‘Say Templo’ tan ‘say Pangulo’ Natan
“Say prinsipe [“pangulo,” NW], sano onloob ira, onloob naani ed pegley da; et no ompaway ira, ompaway ira naani a manuulop.”—EZEQUIEL 46:10.
1, 2. Anton manunan katuaan so ontulong ed sikatayo ta pian naamtaan tayo so dakel ed kabaliksan na pasingawey nen Ezequiel nipaakar ed templo?
AGSIGPOT a kombinsido iray pigaran kadaanan a Judion rabbi ed libro na Ezequiel. Unong ed Talmud, eekalen ni ingen na pigara’d sikara so libro manlapud kanon na Masanton Kasulatan. Nairapan iran mangipaliwawa ed kabaliksan na pasingawey nipaakar ed templo kanian inkuan dan ag-itan narandan na too. Nawewetwet so arum ya iskolar na Biblia ed pasingawey nen Ezequiel nipaakar ed templo nen Jehova. Komusta itayo balet?
2 Nanlapulad inkipawil na puron panagdayew, benendisionan nen Jehova so totoo to na dakel a sinag na espiritual ya aralem a pakatalos, pati say pakatebek ed no anto so espiritual a templo na Dios—say singa-templon uksoyan nen Jehova parad puron panagdayew.a Sayan manunan katuaan so ontulong ed sikatayo pian natalosan a maong so kabaliksan na pasingawey nen Ezequiel nipaakar ed templo. Konsideraen tayo pan maong so apatiran kabiangan na sayan pasingawey—say templo, say inkasaserdote, say pangulo, tan say dalin. Antoy kabaliksan na saraya natan?
Sika tan say Templo
3. Anto so naaralan tayo manlapud atagey a gubida tan saray ukit ed dingding a walad saray lolooban ed templo?
3 Isipen pan sikatayoy manpapasyar ed sayan nipasingawey a templo. Onasingger tan onsapat itayo na pitoran balitang ed sakey ya abalbaleg a wangalan. Kaloob ed sayan lolooban, ontangay itayo ed pankelkelaw. Say gubida to et masulok a 30 metro ed kaatagey! Kanian nipanonot ed sikatayo iray estandarte ed iloob ed uksoyan nen Jehova parad panagdayew et atagtagey. Liwawaan na saray sinag a manlalapud saray bintana so inukit iran kiew a palma diad dingding, ya inusar ed Kasulatan pian ilitratoy kaptekan. (Salmo 92:12; Ezequiel 40:14, 16, 22) Sayan sagradon pasen so parad saramay maptek ed moral tan espiritual. Mitunosan ed satan, mansiansia itayon maptek ta pian abobonan nen Jehova so panagdayew tayo.—Salmo 11:7.
4. Sioparay agmakaloob ed templo, tan anto so ibangat na saya ed sikatayo?
4 Diad kada diking na dadalanan, walay taloran silir na guardia. Kasin palooben itayo na saray guardia? Imbaga nen Jehova ed si Ezequiel ya agnayarin onloob so sankailin “agginalsiman ed puso.” (Ezequiel 40:10; 44:9) Antoy kabaliksan na saya? Awaten lambengat na Dios bilang managdayew iramay mangaaro ed saray ganggan to tan manbibilay unong ed saratan. (Jeremias 4:4; Roma 2:29) Abrasaen to iratan ed espiritual a tolda to, say abung a pandayewan ed sikato. (Salmo 15:1-5) Nanlapulad inkipawil na puron panagdayew nen 1919, say mangaraldalin ya organisasyon nen Jehova so angitandoro tan progresibon angipalinew ed saray ganggan to’d moral. Saramay sigagagalan agmangunor so agla naabrasan milimog ed totoo to. Natan et kinmana so nibase’d-Biblian panagdispelosip ed saray agmagbabawin managgaway mauges ta pian napansiansian malinis tan puro so panagdayew tayo.—1 Corinto 5:13.
5. (a) Anto so panpadparaan na pasingawey nen Ezequiel tan say pasingawey nen Juan a nirekord ed Apocalipsis 7:9-15? (b) Diad pasingawey nen Ezequiel, sioparay ililitrato na 12 tribu a mandadayew ed akinpaway a saban?
