“Panangebat ed Nengneng a Mabitar”

DIAD Sermon ed Palandey, tinukoy nen Jesus so “Ganggan tan saray Propetas.” Say komatlon seksion na Hebreon Kasulatan et saray Sulsulat, ya angisakup ed saray libro na anlong, a singa say Salmo tan Uliran. (Mateo 7:12; Lucas 24:44) Saraya, met, so nankarga ed kakabatan na Dios.

Alimbawa, saray uliran so amasakbay ed saray uko-ukom ed kadaanan ya Israel: “Siopaman a mangibaga ed marelmeng: ‘Sika so matunong,’ saray totoo so mangayew ed sikato, sikato so gulaen na saray nasyones. Balet diad saraman so mamaat ed sikato et makapaliket, tan diad sikara et onsabi so bendisyon a maabig. Angoban to so saray bibil na saman so onebat a mabitar.”​—Uliran 24:24-26.

No onsuko so sakey ya ukom ed panangidesdes na pasuksok odino nepotismo tan iyabawag to so marelmeng a matunong, arum so makanengneng ed sikato ya agmanepeg ed posisyon. Akin, anggan saray membro na Hentil a “nasyones” ya akadngel ed ontan ya inkapikewet ed hudisyal so onkiwas ed panagmudmora! Diad biek a dapag, no say sakey ya ukom so sitetepel a mamaat ed marelmeng a too tan onebat ed mabitar a dalan diad walan kaso, nagamoran to so respeto tan aro na saray totoo. Saray totoo ed inkalapagan so napakiwas a mankaliktan ed sikato “na bendisyon a maabig.” Singa inkuan na kaaruman nin uliran: “Angoban to so saray bibil na saman so onebat a mabitar.”

Say ontan ya angob so mananda ed respeto​—diad baetan na managkonseho tan saraman so makakaimaton ed maptek a panamaat. Anganko ta anggan saman so sakey ya abaat so onkiwas a maapabor tan ibalikas to so panangaro to ed ukom. Kuan na Uliran 28:23: “Say mamaat ed sakey a too so makaromog na pamalangkap nen say saman so mangulit ed dila to.” Saramay manseserbi a bilang mamatatken ed kongregasyon natan so nepeg sirin ya agda abuloyan so pikakaaro odino relasyon na pamilya a mamikewet ed panangukom da. Diad mabitar a panangisaklang na nakaukolan a konseho, saray mamatatken so makagamor ed respeto na kongregasyon.