Si Jehova so Mangiiter na Biskeg ed Nakekesawan

“Napasimbalo so biskeg na saramay maniilalo ed si Jehova. Sikaray onatagey a nampayak a singa saray agila.”​—ISAIAS 40:31.

1, 2. Anto so iiter nen Jehova ed saramay manmamatalek ed sikato, tan anto so nepeg ya ikonsidera tayo natan?

SARAY agila so kabiangan na saray sankabiskegan a manok diad katawenan. Saraya so nayarin onsebang ed andukey a distansya ya ag-ikulipakpak iray payak da. Tekep na saray payak a nayarin ombuskag na masulok a duaran metro, “say Ari na saray Manok,” say binmalitok ya agila, so “sakey ed pandinayewan a tuloy ed amin ya agila; diad itekkiab ed tapew na saray pukdol tan saray patar, [satan] so manpaatagey ed dakel ya oras ed tapew na pigaran pantok na palandey, insan mamatayong anggad singsinga la tulnek ed tawen.”​—The Audubon Society Encylopedia of North American Birds.

² Tekep na satan ed kanonotan ya abilidad na itetekkiab, insulat nen Isaias: “[Si Jehova] so mangiiter na biskeg ed sakey a nakekesawan; tan padadaaken so sigpot a pakayari na sakey ya andian na dinamikon enerhya. Saray ugugaw a lalaki so namparan nakesawan tan naalipanesan, tan saray kalangweran a lalakin mismo so maseguron nagapol, balet napasimbalo so biskeg na saramay maniilalo ed si Jehova. Sikaray onatagey a nampayak a singa saray agila. Sikaray ombatik tan agnaalipanesan; sikaray manakar tan agnakesawan.” (Isaias 40:29-31) Agaylan makaligliwa so pakaamta a si Jehova so mangiiter na biskeg ed saramay manmatalek ed sikato pian makapantultuloy, a singano kikinlongan to ira a singa agnakesawan iran payak na ontetekkiab ya agila! Konsideraen met natan so pigaran probisyon a ginawa to pian pabiskegen so sakey a nakekesawan.

Say Pakayari na Pikakasi

3, 4. (a) Pinaseseg nen Jesus iray babangatan to a manggawa na anto? (b) Anto so nailaloan tayo a gawaen nen Jehova bilang ebat ed saray pikakasi tayo?

³ Pinaseseg nen Jesus iray babangatan ton “naynay iran manpikasi tan ag-onsusuko.” (Lucas 18:1) Kasin say panangibalikas ed si Jehova na walad puso tayo so talagan makatulong ed sikatayon napasimbaloy biskeg tan naarawian so isuko sano singano alablabas laray desdes ed bilay? On, balet walaray pigaran bengatlan nepeg a tandaan tayo.

⁴ Nepeg itayon magmaliw a realistiko ed iilaloan tayon gawaen nen Jehova bilang ebat na saray pikakasi tayo. Sakey a Kristianon akasagmak na pirmin depresyon so nankuan ed saginonor: “Singa met ed arum niran beblay, agmanggagawa na milagro si Jehova ed sayan panaon. Balet talagan tutulongan to itayon talonaan tan natambal anggad nayarian tayo ed sayan sistema.” Diad pangisalaysay no akin ya akatulong ed sikato iray pikakasi to, inyarum to: “Makakapankerew ak na masanton espiritu nen Jehova ed loob na 24-oras ed kada agew.” Kanian, ag-itayo ikakalibedber nen Jehova manlapud saray desdes ed bilay a mamakapuy ed sikatayo, balet sikatoy “mangiiter na masanton espiritu ed saramay onkekerew ed sikato!” (Lucas 11:13; Salmo 88:1-3) Satan ya espiritu so mamasarag ed sikatayon arapen so antokaman a subok odino desdes ed sikatayo. (1 Corinto 10:13) No kapilitan, satan so mamano ed sikatayo na “pakayari ed labas na normal” pian makapansungdo anggad ekalen na Panariay Dios so amin a makapadesdes a problema diad balon mundon asingsingger la.​—2 Corinto 4:7.

