Say Binmalitok a Ganggan​—Akin a Siansia nin Makana?

SAY puron balitok so agbalot onkupas, kanian say alahas a ginawa ed balitok so mabmabli tan pinabpabli. Imbes ya ibantak so misimisi na aderal a balitok, saray alahero so mamubo ed mablin metal diad panggawa na sakey a balon gawa na arte lapud pansiansiaen na balitok so kablian to.

Miulibay, anggaman imbalikas nen Jesus so Binmalitok a Ganggan ed apalabas lan duanlibon taon, say kablian to so agkinmesay. Diad pangusisa, odino panitermina ed, saray katunongan ed kakanaan to, magmaong a naapresya tayo so kablian to ed sikatayo natan.

Sanen inter ed sikatayo nen Jesus so Binmalitok a Ganggan, “amin a bengatla, sirin, a labay yon gawaen na totoo ed sikayo, ontan met so gawaen yo ed sikara,” inyarum to ed sikara: “Saya, diad tua, so kabaliksan na Ganggan tan saray Propetas.” (Mateo 7:12) Panon so impantalos ed saya na saray babangatan nen Jesus tan saray arum ya ontatalineng ed sikato?

“Say Kabaliksan na Ganggan tan Saray Propetas”

“Say Ganggan” so manutukoy ed saray akadkaunan sulat a manitibukel ed ununan libro na Biblia, Genesis ya angga ed Deuteronomio. Saraya so mangipaparungtal ed gagala nen Jehova a mamawala na sakey a binin manawtaw ed mauges. (Genesis 3:15) Nisakup ed saratan ya akadkaunan libro na Biblia et say Ganggan, odino tugyop na saray bilibilin, ya inter nen Jehova nen 1513 K. K. P. ed nasyon na Israel ed panamegley nen Moises bilang manamegley diad Palandey Sinai.

Say madibinon ganggan so angibiig ed Israel a manlapud saray kaliberliber a paganon nasyones, tan saray Israelitas so agmanggawa na antokaman a mangikumpromiso ed a maapabor a talindeg da ed arap nen Jehova. Sikara so sigpot a kayarian to tan nakaukolan a mansiansian ontan pian awaten iray bendisyon to. (Exodo 19:5; Deuteronomio 10:12, 13) Balet niarum ed saray obligasyon da ed Dios, say Mosaikon Ganggan so angidatak ed responsabilidad na saray Israelitas a manggawa na maabig ed saray sankailin manaayam ed Israel. Alimbawa, imbaga to: “Say sankailin manaayam a manaayam bilang sakey a sankaili ed sikayo so nepeg a magmaliw ed sikayo a singa sakey a tubo yo; tan sikato so nepeg ya aroen mo a singa inkasika, lapud sika so nagmaliw a sankailin manaayam ed dalin na Ehipto. Siak si Jehova a Dios mo.” (Levitico 19:34) Kaleganan na panaon na saray arari ed Israel, saray sankailin manaayam so nanggayaga ed dakel iran pribilehyo, a singa say impibiang diad impampaalagey ed templo na Dios ed Jerusalem.​—1 Awaran 22:2.

Say Ganggan a niiter ed Israel so angisebel ed pikakalugoran, panagpatey, panagtakew tan inkaagum. Sarayan bilibilin, a pati say “antokaman nin arum a ganggan a wala,” so asegek ed totontonen, “Nepeg mon aroen so kaabay mo a singa inkasikan dili.” Inyarum nen apostol Pablo: “Say aro so agmanggawa na mauges ed kaabay na sakey; sirin say aro so kasumpalan na ganggan.”​—Roma 13:9, 10.

No say Ganggan so angidatak ed mismon letnegan na Binmalitok a Ganggan, anto so “saray Propetas”?