5 Akalukas so dadalanan a paarap ed akinpaway a saban a no iner et mandadayew tan mangigagalang iray totoo ed si Jehova. Mangipanonot iya ed sikatayo ed pasingawey nen apostol Juan nipaakar ed “baleg ya ulop” a mandadayew ed si Jehova diad “agew tan labi ed templo to.” Saray kiew a palma so nilitrato ed namparan pasingawey. Diad pasingawey nen Ezequiel et inadornoan na saratan iray dingding na lolooban. Diad pasingawey nen Juan saray managdayew so akabemben na sangasangay palma, a mangisisimbolo’d gayaga ra’d pangigagalang ed si Jehova tan ed pangaabrasa ra’d si Jesus bilang Ari ra. (Apocalipsis 7:9-15) Unong ed konteksto na pasingawey nen Ezequiel, ililitrato na 12 tribu na Israel so “arum a karnero.” (Juan 10:16; ikompara so Lucas 22:28-30.) Kasin sakey ka met ed saramay manggagayaga ed panangigalang ed si Jehova diad pangiyaabawag ed Panarian to?
6. Anto so gagala na saray pananganan diad akinpaway a saban, tan anton pribilihyo so ipanonot na saya ed saramay kabiangan na arum a karnero?
6 Diad panpapasyar tayo ed akinpaway a saban, nanengneng tayoy 30 a pananganan a no iner et kakanen na totoo iray boluntaryo iran apay da. (Ezequiel 40:17) Natan, saramay kabiangan na arum a karnero so agmangibabagat na ayep, balet ag-ira oonlan kalimalima diad espiritual a templo. (Ikompara so Exodo 23:15.) Insulat nen apostol Pablo: “Lapu ed [si Jesus] sirin mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to. Balet agyo lingwanan so panaggawa na maabig tan say pannanabang; ta say Dios napaliket a maong ed sarayan bagat.” (Hebreos 13:15, 16; Oseas 14:2) Sakey a baleg a pribilihyo so pangiyapay na ontan iran bagat ed si Jehova.—Uliran 3:9, 27.
7. Anto so ipapaseguro ed sikatayo na panagsukat ed templo?
7 Manbabantay si Ezequiel leleg a susukaten na sakey ya anghel iyan nipasingawey a templo. (Ezequiel 40:3) Mipadpara, niganggan ed si apostol Juan: “Onalagey ka, tan sukaten mo so templo na Dios, tan say altar, tan saray wadman a mangigalgalang.” (Apocalipsis 11:1) Antoy kabaliksan na sayan panagsukat? Diad namparan kipapasen saya so mapatnag ya onkana bilang garantiya, sakey a pakatandaan ya anggapoy makaamper ed si Jehova diad panumpal to’d saray gagala to nipaakar ed puron panagdayew. Ontan met natan, napaseguroan itayo ya anggapo—anggan say pirmin isusumpa na saray mabiskeg a gobierno—so makaamper ed kipawil na puron panagdayew.
8. Siopa so makaloob ed saray wangalan ed akindalem a saban, tan anto so ipapanonot ed sikatayo na sarayan wangalan?
8 Leleg ya ombabasil itayo ed akinpaway a saban, nanengneng tayon walay taloran wangalan a mamaarap ed akindalem a saban; say akindalem iran wangalan so adasig tan kasukat met na saray akinpaway a wangalan. (Ezequiel 40:6, 20, 23, 24, 27) Saray saserdote labat so nayarin onloob ed akindalem a saban. Saray akindalem a wangalan so mangipanonot ed sikatayo a nepeg a kapeten na saray alanaan iray madibinon estandarte tan ganggan, balet saratan met ya estandarte tan ganggan so mangigigiya ed amin a tuan Kristiano. Balet anto so kimey na saray saserdote, tekep na anton kabaliksan natan?
Matoor ya Inkasaserdote
9, 10. Panon ya intarya na “peteg ya inkasaserdote,” a singa inlitrato na makasaserdoten klase ed pasingawey nen Ezequiel, so espiritual ya instruksion?
9 Diad sakbay-Kristianon panaon, saray saserdote so amasyan nankimey diad templo. Say panagparti ed ibabagat ya ayayep, panangiyapay ed saratan diad altar, tan panagserbi’d kaparan saserdote tan totoo so makapakesaw a trabaho. Balet walaan ira na arum nin importantin kimey. Onia so ingganggan nen Jehova nipaakar ed saray saserdote: “Ibangat da naani so baley ko ed nandumaan na masanto tan karaklan, tan paibiig da naani ed sikara so marutak tan malinis.”—Ezequiel 44:23; Malaquias 2:7.
