Say Masakbay ya Ombangon

DIAD saray manbubungan kiew ed pasen na Mediteraneo, say kiew ya almendro so sakey ed saray makapakelaw a tuloy. Diad saginonor ya Enero odino Pebrero​—sakbay a tuloy na arum iran kiew—​sikatoy ombabangon ed inyugip to’d panaon na ambetel. Tan agaylan ibabangon! Say interon kiew so akawesay kapa na makaroyroyon kolor a rosas odino amputi iran bolaklak, say saginonor et kuanmono oban na matatken.​—Ipareng so Eclesiastes 12:5.

Tinawag na kadaanan a Hebreos so kiew ya almendro a say “ombabangon a sakey,” ya isisiglaot ed masakbay a panagrosas to. Sayan kaugalian so ginawa nen Jehova pian iyilustra so sakey ya importanten mensahe. Diad gapo na ministeryo to, nipanengneng ed si Jeremias so pasingawey na simit na almendro. Anto so kabaliksan na satan? Insalaysay nen Jehova: “Siak benbenan ko so salitak pian sumpalen ko.”​—Jeremias 1:12.

Unong a say kiew ya almendro so ‘ombangon’ a masaksakbay, ontan met a si Jehova so piguratibon “ombabangon a masakbay” pian ibaki iray propeta ton pasakbayan iray totoo to nipaakar ed saray pansumpalan na itutunganga. (Jeremias 7:25) Tan agto manpainawa​—sikato so ‘mansiansian aliing’—​anggad kasumpal na mapropetikon salita to. Kanian saman so agawa nen 607 K.K.P., diad aturon panaon, a sinmabi panangukom nen Jehova ed apostatan nasyon na Juda.

Ipapasakbay so Salita na Dios a wala so onsabin mipadparan panangukom sumpad marelmeng a sisteman panbibilayan tayo. (Salmo 37:9, 10; 2 Pedro 3:10-13) Diad panutukoy ed ontan a hudisyal a kiwas, papaseguroan itayo nen propeta Habacuc: “Ta say pasingawey sikato ni nipaakar ed nigeter a panaon . . . sikato alagden mo; ta petepeteg ya onsabi, ya ag manbayag.” (Habacuc 2:3) Say marakep a rosas na almendro so mangipanonot ed sikatayo a si Jehova so mansiansian aliing nipaakar ed salita to ta pian sumpalen itan.

[Picture Credit Line ed pahina 32]

Pictorial Archive (Near Eastern History) Est.