Agew na Panangukom​—Sakey a Panaon na Ilalo!

NO SAY pakatalos ed agew na panangukom so manaktakot ed sika, akin ya ag-usisaen no anto so ibabaga na Biblia nipaakar ed satan? Alimbawa, kasin tua a sano idapo na Dios so panangukom ed saray managkasalanan et sikaray nibantak ed impiernon-apuy?

Bueno, say inmunan nikurit ya inkagawa na madibinon panangukom so diad mismon gapo na awaran na too. Si Adan tan si Eva so walaan na pankanawnawan manbilay na ando lan ando ed paraiso diad dalin. (Genesis 1:26-28; 2:7-9, 15-25) Anggaman kuan, sikaray nankasalanan, tan nitarok ed agpaborablen panangukom na Dios. Say nansumpalan? Inekal na Dios so langkap na bilay. Diad arum a panangibaga, sikaray inatey. Imbaga na Dios ed sikara: “Diad linget na lupam so panganan mo na tagano anggad ipawil mo ed dalin, lapud ditan so angalaan ed sika. Lapud sika et dabok ka diad dabok ompawil ka.”​—Genesis 3:16-19.

Saya so mapalalo a panangukom, balet ta maptek. Tan seguradon agmangisakup ed impiernon-apuy. Sanen inatey si Adan tan Eva, sikaray pinmawil ed dalin. Sikaray naandi la. Agbalot isusuhiri na Biblia a sakey a kabiangan nen Adan odino say arum nin too so aliktar ed patey pian napairap ed arum a pasen diad andi-anggaan. Imbes, nabasa tayo: “Amta na saray mabilay a sikaray ompatey; balet no nipaakar ed saray inaatey, anggapo lan balot so kabat da.”​—Eclesiastes 9:5.

Kabat yo ta a saya so inkuan na Biblia? Kabat yo ta, met, ya agbalot inusar na Biblia so balikas ya “ag-ompatey a kamarerwa”? Imbes, ibabaga to: “Say kamarerwa a mankasalanan, sikato so ompatey.” (Ezequiel 18:4, King James Version) Saya so sigpot a mitunosan ed prinsipyo na Biblia: “Say bayar na kasalanan et say patey.” (Roma 6:23, KJ) Sayan ganggan so mangapekta ed sikatayon amin. Amin tayo so kapolian nen makasalanan ya Adan, sirin amin tayo so mankasalanan tan mangawat ed tumang na kasalanan, say patey. A singa ikuan na Biblia: “Lapud sakey a too say kasalanan so linmoob ed mundo, tan say patey lapud kasalanan; tan say patey so linma ed amin a too, ta amin et nankasalanan.” (Roma 5:12, KJ) Say Agew na Panangukom so sakey a manunan kabiangan na oksuyan na Dios diad pangiliktar ed sikatayo manlapud sayan kipapasen.

Say Letnegan parad Agew na Panangukom

Unong ed Biblia, ngalngalin 2,000 taotaon la so apalabas ya impasen na Dios so letnegan na nagawa ed Agew na Panangukom. Saya so agawa sanen si Jesus so linmad dalin tan inter to so ayadyarin atooan a bilay to nisesengeg ed sikatayo. Impaliwawa nen Jesus a mismo: “Ontan la so impangaro na Dios ed mundo ya inter to so bogbogtong ya Anak to, pian siopaman a mangagamil na pananisia ed sikato so agnaderal noag ingen nawalaan na bilay ya andi-anggaan.”​—Juan 3:16.

No agamilen tayo so pananisia ed si Jesus, nagunggunaan itayo la natan manlapud bagat to diad espiritual a dalan. Mamerdona so Dios ed saray kasalanan tayo tan mangiyaabuloy ed sikatayon onasingger ed sikato. (Juan 14:6; 1 Juan 2:1, 2) Balet siansian sikatayo so ag-ayadyari, managkasalanan, tan bilang ontan, siansian sikatayo so mansakit tan agmabayag et ompatey. Agtayo ni agamoran so andi-anggaan a bilay ya insipan nen Jesus. Onsabi iya bilang kasumpalan na Agew na Panangukom.

Say Agew na Panangukom

Anengneng nen apostol Juan so sakey a pasingawey ed Agew na Panangukom, tan dineskribe to itan a singa onggendan: “Tan anengneng ko so sakey a trono ya amputi, tan say manyurong ed sikato, a diad arap to binmatik so dalin tan say tawen; et anggapoy aromog a pasen a panayaman da. Tan anengneng ko so saray inaatey, ankekelag tan ankakabaleg, a walad arap na Dios; tan saray libro so nibuskag, tan sananey a libro so nibuskag, a sikato so libro na bilay: tan naukom so saray inaatey unong ed saray bengatla a nisulat ed saray libro, unong ed saray gawa ra.”​—Apocalipsis 20:11, 12, KJ.