5. (a) Pian magmaliw ya epektibo iray pikakasi tayo, anton duaran bengatla so makana? (b) Panon tayon manpikasi sano mipupuligesgesan itayo ed sakey a kaleteyan na laman? (c) Anto so idemostra na mapilit tan espisipiko iran pikakasi tayo ed si Jehova?

⁵ Ta pian saray pikakasi tayo et epektibo, sikatayo so nepeg a mantultuloy, tan nepeg tayoy magmaliw ya espisipiko. (Roma 12:12) Singa bilang, no maminsan et naaalipanesan ka lapud pipupuligesgesan ed sakey a kaleteyan na laman, diad kagapo lambengat na kada agew et patulongan ka ed si Jehova pian natalonaan mo itan ya espisipikon kaleteyan a sanagew. Ipikasi met itan a sanagew tan sakbay ya onugip ed kada labi. No sika so sinmaew, mikasin perdonaen to ka nen Jehova, balet ta ibagam met ed sikato so rason no akin a sika so sinmaew tan no antoy nayari mon gawaen pian naarawian itan ya inkagawa diad arapen. Say ontan a mapilit tan espisipiko iran pikakasi so mangidemostra ed “Dumerengel na pikakasi” ed masimoon a pilalek mon ontalona ed pibabakal.​—Salmo 65:2; Lucas 11:5-13.

6. Akin a suston nailaloan tayo a denglen nen Jehova iray pikakasi tayo anggan nalikna tayon agtayo makanapegan a manpikasi?

⁶ Anggaman ontan, no maminsan et ompan liknaen na saramay naaalipanesan a sikaray agmakanepegan a manpikasi. Ontan so alikna na sakey a Kristianon bii a nankuan ed saginonor: “Satan so talagan mapeligron kanonotan lapud kabaliksan na satan ya uukomen tayon mismo so inkasikatayo, balet aliwan parad sikatayo so panggawa na ontan.” On, “say Dios a mismo so Ukom.” (Salmo 50:6) Ipapaseguro na Biblia ed sikatayo ya anggaman “say kapusoan tayo so mangondena ed sikatayo . . . , say Dios so babaleg nen say kapusoan tayo tan kabat toy amin a bengatla.” (1 Juan 3:20) Agaylan makaligliwa so pakaamta a sano liknaen tayon agtayo makanepegan a manpikasi, nayarin aliwan ontan so nalilikna nen Jehova ed sikatayo! “Kabat [to so] amin a bengatla” nipaakar ed sikatayo, pati say kipapasen na bilay tayo a nayarin sengegan no akin a liknaen tayon agtayo makanepegan a tuloy. (Salmo 103:10-14) Say panangasi tan kinaaralem na pakatalos to so mamapakiwas ed sikaton denglen iray pikakasi na “sakey a puson maralit tan mansibsibkel.” (Salmo 51:17) Panon ton agdengelen iray kerew tayo sano sikaton mismo so mangokondena ed “siopaman a mamepet ed layag to ed mikakasin kelyaw na sakey ya abeba”?​—Uliran 21:13.

Say Ligsa na Impanaagi

7. (a) Anto so sakey a probisyon nen Jehova pian natulongan itayon napasimbaloy biskeg? (b) Mamabiskeg ed sikatayo so pakaamta na anto nipaakar ed impanaagi tayo?

⁷ Sananey nin probisyon nen Jehova pian tulongan itayon napasimbaloy biskeg et say Kristianon impanaagi. Agaylan mablin pribilihyo so pagmaliw a kabiangan na sankamundoan a pamilya na sanaagi! (1 Pedro 2:17) Sano papakapuyen itayo na saray desdes ed bilay, say ligsa na impanaagi tayo so makatulong ed sikatayon napasimbalo so biskeg. Panon? Diad pakaamtan agtayo manbobokbokor ed iyarap ed makapadesdes iran angat so manamabiskeg ed inkasikaton dili. Agpanduaruwaan a diad limog na agagi tayo et walaray pigaran nipaarap ed parehon pananesdes odino pananubok tan walaan met na mipadparan tuloy a liknaan ed sikatayo. (1 Pedro 5:9) Makapabiskeg a naamtaan a say nasasagmak tan nalilikna tayo et kaslakan.

