Istorya ed Bilay

Magaygayaga Tan Misalsalamat Anggaman ed Makapasinagem ya Impakabalangan

UNONG ED SALAYSAY NEN NANCY E. PORTER

Hunyo 5, 1947 ed saman, sakey a masalimuot a labi diad Bahamas, saray islan arawi manlapud abalaten-bukig a baybay na Estados Unidos. Sikami nen masiken ko, si George, so dinalaw na opiser na imigrasyon. Inderew to ed sikami so sakey a sulat a mangaablog la ed sikami manlapud saray isla tan sikami so kaukolan ya “ontaynan lan tampol ed kolonya!”

SIKAMI nen George so sankaunaan a misionaryon Tastasi nen Jehova a sinmabi ed Nassau, say sankabalegan a syudad diad Bahamas. Kapangraduar mi ed komawalon klase na Gilead, sakey ya eskuelaan na misionaryo ed mamaamianen a New York, sikami so niasain dia. Anto ta so ginawa mi a sengegay ontan a negatibon reaksion kayari lambengat na taloy bulan ya impanayam mi dia? Tan panon a kayari na masulok a 50 taon ni ed saginonor et siansian wadia ak ni?

Panangipasal Parad Ministeryo

Say tatay ko a si Harry Kilner, so mabiskeg ya angimpluensia ed dalay kabibilay ko. Sikatoy angipanengneng na ekselentin alimbawa ed siak, a dakel iray insakripisyo to pian sikatoy magmaliw a sakey ed Tastasi nen Jehova. Anggaman agtanton maabig so bunigas to, sikatoy nampulong lawarin kada sampot-simba, a maseseg ya angiyuna ed intereses na Panarian. (Mateo 6:33) Kapus kamin tuloy ed pinansyal, balet ta say lakoan toy sapatos so sentro na espiritual a kimey diad Lethbridge, Alberta, Canada, nen dekaday 1930. Saray sankaunaan a nanonotan ko et saray sigpot-panaon a ministro na Tastasi nen Jehova, a tatawagen a payunir, ya ombibisita ed abung mi tan inanabang daray eksperiensia ra.

Nen 1943, inggapok so panagpayunir ko ed asingger na Fort Macleod tan Claresholm, Alberta. Diad saman et say panagpulong so nisebel ed Canada lapud palson impormasyon ya inkayat na saray sumusumpa kaleganay Guerra Mundial II. Say kalaknab na teritorya mi so anggad 50 kilometro diad nantupag a direksion, balet lapud siak so ugaw ni tan malikliksi, aliwan problema ed sikami so pambisikleta odino panakar pian nasabi iray angkekelag a purok tan kaumaan ed saman a lugar. Diad sayan panaon et awalaan ak na pankanawnawan nakatongtong so pigaran nangraduar ed Gilead, tan saray eksperiensia ra so anagyat ed siak pian man-misionaryo.

Nen 1945, nankasal kami nen George Porter, a nanlapud Saskatchewan, Canada. Saray atateng to so maseseg a Tastasi nanlapula’d 1916, tan pinili to met so sigpot-panaon a ministeryo bilang karera to. Say inmunan asainmin mi et diad marakdakep a Lynn Valley diad North Vancouver, Canada. Ag-abayag et sikami so naimbitaan ed Gilead.

Akapitongtong ak la ed saray nangraduar ed nanduruman seminaryo na teolohiya ed loob la na pigaran taon tan naimanok so makapuy ya epekto na teolohikon inkipasal da ed pananisia ra ed Dios tan ed Salita to, say Biblia. Diad pidumaan, say naaralan mi ed Gilead so angubol ed abilidad min mannonot tan lalon importanti et apabiskeg so pananisia mi ed si Jehova a Dios tan ed Salita to. Saray kaklase mi so niasain ed Tsina, Singapore, India, saray bansa ed Aprika, Abalaten ya Amerika, tan arum nin pasen. Nanonotan ko ni so liket mi sanen naamtaan min say asainmin mi et diad saray tropikon isla na Bahamas.

