Panakar a Kaibay Dios—A Sankanonot so Andi-Anggaan
“Manakar itayo naani dia ed ngaran nen Jehova a Dios tayo ed ando lan ando lawas.”—MIQUEAS 4:5.
1. Akin a natawag si Jehova ya “Ari ed andi-anggaan”?
ANGGAPO so gapoan nen Jehova a Dios. Sikatoy matukoy a natawag a “[say] Masiken na Saray Ag-agew,” lapud say kiwawala to et anggapoy gapoan. (Daniel 7:9, 13) Panggayagaan met nen Jehova so magnayon ya arapen. Sikato lambengat so “Ari ed andi-anggaan.” (Apocalipsis 10:6; 15:3, NW) Tan diad imaton to, say sanlibon taon so “singa labat karuman no linmabas la, tan singa sankapuyat ed labi.”—Salmo 90:4.
2. (a) Anto so gagala na Dios ed matulok a totoo? (b) Diad anto so pangisentroan tayoray ilalo tan plano tayo?
2 Lapud say Manangiter na bilay et magnayon, nayarian ton ipagamor ed pilimeron sankaparis a too, di Adan tan Eva, so ilalon agmanganggan bilay diad Paraiso. Balet, lapud intunganga ra, abalang nen Adan so kanepegan ed andi-anggaan a bilay, ya impasa to so kasalanan tan patey ed saray kapolian to. (Roma 5:12) Ingen, say impanrebeldi nen Adan so ag-angamper ed orihinal a gagala na Dios. Linawa nen Jehova a manbilay ed ando lan ando iray matulok a totoo, tan ag-onsaew a sumpalen toy gagala to. (Isaias 55:11) Agaylan matukoy sirin, ya isentro tayoray ilalo tan plano tayo diad panlingkor ed si Jehova a sankanonot so andi-anggaan. Bangta labay tayon pansiansiaen ed kanonotan so “agew na Dios,” makanan tandaan a say kalat tayo et say panakar a kaibay Dios ed ando lan ando.—2 Pedro 3:12.
Onkiwas si Jehova ed Aturon Panaon To
3. Panon tayon naamtaan a si Jehova et walaay “aturon panaon” pian sumpalen iray gagala to?
3 Singa ed saramay manaakar a kaibay Dios, interesado itayon maong a manumpal ed linawa to. Amta tayon si Jehova so Baleg a Manangimaton na oras, tan matalek itayon agton balot onsaew a manumpal ed saray gagala to diad aturon panaon to. Alimbawa, “sanen sinmabi la so inkagnap na panaon, say Dios imbaki to so Anak to.” (Galacia 4:4) Nibaga ed si apostol Juan a walay “aturon panaon” parad kasumpalan na mapropetiko iran bengatla ya anengneng to ed saray pasingawey. (Apocalipsis 1:1-3, NW) Wala so “panaon na saray inatey pian sikara so naukom.” (Apocalipsis 11:18) Masulok a 1,900 a taon lay linmabas, apuyanan si apostol Pablo a mangibagan say Dios et “tinandaan to so sakey ya agew a sikato so pangukom to naani ed mundo unong ed katunongan.”—Gawa 17:31.
4. Panon tayon naamtaan a pilalek nen Jehova a panganggaen iyan marelmeng a sistema na bengabengatla?
4 Panganggaen nen Jehova iyan marelmeng a sistema na bengabengatla, lapud napapabanday so ngaran to ed mundo natan. Ompapalalo iray marelmeng. (Salmo 92:7) Diad saray salita tan gawa ra, iinsultoen da so Dios, tan ansakit ed sikato so pakanengneng ed pangaayew tan pamapasegsegang da’d saray lingkor to. (Zacarias 2:8) Agpankelawan ya inggeter la nen Jehova so magano lan pangangga na intiron organisasyon nen Satanas! Eksakto lan deniterminay Dios no kapigay kagawa na saya, tan ipapabitar na pakakasumpal na saray propesiya na Biblia a manbibilay itayo la natan ed “panaon na kasumpalan.” (Daniel 12:4) Sikatoy magano lan onkiwas diad kabendisionan na amin a mangaaro’d sikato.