8. (a) Antoran alimbawa so mangipapanengneng a nayari itayon makaromog na nakakaukolan a tuloy a tulong tan ligliwa ed impanaagi tayo? (b) Diad anton paraan a sika so personal ya atulongan odino aligliwa na “sakey a tuan kaiba”?

⁸ Diad ligsa na impanaagi et naromog tayoray ‘tuan kakaiba’ a, sano wala tayo ed inkagonigon, et makapangitarok na nakakaukolan a tuloy a tulong tan ligliwa. (Uliran 17:17) Mabetbet, say kaukolan labat et mapangasi iran salita tan say pagmaliw a manonot. Oniay nanonotan ni na sakey a Kristianon akipuligesgesan ed liknaan na inkaandi-kakanaan: “Walaray kaaron angitongtong ed siak nipaakar ed saray positibon bengatla ed inkasiak pian natulongan ak a talonaan iray negatibon kaisipan.” (Uliran 15:23) Kapatey na kalangweran a marikit to, nalmoan na sakey ya agin bii a diad unona et mairap so pankanta ed saray kantan pan-Panarian ed saray miting ed kongregasyon, nagkalalo la ed saramay nipaakar ed kioli. “Aminsan,” nanonotan to, “anengneng ak a mannangnangis na sakey ya agin bii ya akayurong ed arap ko ed biek a dasig na yurongan. Inamparan toak, pinaringan toak, tan binansagan toak ed pankanta ed nakekeraan a kabiangan na kanta. Onman la so aliknak a panangaro parad agagi tan alay liket ko a sikami akaatendi ed saray miting, ya amorian wadman so tulong parad sikami, diman ed Kingdom Hall.”

9, 10. (a) Panon a makaarum itayo na ligsa na impanaagi tayo? (b) Siopa so nagkalalon mankakaukolan na makapabiskeg a panlilimog? (c) Anto so nagawaan tayo pian natulongan iramay mankakaukolan na panamabiskeg?

⁹ Siempre, walad balang sakey ed sikatayo so responsabilidad a makaarum na ligsa ed Kristianon impanaagi. Kanian, say kapusoan tayo so nepeg ya ‘inatnat’ ta pian nilaktip so amin ya agagi tayo. (2 Corinto 6:13) Agaylan makapaermen parad saramay naaalipanesan a liknaen a say aro na impanaagi so nagmaliw ya ambetel parad sikara! Ingen, kuan na arum a Kristiano a sikaray begtebegtew tan nibabaliwala. Oniay kerew na sakey ya agin bii a say asawa to so sumpad katuaan: “Siopa so agmanpilalek tan agmankaukolan na makapabiskeg a pankakaaroan, panamaseseg, tan maaron panlilimog? Ipangasin panonotan iray agagi a kaukolan mi’ra!” On, nagkalalo la ed saramay onkakapuy lapud sirkumstansya na bilay da​—saramay walaay agmananisian kapareha, mansusulon atateng, saramay walaay graben sakit, saray maedad la, tan arum nira​—so mankaukolan na makapabiskeg a panlilimog. Kaukolan ta ni ya ipanonot iyan bengatla ed arum ed sikatayo?

¹⁰ Anto so nagawaan tayo pian makatulong? Inatnat tayo so panangibalikas tayo na aro. Sano mamaparawes, agtayo lilingwanan iramay mankakaukolan na panamaseseg. (Lucas 14:12-14; Hebreos 13:2) Imbes ya isipen a lapud kipapasen da et agda awaten, akin ya ag-ira siansian imbitaan? Insan pandesidien ira. Anggan agda naawat, maseguron napabiskeg ira diad pakaamtan sikaray nononoten na arum. Ompan satan so magenap la pian napasimbaloy biskeg da.