No Panon Kamin Akapanpirmi

No ikompara ed saray asainmin na saray kaklase mi, antikey labat so biahe min amaarap ed Bahamas. Ag-abayag et panggagayagaan mi la so ampetang a klima, saray asul a tawen, say malinlinew a danum, saray apintaan a bilding, tan alay karakel a bisikleta. Balet, say agkon balot nalinglingwanan a naimanok et say melag ya ulop na limaran Tastasi a manaalagar ed isabi na barkon akaluganan mi. Ag-abayag et naamtaan min say kultura ra et alay pidumaan to ed akaugalian mi la. Alimbawa, say masiken ko so akerew ya itunda toy tawag to ed siak a “sweetheart” diad publiko, ta satan a balikas so kaslakan lan itatawag ed saray kabit.

Kabekta, lapud ompatnag a nasisigen iray klero ed mawayang ya ililiber mi ed limog na totoo, sikami so sititilan inakusa ra bilang Komunista. Bilang resulta, naawat mi so abison taynan mi la so bansa. Balet ta saray Tastasi a walad saray isla, a kulang labat a 20 ed saraman ya agew, so tamtampol ya angala na nilibon pirma ed sakey a petisyon pian niyabuloy so pansiansia mi ni. Diad ontan et say abison itaynan mi so agla atuloy.

Diad Balon Teritorya

Say katuaan ed Biblia so maples a binmasik ed kapusoan a mangaaro ed Dios, kanian dakel niran misionaryo na Gilead so nibaki ed Bahamas. Insan, nen 1950, sakey a sangan opisina so niletneg. Samploy taon ed saginonor, si Milton Henschel, a membro na saray walaay betang diad hedkuarter diad Brooklyn, New York, so binmisita ed Bahamas tan tinepetan toray misionaryo no walay mabulos ya onla tan mangilukas na kimey a panagpulong diad sakey nin isla na Bahamas. Sikami nen George so namboluntaryo, kanian diad satan so ginapoan na 11-taon ya impansiansia ed Long Island.

Sayan isla, a sakey ed dakel a manitibukel ed Bahamas, so 140 kilometro ed karukey tan 6 kilometro ed kaawang, tan diad saman a panaon et anggapo niray baley. Say kabisera et Clarence Town, a walaan na ngalngali 50 ya abung. Say bilay so medyo mairap ni ed saman​—anggapoy koryenti, anggapo niray mansusuplay na danum, odino kusina ed loob na abung odino plumbing. Kanian kaukolan mi so onadapta ed tatawagen a panagbilay diad nisulinek lan parti na isla. Dia et say labalabay a pantongtongan na totoo et say bunigas da. Amoria min agmi nakaukolan ya itekep ed pabano mi so tepet ya, “Komusta kayo la natan?” lapud mabetbet a say ebat da et andukey lan kisalaysay na kompleton medikal ya awaran na sakey a too.

Maslak ed pampupulong mi so nagagawa diad saray kusina lapud kaslakan lan naromog so totoo diad kusina ra ed paway a walay dwag tan susungloran a dalikan. Saray purok so manunan tutugyopen na saray mairap-bilay balet ta maomaong iran dumaralos odino sumisigay. Maslak ed sikara so aliwa lambengat a relihyoso noagta maanito met a maong. Saray nikaduman inkagawa so kaslakan lan ipapasen bilang saray tanda.

Ag-ambaing so klero a looban iray ayaman na totoo pian pilatpilaten so literaturay Biblian intilak mi. Kanian talagan napagyaw daray payakot, balet ta agda sarag a pagyawen so amin. Alimbawa, sakey a manedad na 70 ya akulaw so agtinmalaw. Labay ton natalosan so Biblia a mismo, tan ag-abayag et sikatoy nagmaliw a Tasi a kaibay arum nira. Bangta naroromog iray interesado ed limog na totoo, kaukolan ya imaneho nen George iray pigara ed sikara na 300 kilometro no arum a Simba pian tulongan irayan interesado ya onatendi ed saray miting mi.

Legan na inmuna iran bulan sanen anggapo niray arum a Tastasi, pinansiansia mi nen George so espiritualidad mi diad impangikondukta ed amin a regular iran Kristianon miting. Niarum ni, mapeget min tinumbok so programa ed kada Lunes na labi pian aralen mi so leksion ed magasin a Watchtower tan ed panagbasay Biblia. Babasaen mi met ya amin iray paway na The Watchtower tan Awake! diad bektan naawat mi iratan.

