Susumpalen Mo Kasi so Intiron Obligasyon Mo ed Dios?
“Say Dios ipatnag to so balang gawa ed kaukom, pati balang inyamot a bengatla, no sikato kasi maong, odino sikato kasi mauges.”—ECLESIASTES 12:14.
1. Antoray probisyon nen Jehova ed totoo to?
AANTABAYAN nen Jehova iramay mannonodnonot ed sikato bilang Baleg a Manamalsa ra. Itatarya ed sikara na apuyanan a Salita to so pikakabat a nakaukolan pian sikatoy sigpot dan napaliket. Igigiya ira na masanton espiritu na Dios diad panggagawa ray madibinon linawa tan diad ‘pambubungay ganaganan maabig a gawa.’ (Colosas 1:9, 10) Niarum ni, itatarya nen Jehova so espiritual a tagano tan teokratikon direksion diad panamegley na “matoor tan makabat ya aripen.” (Mateo 24:45-47) Diad nanduruman dalan, sirin, nabebendisionan so totoo na Dios legan dan lilingkoran si Jehova tan susumpalen so makanan kimey na panangipulong na maong a balita na Panarian.—Marcos 13:10.
2. Nipaakar ed panaglingkor ed si Jehova, antoran tepet so nayarin onlesa?
2 Maliket iray tuan Kristiano ed pagmaliw ya okupado ed sagradon serbisyo ed si Jehova. Balet, nayarin nadismaya so arum tan isipen dan anggapo lay kakanaan na pansasagpot da. Singa bilang, nayarin uumamengen no maminsan na saray dedikadon Kristiano no talagan makagungguna iray pampepeleng da. Sano manmomolimoli nipaakar ed panagaral na pamilya tan arum nin kimey, onia iray tepet a nayarin onlesa ed kanonotan na uloy pamilya: ‘Talaga kasin napapaliket si Jehova ed gagawaen mi? Susumpalen mi kasi so intiron obligasyon mi ed Dios?’ Makatulong iray makabat a salita na managpulong pian naebatan irayan tepet.
Kaapaan la Kasi so Amin a Bengatla?
3. Mitunosan ed Eclesiastes 12:8, anto so pirmin kaapaan a mismo?
3 Nayarin iisipen na arum a saray salita na makabat a too et aliwan tanton makapaseseg ed siopaman—kalangweran tan matakken la. “Kaapaan na saray kaapaan, kuan na managpulong; amin sikato so kaapaan.” (Eclesiastes 12:8) Diad tua, pirmin kaapaan a mismo no ibaliwala so Baleg a Manamalsa leleg na inkatobonbalo, ya ontakken lan ag-akapanserbi ed sikato, tan say rarapaten lambengat et say pakasabi ed inkatakken. Parad satan a too, amin la et kaapaan, odino anggapoy kakanaan, anggano sikatoy inatey a walaan na kayamanan tan inkabantog ed sayan mundo a mandukdukol ed pakayari na marelmeng a sakey, si Satanas a Diablo.—1 Juan 5:19.
4. Akin a nibaga ya aliwan kaapaan so amin a bengatla?
4 Aliwan kaapaan so amin a bengatla parad saramay mantitipon na kayamanan ed tawen bilang matoor iran lingkor nen Jehova. (Mateo 6:19, 20) Amayamay so gagawaen da diad makatumang a kimey na Katawan, tan seguradon aliwan kaapaan so ontan iran pansasagpot. (1 Corinto 15:58) Balet no dedikado itayon Kristiano, kasin mansiasiansia itayon okupado ed impabtang na Dios a kimey diad sarayan kaunoran ya agew? (2 Timoteo 3:1) Odino nigagalet itayo ed estilo na kabibilay ya agtanto midumaan ed kapara tayon totoo ed mundo? Nayarin kabiangan ira ed nanduruman relihyon tan debosyonado iran maong, a regular ya onaatendi ed saray pasen na pandadayewan da tan pambabanikelan dan sumpalen so kakaukolanen ed sikara na relihyon da. Siempre, aliwa iran manangiyabawag na mensahe na Panarian. Andian iray suston pikakabat a natan la so “panaon na anggaan” tan anggapoy inkaganatan ed biang da nipaakar ed saray agew a pambibilayan tayo.—Daniel 12:4, NW.