11. Saramay onkakapuy so nayarin mankaukolan na tulong ed antoran paraan?

¹¹ Saramay onkakapuy so nayarin mankakaukolan na tulong ed arum a paraan. Alimbawa, say sakey a mansusulon ina so nayarin mankaukolan na tulong na sakey a matatken ya agin laki a mangipanengneng na interes ed andiay-ama ya anak ton laki. (Santiago 1:27) Say sakey ya agin walaay seryoson sakit so nayarin mankakaukolan na tulong ed pansaliw odino arum niran kimey ed abung. Say sakey a maedad la so nayarin manpirawat na piuulop odino mankakaukolan na tulong pian makapaway ed lawak a ministeryo. Sano walay ombabaleg a pankaukolan ed onia iran tulong, saya so onkakanan tuan ‘subok na inkapeteg na aro tayo.’ (2 Corinto 8:8) Imbes ya arawian iray mankakaukolan lapud panaon tan sagpot a nasasaglawi, komon ta nilabas tayo so subok na Kristianon aro diad pagmaliw a malikas tan onkiwas ed pankaukolan na arum.

Say Pakayari na Salitay Dios

12. Panon itayon tutulongan na Salita na Dios pian napasimbalo so biskeg?

¹² Agmanbayag et naandian na biskeg odino puersa so sakey a toon tinmunda lan mamangan. Mipadpara, say sakey nin dalan ya iikdan itayo nen Jehova na biskeg pian makapantultuloy et say pamapaseguro ed sikatayon natataganon maong ed espiritual. (Isaias 65:13, 14) Anton espiritual a tagano so itatarya to? Manuna ed amin, say Salita to, say Biblia. (Mateo 4:4; ikompara so Hebreos 4:12.) Panon a makatulong itan ed sikatayo a napasimbalo so biskeg? Sano saray pakadesdesan tan probleman nipapaarap ed sikatayo so mamawas na biskeg tayo, napasimbalo tayo so biskeg diad panbasa tayo nipaakar ed liknaan tan peteg-bilay a pipupuligesgesan na matoor a lalaki tan bibii ed panaon na Biblia. Anggaman matalonggaring iran alimbawa na integridad, sikaray totoon “walaan na liknaan a singa sikatayo.” (Santiago 5:17; Gawa 14:15) Nipaarap ira ed saray subok tan saray desdes a mipadpara ed sikatayo. Konsideraey pigaran alimbawa.

13. Antoran Makasulatan ya alimbawa so mangipapanengneng a saray matoor a lalaki tan bibii ed panaon na Biblia so walaay liknaan tan saray eksperiensian mipadparan tuloy ed sikatayo?

¹³ Pirmi so impanermen nen patriarkan Abraham ed impatey na asawa to anggano sikatoy walaan na pananisia diad kioli. (Genesis 23:2; ikompara so Hebreos 11:8-10, 17-19.) Alikna nen magbabawin David a sikatoy agmakanepegan a manlingkor ed si Jehova lapud saray kasalanan to. (Salmo 51:11) Akalikna si Moises na pankulang. (Exodo 4:10) Anagmak si Epafrodito na depresyon sanen akabatan na dakel a lapud graben sakit et limitadoy nagawaan to ed “kimey na Katawan.” (Filipos 2:25-30) Kaukolan a labanan nen Pablo so makabos a laman. (Roma 7:21-25) Si Eudias tan Sintique, duaran alanaan ya agagin bibii diad kongregasyon na Filipos, so malinew a nairapan a mantunosan. (Filipos 1:1; 4:2, 3) Agaylan makapaseseg so pakaamtan sarayan matoor so walaan na liknaan tan eksperiensian singa sikatayo, ingen ag-ira sinmuko! Nisay pinaulyanan ira nen Jehova.

14. (a) Anton instrumento so uusaren nen Jehova pian tulongan itayon makala na biskeg manlapud Salita to? (b) Akin a say Panag-Bantayan tan Awake! iran dyurnal so mangitatarok na saray artikulo nipaakar ed pansosyedad, panpamilya, tan emosyonal iran isyu?

