg tayon bayuboan iratan a kalidad.
16. Akin a makana so pangiwaklit ed saray gawa na kabilungetan?
16 Nagkalautlan saya so tua lapud say mundo nen Satanas so ombibilunget legan a manasingger so anggaan. (Apocalipsis 16:10) Sirin saray salitan insulat nen Pablo ed saray taga Roma so matukotukoy a tuloy: “Say labi so aralem la; tan say agew asingger la. Iwaklit tayo sirin so saray gawa na kabilungetan tan ikawes tayoray ayura na silew. Manakar tayon masimpit a singa diad agew, aliwa a diad kasibaan tan panagbuanges, aliwan diad mabanday a liket tan malukak a kondukta, aliwan diad kolkol tan imon.” (Roma 13:12, 13) Manwarin say andi-anggaan a bilay so sakey a langkap ed Dios, say inkapuro na pananisia tan aro tayo ed silew so mapatnag ed saray kiwas tayo. (Santiago 2:26) Sirin, say awaten tayon panangukom so mandepende ed baleg a sukat diad laknab na pangagamil tayo na maabig iran kimey tan pangipulisay ed makapuy iran gawa.
17. Anto so kabaliksan na “ikawes so Katawan a Jesu-Kristo”?
17 Kayari impangiter to na simbawa diad Roma 13:12, 13, sinampotan nen apostol Pablo diad impangikuanto: “Ikawes so Katawan a Jesu-Kristo, tan agyo papagaan so saray pilalek na laman.” (Roma 13:14) Anto so kabaliksan na “ikawes so Katawan a Jesu-Kristo”? Kabaliksan to a saray Kristiano so nepeg a manumbok a maapapit ed si Jesus, kawesan da so inkasikara, a singa ontan, tekep na ehemplo tan disposisyon to, a manggunaet a magmaliw a singa-Kristo. “Ta diad sayan kurang so akatawagan yo,” kuan nen Pedro, “ta si Kristo so nairapan lapu ed sikayo, ya angitilak na panuliranan pian tumboken yo a maapapit so bakat to.”—1 Pedro 2:21.
18. Anton baleg iran pananguman so nakaukolan no kaliktan tayo so mangawat na paborablen a panangukom?
18 Saya so mabetbet a manasaglawi ed baleg iran pananguman ed bilay na sakey a Kristiano. “Ta aminsan sikayo so kabilungetan,” kuan nen Pablo, “balet natan sikayo la so silew unong ed Katawan. Manakar kayo a bilang ananak na silew, ta say bunga na silew et tugyopen to so kada nengneng na kamaongan tan inkatunong tan katuaan.” (Efeso 5:8, 9) Siopaman a manaagamil na saray gawa na kabilungetan so aliwan manangaro ed silew tan agmangawat na paborablen panangukom ya anggad manggawa ra na pananguman.
“Sikayo so Silew na Mundo”
19. Diad antoran nanduruman dalan a nayarian na sakey a Kristianon isindag so silew?
19 Kaunoran, say pangaro ed silew et kabaliksan toy pangisindag na liwawa pian nanengneng na arum tan natangguyor ira ed satan. “Sikayo so silew na mundo,” kuan nen Jesus. Tan inyarum to: “Pasindagen yo so silew yo ed arap na saray totoo, pian nanengneng daray maabig a gawa yo et galgalangen da so Ama yo a walad tawen.” (Mateo 5:14, 16) Saray maabig a gawa na sakey a Kristiano so mangisakup ed pangipatnag na amin a nengneng na kaabigan tan inkatunong tan katuaan, lapud say ontan a maabig ya ugali so mangitarok na mabiskeg a pantasi ed katuaan. (Galacia 6:10; 1 Pedro 3:1) Nagkalautlan ilaktip da so pitotongtong ed arum nipaakar ed katuaan. Natan, kabaliksan na saya so pibibiang ed sankamundoan a kampanya na panagpulong na “sayan maong a balita na panarian . . . ed amin a panaayaman a dalin ya onkanan pantasi ed amin a nasyones.” Kabaliksan to, met, so siaanos a pamawil ed saramay interesado, pangiyaral ed sikara na Biblia, tan panulong ed sikara, pian diad ontan, mamawala na saray gawa a kien na silew.—Mateo 24:14; 28:19, 20.
20. (a) Panon kaliwawa a say silew so nisisindag natan? (b) Antoran mayaman a bendisyon so pangagayagaan na saramay kinmiwas ed silew?
20 Diad agew tayo, misalamat ed maseseg a panagpulong a kimey na saray matoor a Kristianos, say maong a balita so narerengelan ed masulok a 200 iran bansa, tan say silew so sinmindag a tuloy. Inkuan nen Jesus: “Siak so silew na mundo. Say ontumbok ed siak so agmanakar ed kabilungetan, balet walad sikato so silew na bilay” (Juan 8:12) Agaylan gayaga so pakapibiang ed kasumpalan na sayan sipan! Natan et saray bilay tayo so lalon mayamyaman a sikatayoy agla maniirap ed kabilungetan na mundo nen Satanas. Tan saray ilalo tayo so peteg a makapakelaw unong ya aalagden tayo so paborablen panangukom manlapud tinuro nen Jehova ya Ukom. (2 Timoteo 4:8) Agaylan sakey a desyang no, kayari inkiwala ed silew et sikatayoy niagos lamet ed kabilungetan tan makaawat na agpaborablen panangukom! Diad onggendan ya artikulo, salaysayen tayo no panon so pakapansiansia tayon malet ed pananisia.
Kasin Nipaliwawa Yo?
◻ Anto so letnegan parad panangukom na Dios?
◻ Anto so manunan betang nen Jesus no nipaakar ed saray gagala na Dios?
◻ Panon tayon ipanengneng a sikatayoy papauleyan ed si Jesus bilang say introno nen Jehova ya Ari?
◻ Panon tayon paneknekan so inkasikatayon “ananak na silew”?
◻ Diad sayan kabilungetan na mundo, diad anton dalan a say silew so sinmindag a tuloy?
[Litrato ed pahina 10]
Kaunoran, amin a katooan so mamidbir ed pakauley nen Jesus
[Litrato ed pahina 12]
Ipapanengneng tayon inaro tayo so silew no isisindag tayo ed saray arum