5. Panon so impanmoria di Lot tan Habacuc ed saray kipapasen a walad kaliberliber da?
5 Pinirawat a nanengneng na saray lingkor nen Jehova nensaman so panganggay karelmengan. Say matunong a Lot so “apaermen a tuloy na sankaugsan ya impanbilay na saray mauges a totoo.” (2 Pedro 2:7) Apaermen ed saray kipapasen ed kaliberliber to, inyey-ey nen propetan Habacuc: “Jehova, panon kabayag so itawag ko, et agmo ak naani talinengen? Mantagleey ak ed sika lapu ed duksa, et agka mangilaban. Akin et ipatnag mo ed siak so inkauges, tan onnengneng ka na ag-onkanepegan? Ta say kabagbag tan kaduksa wala ed arap ko; et wala so kolkol, tan say siblangan onalagey.”—Habacuc 1:2, 3.
6. Anto so inyebat nen Jehova ed pikakasi nen Habacuc, tan antoy naaralan tayo’d saya?
6 Diad kabiangan, inmebat si Jehova ed si Habacuc ed oniaran salita: “Say pasingawey sikato ni nipaakar ed nigeter a panaon, tan mansiglat ya onarap ed anggaan, et agnaani mantila. Anggan manabala, sikato so alagden mo; ta petepeteg ya onsabi, ya agmanbayag.” (Habacuc 2:3) Kanian impaamta lay Dios a sikatoy onkiwas ed “nigeter a panaon.” Anggaman singano walay kaabalaan, sumpalen nen Jehova so gagala to—ya ag-onsaew!—2 Pedro 3:9.
Panlingkor Tekep na Ag-ontayer a Seseg
7. Anggaman ag-amtan eksakto nen Jesus no kapigay isabi na agew nen Jehova, panon ton sinumpal so kimkimey to?
7 Kasin say pangamta ed eksakton pangipanaon nen Jehova ed saray ebento so manunan kaukolan tayo pian maseseg tayon makapanakar a kaibay Dios? Andi, aliwan satan. Konsideraen pa so pigaran alimbawa. Interesadon maong si Jesus ed panaon sano nagawa la so linaway Dios ed dalin a singa met ed tawen. On, imbangat nen Kristo iray papatumbok ton mangipikasi: “Ama min wala ka ed tawen, nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:9, 10) Anggano amta nen Jesus a naebatan iyan kerew, agto amta so eksakton inkipanaon na saray bengabengatla. Diad malaknab a propesiya to nipaakar ed anggaan na sayan sistema na bengabengatla, inkuan to: “Satan ya agew tan oras anggapoy mikabat, anggan saray angheles ed tawen, anggan say Anak, noag say Ama lambengat.” (Mateo 24:36) Lapud si Jesu-Kristo so manunaan ed pakasumpal na saray gagala na Dios, sikato so direktamintin mibali ed panigway ed kakabusol na mangatatawen ya Ama to. Balet, sanen wadiad dalin si Jesus, agto ingen amta no kapigan so ikiwas na Dios. Kasin amatayer itan ed sikato diad panaglingkor ed si Jehova? Maseguron andi! Diad impakanengneng ed maseseg ya impanlinis nen Jesus ed templo, “saray babangatan to anonotan da a nisulat: ‘Say paga ed abung mo akmonen toak.’” (Juan 2:17; Salmo 69:9) Si Jesus a mismo so nantultuloy ya okupadon maong ed kimey ya inkibakian to, tan ginawa to itan tekep na ag-ontayer a seseg. Sikatoy nanlingkor met ed Dios a sankanonot to so andi-anggaan.
8, 9. Sanen intepet na saray babangatan so nipaakar ed kipawil na Panarian, antoy nibaga’d sikara, tan panon iran kinmiwas?
8 Tua met itan ed saray babangatan nen Kristo. Si Jesus so akiabet ed sikara sakbay a tuloy na intokotok to’d tawen. Oniay kuan na salaysay: “Sikara sirin, nen wala ra ya atipon, tinepet da ed sikato, a kuan da: ‘Katawan, ipawil mo so panarian ed Israel ed sayan panaon?’” Singa say Katawan da, pantintindekan day isabi na Panarian. Ingen, inmebat si Jesus: “Agnipabtang ed sikayo so pikabat na saray panaon ono kinepeg, ya inggeter na Ama ed pakauley ton dili; balet mangawat kayo na pakayari, no onsabi ed sikayo so espiritu santo; et sikayo so tasik ed Jerusalem, tan ed amin a Judea tan Samaria, tan angga ed kasampotan na dalin.”—Gawa 1:6-8.