Saray mapropetikon libro na Hebreon Kasulatan met so mamekder ed kakanaan na Binmalitok a Ganggan. Ipapanengneng da si Jehova a bilang sakey a Dios a manumpal a sitotoor ed gagala to. Binendisyonan toray matoor ya ariripen to ya, anggaman ag-ayadyari, et manasalin manggawa ed linawa to tan mangipapanengneng na tuan panagbabawi ed saray pikelkel a kurang da. “Urasan yo so inkasikayo; gawaen yo so inkasikayon malinis; ekalen yo so mauges ed saray pidedeneng yo a manlapud arap na saray matak; tundaan yo so manggawa na mauges. Aralen a gawaen so maong; sukimaten so inkaalas; tulongan so inaposan; isaklang so katunongan ed ulila ed ama ya ugaw a laki; iyagel so balo.”​—Isaias 1:16, 17.

Sanen saray totoo na Dios so nanggawa na maptek ed arum tan dia ed Dios, sirin ginarantiyaan nen Jehova so pananulong to. “Onia so imbaga nen Jehova: ‘Pansiansiaen so inkaalas, sikayon totoo, tan gawaen so matunong’ . . . Maliket so toon ompatey a manggawa ed saya, tan say anak na totoon mamemben ed satan.”​—Isaias 56:1, 2.

Ididirehe nen Kristo So Kongregasyon To

Si Kristo so sinmabin manumpal ed Ganggan tan saray Propetas, tan nanlapulad panaon to, say maandon gagala nen Jehova so nantultuloy a nagagawa. (Mateo 5:17; Efeso 3:10, 11, 17-19) Say daan a Ganggan nen Moises so sinandian na balon sipanan, ya angabrasa ed saray Judio tan Hentil iran alanaan a Kristianos. (Jeremias 31:31-34) Anggaman kuan, say Kristianon kongregasyon ed agew tayo so siansian manutumbok ed Binmalitok a Ganggan. Tan nia so sakey nin malaknab a rason diad pangawat ed inkamakana na ganggan: Si Kristo so aktibon Ulo na modernon Kristianon kongregasyon. Agto inuman iray instruksion to. Say apuyanan a simbawa to so siansia nin maabig.

Sakbay na intaynan to ed sayan dalin, ginanggan nen Jesus iray patumbok to a manggawa na babangatan a totoo ed amin a nasyones tan bangatan ira a “manumpal ed amin a bengatlan ingganggan ko ed sikayo.” Saman a bilin so angisakup ed Binmalitok a Ganggan. Pinaseguroan nen Jesus iray babangatan to: “Nia! Siak so wala ed sikayo ed amin na saray agew ya anggad kasampotan na sistema na bengabengatla.”​—Mateo 28:19, 20.

A singa nikurit ed Lucas 6:31, ingganggan nen Jesus: “Unong a singa labay yon gawaen na totoo ed sikayo, ontan met a nengneng so gawaen ed sikara.” Agaylan maabig ya ehemplo so inletneg nen Jesus diad ununan kiwas a manggawa na maabig ed arum!

Diad kurang na mangaraldalin a ministeryo to, maalwar ya inimano nen Jesus so nakaukolan a sungdoan na totoo, tan sikato so akilikna ed sikara. Kaleganan na sakey ed saray impanliber ton nampulong, anengneng to so ulop tan sikara so inabagey to. Balet nagkalalo nen say satan, sikatoy nanggawa na oksuyan ya ontulong ed sikara. Panon? Diad impangorganisa na malaknab a kampanya na panagpulong ya angitarok ed saray babangatan to ed kaabungan na totoo. A singa indirehe to: “Diad antokaman a syudad odino baley a looban yo, anapen yo so makana, tan manayam ditan ya angga ed itaynan yo.” A sayan kimey so walaan na pananulong to tan panamendisyon na Ama to so malinlinew ya anengneng a manlapud kaaruman iran salita nen Jesus: “Siopaman a mangawat ed sikayo so mangawat met ed siak, tan saman so mangawat ed siak so mangawat met ed saman so angibaki ed siak. . . . Tan siopaman a mangiter na anggan sakey a kopan ambetel ya inumen ed sarayan ankekelag lapud sakey a babangatan, ikuan ko ed sikayo a peteg, agton balot nabalang so tumang to.”​—Mateo 9:36–10:42.

