Isasabi nen Jesus odino Kiwawala nen Jesus—Dinan?
“Anto kasi so tanda ed isabim tan say anggaan na mundo?”—MATEO 24:3.
1. Anto so walan betang na tepetepet ed ministeryo nen Jesus?
SAY onsianon panangusar nen Jesus na tepetepet so anagyat ed onderengel ed sikaton manisip, konsideraen iray bengatla ed balon punto-de-bista. (Marcos 12:35-37; Lucas 6:9; 9:20; 20:3, 4) Pisalamatan tayo ta inebatan to met iray tepet. Impalinew na saray ebat to iray katuaan a no aliwan onman et agtayon balot komon akabatan odino atalosan.—Marcos 7:17-23; 9:11-13; 10:10-12; 12:18-27.
2. Anton tepet so kaukolan tayon imanoen natan?
2 Diad Mateo 24:3, naromog tayo ditan so sakey ed sankaimportantian a tepet ya inebatan nen Jesus ed kapiganman. Sanen paganigani lay anggaan na bilay to ed dalin, kapkapangiter nen Jesus ed pasakbay na kadederal na templo ed Jerusalem, a mananda ed anggaan na Judion sistema. Inyarum na salaysay nen Mateo: “Sanen yimurong ed Palandey na saray Olibas, saray babangatan dinmago ra ed sikato a maamot, a kuan da: ‘Ibagam ed sikami, kapigan so kagawa na sarayan bengatla, tan anto kasi so tanda ed isabim [kiwawala, NW] tan say anggaan na mundo?’”—Mateo 24:3.
3, 4. Anton makatantandan pandumaan so wala ed no panon a nipatalos ed saray Biblia so manunan salita ed Mateo 24:3?
3 Minilyon a managbasa na Biblia so nanuumameng, ‘Akin ya intepet itan na saray babangatan, tan panon so nepeg a pangapekta ed siak na ebat nen Jesus?’ Diad ebat to et sinaglawi nen Jesus so ipatnag na bulobulong a mangipapatnag ya “asingger la” so tiagew. (Mateo 24:32, 33) Lapud saya, ibabangat na dakel a relihyon ya onkekerew iray apostol na sakey a tanda ed ‘isabi’ nen Jesus, tandan mamapaneknek a say ipapawil to et asingsingger la. Sisiaen da a say ‘isasabi’ so magmaliw ya eksakton panaon ya awiten to ed tawen iray Kristiano tan insan to la’d satan panganggaen so mundo. Sisiaen mo ta a susto iya?
4 Imbes ed patalos ya ‘isasabi,’ arum a bersyon na Biblia, pati say New World Translation of the Holy Scriptures, so manguusar ed salitan “kiwawala.” Agkasi midumaan so intepet na saray babangatan tan say inyebat nen Jesus ed ibabangat na saray relihyon? Anto ta a talagay nitepet? Tan antoy inyebat nen Jesus?
Anto ta so Tinepet Da?
5, 6. Anto so nibaga tayo nipaakar ed iisipen na saray apostol sanen tinepet da so nabasa tayo ed Mateo 24:3?
5 No konsideraen so inkuan nen Jesus nipaakar ed templo, maseguron say iisipen na saray babangatan et say Judion sistema sanen kinmerew ira na ‘tanda na kiwawala [odino, ‘isasabi’] tan say konklusyon na sistema na bengabengatla [diad literal et “panaon”].’—Ikompara so “mundo” diad 1 Corinto 10:11 tan Galacia 1:4, KJ.
6 Diad sayan panaon et limitado labat so pakatalos na saray apostol ed bangabangat nen Jesus. Sakbay na saya et inisip da ‘a say panarian na Dios et ompatnag a tampol.’ (Lucas 19:11; Mateo 16:21-23; Marcos 10:35-40) Tan anggan kayari na tongtongan ed Palandey na Olibas, balet ta sakbay na inkilanaan na masanton espiritu, tinepet da no ipawil nen Jesus ed saman a panaon so Panarian na Israel.—Gawa 1:6.
