“Ibagam ed Sikami, Kapigan so Kagawa na Saraya’n Bengatla?”

“Balobalo a bengabengatla so ipaliwawak; dia ed arapen na ipaway da ibagak ed sikayo so nipaakar ed sikara.”​—ISAIAS 42:9.

1, 2. (a) Anto so intepet na saray apostol nen Jesus nipaakar ed arapen? (b) Panon ya asumpal so ebat nen Jesus nipaakar ed sakey ya atugyop a tanda?

SAY madibinon panangibangat so ongagapo tan manlalapu ed si Jehova a Dios, “[say Sakey a mangipapaliwawa na] pangangaan a manlapu ed gapo.” (Isaias 46:10, NW) Singa impanengneng na inmunan artikulo, inanap na saray apostol so ontan a panangibangat manlapud si Jesus, diad impanepet ed sikato: “Ibagam ed sikami, kapigan so kagawa na saraya’n bengatla, tan anto so tanda no sarayan bengatla asinger ta la ra ya amin a nasumpal?”​—Marcos 13:4.

² Bilang ebat, deneskribe nen Jesus so sakey ya atugyop a “tanda” a tugyopen na ebidensia a mamaneknek a diad saman et asingger la so anggaan na Judion sistema. Saya so asumpal diad inkaderal na Jerusalem nen 70 K.P. Balet say propesiya nen Jesus so walaan na sakey a lalon babaleg a kasumpalan kayari na dakel a taon ed arapen. Bektaman a “say nigeter a panaon na saray nasyon” so manampot ed 1914, nanengneng so lalon malaknab a tanda, a mangipapatnag ya asingger lan nasumpal so kaplesan a marelmeng a sistema ed sakey a “baleg a kairapan.”a (Lucas 21:24) Minilyon a manbibilay natan so makapaneknek a sayan tanda so asumpal ed saray guerra mundial tan arum niran makatantandan ebento ed sayan koma-20 siglo. Saraya met so tanda na baleg a kasumpalan na propesiya nen Jesus, say modernon kasumpalan na saya so kinmanan tipo na saray agawa manlapud 33 ya anggad 70 K.P.

3. Diad impanalambit ni ed sakey a tanda, antoran kaaruman ya agawgawa so talagan impasakbay nen Jesus?

³ Kayari impanaglawi nen Lucas ed aturon panaon na nasyones, saray misimbangan a salaysay ed Mateo, Marcos, tan Lucas so manedeskribe ed kaaruman a mantutumbokan ya agawgawa a mangilaktip ed sakey a tanda bilang kaaruman ed atugyop a ‘tanda na konklusyon na sistema na bengabengatla.’ (Mateo 24:3) (Diad pahina 15, sayan punto na salaysay so minarkaan diad panamegley na duaran linya.) Ibabaga nen Mateo: “Et kapagdaka ed kayari kairapan ed saratan ya agew, say banwa onbilunget naani, tan say bulan agto naani iter so sinag to, tan saray bibitewen napaptak ira naani a manlapu ed tawen, tan say pakayari tawen nagalaw ira naani. Insan onpatnag so tanda na Anak na too ed tawen, et [insan] manermen naani ed satan so amin a polipoli na dalin, tan nanengneng da naani so Anak na too ya onsasabi ed tapew na lurelurem na tawen a napno’y pakayari tan baleg a gloria. Et ibaki to ra naani angeles to a pati baleg a tanol na trumpeta, et tiponen da ra naani pinili to a manlapu’d saray apatiran dagem, manlapu’d sakey a sampot na tawen anga ed sananey.”​—Mateo 24:29-31.

Kairapan tan Saray Tanda ed Tawen

4. Antoran tepet so onlesa nipaakar ed saray tanda ed tawen a sinaglawi nen Jesus?

⁴ Kapigan itan nasumpal? Amin a taloran Ebanghelyon salaysay so manasaglawi ed nayari tayon tawagen a tantanda ed tawen​—say banwa tan bulan so binmilunget tan napaptak iray bitewen. Inkuan nen Jesus a saraya so ontumbok ed “kairapan.” Kasin say walad kanonotan nen Jesus et say kairapan ya amantok nen 70 K.P., odino kasin say tutukoyen to et say baleg a kairapan a nagawa ed arapen ni ed modernon panaon tayo?​—Mateo 24:29; Marcos 13:24.

