Nagunggonaan Ka Manlapud Balon Sipanan

1. Anton nankaduan kimey so sinumpal nen Jeremias?

NANKADUA so kimey ya inter nen Jehova ed si Jeremias. Say sakey et “mamagot tan mangigeba a maneral tan mamigar.” Say sananey et “mangipaalagey tan mantanem.” Sinumpal na propeta so inmuna sanen imparungtal toy kaugsan na saray mapaatagey a Judio, ya inyabawag toy panangukom na Dios ed sikara tan ed Babilonia. Balet, angipropesiya met na ilalo parad arapen. Impasakbay to so pangipaalagey tan pangitanem ed samay ginagala na Dios ya ipaalagey tan itanem. Singa bilang, sinumpal nen Jeremias imay komaduan kimey to sanen impaimano toy pangipawil ed saray Judio ed dalin a nianakan da.​—Jer. 1:10; 30:17, 18.

2. Akin ya inukom nen Jehova iray totoo to, tan kaunongan kabelat?

² Agto labay ya ibaga a daput no inyabawag nen Jeremias so pangipawil et konsintien la na Dios so totoo to odino ikompromiso to lay estandarte to’d hustisya. Andi, ukomen to iray benger a Judio. (Basaen so Jeremias 16:17, 18.) Diad panaon nen Jeremias, pigpigara ed Jerusalem so ‘manggagawa na matunong’ odino ‘manaanap na katuaan,’ tan agla itan napalampas nen Jehova. Inkuan ton sikatoy ‘naksawan ed panagbabawi’ to. (Jer. 5:1; 15:6, 7) Saratan a Judio et “pinmawil ira ed saray inkauges na saray atateng da ya akauna, a sikara inmaleg ira ya ondengel” ed saray salita nen Jehova. Pinasanok da met so Dios diad impandayew da ed palson dirios. (Jer. 11:10; 34:18) Sikaray ipetek nen Jehova, a dusaen to nira ingen “ed onkanepegan.” Bilang resulta, walaray makamoria ed lingo ra tan ompawil ed sikato.​—Jer. 30:11; 46:28.

3. Akin a nepeg mon aralen so propesiya nipaakar ed balon sipanan?

³ Inusar na Dios si Jeremias pian ipasakbay so sakey a bengatlan walaan na mas malaknab tan manbayag iran gunggona, salanti, sakey a balon sipanan. Diad panaaral tayo ed saray propesiya nen Jeremias, makatunongan labat ya imanoen tayo iyan maabig a bengatla: say balon sipanan. Salatan na satan imay sipanan a ginawa ed Israel kayari na impaway da’d Ehipto, a say manamegley et si Moises. (Basaen so Jeremias 31:31, 32.) Sanen inletneg nen Jesu-Kristo so Pangdem na Katawan, sinaglawi to iyan balon sipanan, kanian seguradon paninteresan tayo iya. (Luc. 22:20) Tinukoy nen apostol Pablo iyan sipanan sanen nansulat ed saray Hebreo. Inaon to so propesiya nen Jeremias tan indanet to so kaimportantian na saya. (Heb. 8:7-9) Balet anton talaga so balon sipanan? Akin a nakaukolan itan? Sioparay kabiangan, tan panon kan nagunggonaan? Nengnengen tayo.

AKIN A NAKAUKOLAN SO BALON SIPANAN?