7. Akin a tetepeten na apostoles ed si Jesus so nipaakar ed betang to ed arapen?
7 Ingen, amta ran sikatoy ontaynan, ta diad agano ni et inkuanton: “Wala ni daiset a panayam na silew ed nanleleetan yo. Manakar kayo ambegyan wala so silew ed sikayo.” (Juan 12:35; Lucas 19:12-27) Kanian talagan panumamengan da, ‘No onalis si Jesus, panon min nabidbiran so ipawil to?’ Sanen nampanengneng bilang say Mesias, maslak so ag-akabidbir ed sikato. Tan kayari na masulok a sakey taon, nansiansia ni iraman a tepet no kasin sumpalen ton amin so kaukolan a gawaen na say Mesias. (Mateo 11:2, 3) Kanian walaan na katunongan iray apostol ya ontepet nipaakar ed arapen. Balet, lamet, kasin say tetepeten da et sakey a tanda a sikato lay asingger lan onsabi odino parad sananey a bengatlan duma?
8. Anton maseguron lenguahe so pisasalita na apostoles ed si Jesus?
8 Isipen mo pan sikay sakey a manok ya ontatalineng ed tongtongan ed Palandey Olibas. (Ikompara so Eclesiastes 10:20.) Anganko nadngel mo komon si Jesus tan saray apostol a mansasalitay Hebreo. (Marcos 14:70; Juan 5:2; 19:17, 20; Gawa 21:40) Ingen, maseguron marunong met ira na Griegon lenguahe.
No Antoy Insulat nen Mateo—Diad Griego
9.Anto so angibasiyan na maslak a patalos ed Mateo?
9 Saray rekord ya apetsaan na komaduan siglo K.P. so mangipapanengneng ya inmunan insulat nen Mateo so Ebanghelyo to ed Hebreo. Mapatnag ya insulat to itan ed lenguahen Griego ed saginonor. Dakel a manuskrito ed Griego so wala ni anggad panaon tayo tan kinmana a pinagkabasiyan ed pangipatalos na Ebanghelyo to ed saray lenguahe natan. Anto so insulat nen Mateo ed Griegon lenguahe nipaakar ed saman a tongtongan ed Palandey Olibas? Anto so insulat to nipaakar ed ‘isasabi’ odino “kiwawala” a tinepet na saray babangatan tan inebatan met nen Jesus?
10. (a) Anton Griegon salita parad “sabi” so mabetbet ya inusar nen Mateo, tan antoray nayarin kabaliksan to? (b) Anto niran Griegon salita so paninteresan tayo?
10 Diad inmunan 23 a kapitulo na Mateo, masulok a 80 a danay a naromog tayo so sakey a kaslakan a Griegon verbo parad ‘sabi,’ ya erʹkho·mai. Mabetbet ya ipapasabi to so ideyan nitanla odino manasingger, a singa ed Juan 1:47: “Si Jesus anengneng to si Natanael ya [onsasabi, NW] ed sikato.” Dependi ed inkausar, say verbon erʹkho·mai so nayarin mankabaliksan ya “onsabi,” “onla,” “onla ed,” “makarateng,” odino “onbuat.” (Mateo 2:8, 11; 8:28; Juan 4:25, 27, 45; 20:4, 8; Gawa 8:40; 13:51) Balet diad Mateo 24:3, 27, 37, 39, inusar nen Mateo so sananey a salita, sakey a nombre ya agnaromog ed saray Ebanghelyo: say pa·rou·siʹa. Lapud impuyan na Dios so inkisulat na say Biblia, akin a pinakiwas to si Mateo a pilien iyan Griegon salita ed sarayan bersikulo sanen isusulat toray Ebanghelyo diad Griego? Anto so kabaliksan na satan, tan akin a labay tayon amtaen itan?
11. (a) Anto so kabaliksan na pa·rou·siʹa? (b) Panon a saray alimbawa ed sulsulat nen Josephus so mamaneknek ed pakatalos tayo ed parou·siʹa? (Nengnengen so paimano’d-leksab.)