5. Anto so datin panmoria nipaakar ed kairapan ed modernon panaon tayo?

⁵ Nanlapulad inkasumpal na aturon panaon na nasyones nen 1914, nagmaliw ya interesadon tuloy so totoo na Dios ed “baleg a kairapan.” (Apocalipsis 7:14, NW) Diad loob na pigaran taon, abaloan dan say modernon-panaon a baleg a kairapan so walaan na gapoan a misimbangan ed panaon na Guerran Mundial I, kayari to et temporaryon tinmunda, tan diad kaunoran et sakey ya anggaan, “[say] bakal na baleg ya agew na Dios, a Makapanyarin amin.” No ontan a talaga so agawa, anto so nagawa ed baetan na saray dekada na “kasampotan na sistema”?​—Apocalipsis 16:14; Mateo 13:39; 24:3, NW; 28:20.

6. Anto so inilaloan nen saman a kasumpalan na propesiya nen Jesus nipaakar ed saray tanda ed tawen?

⁶ Bueno, liknaen a diad baetan na sayan panaon, say atugyop a tanda so nanengneng, pati say panagpulong a kimey na say atipon a totoo na Dios. Inilaloan met a say nipasakbay iran tanda ed tawen so nailaloan a nanengneng ed baetan na panaon kayari na igapo na saya nen 1914-18. (Mateo 24:29; Marcos 13:24, 25; Lucas 21:25) Say imano so niyapasakey ed literal a bengabengatla ed katawenan​—saray kagawaan ed liwang, rocket, saray cosmic odino gamma ray, tan saray panangilanding odino base ed bulan.

7. Anto so nauman a pakatalos nipaakar ed baleg a kairapan a niiter?

⁷ Anggaman ontan, inusisa lamet na The Watchtower na Enero 15, 1970, so propesiya nen Jesus, nagkalautla say onsasabin baleg a kairapan. Impanengneng na satan a diad liwawa na say agawa ed inmunan siglo, say modernon kairapan so agnayarin ginmapo nen 1914-18, sakey ya andukey iran dekada a baetan, tan diad saginonor ed tinmuloy. Sampotan na satan a magasin: “Say ‘baleg a kairapan’ ya agla nagawa lamet et diad arapen ni, lapud satan so mankabaliksan na kadederal na sankamundoan ya imperyo na palson relihyon (pati say Kakristianoan) a tumbokan na ‘bakal na baleg ya agew na Dios, a Makapanyarin amin’ ed Armagedon.”

8. Diad nauman a panmoria nipaakar ed modernon kairapan, panon so impangisalaysay na Mateo 24:29?

⁸ Balet ibabaga na Mateo 24:29 a saray tanda ed tawen so onsabin “kapagdaka ed kayari kairapan.” Panon a nagawa itan? Insuheri na The Watchtower na Mayo 1, 1975, a “say kairapan” et samay sinmabi ed kapantokan nen 70 K.P. Balet ed anton pantalos a nibagan saray tanda ed tawen ed panaon tayo so nagagawa a “kapagdaka” kayari na sakey ya agawa nen 70 K.P.? Inkatunongan a diad imaton na Dios et saray siglo ed baetan so antikey. (Roma 16:20; 2 Pedro 3:8) Anggaman ontan, say araldalem a panusisa na sayan propesiya, nagkalautla ed Mateo 24:29-31, so mangipapaarap ed duman salaysay. Saya so mangiyilustra no panon a say liwawa so “mantultuloy angga ed nagnap ya agew.” (Uliran 4:18, American Standard Version)b Kunsideraen tayo no akin a say sakey a balo, odino anguman a salaysay so matukoy.