4. Antoy sinumpal na Ganggan a sipanan?

⁴ Pian natalosan tayo so balon sipanan, nepeg tayo nin talosan no akin a ginawa imay akauna, say Ganggan a sipanan. Walaray alay abig a gagalan sumpalen na satan parad nasyon a manaalagar ed insipan a Bini, a pakabendisyonan na dakel. (Gen. 22:17, 18) Sanen inawat na saray Israelita so Ganggan a sipanan, nagmaliw iran ‘pabpablien a pinagka-kayamanan’ na Dios. Diad satan a sipanan, say tribu nen Levi so panlapuan na saray saserdote ed nasyon. Sanen akisipanan si Jehova ed nasyon na Israel diad Palandey Sinai, sinaglawi to so “sakey a panarian na saray saserdotes, tan sakey a masimpit a nasyon” ingen agto ni imparungtal no kapigan tan no panon itan a nagawa. (Exo. 19:5-8) Anggad agni niparungtal, impalinew na sipanan ya agsigpot a natumbok na saray Israelita so Ganggan, kanian nipatnag iray kasalanan da. Sirin, diad silong na Ganggan, nepeg a naynay a manbagat iray Israelita pian nasakbongan iray kasalanan da. Balet, malinew a kaukolan da so sakey a perpekton bagat ya agla ulit-uliten. On, kakkaukolan so permanentin kaperdona ed saray kasalanan.​—Gal. 3:19-22.

5. Akin ya impaipasakbay nen Jehova so balon sipanan?

⁵ Natalosan tayo sirin ya anggano say Ganggan a sipanan et oneepekto ni, impaipropesiya la na Dios ed si Jeremias so balon sipanan. Lapud panangaro tan kaabigan nen Jehova, aliwa labat a sakey a nasyon so labay ton pangiteran na permanentin tulong. Panamegley nen Jeremias, oniay inkuan na Dios nipaakar ed saramay magmaliw a kabiangan na balon sipanan: “Perdonaen ko naani inkauges da, tan agko la naani nonoten so kasalanan da.” (Jer. 31:34) Anggaman nisipan itan ed panaon nen Jeremias, satan so mangiter na marakep ya ilalo parad amin a totoo. Panon?

6, 7. (a) Antoy liknaan na arum lapud pakakagawa day kasalanan? (b) Akin a napaseseg ka no aralen mo so balon sipanan?

⁶ Aliwa tayo nin perpekto tan mabetbet tayo iyan naiimano. Napatnagan itan ed kipapasen na sakey ya agin abayag to lan lalabanan so kakapuyan to. Inkuan to: “No naulit ko lamet itan, aliwliwan maong so liknaan ko. Liknaen kon agak la naperdona ed ginawak. Mair-irap koy manpikasi. Igapok ed pangibagay, ‘Jehova, agko amta no dengelen mo ak, balet . . . ’” Walaray makakaeksperiensya na singa onia tan wala met iray akapankasalanan a liknaen dan walay “sakey a lurem” a mangaamper na pikakasi ra ed Dios. (Tag. 3:44) Say arum et nagogonigon ni lapud agawaan dan kasalanan, anggano pigay taon lay linmabas. Anggan saray napanuliranan a Kristiano et makapansalita na saray bengatlan pagbabawian da ed saginonor.​—Sant. 3:5-10.

⁷ Agtayo iisipen ya ag-itayon balot makapankasalanan. (1 Cor. 10:12) Anggan si apostol Pablo et inaksobi ton sikatoy alingo. (Basaen so Roma 7:21-25.) Lapud saya, nanonotan tayo so balon sipanan. Insipan na Dios a lingwanan to la iray kasalanan, a sakey iyan importantin gagala na balon sipanan. Agaylan agnaparaan a gunggona! Talagan apakiwas si Jeremias ed impangipasakbay to ed satan, tan ontan tayo met sano naaralan tayo so dakel ni nipaakar ed balon sipanan tan naamtaan no panon tayon nagunggonaan ed satan.

ANTO SO BALON SIPANAN?

8, 9. Antoy insakripisyo nen Jehova pian naperdonay kasalanan?