9 Anggapoy pakanengnengan ya adismaya iray babangatan lapud sayan ebat. Imbes, nampelengan dan maong so kimey na panagpulong. Diad loob na pigaran simba, atayek da lay Jerusalem ed bangat da. (Gawa 5:28) Tan diad loob na 30 taon, nikayat da lay panagpulong da ed ontanlan inkalaknab a nibaga nen Pablo a say maong a balita et nipulong “ed amin a pinalsa ed leksab na tawen.” (Colosas 1:23) Anggaman say Panarian et ‘agnipawil ed Israel’ a singa abaloan na babangatan tan ag-itan niletneg ed tawen legan na impanbilay da, nantultuloy iran nanlingkor ed si Jehova a maseseg a sankanonot da so andi-anggaan.
Usisaen Iray Motibo Tayo
10. Say agpakaamta no kapigay paneral na Dios ed sistema nen Satanas so mangiyabuloy ed sikatayon mamaneknek ed anto?
10 Pirawat met na modernon-agew iran lingkor nen Jehova so pakanengneng ed pangangga na sayan mauges a sistema na bengabengatla. Balet, say manunan panpagaan tayo et aliwan say kiliktar tayo diad insipan a balon mundo na Dios. Labay tayon nanengneng so kapasantos na ngaran nen Jehova tan say kiyalangon na inkasoberano to. Lapud saya, panliketan tayo ta ag-imbaga na Dios ed sikatayo so ‘agew odino oras’ ya inggeter a pakaderal na sistema nen Satanas. Mangiyaabuloy iya ed sikatayo pian nipatnag a determinado itayon magnayon a manakar a kaibay Dios lapud sikatoy inaro tayo tan aliwan lapud temporaryo, binubukor iran kalat tayo.
11, 12. Diad anton paraan a naangat so integridad nen Job, tan panon a misiglaotan itan ya angat ed sikatayo?
11 Say panmantini’d integridad tayo so ontulong met a mamaneknek ya aliwa so iyaakusa na Diablo a say maptek a Job—tan pati ed saray totoon singa sikato—so manlilingkor ed Dios lapud dilin-pankaabigan. Kayari na impaneskribe nen Jehova ed lingkor ton si Job bilang andi-kabalawan, maptek, matakot ed Dios a too, marelrelmeng ya inturing nen Satanas: “Si Job antakot ta ed Dios ya andi-kabaliksan? Agka ta nanggawa na alar ed liberliber to, tan dia ed liberliber na amin a wala ed sikato, ed amin a diking? Binendisionan mo so kimey na saray lima to, tan say kayarian to minmunat ed dalin. Balet, yunat mo so limam natan, tan diwiten mo so amin a wala ed sikato, et ikaindan to ka ed lupam.” (Job 1:8-11) Diad impamasiansia to’d integridad to diad silong na pakasalsalian, apaneknekan nen Job a palso iyan mauge-uges ya akusasyon.
12 No ontan met so pamemben tayo ed kurso na integridad, nasuppiat tayo so antokaman a satanikon akusasyon a manlilingkor ti labat kuno ed Dios lapud ta amta tayon asingsingger lay pakatumang. Say agpakaamta ed eksakton panaon no kapigay kipaakseb na panangibales na Dios ed saray marelmeng so mangiter ed sikatayoy pankanawnawan mamaneknek a talagan inaro tayo si Jehova tan labay tayoy mankurang ed saray dalan to diad ando lan ando. Satan so mangipanengneng a matoor itayo ed Dios tan manmamatalek itayo ed paraay pangaasikaso to’d saray pamaakaran. Niarum ni, say agpakaamta ed agew tan oras so ontulong ed sikatayon mansiansian akabantay tan sililiing ed espiritual lapud ta amta tayon onsabi so anggaan ed anggan anton oras, a singa matakew ed labi. (Mateo 24:42-44) Diad inagew-agew a panakar a kaibay Jehova, napaliket tayoy puso to tan makapawala tayoy ebat ed Diablo, a mamabalaw ed sikato.—Uliran 27:11.
Manplano Parad Andi-anggaan!