9. Panon ya ontulong so Hebreon Kasulatan pian natalosan iray salita nen Jesus nipaakar ed saray agawgawa ed katawenan?

⁹ Diad apatira ed saray apostol to, inter nen Jesus so propesiya nipaakar ed ‘say banwa onbilunget naani, tan say bulan agto naani iter so sinag to, tan saray bibitewen napaptak.’ Bilang Judios, natalosan da itan a balikas manlapud saray Kasulatan, a diad Sofonias 1:15, alimbawa, say panaon na panangukom na Dios so tinawag ya “agew na gonigon tan irap, agew na kabagbag tan pankibalatar, agew na bilunget tan udiem, agew a malurem tan makapal a bilunget.” Wala met iray Hebreon propetan aneskribe ed imbilunget na banwa, say bulan so agsinminag, tan saray bitewen so ag-angiter na liwawa. Naromog mo iratan a balikas ed madibino iran mensahe sumpa ed Babilonia, Edom, Ehipto, tan mamaamianen a panarian na Israel.​—Isaias 13:9, 10; 34:4, 5; Jeremias 4:28; Ezequiel 32:2, 6-8; Amos 5:20; 8:2, 9.

10, 11. (a) Anto so impropesiya nen Joel nipaakar ed saray bengatla ed katawenan? (b) Dinan a kabiangan na propesiya nen Joel so asumpal nen 33 K.P., tan dinan met so ag-asumpal?

¹⁰ Sanen nadngel da so imbaga nen Jesus, maseguron anonotan di Pedro tan arum ni so propesiya nen Joel ed Joel 2:28-31 tan 3:15: “Ikalbok naani so espirituk ed amin a laman, et saray anak yo a lalaki tan bibii manprofeta ra naani. . . . Et ipatnag ko naani so saray pankelkelawan ed saray tawen tan ed dalin; dala, tan apuy, tan sekseklang ya asewek. Say banwa magmaliw naani ya ambilunget, tan say bulan [magmaliw a] dala, arapen na isabi na baleg tan makapataktakot ya agew nen Jehova.” “Say banwa tan say bulan onkuyep ira, tan saray bitewen isiblet da so pansinag da.”

¹¹ Singa nisalaysay ed Gawa 2:1-4 tan 14-21, nen Pentecostes 33 K.P., angikalbo so Dios na masanton espiritu ed 120 a babangatan, a lalaki tan bibii. Impakabat nen apostol Pedro a saya so impropesiya nen Joel. Komusta met iray salita nen Joel nipaakar ed ‘banwa a magmaliw ya ambilunget tan say bulan a magmaliw a dala tan saray bitewen isiblet da so pansinag da’? Anggapon balot so mangipanengneng a saya so asumpal nen 33 K.P. odino ed masulok a 30-taon a dukey a panaon na konklusyon na Judion sistema na bengabengatla.

12, 13. Panon ya asumpal iray tanda ed tawen ya impropesiya nen Joel?

¹² Malinew a say kaunoran a kabiangan na propesiya nen Joel so walaan na lalon maapit a pisiglaotan ed “isabi na baleg tan makapataktakot ya agew nen Jehova”​—say kadederal na Jerusalem. Wala so imbaga na The Watchtower na Nobyembre 15, 1966, nipaakar ed kairapan a sinmabi nen 70 K.P.: “Maseguro a saman so ‘agew nen Jehova’ no nipaakar ed Jerusalem tan ed saray anak to. Tan mitunosan ed saman ya agew et dakel a ‘dala tan apuy tan asewek a linaew,’ say banwa so agmangiter na liwawa diad kabilungetan na syudad ed agew, tan say bulan so mangipapanonot ed panangipatedted na dala, aliwan deen, pinmilak a liwawa na bulan ed labi.”c

¹³ On, singa ed arum niran propesiyan naimano tayo, saray tanda ed tawen ya impasakbay nen Joel so nasumpal sano idapo la nen Jehova so panangukom to. Imbes a pabayagen ni so panaon na panganggaan na Judion sistema, say ibilunget na banwa, bulan, tan saray bitewen so agawa sanen nilusob so Jerusalem na saray puersan managderal. Makatunongan, a nailaloan tayo a sakey a babaleg a kasumpalan na satan a kabiangan na propesiya nen Joel sano onggapo lan nagawa so paneral na Dios ed kaplesan a sistema.

Dinan a Kairapan so Nagawa Sakbay na Saray Tanda ed Tawen?