10 Kasin aapresiaen mo so impasyan kimey tan mapaabeban serbisyo a gagawaen na saray alanaan bilang sakey ya ulop, “peteg ya inkasaserdote,” nisengeg ed puron panagdayew? (1 Pedro 2:9) Singa saray Levitas a saserdote nensaman, idadaulo ray panangiter na espiritual ya instruksion, a tutulongay totoo pian natalosan da no anto so malinis tan naabobonan ed imaton na Dios tan no antoy andi. (Mateo 24:45) Say ontan ya instruksion, a manlalapud nibase’d-Biblia iran publikasyon tan ed saray Kristianon miting tan kombension, so ontutulong ed minilyon pian makapipulangan ed Dios.—2 Corinto 5:20.
11. (a) Panon a nidanet ed pasingawey nen Ezequiel so kaimportantian na inkalinis ed biang na saray saserdote? (b) Diad kaunoran iran agew, panon a nalilinisan iray alanaan ed espiritual a pantalos?
11 Anggaman ontan, nepeg ya aglambengat bangatan na saray saserdote so arum a magmaliw a malinis; sikaran mismo so nepeg a magmaliw malinis. Kanian, akadkaunan anengneng la nen Ezequiel so prosesoy panaggogol parad saray saserdote na Israel. (Ezequiel 44:10-16) Mipadpara, ipapanengneng na awaran a nen 1918 et yinmurong si Jehova ‘bilang managgogol’ ed espiritual a templo to, a susurien so makasaserdoten alanaan a klase. (Malaquias 3:1-5) Saramay naukom a malinis ed espiritual odino nagbabawi lapud datin panagtalintao so naabuloyan a mantultuloy ed pribilihyo na serbisyo diad espiritual a templo to. Siansia, singa ed arum met, saray sinansakey ya alanaan so nayarin magmaliw ya agmalinis—ed espiritual tan moral. (Ezequiel 44:22, 25-27) Kaukolan dan pambanikelan so pansiansian ‘andian na mantsa manlapud mundo.’—Santiago 1:27; ikompara so Marcos 7:20-23.
12. Akin a kaukolan tayon apresiaen so kimey na saray alanaan?
12 Nayarin itepet na balang sakey ed sikatayo, ‘Kasin aapresiaen ko so alimbawan ipapanengneng na saray alanaan ed dakel lan taon a matoor a serbisyo ra? Kasin aaligen koy pananisia ra?’ Maabig a tandaan na saramay kabiangay baleg ya ulop ya agda lawas nakaiba ed dalin iray alanaan. Nipaakar ed saray saserdote ed pasingawey nen Ezequiel, oniay inkuan nen Jehova: “Anggapo naani iter yo ed sikara a kayarian [a dalin] ed Israel; siak so kayarian da.” (Ezequiel 44:28) Mipadpara, saray alanaan so aliwan magnayon a manayam ed dalin. Walaan iray mangatatawen a tawir, tan momoriaen itan na saramay kabiangan na baleg ya ulop a sakey a pribilihyo so panuporta tan pamaseseg ed sikara legan a wadia nira’d dalin.—Mateo 25:34-40; 1 Pedro 1:3, 4.
Siopa so Pangulo?
13, 14. (a) Akin a say pangulo et nepeg a kabiangan na arum a karnero? (b) Siopa so ililitrato na pangulo?
13 Natan et onlelesay makapainteres a tepet. Siopa sirin so irerepresenta na pangulo? Lapud sikatoy natutukoy bilang indibidual tan bilang sakey a grupo, nayarin nikuan tayon irerepresenta toy sakey a grupo na totoo. (Ezequiel 44:3; 45:8, 9) Balet siopa? Maseguron aliwan saray alanaan. Diad pasingawey, sikatoy maapit a mikikimeyan ed saray saserdote, balet aliwan sakey ed sikara. Aliwan singa say makasaserdoten klase, sikatoy naikdan na tawir ed dalin tan sirin et sikatoy walaan na arapen diad dalin, aliwan diad tawen. (Ezequiel 48:21) Sakey ni, ibabaga na Ezequiel 46:10: ‘Say pangulo, sano onloob ira [saray aliwan makasaserdoten tribu], onloob naani ed pegley da [ed akinpaway a saban na templo]; et no ompaway ira, ompaway ira naani a manuulop.’ Sikatoy ag-onloob ed akindalem a saban noagta mandayew ed akinpaway a saban, ya onloloob tan ompapaway ed templo a kaibay totoo. Sarayan katuaan so seguradon mangipabitar a say pangulo so kabiangan na baleg ya ulop na arum a karnero.