13. Anto so ipapabitar na Biblia nipaakar ed panagplano’d arapen?
13 Amta na saramay manaakar a kaibay Dios a makabat so panggaway makatunongan iran plano parad arapen. Sikakabat ed saray problema tan limitasyon lapud inkatakken, uusaren a maong na dakel a totoo so inkatobonbalo tan inkabiskeg da ta pian mainawa ira ed pinansyal sano ontakken la ra. Komusta, sirin, so mas importantin espiritual ya arapen tayo? Oniay ibabaga na Uliran 21:5: “Saray kaisipan na saray makuli arap ira lambengat ed inkadaakan; balet balang sakey a mangganat, mangganat lambengat a naukolan.” Say panplano ed arapen a sankanonot so andi-anggaan so peteg a mabentaha. Lapud agtayo amtan eksakto no kapigay isabi na anggaan na sayan sistema, kaukolan tayon panisipan iray pankaukolan tayo’d arapen. Balet magmaliw itayon balansi tan iyuna ed bilay iray intereses na Dios. Nayarin ikuan na totoon andiay pananisia a say pangisentroy intereses na sakey diad panggaway linawa na Dios et agto nenengnengey arapen to. Balet ontan ta?
14, 15. (a) Anton ilustrasyon so sinaglawi nen Jesus nipaakar ed saray panagplano ed arapen? (b) Akin ya agnenengnengen na mayaman a too ed ilustrasyon nen Jesus so walad arapen to?
14 Sinaglawi nen Jesus so sakey ya ilustrasyon a makapangipaliwawa ed sayan pamaakaran. Inkuan to: “Say dalin na sakey a toon mayaman binmunga na dakel. Et minolimoli to ed loob ton dili, a kuan to, ‘Anto so gawaen ko naani, ta anggapo so pangyatolan ko ed saray bungak?’ Et inkuan to, ‘Saya so gawaen ko, igebak so saray kamalir ko, et ipaalagey ko so babaleg; et yatol ko ya amin diman so trigok tan saray kayamanan ko; et kuan ko naani ed kamarerwak: “Kamarerwa, dakel so saray kayamanan mo ya inyatol nipaakar ed dakel a taon; manpainawa ka, mangan ka, oninum ka, manliket ka.”’ Ingen inkuan ed sikato na Dios, ‘Sika makulangkulang, natan a labi nakerew ed sika so kamarerwam; et saray bengatla ya intadiam, siopa naani mankayarian ed sikara?’ Ontan so mantipon na kayamanan nipaakar ed sikato, et aliwa a mayaman dia ed Dios.”—Lucas 12:16-21.
15 Kasin say punto nen Jesus et agla komon nantrabaho so mayaman a too diad sagpot a nawalaay materyal a seguridad diad arapen? Andi, lapud ipapaseseg na Kasulatan so pankuli. (2 Tesalonica 3:10) Say lingo na mayaman a too et agto ginawa so nakakaukolan pian magmaliw a “mayaman dia ed Dios.” Anggano napanggayagaan toy materyal a kaykayamanan to ed loob na dakel a taon, sikatoy ompatey lanlamang ed saginonor. Agto nenengnengey arapen to, agto iisipen so nipaakar ed andi-anggaan.
16. Akin a matalek tayon napandependian si Jehova parad maligen ya arapen?
16 Say panakar a kaibay Jehova a sankanonot so andi-anggaan so parehon praktikal tan inenengneng ed arapen. Sankaabigan itan a panangiplano ed arapen. Anggaman makabat so panggaway praktikal iran plano nipaakar ed panag-eskuela, trabaho, tan saray responsabilidad ed pamilya, kaukolan tayon lawas tandaan ya agbalot paulyanan nen Jehova iray matoor a lingkor to. Inkansion nen Arin David: “Tobonbalo ak nensaman, et natan masiken ak la; agko nin balot anengneng a say matunong et apaulyan, nisay saray bini to mipabpayabol na nakan.” (Salmo 37:25) Ontan met so impaseguro nen Jesus a taryaan na Dios so amin a mangiyuuna ed Panarian to tan mankukurang ed matunong iran dalan nen Jehova.—Mateo 6:33.