14, 15. Anto so epekto na propesiya nen Joel ed pantalos ed Mateo 24:29?

¹⁴ Say kasumpalan na propesiya nen Joel (mitunosan ed arum niran propesiya a manguusar na parehon panangibalikas) so ontulong ed sikatayon natalosan iray salita ed Mateo 24:29. Malinew, so imbaga nen Jesus a ‘say banwa onbilunget naani, tan say bulan agto naani iter so sinag to, tan saray bibitewen napaptak’ so agmanutukoy ed saray bengatlan nagagawa ed loob na dakel a dekada ed konklusyon na kaplesan a sistema, a singa saray rocket ed liwang, saray panaglanding ed bulan, tan mipadpara iran bengatla. Andi, say sasaglawien to et say “baleg tan makapataktakot ya agew nen Jehova,” say kadederal ya onsabi ni.

¹⁵ Saya so misiglaot ed pakatalos tayo nipaakar ed no panon a saray tanda ed tawen so nagawan “kapagdaka ed kayari kairapan.” Say tutukoyen nen Jesus et aliwan say kairapan ya agawa nen 70 K.P. Imbes, say tutukoyen to et say gapo na baleg a kairapan a mangigeba ed sankamundoan a sistema ed arapen, a mamantok ed insipan ton “kiwawala.” (Mateo 24:3) Satan a kairapan so arapen tayo ni.

16. Dinan a kairapan so tinukoy na Marcos 13:24, tan akin ya ontan?

¹⁶ Komusta iray salita ed Marcos 13:24: “Ingen dia ed saratan ya agew kayari na satan a kairapan, say banwa onbilunget, tan say bulan ag mangiter naani liwawa to”? Dia, parehon say “saratan” tan “satan” et porma na say Griegon salitan e·keiʹnos, sakey a demonstratibon pronoun a mangipapatnag na sakey a bengatlan mabayag nin nagawa. Say e·keiʹnos so nayarin usaren pian ipanengneng so sakey a bengatlan abayag lan agawa (odino asaglawi la) odino sakey a bengatla ed arawin arapen. (Mateo 3:1; 7:22; 10:19; 24:38; Marcos 13:11, 17, 32; 14:25; Lucas 10:12; 2 Tesalonica 1:10) Kanian, say Marcos 13:24 so manutukoy ed “satan a kairapan,” aliwan say kairapan a pinawala na saray Romano, noagta say makapanyarin gawa nen Jehova ed anggaan na kaplesan a sistema.

17, 18. Anton liwawa so iiter na Apocalipsis nipaakar ed no panon a nagawa so baleg a kairapan?

¹⁷ Saray kapitulo 17 ya anggad 19 na Apocalipsis so mitunosan tan mamekder ed sayan nauman a pantalos ed Mateo 24:29-31, Marcos 13:24-27, tan Lucas 21:25-28. Diad anton paraan? Ipapanengneng na Saray Ebanghelyo a sayan kairapan so agginmapo tan mansumpal a maminpisan; Kayari a saman so onggapo, pigara ed saray matungangan totoo so mabilay ni pian nanengneng so “say tanda na Anak na too” tan manirap​—mantagleey tan, singa ed imbaga na Lucas 21:26, “napunaw ira nisengeg ed takot tan egagel da ed saray bengatla’n onsabi ed mundo.” Satan a matalonan takot so lapud ta nanenengneng da so “say tanda” a mangipapaniring ed asingger lan kadederal da.

¹⁸ Say salaysay ed Apocalipsis so mangipapanengneng a say arapen a baleg a kairapan so onggapo ed militarismo “iran saklor” na internasyonal ya “atap ya ayep” ya onbuwilta ed baleg a balangkantis, say Babilonia a Baleg.d (Apocalipsis 17:1, 10-16) Balet dakel a totoo so natilak, ta saray arari, managtagilako, kapitan na barko, tan arum nira so mandageyem ed kaandi na palson relihyon. Maseguron dakel so makamoria ya ontumbok la so kaukom da.​—Apocalipsis 18:9-19.

Anto so Onsabi?

