PAIBANGAT ED SALITA NA DIOS
Antoy Nagawa Diad Agew na Panangukom?
Pantongtongan ed sayan artikulo iray tepet ya ompan nitetepet mo met tan no iner mo naalmo iray ebat diad Biblia. Labalabay na Saray Tasi nen Jehova ya tulongan kan naamtaay ebat.
1. Anto so Agew na Panangukom?
Singa nanengneng ed litrato, iisipen na dakel ya totoo ya diad Agew na Panangukom, binilyon kuno ya kamarerwa so onarap ed trono na Dios pian ukomen base ed ginawa dad apalabas, no kasin manbilay irad tawen odino pairapen ed impierno. Pero, ipapanengneng na Biblia ya say gagala na Agew na Panangukom et pian iligtas iray totoo ed ag-inkahustisya. (Salmo 96:13) Si Jesus so tinuro na Dios ya magmaliw ya Ukom pian ipawil so hustisya ed katooan.—Basaen so Isaias 11:1-5; Gawa 17:31.
2. Panon ya ipawil na Agew na Panangukom so hustisya?
Nen nanrebelde ed Dios so inmunan too ya si Adan, impatawir tod amin ya anak to so kasalanan, irap, tan ipapatey. (Roma 5:12) Pian nasolusyonan itan ya ag-inkahustisya, paolien odino bilayen lamet nen Jesus iray binilyon ya inaatey. Ipapanengneng na libron Apocalipsis ya nagawa itan legan na 1,000 taon ya uley nen Kristo Jesus.—Basaen so Apocalipsis 20:4, 11, 12.
Saray paolien et ukomen, aliwan base ed saray ginawa ra antis iran inatey, imbes, ukomen ira base ed no antoy gawaen da kayarin nipaamta so karga na “saray lukot” ya abitlad Apocalipsis kapitulo 20. (Roma 6:7) Saramay paolien tan nawalaan na pankanawnawa o tsansa ya nakabat so Dios et “saray matunong tan saray agmatunong,” ya singa imbaga nen apostol Pablo.—Basaen so Gawa 24:15.
3. Anto ray gawaen o sumpalen diad Agew na Panangukom?
Saramay inatey ya agdan balot akabat tan apanlingkoran si Jehovan Dios et paolien pian naikdan na pankanawnawan manguman tan gawaen so duga. No gawaen da ’tan, say resulta, sikaray “napaoli pian manbilay.” Saramay napaoli balet ya agda labay ya unoren so panlabayan nen Jehova, sikaray “napaoli pian naukom.”—Basaen so Juan 5:28, 29; Isaias 26:10; 65:20.
Diad sampot na 1,000 taon ya Agew na Panangukom, ipawil nen Jehova ed perpekton kipapasen iray maunor ya totoo, ya singa samay orihinal ya gagala to. (1 Corinto 15:24-28) Makapaliket itan! Bilang unor ya subok, ibulos nen Jehova si Satanas ya Diablo ya inkulong ed kaaralman diad loob na 1,000 taon. Diad satan, salien lamet nen Satanas ya tuksoen iray totoo ya manrebelde ed si Jehova. Saraman balet so manmatoor ed si Jehova et manbilay ya anggapoy anggaan diad dalin.—Basaen so Isaias 25:8; Apocalipsis 20:7-9.
4. Antoy sakey nin agew na panangukom ya makagunggona ed sikatayo?
Diad Biblia, uusaren met so termino ya “agew na pangukom” pian tukoyen so nagawan panderal ed kaplesan ya sistema na mundo. Satan ya agew na panangukom et bigbiglan onsabi. Singa itan samay agawan Delap diad panaon nen Noe ya aneral ed amin ya mauges a totoo. Magano lan naderal iray “mauges a totoo” tan onsabi la so balon mundo ya ditan “manayam so inkatunong.” Talagan makapaliket itan!—Basaen so 2 Pedro 3:6, 7, 13.