Inatey si tatay ko sanen wadman kami ed Long Island. Diad tinmumbok a tiagew, na 1963, inyuksoy mi so pakapanayam nen Nanay diad asingger ed sikami. Anggaman sikatoy maedad la, niyadapta ton tampol so bilay to ed Long Island anggad impatey to nen 1971. Natan et wala lay kongregasyon ed Long Island a walaay balo-balon Kingdom Hall.

Makapasinagem ya Angat

Nen 1980, atebek nen George ya onkakapuy lay bunigas to. Ginmapo la’d saman so sakey ed makapaot-ot iran eksperiensia ed bilay ko​—say impakaimaton ed inad-aron masiken ko, kakimeyan, tan kaiba a managmak na Alzheimer’s disease. Intiramintin anguman so personalidad to. Say kaunoran tan sankairapan a parti et nambayag na manga apatira nin taon sakbay na impatey to nen 1987. Siak so inulop to ed ministeryo tan ed saray miting anggad nayarian to, anggaman dakel ya agew a say sagpot to et nannangisan ko. Say panangipatnag na Kristianon agagi tayo ed aro ra so petepeteg a nanligliwan maong ed siak, balet siansian sikatoy kail-iliw ko.

Sakey ed sankablian ya aspekto na panamaley mi nen George et say mabetbet tan alay abig a komunikasyon mi. Natan ta anggapo lay George, nagkalalon pisalamatan ko ta iimbitaan nen Jehova iray lingkor to a ‘mikasi ya andi tunda,’ a “mansiansia a malet ed pikakasi,” tan usaren so “amin a nengneng na pikakasi.” (1 Tesalonica 5:17; Roma 12:12; Efeso 6:18) Agaylan makaligliwa a naamtaan a si Jehova so mangiyaansakit ed pankaabigan tayo. Say liknaan ko et singa ed liknaan na salmista a nankantan: “Nagalang so Katawan, a sikato agew-agew ya ililibitan to itayo na awi’ tayo.” (Salmo 68:19) Diad panganamot ed kada sansakey agew labat, a bibidbiren iray limitasyon ko, tan diad pagmaliw a misalsalamat ed saray bendision a nitatarok ed kada agew, a singa ed insimbawa nen Jesus, so talagan say sankarakpan a paraan na pambilay.​—Mateo 6:34.

Makapagayaga Iran Tumang ed Ministeryo

Say pagmaliw ya okupado ed Kristianon ministeryo so ontutulong ed siak ya agtanton nonoten iray apalabas. Diad ontan et atalonaan koray liknaan a mansumpal ed depresyon. Say pangibabangat na katuaan na Biblia ed arum so nikadkaduman lapuan na gayaga. Itatarya na satan so mauksoy a rotina ed espiritual ya angiter na direksion tan inkaligen ed bilay ko.​—Filipos 3:16.

Aminsan et walay tinmawag ed siak ed telepono a sakey a biin anginabangan ko na mensahe nipaakar ed Panarian manga 47 taon lay apalabas. Sikatoy marikit na sakey ed saray inmunan inyaralan mi na Biblia sanen kasabisabi mi labat ed Bahamas nen 1947. Say nanay, tatay, tan amin ed agagi ton lalaki tan bibii so nagmaliw a Tastasi nen Jehova a singa met ed maslak iran anak da tan apo ra. Diad tua, masulok a 60 membro na pamilya na sayan bii so Tastasi la. Balet ta agto nin balot inawat nensaman so katuaan na Biblia. Natan balet, sikato la so akaparaan a magmaliw a lingkor nen Jehova a Dios. Agaylan gayaga so pakaimaton ed pigpigaran Tastasi a walad Bahamas nen sinmabi kami nen George a dinmaak na masulok a 1,400!