5. No say manunan pampapagaan tayo la et say inagew-agew a gegemtan ed bilay, antoy nepeg tayon gawaen?
5 Oniay inkuan nen Jesu-Kristo nipaakar ed mapeligron panaon tayo: “Unong ed saray agew nen Noe, ontan naani so isabi na Anak na too. Ta singa diad saraman ya agew ed arapen na delap nankakakan ira tan naninum ira, angaasawa ra tan akiaasawa ra anggad agew ya inloob nen Noe ed biong. Tan agda akabkabatan angga ed sinmabi’ delap, et inyanor to ra ya amin; ontan naani so isabi Anak na too.” (Mateo 24:37-39) No kabkaabigan et aliwa pan makapuy so panangan tan panag-inum, tan say panangasawa so uksoyan ya inletneg na Dios mismo. (Genesis 2:20-24) Ingen, no namoria tayon say manunan pampapagaan tayo la et say inagew-agew a gegemtan ed bilay, akin ya ag-iya itekep ed pikakasi? Si Jehova so makatulong ed sikatayo pian niyuna so intereses na Panarian, makapanggaway maptek, tan makapangisumpal ed obligasyon tayo ed sikato.—Mateo 6:33; Roma 12:12; 2 Corinto 13:7.
Dedikasyon tan say Obligasyon Tayo ed Dios
6. Diad anton importantin dalan ya onsasaew so pigaran bautismado a manumpal ed obligasyon da ed Dios?
6 Nakaukolan a manpikasin masimoon so arum a bautismadon Kristiano lapud ta agla ra manbibilay unong ed saray obligasyon da ed ministeryo ya inako ra sanen indededika ray inkasikara ed Dios. Kada taon et masulok a 300,000 so nababautismoan diad loob na pigara lan taon natan, balet aliwan ontan so ibubulaslas na intiramintin bilang na aktibon Tastasi nen Jehova. Say arum a nagmaliw lan manangipalapag na Panarian so tinmunda lan mangipupulong na maong a balita. Balet, nepeg a nawalaan na makabaliksan a pibibiang ed Kristianon ministeryo iray indibidual sakbay iran nabautismoan. Kanian sikaray sikakabat ed ingganggan nen Jesus ed amin a patumbok to: “Onla kayo . . . tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo: tan nia, walaak a naynay ed sikayo, ya angga ed kasampotan na mundo.” (Mateo 28:19, 20) Nilikud labat no walay nikadkaduman tuloy iran limitasyon da lapud bunigas odino arum nin sengegan ya anggapoy nagawaan da, saray bautismado ya agla manlilingkor bilang aktibon Tastasi na Dios tan ed si Kristo so agla manbibilay unong ed intiron obligasyon da ed arap na Baleg a Manamalsa tayo.—Isaias 43:10-12.
7. Akin a nepeg tayoy mantitipon a regular parad panagdayew?
7 Say kadaanan ya Israel et sakey a nasyon a dedikado ed Dios, tan diad silong na Ganggan a sipanan et walaan na obligasyon so totoo to ed arap nen Jehova. Singa bilang, kaukolan a mandaragup so amin a lalaki parad taloran tinaon a piesta, tan say toon sigagagalan agmanngilin ed Paskua so “nisian” diad patey. (Numeros 9:13; Levitico 23:1-43; Deuteronomio 16:16) Pian nasumpal day obligasyon da ed Dios bilang dedikadon totoo to, nepeg a mandaragup iray Israelita diad panagdayew. (Deuteronomio 31:10-13) Anggapo so nibaga ed Ganggan a, ‘Gawa yo iya no kombinienti ed sikayo.’ Parad saramay dedikado la natan ed si Jehova, maseguron mangidanet iyan ganggan ed saray salita nen Pablo a: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasingger so agew.” (Hebreos 10:24, 25) On, say regular a pitipon ed saray kapananisiaan so kabiangay obligasyon na dedikadon Kristiano ed Dios.
Maalwar Mon Simbangen Iray Desisyon Mo!
