Report na Saray Manangiyabawag na Panarian

Say Dios so Mamapabaleg Diad Alaska

DIAD silong na sakbong a niebe tan yelo, sakey a melanting a bukel so manaalagar na pankanawnawan ontubo. Diad loob labat na taloy bulan a tiagew ed Alaska, say kakawaloy pulgada a bukel na repolyo so ombaleg anggad ngalngali 40 kilo! On, sayan dalin ya aminsan et impasen na dakel ya agmabuna, agnataneman so makapanbungay daakan.

Nagkalalo lan tua iya ed espiritual a lawak diad Alaska. Ditan, diad dalin a manbayag so panaoy yelo, mantutultuloy a mangitatanem iray Tastasi nen Jehova na bukel na Panarian. Singa ed arum a parti na dalin, papabalegen na Dios iray bukel ed mabunan kapusoan.​—1 Corinto 3:6, 7.

● Leleg a wala’d school bus, naobserbaan na kalangweran a Tasi a manngaran na Vanessa so kapara ton estudyante, si Ann, a naynay a manbukbukor ya akayurong. Ompatnag a maermen si Ann, kanian pinayurong nen Vanessa si Ann ed abay to. Agpankelawan a maermen si Ann! Say ina to manaya so inatey lapud ataki ed puso, tan ag-abayag et inatey so ama to lapud kanser. Saya no akin a manaayam si Ann ed kakanayon to diad Alaska.

Sinmamar si Vanessa ed ayaman na balon kabat to leleg a manpupulong aminsan a Sabado tan intilakan to na brosyur a Peteg Kasin Manatalima so Dios ed Sikatayo? Ka-Lunesan to diad eskuelaan, inanap nen Ann so kalangweran a Tasi. Dakel so tepet nen Ann nipaakar ed Biblia, a naebatan nen Vanessa. “Iner so panaaralan yo?” so intepet to. Diad saman a labi et pilpilimero nen Ann ya akiaral diad Kingdom Hall.

Akaromog a tampol iyan ulilan mantaon na 17 na ‘kaamaan’ tan ‘kainaan,’ unong ya insipan nen Jesus. (Mateo 19:29) Tan agaylan magayagan okasyon so pakanengneng ed makakaliket tan makakaimis lan Ann diad pangisisimbolo toy dedikasyon to’d si Jehova diad bautismo ed danum diad “Mensaheros na Maridios a Kareenan” a Distriton Kombension!

● Diad arawi iran lugar na maawang ya Arctic a rehyon na Alaska​—a ditan et nilasus kilometroy impanaarawian na saray baryo​—say duaray-makinan eroplano na Watch Tower Society so uusaren ed pangitatanem na bukel na Panarian ed masulok a 150 komunidad. Balet say espiritual ya ibabaleg panamegley na regular a panangiyaral na Biblia so mandedependi ed korespondensia. Lapud say pansulat et sakey ya angat parad dakel, sakey a managbangat na Biblia so kaukolan a mapamaraan ta pian napansiansiay interes na iyaaralan. Panon kasin nagawaan iya?

Progresibon naiyaralan nen Kathy si Edna na Biblia, anggaman nanarawian na masulok a 600 kilometro so panaayaman da! Imbes a basta sakalen iray tepet ed katulongan ya aaralen, insulat nen Kathy so tepetepet ed peliges ya angitarya met na espasyon pakapangisulatan na saray ebat. Kayarin inebatan nen Edna, balesen nen Kathy a susulatan na saray komenton nakakaukolan pian nipalinew so sakey a punto. Inkuanen Kathy: “Igaganak so labi Mierkoles parad ‘panagaral’ mi, tan tutumboken ko itan a singa gagawaen ko ed arum nin iyaaralan koy Biblia. Impawitan ko met si Edna na na-addressan tan aselyoan lan sobre. Lapud sabien toy duay simba so pangikoreo, say panangiyaral panamegley na korespondensia so ompatnag a matantan.”

Isipen pay liket sanen nannengnengan ira di Kathy tan Edna diad distriton kombension ed Anchorage kayari samploy bulan ya impanaral da panamegley na koreo! Malikeliket met iray Tastasi ed iyaatendi na estudyante na Biblia tan arum ya interesado a nanlalapud nanduruman ararawin baryo diad Alaska.

Anggaman no maminsan et ompatnag a matantan so ibabaleg, arum a “palakay” so maples ya ontubo sano nasinagan na liwaway katuaan. Diad promedyo, masulok a sanlasus a balon manangidayew nen Jehova so nababautismoan kada taon diad Alaska! Nibaga tayon, “Salamat, Jehova,” ed pamapabaleg ed satan!