No maminsan et tetepetan ak na totoo no pampirpirawatan koy nawalaan na dilin ananak ko. Siempre, sakey a bendision so pakawalaan na ananak. Ingen, say aro a lawas nipapalikna ed siak na saray espiritual ya anak, apo, tan apo ed pueg so bengatlan aglagi naeksperiensia na amin a peteg ya atateng. Tua, saramay ‘manggawa na maabig’ tan ‘mayaman ed maabig a gawa’ so sankaliketan a totoo. (1 Timoteo 6:18) Kanian siak so lawas okupado ed ministeryok legan ya iyaabuloy na bunigas ko.

Sakey ya agew diad opisinay dentista, sakey a marikit so inmasingger ed siak a kuanto, “Agyo ak kabat, balet kabat ta kayo, tan labay kon naamtaan yo ya inaro ta kayo.” Insan to intuloy no panon ton naamtaan so katuaan manlapud Biblia tan say pisalsalamat to a sikami iran misionaryo so linma ed Bahamas.

Diad sakey nin inkagawa sanen kasabisabik manlapud bakasyon, walay asabian kon sakey a rosas ed puertay panaayaman ko natan diad sangan opisina na Tastasi nen Jehova ed Nassau. Walay antikey a mensahen akasulat a, “Maliket kami ta akasempet kayo la.” Say pusok so manlepleppua ed pisalsalamat, tan pirmin naarok si Jehova diad pakakaimano ed klase na totoon papawalaen na Salita, organisasyon, tan espiritu to! Peteg, say pananustuni nen Jehova so mabetbet a nipapatnag diad panamegley na saramay kalimoglimog tayo.

Manleppua ed Pisalsalamat

Aglawas mainawa so bilay ko, nisay saray aspekto na satan so mainomay natan. Balet daakan so nepeg kon pisalamatan​—saray gayaga ed ministeryo, say aro tan panamabli na dakerakel a Kristianon agagin lalaki tan bibii, say maaron panangasikaso na organisasyon nen Jehova, saray alay abig a katuaan a manlalapud Biblia, say ilalo a pakapilimog lamet ed saray inad-aro sano sikaray napaoli ed bilay, tan saray pakanodnonotan ed 42 taon na impiasawa ed sakey a matoor a lingkor nen Jehova. Sakbay na impankasal mi nensaman, impikasik a siak komon so lawas magmaliw a katulongan nen masiken ko ta pian makapansiansia ed sigpot-panaon a ministeryo, a pinabpabli ton tuloy. Si Jehova so mapalabon angebat ed satan a pikakasi. Kanian labay kon ibalikas so pisalsalamat ko ed si Jehova diad lawas pagmaliw a matoor ed sikato.

Say Bahamas so bantog a papasyaran na saray turista, a manggastos na nilibon dolyar pian laen itan tan panggayagaan iray dakep na tropiko. Diad desisyon kon lingkoran si Jehova inerman so pangi-asainan na organisasyon to, nanggayagaan koray eksperiensia ya impanbaroy ed sarayan isla, pian iyabawag so maong a balita na Panarian na Dios. Balet nagkalalon importanti et naaralan tan pabpablien koy panangaro na saray sankaabigan a makaaron taga-Bahamas.

Pisalamatan kon tuloy iramay angitarok na katuaan ed atateng ko, insan da met nipaslep ed kanonotan tan pusok sanen ugaw ak ni so pirmin pampilalek ya unaen so Panarian na Dios. Saray kalangweran niran lingkor nen Jehova natan so nabendisionan met na daakan no sikaray onloob ed “baleg a kapot” a mangitonton ed baleg iran pankanawnawa na apalaknab a ministeryo. (1 Corinto 16:9) Sikayo met so manleppua ed pisalsalamat no usaren yoy bilay yo pian igalang so “Dios na saray dirios,” si Jehova.​—Deuteronomio 10:17; Daniel 2:47.

[Litrato ed pahina 24]

Diad pankikimey ed karsada na Victoria, B.C., nen 1944

[Litrato ed pahina 24]

Sikami nen George so inmatendi ed Gilead School nen 1946

[Litrato ed pahina 25]

Kaibay George a walad arap na ayaman na saray misionaryo diad Nassau, Bahamas, nen 1955

[Litrato ed pahina 26]

Say ayaman na saray misionaryo diad Deadman’s Cay, a nanlingkoran mi manlapud1961 ya anggad 1972