¹⁴ Pian natulongan itayon makalay biskeg manlapud Salita to, uusaren nen Jehova so matoor tan makabat ya aripen a klase pian itarok ed sikatayo so mantultuloy ya agos na “tagano ed manepeg a panaon.” (Mateo 24:45) Abayag lan uusaren na matoor ya aripen iray dyurnal a Panag-Bantayan tan Awake! pian idepensa so katuaan na Biblia tan iyabawag so Panarian na Dios bilang say mogmon ilalo na too. Nagkalalo la ed apalabas a pigaran dekada, angitarok irayan dyurnal na nipanpanaon a Makasulatan iran artikulo nipaakar ed pansosyedad, panpamilya, tan emosyonal iran angat a nipapaarap anggan ed arum a totoo na Dios. Diad anton gagala a nipapalapag iratan ya impormasyon? Maseguron pian natulongan iramay manasagmak na sarayan angat a makala na biskeg tan panamaseseg manlapud Salitay Dios. Balet natutulongan itayo met, na saratan ya artikulo pian lalon natalosan so nayarin sagmaken na pigara ed agagi tayo. Diad ontan et lalo itayon nakikinlongan a talinengen iray salita nen Pablo: “Mansalitan sililigliwa ed saray walaay depresyon a kamarerwa, suportaay makapuy, nawalaan na andukey a panagtepel ed amin.”​—1 Tesalonica 5:14.

Mamatatken a “Sakey ya Amotan Manlapud Dagem”

15. Anto so impropesiya nen Isaias nipaakar ed saray manlilingkor bilang mamatatken, tan anton responsabilidad so nipapasakbat ed sikatayo?

¹⁵ Wala ni itatarya nen Jehova pian tulongan itayo sano naaalipanesan itayo​—saray mamatatken ed kongregasyon. Onia so insulat nen propeta Isaias nipaakar ed saraya: “Balang sakey so nepeg a napaneknekan a singa sakey ya amotan manlapud dagem tan sakey a siroman manlapud bagyon mauran, singa saray agus na danum ed amagaan a bansa, singa anino na sakey a mabiskeg a baton ambelat ed sakey a kinmelang a dalin.” (Isaias 32:1, 2) No ontan, saray mamatatken so responsabli a misukatan ed impasakbay nen Jehova nipaakar ed sikara. “Nepeg [dan] paneknekan” so inkasikaran lapuan na ligliwa tan pakarepreskoan na arum tan mabulos a “manakbat na saray awit [odino, “bengabengatlan makapagonigon”; diad literal et “ambelat iran bengatla”] na balang sakey.” (Galacia 6:2, paimanod-leksab [diad Ingles]) Panon dan nagagawaan iya?

16. Anto so nagawaan na mamatatken pian natulongan so sakey a makakaliknan sikatoy agmakanepegan a manpikasi?

¹⁶ Singa asalambit la, no maminsan et nayarin liknaen na sakey a naaalipanesan a sikatoy agmakanepegan a manpikasi. Anto so nagawaan na mamatatken? Nayarin manpikasin kaiba to odino manpikasi parad sikato. (Santiago 5:14) Anggan say ikerew ed si Jehova lambengat, legan a narerengel na toon naaalipanesan, a tulongan itan a sakey a natalosan no kaunongan so panangaro nen Jehova ed sikato tan say arum so maseguron makaligliwa la. Say pakadngel ed masimoon, impapuson pikakasi na sakey a matatken so nayarin ontulong a mamabiskeg na kompiyansa na nasisinagem a too. Nayarin sikato so natulongan a mankatunongan a no mankompiyansay mamatatken ya ebatan nen Jehova iray pikakasin diad biang to, sirin sikato so makapinabang met ed satan a kompiyansa.

17. Akin a saray mamatatken so nepeg a magmaliw a mililiknan managtalineng?

¹⁷ “Balang sakey a too so nepeg a magmaliw a maples ya ondengel, matantan ed panagsalita,” kuan na Santiago 1:19. Pian natulongan iray naaalipanesan a napasimbaloy biskeg da, saray mamatatken so nepeg a magmaliw a mililiknan managtalineng. Diad arum a kaso et nayarin saray membro na kongregasyon so mipupuligesgesan ed saray problema odino pakadesdesan ya agnaresolbi diad sayan sistema na bengabengatla. No ontan, ompan say kaukolan da et aliwan sakey a solusyon pian “resolbien” so problema ra noagta say basta pitongtong ed maong a managtalineng​—sakey a toon agto ibaga ed sikara no antoy nepeg a liknaan da noagta ontalineng ya agmangukom.​—Lucas 6:37; Roma 14:13.