11 Direktaan et say pa·rou·siʹa so mankabaliksan na “kiwawala.” Ibabaga na Expository Dictionary of New Testament Words nen Vine: “Say PAROUSIA, . . . diad literal et, sakey a kiwawala, para, kaiba, tan ousia, pagmamaliw (manlapud eimi, magmaliw), so mangipapanengneng na namparan isabi tan say onsublay a kiwawalan kaiba. Singa bilang, diad sakey a sulat ed papiro sasaglawien na marikit so nesisita na parousia to ed sakey a lugar pian naasikaso toray bengatlan nisisiglaot ed kaykayarian to.” Isasalaysay na arum a leksikon a say pa·rou·siʹa so mangipapaamta na ‘ibisita na sakey a manuley.’ Kanian, aliwa labat itan a basta say mismon isasabi, noagta sakey a mantultuloy a presensia nanlapulad insabi. Makapainteres, ontan so impangusar na manag-awaran a Judion Josephus a kapanaonan na saray apostol ed pa·rou·siʹa.a
12. Panon a say Biblia a mismo so ontutulong ed sikatayon mamekder ed kabaliksan na pa·rou·siʹa?
12 Say kabaliksan na “kiwawala” so malinlinew a pinekderan na kadaanan a literatura, ingen nagkalautlan interesado iray Kristiano ed no panon ya uusaren na Salitay Dios so pa·rou·siʹa. Say ebat so pareho—kiwawala. Natalosan tayo itan manlapud saray alimbawa ed sulsulat nen Pablo. Singa bilang, insulat to ed saray taga-Filipos: “Anggan singa sikayo so wala lawas ed katutulok, aliwa a diad akaarapak [kiwawalak, NW] labat, noag ingen nagkalalo natan ed kaandik ed arap yo, isumpal yo so dili a kilalaban yo.” Sinaglawi to met so pansiansian kaiba ra pian sikaray manggayaga ‘ed piarap [pa·rou·siʹa] to lamet ed sikara.’ (Filipos 1:25, 26; 2:12) Nabasa ed arum a bersyon so “say pagmamaliw kon kaiba yo la lamet” (Weymouth; New International Version); “sano kaiba yoak lamet” (Jerusalem Bible; New English Bible); tan “sano maminsan nin kalimog yoak.” (Twentieth Century New Testament) Diad 2 Corinto 10:10, 11, pinandumaan nen Pablo so “inkatoo to a silalaman” ed pagmamaliw ton “andi kami.” Diad sarayan alimbawa et mabitar ya agto sasaglawien so iyasingger odino isabi to; inusar to so pa·rou·siʹa diad pantalos ed pagmamaliw a presenti.b (Ikompara so 1 Corinto 16:17.) Balet, komusta met iray impanukoy nipaakar ed pa·rou·siʹa nen Jesus? Kasin saraya et manutukoy ed “isasabi” to, odino kasin ipapanengneng day tuloytuloy a kiwawala to?
13, 14. (a) Akin a nibaga tayo a say pa·rou·siʹa so malaknab a panaon? (b) Anto so nibaga nipaakar ed dukey na panaon na pa·rou·siʹa nen Jesus?
13 Interesado ed pa·rou·siʹa nen Jesus iray alanaay-espiritun Kristiano ed agew nen Pablo. Balet pinasakbayan ira nen Pablo ya ag-ira ‘napagalaw a tampol ed kalakal da.’ Kaukolan ya ompatnag nin unona so “too na kasalanan,” ya apaneknekan a say klero na Kakristianoan. Insulat nen Pablo a “say isabi to [mauges a sakey] so mitukoyan ed gawa nen Satanas a pati amin a pakayari tan saray tanda.” (2 Tesalonica 2:2, 3, 9) Malinew, say pa·rou·siʹa, odino kiwawala, na “[say] too na kasalanan” so aliwan sakey labat a temporaryon isasabi; mantultuloy itan ed andukey nin panaon, a ditan onwala iray tilan tanda. Akin a makabaliksan iya?
14 Konsideraen pay bersikulon sakbay na satan: “Ompatnag so mauges a sikato so pateyen nen Jesus a Katawan ed alingasew na sangi to tan nabalang lapu ed kipatnag na isabi to.” No panon a say kiwawala na “too na kasalanan” so diad loob na sakey a peryodo na panaon, say kiwawala nen Jesus so manpatuloy met ed loob na pigaran panaon tan mamantok ed kaderal na “say anak na kibabalang.”—2 Tesalonica 2:8.
Saray Aspeto na Salitan Hebreo
15, 16. (a) Anton partikular a salita so uusaren na dakel a patalos na Mateo ed Hebreo? (b) Panoy inkiusar na bohʼ ed Kasulatan?