17. Panon tayon naamtaan ya asingger lay anggaan?
17 Anggaman panlilingkoran tayoy Dios a sankanonot so andi-anggaan, naynay tayon pansiansiaen ed kanonotan so agew nen Jehova. Malinlinew a papaneknekan na pakasusumpal na propesiya ed Biblia so inkaasingger la na satan ya agew. Sayan siglo so abidbiran la ed saray bakal, salot, yegyeg, tan kakisiray tagano, pati say panamasegsegang ed saray tuan Kristiano tan say sankamundoan a panagpulong na maong a balitay Panarian na Dios. Amin na saraya so kabiangan ed panaon na anggaan na sayan marelmeng a sistema na bengabengatla. (Mateo 24:7-14; Lucas 21:11) Say mundo so napnapno na saramay “mangaro ed lamalaman da, maaro ra na pilak, managpasirayew, atagey a linawa, maayew, matulay ed saray kaatengan da, malamang, aliwa ran masimpit. Anggapo so aro ra a nianakan, anggapo so panangasi ra, managpauges, aliwa ran maadia, maruksa ra, maingongot ed saray maabig, managliput, mayuuges, mapasang, maaro ed likeliket, a lalo nen say dia ed Dios.” (2 Timoteo 3:1-5) Diad sarayan maatap a kaunoran ya agew, say bilay so mairap parad sikatayon lingkor nen Jehova. Agaylay pantintindek tayo ed panaon sano punasen lay Panarian nen Jehova so amin a kaugsan! Kaleganan to ni, komon ta determinado tayon manakar a kaibay Dios a sankanonot so andi-anggaan.
Panlingkor a Sankanonot so Agmanganggan Bilay
18, 19. Antoy mangipanengneng a nanlingkor ed Dios iray matoor nensaman a sankanonot day andi-anggaan?
18 Legan tayon manaakar a kaibay Jehova, nodnonoten tayo komon so pananisia nen Abel, Enoc, Noe, Abraham, tan Sara. Kayari na impanaglawi ed sikara, insulat nen Pablo: “Unong ed pananisia inatey iraya ya agda ni inawat so saray sipan, ingen sikara so anengneng da tan sikara so imbano ra nanlapu ed arawi, tan impatua’ra a sikara so sankaili tan manaakar ed tapew na dalin.” (Hebreos 11:13) Saratan a matoor et “panpirawatan da so dalin a magmaong, salanti, say mangatatawen.” (Hebreos 11:16) Diad pananisia, tinalaranan day magmaong a pasen ed silong na pananguley na Mesianikon Panarian na Dios. Makaseguro itayon tumangan ira na Dios na magnayon a bilay diad satan a magmaong a pasen—say mangaraldalin a Paraiso ed silong na uley na Panarian.—Hebreos 11:39, 40.
19 Imbalikas nen propetan Miqueas so determinasyon na totoo nen Jehova a mandayew ed Dios a magnayon. Insulat to: “Amin a baley manakar ira balang sakey ed ngaran na dios to; et manakar itayo naani dia ed ngaran nen Jehova a Dios tayo ed ando lan ando lawas.” (Miqueas 4:5) Si Miqueas so matoor a nanlingkor ed si Jehova anggad impatey to. Diad iyoli to’d balon mundo, andi-duaruwan itultuloy na satan a propeta so panakar a kaibay Dios ed andi-anggaan. Agaylan abig ya alimbawa parad sikatayon amin a manbibilay lan asingsingger ed panganggaan!
20. Anto so nepeg komon a determinasyon tayo?
20 Aapresiaen nen Jehova so aron ipapanengneng tayo’d ngaran to. (Hebreos 6:10) Amta ton mairap tayon mantinien so integridad tayo’d sikato diad sayan mundo a dodominaen na Diablo. Balet, lapud “say mundo mangangga, sabalet so mangunor ed linawa na Dios so onsiansia lawas.” (1 Juan 2:17; 5:19) Sirin, diad tulong nen Jehova, komon ta determinado tayon sungdoan iray pakasalsalian ya aarapen tayo ed agew-agew. Komon ta akasentro so panag-isip tan kabibilay tayo ed saray makapakelaw a bendision ya insipan na maaron mangatatawen ya Ama tayo. Magmaliw a kien tayo iratan no mantultuloy itayon manakar a kaibay Dios a sankanonot so andi-anggaan.—Judas 20, 21.
Panon Yon Ebatan?
◻ Anto so gagala na Dios ed matulok a totoo?
◻ Akin ya agni kinmiwas si Jehova pian panganggaen toy agmaridios a mundo?
◻ Akin a say agpakaamtan eksakto no kapigay ikiwas na Dios so nepeg ya agmamakesay ed seseg tayo?
◻ Anto so pigaran gungguna ed panakar a kaibay Dios a sankanonot so andi-anggaan?
[Litrato ed pahina 17]
Say panakar a kaibay Dios so mankaukolay maseseg a panaglingkor ed sikato a singa ginawa na inmuunan babangatan nen Kristo