Istorya ed Bilay

Say Daiset a Sakripisyo so Akagamoran Mi na Daakan a Bendisyon

UNONG ED SALAYSAY NEN GEORGE TAN ANN ALJIAN

Agmin balot inisip nen akulaw ko ya onsabi so agew et agmi nibiig so salitan “managbangat” ed “otot.” Agmin balot inisip a diad edad min masulok lan 60 et panmorekdekan mi iray nikadkaduman letra pian makapitalosan kami ed saray totoo a taga Arawin Bukig. Ingen, ontan so ginawa mi nen Ann sanen mansamposampot la so dekaday 1980. Abuloyan yo kami pan mangisalaysay ed sikayo no panon min agamoran so daakan a bendisyon lapud saray daiset ya insakripisyo mi diad apalabas iran taon.

BINMALEG ak ed pamilya a walaan na poli ya Armenian tan membro kami na Armenian Church. Si Ann et sakey a Romanon Katoliko. Inkompromiso min dua so relihyoso iran sisiaen mi sanen nankasal kami nin 1950. Siak so 27 años tan si Ann et 24. Nanayam kami ed sakey ya apartment a walad tagey na puestok parad dry-cleaning diad Jersey City, New Jersey, E.U.A. Diad saman et ngalngali apat taon lan negosyok iya.

Nen 1955 et akasaliw kami na alay dakep ya abung a walaan na taloran kuarton-ugipan diad Middletown, New Jersey. Manga 60 kilometro so kaarawi na satan ya ayaman mi manlapud pannenegosyoan ko, a ditan et anem agew so pantratrabahok ed loob na sakey simba. Lablabi lay isesempet ko. Say pakapitotongtong ko labat ed saray Tasi nen Jehova et kapag no onsamar ira ed puestok tan mangipapalima ira ed siak na literatura na Biblia. Interesado ak a maong a manbasa na literatura. Anggaman okupado ak a tuloy ed negosyok, abayuboan ko so aralem a panagrespeto ed Biblia.

Naamtaan ko a say istasyon na radyo na Watchtower, say WBBR, so mangibrobrodkas na saray paliwawa ed Biblia diad saray oras na panmamanehok a paonla tan pasempet manlapu ed puestok. Dinengel kon maong irayan paliwawa, tan binmulaslas so interes ko anggad inkerew ko la ed saray Tasi a bisitaen da ak. Nen Nobyembre 1957, si George Blanton so dinmalaw ed abung ko tan inyaralan to ak na Biblia.

Say Pamilya Mi so Nankakasakey ed Puron Panagdayew

Anto so liknaan nen Ann ed saya? Sikato so abuloyan tayon mangisalaysay ed sikayo.

“Diad gapo, siak so pirmin onsusumpa. Naynay kon didisturboen so panaaral nen George ed Biblia kanian denesidi toy manaral diad arum a lugar, a ginawa to itan ed loob na waloran bulan. Legan na satan a panaon, ginmapo si George ya inmatendi ed saray sinimban aral diad Kingdom Hall. Amtak ed saman a sikato so seryoson manaaral na Biblia lapud satan labat so agew ya agto pantratrabaho. Ingen ta sikato so nansiansian maabig ya asawan laki tan ama​—a nagmaliw nin magmaong​—kanian anguman so awawey ko. Diad tua, sano pupunasan ko so lamisaan a panagkapean mi sano anggapo so makanengneng, alaen ko so magasin ya Awake! a naynay ya ititilak nen George diman, tan babasaen ko itan. No maminsan et ibasa ed siak nen George iray artikulo na Awake! ya agdirektan manasaglawi ed doktrina noagta saramay mangipapabitar ed Manamalsa.