19. Anto so nailaloan tayo sano onggapo la so baleg a kairapan?

¹⁹ Saray bersikulo na Ebanghelyo ed Mateo, Marcos, tan Lucas so mikasakey ed Apocalipsis kapitulo 17-19 ed pangipalinew ed malaknab a pakatalos nipaakar ed asingger lan nagawa. Diad nigetar a panaon na Dios, say baleg a kairapan so onggapo ed panamegley na sakey ya ilulusob sumpa ed sankamundoan ya imperyo na palson relihyon (Babilonia a Baleg). Saya so lalon sumpa ed Kakristianoan, a misimbangan ed agmatoor a Jerusalem. “Kapagdaka ed kayari” na sayan kabiangan na kairapan, “wala naani tanda dia’d agew tan bulan tan saray bibitewen; et dia ed tapew na dalin [agnaparaan ya] irap na saray nacion.”​—Mateo 24:29; Lucas 21:25.

20. Antoray tanda ed tawen a nailaloan tayo?

²⁰ Diad anton pantalos a ‘say banwa onbilunget, say bulan ag mangiter naani liwawa to, saray bibitewen napelag ira naani manlapu ed tawen, tan saray pakayari ya wala ed tawen natenyeg ira naani’? Anggapoy panduaruwa ed asasakbay a kabiangan na baleg a kairapan, dakel a liwawa​—prominentin klero na relihyoson mundo—​so niwalwal tan inekal la na “saray samploran saklor” ya asaglawi ed Apocalipsis 17:16. Maseguro met ya atenyeg iray mapulitikan pakayari. Nayari kasin niwala met itan a makapataktakot iran ebento ed literal a katawenan? Talagan niwala itan, tan nagkalalo lan makapakelkelaw nen say deniskribe nen Josephus ya agawa nen asingger lay anggaan na Judion sistema. Kabat tayo a diad apalabas ya inmunan panaon et impanengneng na Dios so pakayari to a manggawa na ontan iran makadesyang ya epekto, tan satan so sarag ton gawaen lamet.​—Exodo 10:21-23; Josue 10:12-14; Uko-ukom 5:20; Lucas 23:44, 45.

21. Panon a nagawa so sakey a “tanda” ed arapen?

²¹ Diad sayan punto, amin a taloran manag-sulat na Ebanghelyo so angusar ed toʹte (insan) pian ipaamta so ontumbok a nagawa. “Insan onpatnag so tanda na Anak na too ed tawen.” Nanlapulad Guerra Mundial I, atebek na saray tuan babangatan nen Jesus so atugyop a tanda na agnanengneng a kiwawala to, anggaman saya so agbinidbir na maslak a totoo. Balet say Mateo 24:30 so manasaglawi ed sakey nin “tanda” ya ompatnag ed arapen, saman so nipaakar ed “Anak na too,” tan amin a nasyon so napaskar a mangimano. Sano onsabi si Jesus tekep na saray lurem a manasakbong ed sikato, saray sumusumpan katooan ed sankamundoan so makamoria a say “isasabi” (Griego, er·khoʹme·non) lapud sakey a labas-nen-toon panangidemostra na maarin pakayari to.​—Apocalipsis 1:7.

22. Anto so magmaliw ya epekto ed pakanengneng ed “say tanda” na Mateo 24:30?

²² Diad Mateo 24:30 et uusaren to lamet so toʹte pian ipaamta no anto so ontumbok a nagawa. Insan bakbaken na saray nasyon so inkasira tan mantagleey, lapud nalikna ran say kadederal da so asingger la. Agaylan miduma ed ariripen na Dios, ta sikatayo so makayarin mangitangay ed kauloan tayo, lapud kabat tayon asingger lay kililiktar! (Lucas 21:28) Ipapanengneng met na Apocalipsis 19:1-6 a mangagayaga iray tuan managdayew ed tawen tan ed dalin ed pangangga na baleg a balangkantis.

23. (a) Anton kiwas so gawaen nen Jesus nipaakar ed saray pinili? (b) Anto so nibaga nipaakar ed nakdaan a naala ed tawen?