8. Akin a nepeg lan masimoon a nonoten na sakey a dedikadon kalangweran so sagradon serbisyo to?
8 Nayarin sakey kan kalangweran a dedikado ed si Jehova. Nagamoran moy mayaman iran bendision no iyunam ed bilay mo so intereses na Panarian. (Uliran 10:22) Diad panamegley na pikakasi tan maalwar a panagplano, nausar mo iray taon na kaugawan mo diad sakey a nengneng na sigpot-panaon a serbisyo—sakey a maabig a dalan pian napatnagan a nonodnonoten mo so Baleg a Manamalsam. Ta no andi, nayarin samsamen la na materyal iran interes so karaklan ed panaon tan atension mo. Singa met say lapag a katooan, nayarin masakbay kan mangasawa anggad makaotang ka la pian nawalaay materyal iran bengatla. Say magastos a karera so nayarin mangala na dakel a panaon tan biskeg mo. No walaan kay ananak, nakaukolan mon sakbaten iray responsabilidad ed pamilya diad loob na dakel a dekada. (1 Timoteo 5:8) Nayarin agmo nalingwanan so Baleg a Manamalsam, balet ta makabat no moriaen mon diad masakbay lan pakapanplanom, odino diad agmo pakapanplano et nileletneg mo lay arapen na bilay mo bilang wala la’d edad. Sano matakken ka la, nayarin nodnonoten mo so linmabas la tan kaliktan mo a nagkalalo ni komon so inusar mo ed kaugawan mo ed sagradon serbisyo ed Baleg a Manamalsa tayo. Akin ya agmo la natan nonoten a masimoon iray iilaloan mo, ta pian napenek ka ed sagradon serbisyom ed si Jehova diad saray taon na inkaugaw mo?
9. Anto so nayarin magmaliw a posibli ed sakey a minmasiken la tan datin anakbat na ambelat iran responsabilidad ed loob na kongregasyon?
9 Nonoten pa so sakey nin klase na sirkumstansia—nipaakar ed sakey a too a datin nanserbi bilang pastol ed “pulok na Dios.” (1 Pedro 5:2, 3) Lapud pigaran rason, boluntaryo ton inikbanan iratan a pribilihyo. Tua, sikatoy minmasiken la natan, tan nayarin mas mairap ed biang to so pankimey ed serbisyo ed Dios a singa say dati. Balet nayari ni kasin dampoten to lamet iray teokratikon pribilihyo? Agaylaran bendision so nayarin itarok na satan a too no nasarag ton sakbaten so kaaruman a responsabilidad ed kongregasyon! Tan lapud anggapo so toon manbibilay a bukor to, manliket iray kakaaro tan inad-aro’d bilay no napadaak to so serbisyo to, diad kigloriaan na Dios. (Roma 14:7, 8) Sankaimportantian ed amin, aglingwanan nen Jehova so gagawaen na sakey diad serbisyo ed sikato. (Hebreos 6:10-12) Kanian, anto so makatulong ed sikatayo pian nodnonoten so Baleg a Manamalsa tayo?
Saray Katulongan Diad Pannodnonot ed Baleg a Manamalsa Tayo
10. Akin a walad sankaabigan a posisyon so managpulong pian mangitarya na saray panontonan nipaakar ed pannodnonot ed Baleg a Manamalsa tayo?
10 Say managpulong so walad sankaabigan a posisyon pian mangitarya na saray panontonan nipaakar ed pannodnonot tayo ed Baleg a Manamalsa tayo. Inebatan nen Jehova iray masimoon a pikakasi to diad impakagamor toy ekstraordinaryon kakabatan. (1 Arari 3:6-12) Sinurin maong nen Solomon so amin a nalalanor ed kurakurang na too. Niarum ni, sikatoy pinuyanan na Dios pian isulat iray nalmoan to diad kagunggunaan na arum. Insulat to: “Et arum ni, lapu ed say managpulong sikato nensaman so makabat, imbangat to a siansia so pikakabat ed baley; on, sikato tinalineng to, tan inusisa to, tan inuksoy to so dakerakel ya uliran. Say managpulong inusisa to ya inanap so saray makapaliket a salsalita, tan say nisulat nensaman a maptek, salanti salsalita a matua.”—Eclesiastes 12:9, 10.
11. Akin a nepeg tayon awaten so makabat a simbawa nen Solomon?
11 Oniay nabasa ed patalos na Griegon Septuagint ed sarayan salita: “Tan niarum ni, lapud makabat so managpulong, lapud imbangat to’d katooan so kakabatan; ta pian narengel so alay abig manlapud saray parabolo, maseet a nansukimat so managpulong pian naromog to iray makaroyroyon salita tan sakey a nisulat a walaan na inkatunong—saray salita na katuaan.” (The Septuagint Bible, ya impatalos nen Charles Thomson) Nambanikelan nen Solomon a sabien so kapusoan na saray managbasa to diad panamegley na balibali iran salita tan saray talagan makapainteres tan makagunggunan tema. Lapud saray salita ton naromog ed Kasulatan et resulta na impamuyan na masanton espiritu, mabulos tayon naawat iray asukimat to tan makabat a simbawa to.—2 Timoteo 3:16, 17.