15 Singa asaglawi la, mabitar ya insulat nen Mateo so Ebanghelyo ton inmuna diad Hebreon lenguahe. Kanian, anton Hebreon salita so inusar to ed Mateo 24:3, 27, 37, 39? Saray bersyon na Mateo a nipatalos ed modernon Hebreo so walaan na pormay berbon bohʼ, a nampara ed tepet na apostoles tan ed ebat nen Jesus. Nayarin mangipaarap iya ed pakabasaan na singa onia: ‘Anto so magmaliw a tanda na [bohʼ] tan say anggaan na mundo?’ tan, ‘Unong ed saray agew nen Noe, ontan naani so [bohʼ] na Anak na too.’ Anto so kabaliksan na bohʼ?
16 Anggaman nanduruma so kabaliksan to, say Hebreon berbon bohʼ so walaan na manunan kabaliksan ya “onsabi.” Oniay ibabaga na Theological Dictionary of the Old Testament: ‘Lapud naromog itan a 2,532 a danay, say bohʼ so sakey ed sankabetbetan a nauusar a berbo diad Hebreon Kasulatan tan manunan berbon mangipapatnag na ikiwas.’ (Genesis 7:1, 13; Exodo 12:25; 28:35; 2 Samuel 19:30; 2 Arari 10:21; Salmo 65:2; Isaias 1:23; Ezequiel 11:16; Daniel 9:13; Amos 8:11) No inusar nen Jesus tan saray apostol so sakey a salitan walaay ontan a kalaknab iran kabaliksan, nayarin pandebatian so kabaliksan to. Balet inusar da ta itan?
17. (a) Akin a nayarin say modernon Hebreon patalos na Mateo so agmangipapanengneng no anton talagay imbaga nen Jesus tan saray apostol? (b) Iner ni pakaromogan tayo na pakapatnagan no anton salita so inusar nen Jesus tan saray apostol, tan anto ni rason a sayan nanlapuan et paninteresan tayo? (Nengnengen so paimano’d-leksab.)
17 Tandaan a saray modernon Hebreon bersyon so patalos a nayarin agmangipresenta ed eksakton insulat nen Mateo ed Hebreo. Diad tua et nayarin angusar si Jesus na salitan nilikud ed bohʼ, sakey a mitukoyan ed pantalos a pa·rou·siʹa. Nanengneng tayo iya manlapud 1995 a libron Hebrew Gospel of Matthew, nen Propesor George Howard. Ipapaimano na libro so koma-14 siglon argumenton sumpad Inkakristianon insulat na Judion doktor a Shem-Tob ben Isaac Ibn Shaprut. Imparungtal na satan a dokumento so Hebreon teksto na Ebanghelyo nen Mateo. Wala so ebidensya ya imbes ya ipatalos manlapud Latin odino Griego ed panaon nen Shem-Tob, sayan teksto na Mateo so daan lan tuloy tan orihinal ya insulat ed Hebreo.c Diad ontan et nipanengneng to ed sikatayo no anton talaga so nibaga ed Palandey na Olibas.
18. Anton makapainteres a Hebreon salita so inusar nen Shem-Tob, tan anto so kabaliksan na satan?
18 Diad Mateo 24:3, 27, 39, ag-inusar ed teksto na Mateo nen Shem-Tob so berbon bohʼ. Imbes, inusar to so mitukoyan a nombren bi·ʼahʹ. Satan a nombre so naimano ed Hebreon Kasulatan dia labat ed Ezequiel 8:5, a kabaliksan to diman a “lolooban.” Imbes ya ibalikas so akto na isabi, say bi·ʼahʹ ditan so manutukoy ed lolooban na sakey a bilding; sano wala ka la ed lolooban odino ed arapan, wala ka la’d bilding. Ontan met, mabetbet ya uusaren na ag-Biblikon relihyoso iran dokumento a kaiba na Dead Sea Scrolls so bi·ʼahʹ nipaakar ed isasabi odino igagapo na makasaserdote iran betang. (Nengnengen so 1 Awaran 24:3-19; Lucas 1:5, 8, 23.) Tan say sakey a 1986 a patalos ed Hebreo ed kadaanan a Syriac (odino, Aramaiko) na Peshitta so angusar met ed bi·ʼahʹ ed Mateo 24:3, 27, 37, 39. Kanian wala so ebidensya a diad kadaanan a panaon et say nombren bi·ʼahʹ so nayarin walaan na kabaliksan a duma manlapud berbon bohʼ ya inusar ed Biblia. Akin a makapainteres iya?