On, unong ed pasingawey nen Juan, say Agew na Panangukom so imatonan na Dios a mismo. Balet sakey ni so nalalanor. Impaliwawa nen apostol Pablo: “Say [Dios] so ananda na sakey ya agew, a pangukom to ed mundo unong ed inkatunong diad panamegley na saman a lakin tinuro to.” (Gawa 17:31, KJ) Siopa itan a laki? Si Jesus, a sikaton mismo so angikuan: “Say Ama so agmangukom ed siopaman a too, ingen inter to so amin a panangukom ed Anak.” (Juan 5:22, KJ) Sirin si Jesus so tinuro na Dios ya Ukom diad Agew na Panangukom.

Saya so maong iran balita parad saray katooan. Si Jesus so ipaparungtal na ebanghelyo a bilang sakey a too na inkamaabagey. Sikatoy aliwan mapaatagey odino mareklamo noagta “mauyamo tan mapaabeba ed puso.” (Mateo 11:29; 14:14; 20:34) Sikatayo so maliket a niwala ed panangasikaso na ontan ya ukom.

Kapigan Itan?

Kapigan, anggaman kuan, so Agew na Panangukom? Ibabaga na Apocalipsis a no “say dalin tan tawen [so] naandi.” Saya so mangipanonot ed sikatayo ed saray salita nen apostol Pedro: “Saray tawen tan say dalin a wala natan so niatol a parad apuy tan sikaray impansiansia parad agew na panangukom tan ed kadederal na saray agmaridios a totoo.” (2 Pedro 3:7) Kasin say literal a dalin so napoolan? Andi, say Biblia so malinew nipaakar ed sayan punto. Say literal a dalin so agbalot naderal. “Say dalin . . . [so] agnagalaw ed ando lan ando.” (Salmo 104:5, KJ) Ipapanengneng na konteksto na saray salita nen Pedro a say peles ya agmaridios a mundo na sistema na bengabengatla so naderal. Saray agmaridios a totoo, aliwan say planetan Dalin, so naderal.​—Juan 12:31; 14:30; 1 Juan 5:19.

Sarayan agmaridios a totoo so naderal ed tatawagen na Biblia a bakal na Armagedon​—a satan, singa mabetbet ya ipapanengneng na sayan magasin, so asingsingger lan nagawa. (Apocalipsis 16:14, 16) Kayari to, si Satanas a mismo so nikalinsurong tan nasebelan a manlapud pansigensigen ed katooan ed sanlibon taon, tan sayan sanlibon taon so aktual a karukey na Agew na Panangukom. (Apocalipsis 19:17–​20:3) Anto so nagawa ed saray matoor sano saray agmaridios a totoo so natawtaw ed Armagedon? Sikaray niliktar a mamaarap ed Agew na Panangukom. Nabasa tayo: “Saray maptek sikara naani mansiansia ed dalin. Balet no nipaakar ed saray marelmeng, sikaray napegpeg a manlapu ed dalin.”​—Uliran 2:21, 22.

Diad pamaneknek ed saya, ibabaga na Biblia so “sakey a baleg ya ulop, ya agnayarian na toon bilangen, a nanlapud amin a nasyones tan tribu tan totoo tan pansasalita” ya ompaway ed dalin sakbay na Armagedon. Saraya so “pinmaway a nanlapud baleg a kairapan”; diad arum a salita, sikaray niliktar ed anggaan na sayan agmaridios a mundo a singa say inkiliktar nen Noe ed anggaan na mundo diad agew to. (Apocalipsis 7:9-17; 2 Pedro 2:5) Kabat yo ta a sayan internasyonal a baleg ya ulop na saray aktibon Kristianos so onkukurang anggad natan? Saraya so maniilalo ed kililiktar diad baleg a kairapan tan manbilay na ando lan ando ed dalin. Say kiwawala ra so sakey a maseguron ebidensya ed kinaasingger na Agew na Panangukom.

Siopa Ra So Naukom?

Sayan baleg ya ulop so naukom ed Agew na Panangukom. Balet ta agda bukbukor. Intuloy na salaysay nen Juan: “Tan inter na dayat so inaatey a walad sikato; tan say patey tan say Hades inter da so inaatey a wala ed sikara: tan sikaray naukom balang too unong ed saray gawa to.” (Apocalipsis 20:13, KJ) Nia so kaaruman a paneknek a saray totoo so agmanirap na ando lan ando ed impierno. No say impierno et initer toray inaatey a wala ed sikato, panon a say siopaman so makapansiansiad man na andi anggaan? Diad tua, say impierno ed Biblia et say kaslakan a lubok na totoo, no iner a saray inatey so nansiansian agmakalikna a manaalagar na kioli. Diad Agew na Panangukom, say impierno so sigpot a naandian na inatey to.​—Eclesiastes 9:10.

Diad Agew na Panangukom sioparay napaoli a manlapud saray inaatey? Inkuan nen apostol Pablo: “Wala so kioli ed bilay na saray inaatey, saray matunong tan agmatunong.” (Gawa 24:15, KJ) Kanian, saray matoor ya ariripen na Dios, “saray matunong”, so napaoli. Tan ontan met ed saray agnabilang nin arum, “saray agmatunong.” Mabitar, say kioli so mangisakup ed saramay inaatey tan saramay siansia nin walad lubok​—nilikud so siopaman a say kasalanan to so seryoson tuloy a sikaray sigpot lan inukom na Dios ya agmanepeg ed bilay.​—Mateo 12:31.