18, 19. (a) Panon a say pagmaliw a masiglat ya ontalineng so makatulong ed sakey a matatken a naarawian so pamabelat ed awit na sakey a naaalipanesan? (b) Anto so magmaliw a resulta sano mangipapanengneng iray mamatatken na “pililikna”?

¹⁸ Sikayoran mamatatken, say pagmaliw a masiglat ya ontalineng so makatulong ed iyarawim ed palpalaran a pamabelat ed awit na naaalipanesan. Singa bilang, no say sakey ya agi so ag-akaatendi ed pigaran miting odino tinmantan ed pibibiang to ed lawak a ministeryo, peteg ta a kaukolan to so konseho nipaakar ed panggawa na malaglaem ni ed ministeryo odino nipaakar ed pagmaliw to a lalon regular ed saray miting? Anganko. Balet kasin kabat yo so interon situasyon? Wala ta so ondaraak a problema to’d bunigas? Kasin agano nin nauman iray responsabilidad to ed pamilya? Kasin wala ni’ray arum a sirkumstansya odino pakadesdesan a mamapakapuy ed sikato? Tandaan, saman a too et liknaen ton akapankasalanan lapud sikatoy kinmulang.

¹⁹ No ontan, panon yon natulongan itan ya agi? Sakbay kayon manggawa na konklusyon tan manimbawa, ontalineng! (Uliran 18:13) Diad panamegley na manetebek iran tepet ya ‘agwaten’ so liknaan ed puso na saman a too. (Uliran 20:5) Ag-ibabaliwala irayan liknaan​—bidbiren ira. Nayarin say sakey a naaalipanesan so kaukolan a napaseguroan lamet a si Jehova so manmamalasakit ed sikatayo tan makakatalos a no maminsan et nayarin nageteran itayo na sirkumstansya tayo. (1 Pedro 5:7) Sano mangipanengneng na ontan iray matatken a “pililikna,” saray naaalipanesan so ‘makaromog na pakarepreskoan ed kamarerwa ra.’ (1 Pedro 3:8; Mateo 11:28-30) Sano naromog da so ontan a pakarepreskoan, agla ira kaukolan a bagaan a manggawa na malaglaem; say kapusoan da so managdag ed sikaran gawaen so makatunongan a nayarian da ed panaglingkor ed si Jehova.​—Ikompara so 2 Corinto 8:12; 9:7.

20. Lapud manasingger la so anggaan na sayan marelmeng a kailalakan, anto so nepeg a determinadon gawaen tayo?

²⁰ Peteg a sikatayoy manbibilay ed sankamairapan a panaon ed interon awaran na too. Saray desdes ed panagbilay diad mundo nen Satanas so ondaraak legan a manasingger itayo ed panaon na anggaan. Tandaan, singa sakey a leon a manaanap na nabuag to, tatalaranan na Diablo a sikatayo so naalipanesan tan onsuko pian mainomay to itayon biktimaen. Agaylan pisasalamat tayo ed si Jehova a mangiiter na biskeg ed sakey a nakekesawan! Komon ta sigpot tayon anamoten iray probisyon to pian ikdan to itayo na biskeg a makapantultuloy, a singano susuplayan to itayo na makapanyari iran payak na sakey ya ontetekkiab ya agila. Lapud asingger lay anggaan na sayan marelmeng a kailalakan, aliwan natan so panaon ya itundan ombatik ed lumba nipaakar ed tumang​—say andi-anggaan a bilay.​—Hebreos 12:1.

Anto so Ebat Yo?

◻ Anto so nailaloan tayon gawaen nen Jehova bilang ebat ed saray pikakasi tayo?

◻ Diad antoran paraan a makala tayo na biskeg manlapud Kristianon impanaagi tayo?

◻ Panon tayon tutulongan na Salita na Dios pian pasimbaloen so biskeg?

◻ Anto so nagawaan na mamatatken pian natulongan iray naaalipanesan a napasimbalo so biskeg?

[Litrato ed pahina 17]

Sano mamaparawes, agtayo lilingwanan iramay mankakaukolan na panamaseseg

[Litrato ed pahina 18]

Nayarin kerewen na mamatatken ed si Jehova a tulongan iray naaalipanesan a natalosan a sikaray talagan aaroen