⁸ No lalon nakakabat moy Jehova, lalon namomoriam a sikatoy maomaong tan mapangasi ed saray aliwan perpekton totoo. (Sal. 103:13, 14) Sanen impasakbay nen Jeremias so balon sipanan, impabitar to a ‘perdonaen nen Jehova so inkauges da’ tan lingwanan to lay kasalanan da. (Jer. 31:34) Nayarin ninonot nen Jeremias no panon a sumpalen na Dios itan. Anggan panon et atalosan to a nen tinukoy na Dios so balon sipanan, walay nagawan paknaan, odino kontrata, ed baetan To tan saray totoo. Panamegley na satan, sumpalen nen Jehova so impaisulat to’d si Jeremias, kaiba lay panamerdona. Wala ni iray kaaruman a detalye ya iparungtal na Dios nipaakar ed sayan gagala to, pati say gawaen na Mesias.

⁹ Nayarin walaray naiimanom ya atateng a kokonsintien da iray anak da, ya agda ira didisiplinaen. Ontan met kasi Jehova? Andin balot! Nipalinew iya sanen inmepekto la so balon sipanan. Imbes a basta paandien iray kasalanan, sineguro na Dios a natumbok toy dilin estandarte to ed hustisya diad impangitarya to na legal a basiyan ed panamerdona, tan baleg so insakripisyo to’d saya. Natalosan mon maong iya diad pangimanom ed insulat nen Pablo sanen impaliwawa to so balon sipanan. (Basaen so Hebreos 9:15, 22, 28.) Sinalambit nen Pablo so “dondon a mangibulos” tan imbaga to a “no anggapo so niibung a dala, agnaperdona iray kasalanan.” Aliwa iyan panangibagat ed dala na saray baka odino kanding ya iyaapay unong ed Ganggan. Andi, inmepekto so balon sipanan panamegley na dala nen Jesus. Base ed satan a perpekton bagat, nayarian nen Jehova a permanentin ‘perdonaen so inkauges tan kasalanan.’ (Gawa 2:38; 3:19) Balet sioparay magmaliw a kabiangan na balon sipanan tan makagamor na satan a panamerdona? Aliwan say Judion nasyon. Imbaga nen Jesus ya ipulisay na Dios iray Judio, saramay walad silong na Ganggan a mangibabagat na ayayep, tan paboran To so sananey a nasyon. (Mat. 21:43; Gawa 3:13-15) Sayan nasyon et say “Israel na Dios,” a tugyopen na saray Kristianon alanaan na masanton espiritu. Diad simplin panangibaga, say Ganggan a sipanan et diad baetan na Dios tan literal ya Israel, balet say balon sipanan et diad baetan nen Jehova a Dios tan say espiritual ya Israel, a si Jesus so Manamegley.​—Gal. 6:16; Roma 9:6.

10. (a) Siopa so “sanga” nen David? (b) Panon a nagunggonaan iray totoo ed sayan “sanga”?

¹⁰ Deniskribe nen Jeremias imay onsabin Mesias bilang “sanga” nen David. Matukotukoy itan ta nen manlilingkor si Jeremias bilang propeta, apultot so linya nen David a panlalapuay ari. Balet nansiansia so sengeg. Asabi panaon et nianak si Jesus ed linya nen Arin David. Sikatoy natawag a “Jehova a Matunong Tayo,” a mangipapabitar ed aralem a panamabli na Dios ed inkatunong. (Basaen so Jeremias 23:5, 6.) Inabuloyan na Dios a manirap tan ompatey so bogbogtong ya Anak to diad dalin. Kanian unong ed inkahustisya, nayarin usaren nen Jehova so bili na dondon bagat na sayan “sanga” nen David bilang basiyan na panamerdona. (Jer. 33:15) Diad ontan, posible parad pigaran totoo a niyabawag a “matunong parad bilay” tan nalanaan na masanton espiritu, a magmaliw a kabiangan na balon sipanan. Say sakey nin paneknek a papablien na Dios so inkatunong et saramay agkabiangan na sipanan so nayarin nagunggonaan tan talagan nagunggonaan ed satan, a singa nanengneng tayo.​—Roma 5:18.