14 Malinew, walaan na pigaran responsabilidad so pangulo ed limog na totoo na Dios. Diad akinpaway a saban, sikatoy akayurong ed balkon ed Bukig a Wangalan. (Ezequiel 44:2, 3) Saya so mangipanengneng na betang ed panangasikaso, a mipara ed saramay mamasiken ed Israel ya akayurong ed wangalan na syudad tan angipaakseb na panangukom. (Rut 4:1-12; Uliran 22:22) Siopa ed limog na arum a karnero so mamebembey betang na panangasikaso natan? Saray mamatatken a walaan na mangaraldalin ya ilalo ya aturo panamegley na masanton espiritu. (Gawa 20:28) Kanian say pangulon klase so nipaparaan natan tekep na ilalon panserbi’d saginonor diad sakey a kapasidad na panangipakurang diad balon mundo.
15. (a) Panon ya ipapalinew na pasingawey nen Ezequiel so siglaotan na mamatatken a kabiangan na baleg ya ulop tan say alanaan a makasaserdoten klase? (b) Anto so panangidaulon inako na saray alanaan a mamatatken ed mangaraldalin ya organisasyon na Dios?
15 Balet, antoy siglaotan natan na alanaan a makasaserdoten klase tan saratan a mamasiken a, bilang kabiangan na baleg ya ulop et manseserbin walaan na saray betang ed panangasikaso? Say pasingawey nen Ezequiel so mangisusuheri a saray mamatatken a membro na baleg ya ulop so walaan na masuporta tan mapasakop a betang, legan a mangidadaulo ed espiritual iray alanaan. Panon ya ontan? Tandaan, saray saserdote ed pasingawey so naikdan na responsabilidad a mangibangat ed totoo nipaakar ed espiritual iran pamaakaran. Nibaga met ed sikara ya onakto ira bilang uko-ukom ed legal iran kaso. Niarum ni, saray Levita so apabtangan a ‘manbantay’ ed saray wangalan na templo. (Ezequiel 44:11, 23, 24) Malinew, say pangulo so kaukolan a manpasakop ed espiritual iran serbisyo tan panangidaulo na saray saserdote. Matukoy sirin a diad modernon panaon et saray alanaan so mangidadaulo ed puron panagdayew. Alimbawa, saray membro na Mananguley ya Ulop na Tastasi nen Jehova so apili ed limog da. Saratan a matoor ya alanaan a mamatatken so mangipapasal ed natitibukel lan pangulon klase ed loob la na saray dekada, ya ipaparaan iray prospektibon membro na sayan klase ed panaon sano nipabtang la’d sikara so sigpot ya autoridad da diad onsabin balon mundo na Dios.
16. Unong ed Isaias 32:1, 2, panon so nepeg ya ikiwas na amin a mamatatken?
16 Anton klase na manangasikaso irayan prospektibon membro, a mangako ed apalaknab iran responsabilidad bilang pangulon klase? Say propesiyan naromog diad Isaias 32:1, 2 kuanto: “Nia sakey ya ari so manari naani ed kaptekan, tan saray prinsipe manuley ira naani ed inkatunong. Et sakey a too so magmaliw naani a singa sakey ya amotan na dagem, tan sakey a siruman ed bagyo, singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya apagaan.” Nasusumpal iyan propesiya natan legan a pankikimeyan na Kristianon mamatatken—alanaan tan arum a karnero—so panalimbeng ed pulok manlapud saray “bagyo” a singa say panamasegsegang tan pakadismayaan.