19. No si Jesus tan saray apostol et inusar da so bi·ʼahʹ, anto so nibaga tayo?
19 Nayarin inusar na saray apostol ed tepet da tan si Jesus ed ebat to iyan nombren bi·ʼah.ʹ Anggan say walad kanonotan labat na saray apostol et say ideyan basta isasabi labat nen Jesus ed arapen, nayarin inusar nen Kristo so bi·ʼahʹ pian ilaktip so mas ni nen say iisipen da. Nayarin say tutukoyen nen Jesus et say isasabi to ed balon inkabetang; say isasabi to so gapoan na balon betang to. Saya so misimbangan ed pantalos a pa·rou·siʹa, a diad kaunoran et inusar nen Mateo. Say ontan ya impangusar ed bi·ʼahʹ so natalosan, a manuporta ed abayag lan ibabangat na Tastasi nen Jehova, a say atugyop a “tanda” ya inter nen Jesus so mangipapatnag a sikato lay wadia.
Pantalaran ed Pantok na Kiwawala To
20, 21. Anto so naaralan tayo manlapud komento nen Jesus nipaakar ed samay agew nen Noe?
20 Say panaaral tayo nipaakar ed kiwawala nen Jesus so kaukolan a direktan mangapekta ed bilay tayo tan ed saray iilaloan tayo. Pinaseseg nen Jesus iray babangatan to a manalerto. Angiter na sakey a tanda ta pian naimano so kiwawala to, anggaman maslak so agmangimano: “Unong ed saray agew nen Noe, ontan naani so isabi na Anak na too. Ta singa dia’d saraman ya agew ed arapen na delap nankakakan ira tan naninum ira, angaasawa ra tan akiasawa ra anggad agew ya inloob nan Noe ed biong; tan agda akabkabatan angga ed sinmabi delap et inyanor to ra ya amin, ontan naani so isabi Anak na too.”—Mateo 24:37-39.
21 Nen panaon nen Noe, maslak a totoo ed saman a kailalakan so basta nantultuloy ed normal a kabibilay da. Impasakbay nen Jesus a mipadpara itan ed “kipatnag na Anak na too.” Nayarin liknaen na totoo ed kaliberliber nen Noe ya anggapoy nagawan mauges. Kabat yo no antoy talagan agawa. Saraman ya agew, a linmaknab ed sakey a panaon, so sinmabi ed kapantokan, “sinmabi delap et dineral toran amin.” Imparungtal nen Lucas so mipadparan salaysay ya impareng nen Jesus ‘iray agew nen Noe’ ed “saray agew na Anak na too.” Impanonot nen Jesus: “Ontan met naani ed agew a kipatnag na Anak na too.”—Lucas 17:26-30.
22. Akin a nagkalautlan interesado tayo ed propesiya nen Jesus ed Mateo kapitulo 24?
22 Amin na saya so walaan na nikaduman kabaliksan parad sikatayo lapud manbibilay itayo ed panaon a naiimano tayoray ebenton impasakbay nen Jesus—bakabakal, yegyegyeg, salot, kakisiran na tagano, tan panamasegsegang ed saray babangatan to. (Mateo 24:7-9; Lucas 21:10-12) Saratan a kipapasen so sankapatnagan la nanlapulad inkagawa na impanguman-ed-awaran a gutgutan a tinawag a Guerra Mundial I, anggaman ipapasen na maslak a totoo iraya bilang normal a kabiangan na awaran. Balet, natatalosan na saray tuan Kristiano so kabaliksan na sarayan importantin ebento, no panon ya atalosan na alerton totoo a say panluluglug na saray bulong na kiew a higos et kabaliksan ton asingger lay tiagew. Insimbawa nen Jesus: “Ontan met sano nanengneng yo so sarayan bengatla a nagawa, amtaen yo a say panariay Dios asingger la.”—Lucas 21:31.