11. (a) Antoy angisulatan ed ganggan na balon sipanan? (b) Akin ya interesado iray ‘arum a karnero’ ed ganggan na balon sipanan?

¹¹ Labay mo nin naamtaan so arum a pandumaan na balon sipanan tan say Mosaikon Ganggan a sipanan? Say sakey a baleg a pandumaan et say angisulatan ed saratan. (Basaen so Jeremias 31:33.) Say Samploran Ganggan a kabiangan na Ganggan a sipanan et nisulat ed saray tapyas a bato, a sinmabi panaon et naandi. Diad pidumaan, say ganggan na balon sipanan ya impropesiya nen Jeremias et isulat ed kapusoan na totoo, tan agnaandi. Saray alanaan a Kristiano a kabiangan na balon sipanan so talagan mangaapresya ed sayan ganggan. Panon to balet iramay agkabiangan na balon sipanan, saray ‘arum a karnero,’ a maniilalon manbilay ya andi-anggaan ed dalin? (Juan 10:16) Aapresyaen da met so ganggan na Dios. Singa ra saramay sankaili ed dalin na Israel ya angawat tan agunggonaan ed Mosaikon Ganggan.​—Lev. 24:22; Num. 15:15.

12, 13. (a) Anto so ganggan na balon sipanan? (b) Diad silong na “ganggan na Kristo,” akin ya agmo liknaen a papasooten kan manlingkor ed Dios?

¹² Antoy iyebat mo no atepetan kan, ‘Anto ‘tay ganggan a nisulat ed kapusoan na saray alanaan a Kristiano?’ Sayan ganggan et natawag met a “ganggan na Kristo.” Say unonan angiteran ed saya et saray espiritual ya Israelita, saramay kabiangan na balon sipanan. (Gal. 6:2; Roma 2:28, 29) Say “ganggan na Kristo” et nayarian mon deskribien ed sakey a salita​—aro. (Mat. 22:36-39) Antoy gawaen na saray alanaan pian nisulat ed puso ra iyan ganggan? Say duaran importantin paraan et diad panaral da na Salitay Dios tan pampikasi’d Jehova. Nepeg sirin a naynay a gawaen iratan na amin a tuan Kristiano bilang kabiangan na panagdayew da, anggan saramay agkabiangan na balon sipanan a malabay a nagunggonaan ed satan.

¹³ Say “ganggan na Kristo” so atukoy ya “ayadyarin ganggan a mangitonton ed kawayangan” tan “ganggan na bulos a totoo.” (Sant. 1:25; 2:12) Dakel so nianak ed silong na Mosaikon Ganggan, balet anggapoy nianak a wala la’d balon sipanan odino diad silong na ganggan na Kristo. Anggapo ed saray matulok ed ganggan na Kristo so papasooten a manlingkor ed Dios. Ingen maliket iran makaamta a say ganggan na Dios et nayarin isulat ed kapusoan tan saray magnayon a gunggona na sipanan ya impasakbay nen Jeremias et nayarin nagamoran na totoo natan.

NO SIOPARAY NAGUNGGONAAN ED BALON SIPANAN

14. Sioparay talagan nagunggonaan ed balon sipanan?

¹⁴ Walaray arum a no naamtaan dan say 144,000 so kabiangan na balon sipanan, nayarin isipen da a saraya labat so nagunggonaan ed satan lapud saray alanaan labat so nepeg a mibiang ed saray emblema ed tinaon a Memoryal na impatey nen Kristo, a say alak so mangirepresenta ed ‘dala nipaakar ed sipanan.’ (Mar. 14:24) Balet, tandaan a saramay kabiangan na balon sipanan et nakaiba nen Jesus bilang “bini” nen Abraham, a pakabendisyonan na amin a nasyon. (Gal. 3:8, 9, 29; Gen. 12:3) Kanian diad sayan balon sipanan, sumpalen nen Jehova so sipan to a bendisyonan so amin a totoo panamegley na “bini” nen Abraham.

