Say Binmalitok a Ganggan—Anto Itan?
“NIA! Agko guguloen iray kakaabay ko. No nipaakar ed siak, nayarian dan gawaen so labay da. Balet, siempre, no sikara so wala ed kairapan, gawaen ko so nayarian kon ontulong.” Kasin ontan so panmoria yo? Sano ombasig iray desyang, saray gawa na panangasi tan agkasibletan so nayarin baleg, mabetbet diad pankelaw na dakel. Balet kasin saya so magenap?
No sakey kan ateng, anggapoy duaruwan binilin moray anak mo ya agda gagawaen so pamasyudot ed saray kagalaw da. Dakel ed sikatayo so walaan na saray piglat a manlapud inkatobonbalo diad pangipanengneng a say pangipulisay ed totontonen so mangitarok na kababales. On, naaralan tayo so kakabatan na totontonen ya impabitar nen pilosopon Confucius a taga Bukig: “Say agmo labay a nagawa ed sika, agmo gagawaen ed arum.” Kasin namoria yo, anggaman kuan, a saya so abebbeba lambengat, negatibon bersion na saman so akabatan a bilang say Binmalitok a Ganggan?
Sakey a Positibon Ganggan
Unong ed Webster’s New Collegiate Dictionary, say “binmalitok a ganggan” so naukeran a bilang “sakey a totontonen na etikon kondukta a manutukoy ed [Mateo] 7:12 tan [Lucas] 6:31 tan ibabaga ton nepeg a gawaen na sakey ed arum so unong a labay ton gawaen na arum ed sikato.” Nengnengen so kahon ed leksab na pahina tan imanoen no panon a say nanduruman bersion na Biblia ed Mateo kapitulo 7, bersikulo 12 so mangiyabuloy ed karlangan na sayan manangigiyan prinsipyo ya onsinag.
Ipangasin imanoen ya anggaman say salita so manduruma ed kada bersion, say totontonen so positibo. Tutal, singa inkatunongan nen Jesus ya akadkauna diad Sermon ed Palandey: “Itultuloy yo so onkerew tan niiter ed sikayo; itultuloy yo so mananap, tan makaromog kayo; itultuloy yo so ontuktok, tan nalukasan ed sikayo. Ta siopaman ya onkerew so mangawat, tan siopaman a mananap so makaromog, tan siopaman ya ontuktok so nalukasan.” (Mateo 7:7, 8) Onkerew, mananap, ontuktok, so amin et positibon aksion. “Amin a bengatla, sirin,” intuloy nen Jesus, “a labay yon gawaen na totoo ed sikayo, ontan met so gawaen yo ed sikara.”—Mateo 7:12.
Ipapanengneng na Biblia a saray babangatan nen Jesus so angiyalibansa diad pambilay ed sayan parehon totontonen. (Roma 15:2; 1 Pedro 3:11; 3 Juan 11) Makapaermen, anggaman kuan, say kaplesan a kipapasen na saray siglaotan na too so mamekder a, malaknab, saray totoo, balanglan mangibabagan Kristiano odino andi, so agmanutumbok ed satan. Kasin kabaliksan na saya a sayan ganggan na etikon kondukta so aliwa lan makana? Kasi ta anganko et andi-la-ed-panaon?
[Kahon ed pahina 3]
“Gawaen ed arum a totoo so amin a labay yon gawaen da ed sikayo.”—The Holy Bible, impatalos nen R. A. Knox.
“Tratoen so arum a totoon eksakto a singa labay yon pantrato ra ed sikayo.”—The New Testament in Modern English, nen J. B. Phillips.
“Antokaman a pilalek yon gawaen na arum ed tan para ed sikayo, ontan met so gawaen yo ed tan para ed sikara.”—The Amplified New Testament.
“Gawaen ed arum so amin a bengatlan labay yon gawaen da ed sikayo.”—The New Testament in the Language of Today, nen W. F. Beck.
“Diad amin a pamaakaran sirin, tratoen yo so kapara yon too unong a kaliktan yon pantrato ra ed sikayo.”—The Four Gospels, impatalos nen E. V. Rieu.
“Nepeg yon agamilen so pideneng ed arum a singa labay yo a pideneng da ed sikayo.”—The New Testament, nen C. B. Williams.