²³ Ituloy ya ikuan na propesiya nen Jesus, ed Marcos 13:27: “Tan saman la [toʹte] ibaki to so saray angeles et tiponen da naani a pandaragupen so saray pinili to manlapu ed saray apatira’n dagem, manlapu ed kasampotan na dalin anga ed kasampotan na tawen.” Dia si Jesus so mangiyaapasakey ed nakdaan na 144,000​—“saray pinili” a siansian mabilay ed dalin. Diad kagapo na angaan na sistema na bengabengatla, sarayan alanaan a babangatan nen Jesus so nitarok ed teokratikon pankakasakey. Anggaman ontan, unong ed inusar a pantutumbokan, diad Marcos 13:27 tan Mateo 24:31 et manedeskribe na sananey a bengatla. “[Diad panamegley na] baleg a tanol na trumpeta,” “saray [nakdaan a] pinili” so natugyop ed saray suyok na dalin. Panon iran natugyop? Anggapoy suppiat, sikaray ‘tatakan’ tan malinlinew a binidbir nen Jehova bilang kabiangan na “[saray] atawag tan apili tan matoor.” Tan diad inggetar a panaon na Dios, sikaray natugyop ed tawen a magmaliw ya arin-saserdote.e Saya so mangitarok na gayaga ed sikara tan ed saray matoor a kaiba ra, say “baleg ya olop,” a natatakan met lapud pinmaway ira ‘nanlapu ed baleg ya irap’ pian pangayagaan iray bendisyon ed paraison dalin​—Mateo 24:22; Apocalipsis 7:3, 4, 9-17; 17:14; 20:6; Ezequiel 9:4, 6.

24. Anton pantutumbokan so ipaparungtal na Mateo 24:29-31 no nipaakar ed onsabin nagawgawa?

²⁴ Sanen inkuan na apostoles, “Ibagam ed sikami . . . ,” say ebat nen Jesus so anaglawi ed nagkalalo ni nen say natalosan da. Ingen, diad panaon na panbibilayan da et nangayagaan da so impakanengneng ed tipikon kasumpalan na propesiya to. Say panaral tayo ed ebat nen Jesus so nipaarap ed kabiangan na propesiya to a nasumpal ni ed asingger ya arapen. (Mateo 24:29-31; Marcos 13:24-27; Lucas 21:25-28) Nanengneng tayo la natan a say kililiktar tayo so manasingger la. Nayarin onnengneng tayo ed arapen ed igapo na baleg a kairapan, insan say tanda na Anak na too, tan insan say panipon na Dios ed saray pinili. Diad kaunoran, bilang Manangidapo nen Jehova ed Armagedon, say Mibabakal-ya-Ari tayo, say nitronon Jesus, so “mangumpleto ed pananalo to.” (Apocalipsis 6:2, NW) Satan ya agew nen Jehova, sano idapo to so panangibales to, so onsabi bilang engranden pangangga na sistema na bengabengatla ya ananda ed agew na Katawan a Jesus manlapud 1914 a manpatuloy.

25. Panon tayon mibiang ed arapen nin kasumpalan na Lucas 21:28?

²⁵ Komon ta manpatuloy a nagunggunaan mo so inkasika ed madibinon panangibangat, ta pian onkiwas ed arapen ni a kasumpalan na saray salita nen Jesus: “Balet sano ongapo a nagawa so saraya a bengatla, tangay kayo, et itangua yo so saray olo yo; ta say karondon yo asinger la.” (Lucas 21:28) Agaylan engranden arapen so walad arap na saray pinili tan ed baleg ya ulop legan ya itutultuloy nen Jehova ya iyalangon so masanton ngaran to!

[Saray paimano ed leksab]

Kasin Natandaan Mo?

◻ Panon ya asumpal nen inmunan siglo iray kabiangan na Joel 2:28-31 tan 3:15?

◻ Dinan a kairapan so tutukoyen na Mateo 24:29, tan akin ya ontan so ebat tayo?

◻ Antoran tanda ed tawen so tutukoyen na Mateo 24:29, tan panon a saya so tamtampol kayari na kairapan?

◻ Panon a nasumpal ed arapen so Lucas 21:26, 28?

[Litrato ed pahina 16, 17]

Sakop na templo

[Credit Line]

Pictorial Archive (Near Eastern History) Est.