“Sakey a labi sanen inmalis si George pian paiyaralan na Biblia ed si Brother Blanton, inalak so publikasyon ya inggaton na duay taon ya anak min si George diad lamisitan walad abay na dukolan ko. Satan so nipaakar ed ilalo na saray inaatey. Anggano naksawan ak, binasak itan lapud kapatepatey ni nen baik, tan maer-ermen ak ed saman. Atalosan kon tampol so katuaan na Biblia a saray inaatey et agmaniirap ed sakey a pasen tan sikara so ombilay ed arapen a kikioli. Agnambayag et akayurong ak lan manbabasa diad dukolan ko, a magunaet kon binasa tan ginulisan iray punton labay kon ipanengneng ed si George sano sikato so onsempet manlapud impanaral to na Biblia.

“Agmakapanisia so masiken ko ed biglan impanguman ko. Sanen sikato so tinmaynan ed abung, siak so onsusumpa, balet diad saman et panliketan ko laray alay abig a katuaan na Biblia a naamtaan ko! Aliing kami anggad palbangon lapud nantongtongan mi ni so nipaakar ed Biblia. Impaliwawa nen George so gagala na Dios ed dalin. Inkerew ko ed sikato diad saman a labi no nayarin diad abung mi la so panaralan to ta pian makapibiang ak.

“Inrekomenda nen Brother Blanton a mibiang met iray ananak mi ed panagaral. Say abaloan mi et ugugaw nira, lapud mantaon ni labat ira na duara tan apatira. Balet, impabitar nen Brother Blanton ed sikami so Deuteronomio 31:12, a kuanto: ‘Pantitipon mo naani totoo, saray lalaki tan bibii, tan saray angkelag . . . , ta pian narengel da tan natumbok da.’ Inapresya mi iman a bilin tan inyuksoy mi ni ingen so pankomento na ananak mi legan na panagaral mi na Biblia. Ipaparaan mi iray komento mi, balet agmin balot imbangat ed sikara no anto so ibaga ra. Inisip mi ya akatulong iya ed ananak mi a manseryoso ed katuaan. Lawas min pisalsalamatan so panangigiya nen Brother Blanton ed sikami pian natulongan kamin sankapamilyaan ya ombulaslas ed espiritual.”

Saray Angat a Mankaukolan na Panagsakripisyo

Sanen sankakaiba kami lan manaaral na Biblia, walaray balon angat ya inarap mi. Lapud arawin tuloy so puestok , mabetbet ak ya onsempet na alas-nuebe na labi. Lapud saya, agak makakaatendi ed saray miting ed pegley-simba, anggaman makakaatendi ak ed Simba. Diad saman a panaon et naaatendian nen Ann so amin a miting tan sikatoy maples ya inmaligwas. Labay ko met ya atendian so amin a miting ontan met ed pangikondukta na makagunggonan panagaral mi na Biblia bilang pamilya. Amtak a kinaukolan ko so mansakripisyo. Kanian denesidik a bawasan so oras ko ed negosyo, anggaman nayarin naandi so pigaran sukik.

Maabig so resulta na satan. Seneryoso mi so panagaral mi bilang pamilya a singa met ed limaran miting a sinimban gagawaen ed Kingdom Hall. Tinawag mi itan a komanem a miting. Kanian angiletneg kami na espisipikon agew tan oras​—kada Mierkoles ed oras na alas-8 na labi. Kayari na pangdem, no asinopan mi laray anganan mi, sakey ed sikami so mangibaga ya, “Asingger lan onggapo so oras na ‘miting’ tayo!” Igapo la nen Ann so panagaral mi no naatrasado ak, tan sikatoy salatan ko no kasabik.

Say sakey nin amabiskeg ed sikami tan nanggawa ed sikamin nankakasakey bilang pamilya et say panagbasa mi na inagew-agew a teksto ed kabuasan. Balet, wala so angat ed pangiyuksoy ed saya. Nanduruma so oras na ibabangon mi. Nantongtongan mi iya tan denesidi mi a manbabansag kamin ombangon, man-almusal ed alas-6:30 na kabuasan, tan konsideraen mi so inagew-agew a teksto. Saya so akagunggonan maong ed sikami. Sanen binmaleg laray ananak mi, denesidi ra so manlingkor diad Bethel. Naisip mi ya akatulong ed espiritualidad da iyan inagew-agew a panisingbat mi ed teksto.