15. Antoy nipasakbay a gawaen na saray alanaan?

¹⁵ Si Jesu-Kristo, a manunan kabiangan na bini nen Abraham, so manlilingkor bilang Atagey a Saserdote, tan sikatoy angitarya na perpekton bagat pian naperdonay kasalanan. (Basaen so Hebreos 2:17, 18.) Balet, abayag lan impasakbay na Dios so “sakey a panarian na saray saserdotes, tan sakey a masimpit a nasyon.” (Exo. 19:6) Diad literal a nasyon na Israel, nandumaan a tribu so panlapuan na saray saserdote tan saray arari. Kanian panon a niwala so insipan a nasyon a tugyopen na parehon arari tan saserdote? Say unonan sulat nen apostol Pedro et parad saramay apasanto panamegley na espiritu. (1 Ped. 1:1, 2) Tinukoy to ra bilang “saray saserdote a manari, say masanton nasyon, totoo a magmaliw a kayarian na Dios.” (1 Ped. 2:9) Sirin, saray alanaan a Kristianon kabiangan na balon sipanan so manlingkor bilang saserdote ya iwawanwan nen Kristo. Isipen pay kabaliksan na satan! Naynay tayon naiirapan lapud epektoy kasalanan, a siansia nin ‘manuuley bilang ari.’ Ontan met so naeksperiensya na sarayan saserdote. (Roma 5:21) Amta ray liknaan na akagaway lingo tan panatalona’d pakakakonsiensia. Kanian bilang kakaiba nen Kristo, nayarian day milikna ed sikatayo legan tayon tatalonaan so inkamakasalanan tayo.

16. Panon a makapaseseg ed “baleg ya ulop” so Apocalipsis 7:9, 14?

¹⁶ Diad Apocalipsis 7:9, 14, adeskribe so “baleg ya ulop” ya ‘akasulong na amputin kawes,’ a mangipapatnag a sikaray malinis ed arapan na Dios. Natutugyop la natan iyan baleg ya ulop a makaliktar ed “baleg a kairapan.” Kanian, anggan natan et nibagan matunong ira ed arapan na Dios. Niyabawag iran matunong bilang kakaaro nen Jehova. (Roma 4:2, 3; Sant. 2:23) Agaylan abig a gunggona! No kabiangan ka na baleg ya ulop, makaseguro kan tulongan ka na Dios ed panggugunaet mon mansiansian malinis ed imaton to.

17. Diad anton pantalos ya agla “nonoten” nen Jehova iray kasalanan?

¹⁷ Antoy nagawa ed saray kasalanan na saramay abobonan na Dios? Singa abitla la, oniay imbaga nen Jehova panamegley nen Jeremias: “Perdonaen ko naani inkauges da, tan agko la naani nonoten so kasalanan da.” (Jer. 31:34) Base ed bagat nen Jesus, ontan so gagawaen na Dios ed saray alanaan. Peperdonaen met na Dios iray kasalanan na baleg ya ulop base’d samay parehon ‘dala nipaakar ed sipanan.’ Sanen imbaga nen Jeremias ya agla “nonoten” na Dios iray kasalanan, agto labay ya ibaga a nakabawan la na Dios iratan. Imbes, ipapabitar to a bektaman a niiter la nen Jehova so nakaukolan a disiplina tan pinerdona to la so magbabawin managkasalanan, agto la suysoyen so kasalanan. Nonoten pa iray kasalanan nen Arin David makalanor ed si Bat-seba tan Urias. Adisiplinay David tan asagmak toy resulta na impankasalanan to. (2 Sam. 11:4, 15, 27; 12:9-14; Isa. 38:17) Balet, agnantultuloy a siningil na Dios si David ed saray kasalanan to. (Basaen so 2 Awaran 7:17, 18.) Singa nipabitar ed balon sipanan, agla nonoten na Dios iray kasalanan bektaman a pinerdona to la iratan base ed bagat nen Jesus.​—Eze. 18:21, 22.

