Tastasi nen Jehova ed Interon Mundo​—Say Bahamas

SAY Commonwealth na Bahamas​—sakey ya arkipelago na 3,300 ya isla tan ankelag iran isla​—so nidatak a singa sakey a koral a kuwintas ed nibaliw na 900 a kilometro na asul-berden kolor na dayat ed baetan na Florida tan Cuba. Diad limog na 267,000 a mibabaley to et sakey ya ombubulaslas a koro na saray manangiyabawag na Panarian. Say kanta na panagdayew da so mangipanonot ed Isaias 42:10-12: “Ikantaan yo si Jehova na sakey a balo a canta, tan say galang to a manlapu ed sampot na dalin; sikayo ya onlepsag ed dayat, tan saray amin a wala ed sikato, saray polpolo, tan saray manaayam ed sikara . . . manlapu ed toktok na saray palandey. Mangiter ira komon na galang ed Jehova, tan ipaliwawa ra so galang to ed saray polpolo.”

Naangat so Balon Pananisia

Nen Hulyo 1992, sakey a regular pioneer (sakey a sigpot-panaon a managpulong na Panarian) so akapangipalima ed sakey a kaaro ed negosyo na katulongan ed panaral ed Biblia a Makapambilay Kayo na Ando lan Ando ed Paraiso diad Dalin. Kayari na impakabasa na laki ed libro, kuanto’d inkasikato, ‘Sayan relihyon so bengatlan nepeg kon usisaen.’ Diad ontumbok a duaran Simba, sikato so inmatendi ed saray miting ed duaran nandumaan a Kingdom Hall na Tastasi nen Jehova. Insan, sakey a panagaral ed Biblia so nigapo ed sikato. Anggaman ontan, diad anemiran simba labat nin panaaral to ed saray leksion ed Biblia, sakey ya angat so linmesa a manubok ed balon pananisia to​—saray selebrasyon na agew-na-inkiyanak.

Say pamilya na negosyante so alanor a tuloy ed saratan a selebrasyon, balet say aro to ed Salita na Dios so anagyat ed sikaton ituloy so panaral to’d Biblia. Legan a say pikakabat to ed Makasulatan a katuaan so ondaraak, ontan met ya ondaraak so pakatalos to ed sarayan selebrasyon na agew-na-inkiyanak tan saray minumundon piesta-opisyal tan ed panmoria nen Jehova ed saratan.

Sanen say asawa na sayan laki so angorganisa na sakey a sosyal a panduroypo para’d Father’s Day, magalang ton impulisay so iyatendi. Balet ta liknaen na asawan bii a sikato so agla inaro tan iyuuna na laki so relihyon nen say sikato tan say pamilya. Sipapangasi ton insalaysay a say panangiyaplika ed naaaralan to manlapud Biblia so ontulong a manimbalo ed sikato pian magmaliw a magmaong ya asawan laki tan ama. Diad kaunoran, binmaleg so apresasyon na asawan bii ed panangaro to ed Makasulatan a katuaan tan inmabobon a manaral na Biblia. Natan sikato so mangikokondukta na sakey a panagaral na Biblia ed pamilya to. Tan agaylan gayaga so niwalad sikato diad “Madibinon Panangibangat” a Distriton Kumbension ed sayan apalabas a taon! Say asawa to tan marikit to so presenti tan anengneng da so inkabautismo to.

Saray Inmalis so Makakarengel ed Balon Kanta

Nilibon Haitian ya inmalis so nititipon ed sosyedad na Bahamas. Sikara met so kaukolan ya ondengel ed balon kanta na katuaan na Panarian. Saray Tasi a manaayam ed Bahamas so misadsalamat a duaran Haitian-Amerikan a sanasawa so sinmabi. Sarayan indibidual so akatulong pian mamabiskeg ed balo nin aporma iran grupo na Haitian ed saray isla na Grand Bahamas tan Abaco.

Bilang kaaruman a tulong ed saray interesadon Haiti ed mensahe na Panarian, say sankaunaan a distriton kumbension a Creole so agawa ed Bahamas manlapud Hulyo 31 ya anggad Agosto 1, 1993. Adampot so bilang na inmatendi a 214, a walaay taloran balon dedikadon abautismoan. Dakel ya Haitian ya akaaral na katuaan ed Bahamas so pinmawil ed nanayaman dan isla odino inmalis ed sananey a pasen pian iyarum so boses da ed saraman so lokal a Tastasi diad pankanta na panangidayew ed si Jehova.

[Kahon ed pahina 8]

SAY KIPAPASEN NA BANSA

1993 Serbisyon Taona

PANTOK A BILANG NA MANTATASI: 1,294

RATIO: 1 a Tasi ed kada 197

INMATENDI ED MEMORYAL: 3,794

PROMEDYON MANANGIPALAPAG A PAYUNIR: 186

PROMEDYON PANANGIYARAL NA BIBLIA: 1,715

BILANG NA ABAUTISMOAN: 79

BILANG NA SARAY KONGREGASYON: 22

SANGAN OPISINA: NASSAU

[Paimano ed leksab]

[Litrato ed pahina 9]

Say sankaunaan a Kingdom Hall, pati say sangan opisina tan ayaman na misionero

[Litrato ed pahina 9]

Maseseg iray Tasi a mangiyaabawag na maong a balita

[Litrato ed pahina 9]

Si Milton G. Henschel tan si Nathan H. Knorr a kaiba iray misionero ed Nassau ed ngalngali 45 a taon lay apalabas

[Litrato ed pahina 9]

Say balon sangan opisina, nidedika nen Pebrero 8, 1992