Saray Pribilehyo Kayari na Bautismo so Mankaukolan na Babaleg a Panangisakripisyo

Siak so abautismoan nen 1962, tan kayari na impannegosyok ed loob na 21 a taon, inlakok itan tan nantrabaho ak ed pasen ya asingger ed sikami ta pian onapit ak ed pamilyak tan makapaniiba kamin manlingkor ed si Jehova. Saya so angilukas ed dalan parad dakel a bendisyon. Angiletneg kami na kalat ya onloob kamin amin ed sigpot-panaon a ministeryo. Satan so ginmapo nen kasakbayan na dekaday 1970 sanen say panguloan ya anak mi, si Edward, so nagmaliw a sigpot-panaon a ministro, odino regular payunir, kapangraduar to ed haiskul. Ag-abayag diad saginonor, nampayunir met so anak min si George, tan tinmumbok met lay Ann. Apaseseg ak a maong ed sikaran talo, lapud isasalaysay da ed siak iray naeksperiensya ra ed lawak na kimeyan. Bilang pamilya et nantongtongan mi no panon min pasimplien so bilay mi ta pian makaloob kamin amin ed sigpot-panaon a ministeryo. Denesidi min ilako so abung mi. Nanayam kami ed satan ya abung ed loob na 18 a taon tan ditan kami nampamilya. Pinabpabli mi itan ya ayaman mi, balet benendisyonan nen Jehova so desisyon mi ya ilako itan.

Si Edward so atawag ed Bethel nen 1972, tan si George, nen 1974. Anggaman naiiliwan mi ira nen Ann, agmi ninonot a maabig komon no manaayam ira ya asingger ed sikami, mangasawa ra, tan manilalak ira. Imbes, nanliketan mi so panlilingkor na ananak mi ed si Jehova diad Bethel.a Mipakna kami ed Uliran 23:15, a kuanto: “Anak ko, no say pusom makabat, say pusok manggayaga, anggan siak.”

Nan-Espisyal Payunir Kami

Lapud walad Bethel so duaran anak mi, nantultuloy kamin nampayunir. Insan sakey ya agew nen 1975, akaawat kami na sulat a mangiimbita ed sikami a man-espisyal payunir diad agni naasainan a teritorya diad Clinton County, Illinois. Agaylan makapasurprisa iman! Kabaliksan na satan a kinaukolan min taynan so New Jersey, a nanayaman mi ya asingger ed saray anak mi a walad New York tan wadman iray kakaaro tan kakanayon mi. Balet, impasen mi iman ya asainmin a nanlapud si Jehova tan sikami so nansakripisyo ya angitonton ed balo iran panamendisyon.

Kayari na pigaran bulan na impankimey mi ed agnaasainan a teritorya, ginmapo kamin nanggawa na saray miting ed sakey a hall a parad publiko diad Carlyle, Illinois. Balet labay mi so nawalaan na permanentin pasen a pantitiponan. Sakey a sanasawan agi a taga-diman so akaromog na sakey a lote a walaan na melag a kamarin a nayari min upaan. Nilinisan mi itan​—diad paway tan loob​—tan ginawa mi itan a melag a pantitiponan. Makakalek kami no nanonotan mi so sakey a kabayo a tumakiling ed sikami. Naynay ton idunglaw so ulo to ed bintana pian nengnengen no anto so nagagawa ed aral!

Sinmabi panaon et aporma so Carlyle Congregation, tan nanliketan mi so intulong ditan. Sikami so tinulongan na sakey a malangwer nin sankapareha a payunir, si Steve tan Karil Thompson, a linma met ditan pian mankimey diad agnaasainan a teritorya. Nanayam ditan so sanasawan Thompson diad loob na pigaran taon tan diad saginonor et inmatendi ira ed Watchtower Bible School of Gilead tan nanmisionaryo ira ed Bukig Aprika, tan nanlingkor ira ed panagbiahen kimey.