18, 19. Antoy naaralan tayo ed balon sipanan nipaakar ed panamerdona?

¹⁸ Sirin, ipapabitar na balon sipanan so alay abig a paraan na pidedeneng nen Jehova ed saray makasalanan a totoo, balanglan alanaan, a kabiangan na sipanan, tan saramay walaan na ilalon manbilay ed dalin. Makapanmatalek ka a bektaman a pinerdona la nen Jehova iray kasalanan mo, agto la suysoyen iratan. Wala sirin so naaralan tayo ed insipan na Dios a balon sipanan. Tepetan mo pay inkasika, ‘Kasin aaligen koy Jehova, ya agko la susuysoyen iray kasalanan na arum, ya imbagak a pinerdonak la?’ (Mat. 6:14, 15) Kaiba la’d saya iray melag tan seryoson kasalanan, a singa say impikalugoran na Kristianon asawa. No say sakey et pinerdona to lay nagbabawin asawa to ya akikalugoran, agta manepeg ya ‘agto la nonoten so kasalanan’? Tua, aliwan mainomay a lingwanan iray kasalanan, balet sakey iyan paraan pian naalig tayoy Jehova.a

¹⁹ Sayan naaralan tayo nipaakar ed balon sipanan et niyaplika tayo anggan diad sakey ya adispelosip balet ta nagbabawi tan akapawil la. Panon to no satan a too et sengegay impakaandian mo odino dineral toy reputasyon mo? Natan ta akapawil la ed kongregasyon, panon a mangapekta ed kanonotan tan reaksion tayo so nabasa’d Jeremias 31:34? Kasin sikatoy perdonaen tayo tan agla suysoyen so kasalanan to? (2 Cor. 2:6-8) On, satan so nepeg a panggunaetan ya iyaplika na amin a mangaapresya ed balon sipanan.

SARAY BENDISYON NA BALON SIPANAN—NATAN TAN DIAD ARAPEN

20. Akin a nibagam a duma ka ed dakel a kapanaonan nen Jeremias?

²⁰ Singa oniay ibabaga na dakel a Judio ed panaon nen Jeremias: “Si Jehova agnaani manggawa na maong, agmet naani manggawa na mauges.” (Sof. 1:12) Anggaman kabat da met no siopa si Jehova, isipen dan anggapoy gawaen to’d sikara tan agto ra ilaloan a manbilay unong ed antokaman ya estandarte. Balet amtam ya anggapoy niyamot ed Dios. Marespeton tatakotan moy Dios tan seguradon agmo labay so manggaway mauges. (Jer. 16:17) Amtam met a si Jehova et maomaong tan mapangasin Ama. Iimanoen to iray maong a gawa tayo, balanglan nanenengneng na arum o andi.​—2 Awa. 16:9.

21, 22. Akin ya agla kaukolan ya ibaga ed sika: “Amtaen mo si Jehova”?

²¹ Nia so sakey ya importantin gagala na balon sipanan: “Iyan ko naani tunong ko ed saray akindalem a kabiangan da, tan dia ed puso ra sikato so isulat ko naani; et siak naani Dios da, . . . Et sikara agla ra naani mangibangat balang laki ed kaabay to, tan balang laki ed agi to, a kuan da, Amtaen mo si Jehova; ta sikara amta ra ak naani ya amin.” (Jer. 31:33, 34) Papaneknekan na saray alanaan a wadia ni’d dalin ya akasulat ed kapusoan da so ganggan na Dios. Papablien day katuaan a naromog ditan, imbes a manmatalek ed bangabangat na siopaman a too. Tan maliket dan inanabang ed baleg ya ulop so pikakabat a walad Biblia. Kanian sarayan walaan na ilalon manbilay ed dalin et akabat tan naaro da met si Jehova. Papaiwanwan iraya ed sikato tan manmamatalek ira’d saray sipan to. Anganko et ontan ka. Sikatoy kabkabat mo tan maapit so relasyon mo’d sikato. Alay abig itan!