Say Panangukom

Anto, anggaman kuan, so nagawa ed saray niliktar a baleg ya ulop tan saray apaoli ed Agew na Panangukom? Ikuan na Biblia: “Saray inaatey so naukom unong ed saray bengatla a nisulat ed saray libro, unong ed saray gawa ra.” Saya so sakey a panaon na maalwar a panangusisa. Amin na saray mabulos ya onkiwas unong ed ‘saray bengatla a nisulat ed saray libro’​—mabitar a saray kakaukolanen na Dios ed katooan diad satan a panaon​—​so nisulat ed “libro na bilay.” (Apocalipsis 20:12, KJ) Sikaray ontundas diad igamor na andi-anggaan a bilay!

Tan, diad kaunoran, say bagat nen Jesus so mangitarok na saray pisikal a gungguna! Diad satan a panaon saramay nisulat ed libro na bilay so agla nipaabeba ed sakit tan ipapatey. Imbes, sikaray kalkalnan nipawil ed atooan ya inkayadyari, tekep na nisipan ya andi-anggaan a bilay parad saramay angagamil na pananisia ed si Jesus. Agaylan makatantandan ilalo! Anggaman ontan, arum so ompatnag ya agmalabay a mangunor ed ‘saray bengatla a nisulat ed saray libro.’ Anto so nagawa ed sikara? Sikaray agmakagamor na maandon bilay. Imbes, ibabaga na kasulatan: “Siopaman ya agnaromog a nisulat ed libro na bilay so nibantak ed dayat na apuy.”​—Apocalipsis 20:15, KJ.

Saya ta so impiernon-apuy a sasalitaen na Kakristianoan? Andi, ta diad saginonor iran bersikulo, nabasa tayo: “Say patey tan say impierno so nibantak ed dayat na apuy. Saya so komaduan ipapatey.” (Apocalipsis 20:14, KJ) No say impierno et nibantak ed dayat na apuy, say dayat et aliwan sikatoy impierno. Nagkalalo ni, say patey so aliwan bengatlan peteg a nayarin dokdoken tan ibantak ed inerman. Sirin say dayat na apuy so simboliko. Diad anto? Ibabaga na Biblia: “Saya so komaduan ipapatey.” Sano say patey tan Hades so nibantak ed dayat na apuy, sikaray “ompatey,” naandi la. Mipadpara, saray matungangan katooan a niwalad man so ompatey, odino naandi la. Saya, anggaman kuan, so komaduan ipapatey, ya anggapo la so ilalo ed kioli.

Agew na Panangukom​—Sakey a Panaon na Ilalo

Sirin sano isipen tayo so Agew na Panangukom, agnepeg a sikatayo so natalagnaw odino nataktakot. Say Agew na Panangukom so sakey a panaon na ilalo, sakey a panaon pian ipawil ed katooan so andi-anggaan a bilay ya abalang nen Adan. Talinengen iray bendisyon a nagamoran na saramay naukom a matoor: “Nia! Say tabernakulo na Dios so walad saray totoo, tan sikato so manayam naani ed sikara, tan sikara naani baley to. Tan say Dios a mismo so wala ed sikara. Tan punasen to so amin a lua ed kamataan da, tan anggapo la so patey, nisay pannangis nisay pandageyem o nisay ot-ot. Saray gendat a bengatla so naandi la.”​—Apocalipsis 21:3, 4.

Diad sampot na sanlibon taon ya Agew na Panangukom, saray matoor a katooan ed amin a pasen na dalin so magmaliw lan ayadyari. Sikaray “pinmawil ed bilay” ed sigpot a pantalos, tan say gagala na Agew na Panangukom so nasumpal. (Apocalipsis 20:5) Insan, ibabaga na Biblia, a naabuloyan si Satanas ya onasingger ed katooan ed sankaunoran a pankanawnawa. (Apocalipsis 20:3, 7-10) Saramay onsumpa ed sikato ed sayan pinal a panaon so mangayaga ed sigpot a kasumpalan na sipan na Biblia: “Saray matunong a mismo so mangayarian na dalin, tan sikara so manayam ed tapew to diad ando lan ando.”​—Salmo 37:29.

Agaylan makapakelaw a probisyon so Agew na Panangukom! Tan agaylan makatantanda a natan la et sikatayoy makapanparaan ed satan, diad panaral na Biblia, pangamta ed linawa na Dios, tan pangiyaplikad sayan madibinon linawa ed saray bilay tayo! Agpankelawan ya imbalikas na salmista so gayaga tod kaisipan ed panangukom na Dios sanen insulat to: “Mangayaga komon so katawenan, tan manliket komon so dalin. Onongol komon so dayat tan saray lugan to. Mangayaga komon so uma tan amin a wadman. Ontan met komon ta amin a kakiewan ed takel so unyugayog a magaygayaga ed arap nen Jehova. Ta sikatoy onsabi, onsabi a mangukom na dalin.”​—Salmo 96:11-13.