Agnambayag et apusek la so melag a pantitiponan mi, tan nakaukolan mi so babaleg a hall. Tinmulong lamet imay sanasawa a taga-diman tan akasaliw kami na lote a matukoy parad sakey a Kingdom Hall. Malikeliket kami ta kayari na pigaran taon et naimbitaan kami ed dedikasyon na balon paalagey a Kingdom Hall diad Carlyle! Siak so apribilehyoan a manpaliwawa nipaakar ed dedikasyon. Say asainmin mi diman et alay abig ya eksperiensya parad sikami, sakey a bendisyon nen Jehova.

Nilukas ed Sikami so Balon Lawak

Nen 1979 et akaawat kami na balon asainmin, diad Harrison, New Jersey. Nanlingkor kami diman ed loob na manga 12 taon. Legan na saman a panaon et inyaralan mi na Biblia so sakey a Tsino a bii, tan saya so angitonton ed dakel nin impangiyaral ed saray Tsino. Kaleganan na saya, naamtaan mi a nilibon Tsino ya estudyante tan pamilya so manaayam ed lugar mi. Lapud saya, sikami so pinaseseg a manaral na lenguahe ya Intsik. Anggaman kinaukolan na satan so pangusar na panaon ed kada agew pian manaral na lenguahe, nanresulta itan ed dakel a maliket a panangiyaral na Biblia ed saray Tsino diad lugar mi.

Legan na saratan a taon, naeksperiensya mi so dakel a makapalek iran agawa, nagkalalo la ed getma min mansalita na Intsik. Sakey ya agew et impakabat nen Ann so inkasikato bilang “otot” na Biblia imbes a “managbangat” na Biblia. Parparehon maong irayan salita. Inmimis labat so unabung tan inkuanto: “Ontuloy kayo. Agak nin balot akapitongtong ed otot na Biblia.” Naiirapan kami nin siansia ed lenguahe.

Insan niasain kami ed sananey a lugar diad New Jersey a ditan mi intultuloy so pankimey ed lawak a kawalaan na saray Tsino. Diad saginonor et naimbitaan kami ya onalis ed Boston, Massachusetts, a wala so sakey a grupo na Tsino ya atugyop la ed loob na ngalngali taloy taon. Apribilehyoan kami ya ontulong ed sayan grupo diad linmabas a pitoy taon tan nanliketan mi so impakaimaton ed impagmaliw na satan a sakey a kongregasyon nen Enero 1, 2003.

Saray Bendisyon ed Bilay a Walaay Panangisakripisyo

Diad Malaquias 3:10, nabasa tayo so imbitasyon nen Jehova ed totoo to ya itarok da iray apay tan bagat da ta pian ikalbo to iray bendisyon to anggad anggapo la so nakaukolan da. Intunda mi so negosyo a naninteresan kon maong. Inlako mi so abung a pinabpabli mi. Tan insakripisyo mi met so arum niran bengatla. Ingen, no ikompara iratan ed saray bendisyon, melag ni labat iray insakripisyo mi.

On, agaylan daakan a bendisyon so impagamor nen Jehova ed sikami! Nanliketan mi so inkiwas na ananak mi ed katuaan, nanggayagaan mi met so impibiang ed sigpot-panaon diad manangiter-bilay a ministeryo, tan naeksperiensya mi so panangasikaso nen Jehova ed saray pankaukolan mi. On, agamoran mi so daakan a bendisyon lapud saray daiset ya insakripisyo mi!

[Paimano ed leksab]

[Litrato ed pahina 25]

Kaiba nen Ann si Louise tan George Blanton, 1991

[Litrato ed pahina 26]

Say Kingdom Hall ed Carlyle, a nidedika nen Hunyo 4, 1983

[Litrato ed pahina 27]

Kaiba mi so kapkapanporman Boston Chinese Congregation

[Litrato ed pahina 28]

Kaiba mi si Edward, Connie, George, tan si Grace