17. Panon so nepeg a panmoria na saray Kristianon managpastol ed inkasikaran dili, tan panon iran moriaen na pulok?
17 Saray salitan “prinsipe” tan ‘pangulo,’ a walaan na parehon kabaliksan ed Hebreo, so agnausar bilang titulo a denisinyon mangitandoro ed lalaki. Imbes, dedeskribien na saratan so responsabilidad a sakbaten na sarayan lalaki diad pangasikaso ed saray karnero na Dios. Mapekder ya impasakbay nen Jehova: “Sikato komon so masarag ed sikayo, O prinsipe na Israel! Ekalen yo so panamasoot tan panagsamsam, et gawaen yo so inkatunong tan kaptekan.” (Ezequiel 45:9) Maabig parad amin a mamatatken natan ya ipapuso itan a konseho. (1 Pedro 5:2, 3) Bilang resulta, nabidbiran na pulok a si Jesus so angitarya ed saray managpastol bilang ‘langkap a lalaki.’ (Efeso 4:8) Saray kualipikasyon da so nidatak ed apuyanan a Salitay Dios. (1 Timoteo 3:1-7; Tito 1:5-9) Ontumbok sirin iray Kristiano ed panangidaulo na mamatatken.—Hebreos 13:7.
18. Anto so pigaran responsabilidad na saray prospektibon pangulon klase natan, tan anto so responsabilidad da ed arapen?
18 Diad panaon na Biblia walaray pangulo a babaleg so autoridad da bangta say arum et daiset. Natan, saray mamatatken a kabiangay baleg ya ulop so walaan na malaknab a nanduruman responsabilidad. Arum so manlilingkor ed sakey a kongregasyon; arum so manlilingkor ed dakel a kongregasyon bilang managbiahe iran manangasikaso; arum so manlilingkor ed intiro iran bansa bilang membro na Branch Committee; arum so direktan mangaasisti ed nanduruman komite na Mananguley ya Ulop. Diad balon mundo, turoen nen Jesus ‘iray prinsipe ed intiron dalin’ pian mangidaulo ed limog na saray managdayew ed si Jehova ed dalin. (Salmo 45:16) Andi-duaruwan dakel ed saraya so pilien to ed limog na saray matoor a mamatatken natan. Lapud papaneknekan la na sarayan lalaki so inkasikara natan, pilien ton imatalek ed dakel so lalon babaleg iran pribilihyo ed arapen sano iparungtal to so betang na pangulon klase ed balon mundo.
Say Dalin na Totooy Dios Natan
19. Anto so irerepresenta na dalin ed pasingawey nen Ezequiel?
19 Say pasingawey nen Ezequiel so mangililitrato met ed nipawil a dalin na Israel. Antoy irerepresenta na sayan kabiangay pasingawey? Impasakbay na arum a propesiyan nipaakar ed panangipawil a say dalin, say Israel, so magmaliw a paraiso a singa Eden. (Ezequiel 36:34, 35) Natan, panggagayagaan tayo so nipawil a “dalin,” tan satan met et diad Edenikon pantalos. Mipadpara, mabetbet tayon tutukoyen so espiritual a paraiso tayo. Inukeran na Say Panag-Bantayan so “dalin” tayo bilang say “sakop na kimey” na pinilin totoo na Dios.b Inerman so kawalaan na lingkor nen Jehova, sikatoy walad satan a nipawil a dalin basta panggugunaetan ton itandoro so tuan panagdayew diad pankurang ed saray bakat nen Kristo Jesus.—1 Pedro 2:21.
20. Anton prinsipyo so naaralan tayo manlapud “say masanton kontribusyon” ed pasingawey nen Ezequiel, tan panon tayon niyaplika iyan prinsipyo?
20 Komusta balet so kabiangan na dalin a tinawag a ‘masanton kontribusyon’? Saya so kontribusyon na totoo a panuporta ed inkasaserdote tan say syudad. Mipadpara, “amin a baley ed dalin” so mangikontribusyon na sakey a kabiangan na dalin parad pangulo. Antoy kabaliksan na saya natan? Siempre, aliwan say pakabelatan na totooy Dios a susueldoan a kleron klase. (2 Tesalonica 3:8) Imbes, say manunan suportan niiter ed mamatatken et diad espiritual a paraan. Laktipen na satan so pangasisti ed kaplesan a kimey tan pangipanengneng na makoopera tan mapasakop ya awawey. Ingen, singa diad agew nen Ezequiel, sayan kontribusyon so ginawa ‘ed si Jehova,’ aliwan ed siopaman a too.—Ezequiel 45:1, 7, 16.