23. Parad siopa a walaan na nikaduman kabaliksan so Mateo kapitulo 24, tan akin?
23 Impaarap nen Jesus ed saray babangatan so baleg a kabiangan na ebat to ed Palandey Olibas. Sikara imay mibiang ed samay manangisalbay-bilay a kimey a panangipulong na maong a balita ed amin a dalin sakbay na isabi anggaan. Sikara imay makatebek ed “kadimlaan na kapalis . . . a manalalagey ed santo a pasen.” Sikara imay onkiwas diad panamegley na ‘ibatik’ sakbay na baleg a kairapan. Tan sikara imay partikular a naapektoan na kaaruman niran salita: “Noag apatikeyan iratan ya agew, anggapo komon naani laman a nilaban; balet nisengeg ed saray pinili napatikeyan so saratan ya agew.” (Mateo 24:9, 14-22) Balet anton talagay kabaliksan na sarayan makasagyat-kanonotan a salita, tan akin a nibagan mangitatarok iratan na basiyan pian nawalaan itayo na lalon liket, kompiyansa, tan seseg natan. Say ontumbok ya aaralen ed Mateo 24:22 so mangiter na eba-ebat.
[Saray paimano ed leksab]
a Saray alimbawa manlapud Josephus: Say kirmat tan karol ed Palandey Sinai “so angiyabawag a wadman [pa·rou·siʹa] so Dios.” Say anengneng a milagro ed tabernakulo “so mangipanengneng na kiwawala [pa·rou·siʹa] na Dios.” Diad impangipanengneng ed si Eliseo na akapaliber iran karwahe, say Dios “so amaneknek ed aripen to na pakayari tan kiwawala [pa·rou·siʹa] to.” Sanen sinali na Romanon opisyal a Petronio a pandeenen iray Judio, imbaga nen Josephus a ‘talagan impanengneng na Dios ed Petronio so kiwawala [pa·rou·siʹa] to’ diad impamauran. Ag-inyaplika nen Josephus so pa·rou·siʹa ed iyasingger labat odino temporaryon isasabi. Kabaliksan na satan so mantultuloy, ag-anggan nanengneng, a presensia. (Exodo 20:18-21; 25:22; Levitico 16:2; 2 Arari 6:15-17)—Ikompara so Antiquities of the Jews, Libro 3, kapitulo 5, parapo 2 [80]; kapitulo 8, parapo 5 [202]; Libro 9, kapitulo 4, parapo 3 [55]; Libro 18, kapitulo 8, parapo 6 [284].
b Diad A Critical Lexicon and Concordance to the English and Greek New Testament, tinukoy nen E. W. Bullinger a say pa·rou·siʹa et kabaliksan toy ‘pagmamaliw a wadia odino pagmaliw a presenti, sirin et kiwawala, isasabi; isasabin manasaglawi permanentin panayam manlapud saman ya isabin manpatuloy.’
c Say sakey ya ebidensya et lugan na satan so Hebreon balikas a “Say Ngaran,” a nisulat odino pinatikey, a 19 a danay. Oniay insulat nen Propesor Howard: “Say panbasa ed Madibinon Ngaran ed sakey a Kristianon dokumento ya inaon na sakey ya onsusumlang a Judio so makatantanda. No saya so sakey a Hebreon patalos na sakey a Griego odino Latin a Kristianon dokumento, nailaloan na sakey a naromog toy adonai [Katawan] ed teksto, aliwan simbolo parad agnayarin ibalikas a madibinon ngaran a YHWH. . . . Parad sikato agnisalaysay so pangiyarum ed agnepeg ya ibalikas a ngaran. Mabiskeg ya ipapatnag na ebidensya ya inawat nen Shem-Tob so kopya ton Mateo a walaan na Madibinon Ngaran la ed loob na teksto a pinansiansia to itan imbes a mankasalanan ed pangekal ed satan.” Inusar na New World Translation of the Holy Scriptures—With References so Mateo [J2] nen Shem-Tob bilang suporta ed panguusar na madibinon ngaran ed Kristianon Griegon Kasulatan.
Panon so Pangebat Yo?
◻ Akin ya importanti a talosan so pandumaan no panon so impangipatalos na saray Biblia ed Mateo 24:3?
◻ Anto so kabaliksan na pa·rou·siʹa, tan akin ya importanti iya ed sikatayo?
◻ Anto so posiblin panparehoan a niwala ed Mateo 24:3 ed Griego tan ed Hebreo?
◻ Anto so tombok nipaakar ed panaon a kaukolan tayon amtaen pian natalosan so Mateo kapitulo 24?
[Litrato ed pahina 10]
Say Palandey Olibas, a nabantag dia so Jerusalem