²² Panon mon napapabiskeg so relasyon mo’d si Jehova? Seguradon nanonotan mo iray panaon ya inebatan to iray pikakasim. Lapud saratan ya eksperiensyam, napapaaralem moy apresasyon mo ed no anton klase na Dios si Jehova. Nayarin aliknam so tulong to sanen anonotan moy sakey a teksto a tinmulong ed sika pian natalonaan so subok. Pablim iratan. No itultuloy mon aralen so Salita to, lalon onaralem so pikakabat mo’d sikato​—sakey a magnayon a gunggona.

23. Panon a say pikabat ed si Jehova et ontulong ed sika pian naandi so pakakakonsiensiam?

²³ Balet wala ni bendisyon a nagamoran tayo natan lapud balon sipanan. Say pakaamta a mamerdona si Jehova base ed satan a sipanan et ontulong pian naandi so mantultuloy a pakakakonsiensia tayo. Singa bilang, walaray nampaekal sakbay dan naamtaan so estandarte na Dios a nayarin nakonsiensia tan naermenan lapud ginagala ran sampotan so bilay na lukon da. Ontan met so nalikna na arum lapud impamatey da sanen akiguerra ira. Say dondon bagat nen Jesus, a makanakana diad balon sipanan, so basiyan pian naperdona iray tuan magbabawi. Lapud satan, agta nakombinsi itayo a no pinerdona la na Dios so kasalanan tayo et nilingwanan to la itan? Agtayo la nepeg a pawil-pawilen a nonoten iray kasalanan a sigpot lan pinerdona nen Jehova.

24. Panon kan napaseseg ed salaysay diad Jeremias 31:20?

²⁴ Nanengneng tayo ed Jeremias 31:20 so malinlinew a paneknek ed panamerdona na Dios. (Basaen.) Pigay taon sakbay na impanbilay nen Jeremias, dinusa nen Jehova so samploran-tribu a panarian na Israel (ya irerepresenta na Efraim, say manunan tribu) lapud panag-idolatriya. Puersaan iran inawit ed Asirya. Balet, inar-aro na Dios irayan totoo tan inabagey to ra. Impasen to ni ran singa ‘pinabpabli ton anak.’ Sano nanonotan to ra, say ‘puso to mailiw ed sikara.’ Ipapabitar na sarayan balikas, ya asalambit sakbay na impanaglawi ed balon sipanan, a si Jehova et mabulbulos a mamerdona ed saramay magbabawi ed kasalanan da.

25. Akin a misalamat ka ed si Jehova lapud balon sipanan?

²⁵ Say sipan nen Jehova a perdonaen to iray kasalanan panamegley na balon sipanan et sigpot a nasumpal diad sampot na Milenyon Uley nen Kristo. Nipawil la’d satan nen Jesu-Kristo tan say kaiba ton 144,000 a saserdote so inkaperpekto na matoor a totoo. Kayari unor a subok, amin a totoo et magmaliw lan sigpot a kabiangan na pamilya nen Jehova ed interon uniberso. (Basaen so Roma 8:19-22.) Nilibo lan taon a naiirapan so amin a totoo lapud epekto na kasalanan. Balet, say palsa nen Jehova a totoo so magmaliw ya “ananak na Dios a walaan na maglorian kawayangan,” ya agla ra mankasalanan tan ompatey. Sirin, ilaloan mo a diad panamegley na maaron uksoyan na balon sipanan, daakan so gunggonan niwalad sika. Nagunggonaan ka natan tan diad andi-anggaan panamegley na “sanga” nen David tan panliketan mo so “kaptekan ed dalin.”​—Jer. 33:15.