21. Anto so naaralan tayo manlapud impangapag ed dalin diad pasingawey nen Ezequiel?
21 Aliwan say pangulo tan say inkasaserdote labat so walaan na nipabtang a paspasen ed sayan nipawil a dalin. Say inkaapag na dalin so mangipanengneng a balang sakey ed 12 tribu so walaan na maligen a tawir. (Ezequiel 47:13, 22, 23) Kanian saramay kabiangan na baleg ya ulop so aglabat walaan na pasen ed espiritual a paraiso natan noagta sikara met so mangawat na betang a dalin sano tawiren da so sakey a pasen ed mangaraldalin a sakop na Panarian na Dios.
22. (a) Anto so irerepresenta na syudad ed pasingawey nen Ezequiel? (b) Anto so naaralan tayo manlapud impakawalaan na syudad na saray wangalan a walad amin a diking?
22 Kaunoran, anto so irerepresenta na syudad ed pasingawey? Aliwa itan a mangatatawen a syudad, lapud wala itan ed utel na “naagamil ed karaklan” (aliwan sagrado) a dalin. (Ezequiel 48:15-17) Kanian satan so mangaraldalin. Bueno, anto so sakey a syudad? Agta ipapasabi na satan so ideya a nipaakar ed totoo ya ondaragsa bilang sakey a grupo tan manutugyop na bengatlan nauksoy tan naorganisa? On. Kanian, sayan syudad so ompatnag a mangilitrato ed mangaraldalin ya administrasyon a mangungguna ed amin a manugyop na matunong a mangaraldalin a sosyedad. Sigpot itan a nipakurang diad onsabin “dalin a balo.” (2 Pedro 3:13) Saray wangalan na syudad ed amin a diking, sakey a parad kada tribu, so mangiyilustran tuloy ed pagmamaliw a lukas. Natan, say totoo na Dios so aliwan akasekreto tan maamot ya administrasyon. Mainomay ya asinggeran iray responsablin agagi; kabkabat iray prinsipyon mangiwawanwan ed sikara. Ipapanonot ed sikatayo na bengatlan nipaakar ed totoo a nanlapud amin a tribun mamabayubo ed dalin a manusuporta ed syudad a say arum a karnero so manusuporta, anggan diad materyal a paraan, ed saray uksoyan ya ididirehi na satan a panangipakurang parad totoo na Dios ed sankamundoan.—Ezequiel 48:19, 30-34.
23. Anto so konsideraen tayo ed ontumbok ya artikulo?
23 Komusta balet so nipaakar ed ilog ya onaagus manlapud santuaryo na templo? No antoy irerepresenta na satan natan tan ed arapen so tema ed mikatlo tan unor lan artikulo na sayan serye.
[Saray paimano ed leksab]
a Nengnengen so libron Revelation—Its Grand Climax At Hand!, pahina 64, parapo 22, impalapag na Watchtower Bible and Tract Society of New York, Inc.
b Nengnengen so Say Panag-Bantayan, a Hulyo 1, 1995, pahina 20.
Saray Punton Repasoen
◻ Anto so ililitrato na templo ed pasingawey nen Ezequiel?
◻ Siopa so ililitrato na saray saserdote a manseserbi ed templo?
◻ Anto so pangulon klase, tan anto so pigara’d saray responsabilidad to?
◻ Anto so dalin a walad pasingawey nen Ezequiel, tan diad anton pantalos a naapag itan ed 12 tribu?
◻ Anto so ililitrato na syudad?
[Diagram/Mapa ed pahina 15]
(Parad aktual a format, nengnengen so publikasyon)
Say impangapag ed dalin a singa nilitrato ed pasingawey nen Ezequiel
SAY LABINDUAN TRIBU
Say Baleg a Dayat
Dayat na Galilea
Ilog Jordan
Dayat na Asin
DAN
ASER
NEFTALI
MANASES
EFRAIM
RUBEN
JUDA
SAY PANGULO
BENJAMIN
SIMEON
ISACAR
ZABULON
GAD
[Diagram]
IMPAMAAWANG ED MASANTON KONTRIBUSYON
A. ‘Wadman a Mismo si Jehova’ (Jehovah-Shammah); B. mabungan dalin na syudad
Say Betang na Saray Levita
Santuaryo nen Jehova
Say Betang na Saray saserdote
B A B