A say Binmalitok a Ganggan so manutukoy ed positibon aksion a nisesengeg ed arum so anengneng diad impankatunongan nen Jesus ed sananey ya inkagawa: “No aroen yo iraman so mangaaro ed sikayo, ed anton galang itan ed sikayo? Ta anggan saray makasalanan et aaroen da raman so mangaaro ed sikara. Tan no gawaen yo so maabig ed saraman so manggawa na maabig ed sikayo, peteg ya anton galang itan ed sikayo? Anggan saray makasalanan so manggagawa na ontan. Diad kasuniyan, itultuloy ya aroen iray kakabusol yo tan manggawa na maabig. . . tan say tumang yo so abalbaleg.” (Lucas 6:32, 33, 35) Sirin, say panumbok ed siansia nin makanan Binmalitok a Ganggan so managdag ed sikatayon manggawa na ununan ikiwas ed panggawa na maabig anggan diad saray totoon agtayo kabat a personal.

Siansia nin Makana, Siansia nin Onkukurang

Anganko ta say mabiskeg a prueban say Binmalitok a Ganggan so siansia nin makana et manlapud aktual iran eksperiensia na saraman so manbibilay ed satan. Saray Kristianos a mangikikiwas na inkasikaran inagew-agew a mitukoyan ed saray ganggan na Dios so makaromog na baleg a gayaga tan, mabetbet ag-inilaloan iran bendisyon. Diad pagmaliw a magalang tan maamo ed saray mantatrabaho ed medikal a klinik, sakey a Kristianon bii so agunggunaan diad paraan a pangaasikaso na saray nerses tan doktores ed sikato.

Saray Tasi nen Jehova ya akibiang ed maples ya impaalagey iran proyekto na Kingdom Hall so mamekder met ed kakanaan na Binmalitok a Ganggan. Say mapangasin idalaw ed saray totoon manaayam ed asingger a pasen na pampapaalageyan a mangipakabat ed sikara no anto so implano so mabetbet ya angiter na positibon kiwas. Saray totoon diad inmuna et sinmumpa ed saray Tastasi so akaimaton a sikara so manggagawa na maabig ed saray kakaabay da, tan anengneng dan sankaunaan so kooperasyon na saray totoo na Dios ed kimey da. Bilang nansumpalan, arum so angiyopresi na tulong ed panagpaalagey, balanglan direkta odino diad pangiter na suplay.​—Ipareng so Zacarias 8:23.

Sanen sakey a Tasin Iranian a manaayam ed London, Inglatera, so analiw na tagano ed sakey a garita, sikato so ininsulto na managlako lapud sikato so sankaili. Say Tasi so mauyamo tan sitataktikan angipaliwawa a sikato, bilang sakey ed saray Tasi nen Jehova, so andian na mauges a liknaan ed saray totoo ed arum a nasyonalidad. Imbes, dinalaw to so amin ed kakaabay diad mensahe na Biblia. Nansumpalan? Say akankayarian na garita so angarum ed taganon sinaliw na Tasi.

Siempre, say Binmalitok a Ganggan so agnigeter ed ontan iran melag a gawa na inkamapangasi. Segurado, say sankabalgan a balikas na satan et say maabig a gagawaen na saray Tastasi nen Jehova ed sankamundoan diad maparanay ya idadalaw ed saray kaabungan na kakaabay da a tekep na mensahe na maong a balita na Panarian na Dios.

Panagbilay ed Binmalitok a Ganggan

Say pangiyaplika ed Binmalitok a Ganggan et kabaliksan to so pangipaarap na imano ed arum. Sikato so positibon totontonen. Nakaukolan yon anapen iray pankanawnawa ed panggawa na maabig ed saraman so walad liberliber yo. Makaaro tan sinononot, a mangipanengneng na personal ya interes ed sikara! (Filipos 2:4) Diad panggawa na ontan, anien yo so mayaman a bendisyon. Tutumboken yo so simbawa nen Jesus: “Pasindagen yo so liwawa yo ed arap na totoo, pian nanengneng daray maabig a gawa yo tan iter da so gloria ed Ama yo a wala ed katawenan.” (Mateo 5:16) Insan, si Jehova so Mananumang yo legan a sikato so magunaet ya anapen yo tan manbilay ya inagew-agew ed Binmalitok a Ganggan.​—Hebreos 11:6.