12. Diad dilin panangibagam, panon mon ibalikas so imbaga nen Solomon a nikurit ed Eclesiastes 12:11, 12?
12 Anggaman anggapo niray modernon metodo ed panag-imprinta, dakerakel lay libro ed panaon nen Solomon. Panoy panmoria ed saratan a literatura nensaman? Inkuanto: “Saray salita na makakabat et singa saray panagtengteng ed baka, tan singa saray pasak a nipasak iramay mangaagamil ed saray panagtipon na saray estansa; saraya so niiter manlapud sakey a pastol. Nipaakar ed antokaman nilikud ed saraya, ana’ko, imanoen mo so pasakbay: Say panaggawa na dakerakel a libro et anggapo so anggaan to, tan say pirmin panangitalaga ed saratan et makapabanal ed laman.”—Eclesiastes 12:11, 12, NW.
13. Panon a napaneknekan a singa saray panagtengteng ed baka iray salita na saramay walaan na maridios a kakabatan, tan sioparamay singara “pasak a nipasak”?
13 Saray salita na saramay walaan na maridios a kakabatan et singa saray panagtengteng ed baka. Panon ya ontan? Dagdagen na saratan iray managbasa odino dumerengel pian manpaaligwas a mitunosan ed saray abasa odino nadngel iran makabat a salita. Niarum ni, saramay okupado ed “saray panagtipon na saray estansa,” odino saray talagan makabat tan makagunggunan diparan, et singara “pasak a nipasak,” odino malet a nipirmi. Nayarin ontan lapud saray maabig a salita na saratan a totoo so mangiwawandag na kakabatan nen Jehova tan onkana sirin a mamabiskeg tan ontulong ed saray managbasa odino dumerengel. No sakey kan ateng a matakot ed Dios, agmo ta panseetan ya ipurek so ontan a kakabatan ed nonot tan puso na anak mo?—Deuteronomio 6:4-9.
14. (a) Antoran klase na libro so agmakagunggunan ikdan na “pirmin panangitalaga”? (b) Anton babasaen so nepeg tayon imanoen a manuna, tan akin?
14 Balet, akin ya imbaga nen Solomon no antoy ginawa to nipaakar ed saray libro? Bueno, no ikompara ed Salita nen Jehova, lugan lambengat na dakerakel a tomo na libro ed sayan mundo so panagkatunongan na too. Maslak ed sayan panag-isip et mangiwawandag na kaisipan nen Satanas a Diablo. (2 Corinto 4:4) Kanian, daiset lambengat so manbayag a gungguna diad “pirmin panangitalaga” ed ontan iran sekular a babasaen. Diad tua, say karaklan ed saratan et makaderal ed espiritual a paraan. Singa si Solomon, dalepdepen tayo komon so walan ibabaga na Salitay Dios nipaakar ed bilay. Saya so mamabiskeg ed pananisia tayo tan mamaapit ed sikatayo ed si Jehova. Pakabanalan tayo so alabas a panimano ed arum nin libro odino panrereperensiaan. Nagkalalo la sano ginawa iratan a sulsulat unong ed minumundon panagkatunongan a misumlangan ed maridios a kakabatan, saratan so agmakagungguna tan makaderal ed pananisia ed Dios tan ed saray gagala to. Kanian, nodnonoten tayo sirin a say mas makagunggunan sulsulat ed panaon nen Solomon tan ed panaon tayo et saramay mangipapatnag na kakabatan na “sakey a pastol,” si Jehova a Dios. Intarya to so 66 a libro na Masanton Kasulatan, kanian nepeg tayon ikdan iraya na pirmin imano. Say Biblia tan saray makatulong a publikasyon na ‘matoor ya aripen’ so ontulong ed sikatayo pian nagamoran tayoy mismon “pikakabat ed Dios.”—Uliran 2:1-6.
Say Intiron Obligasyon Tayo ed Dios
15. (a) Panon mon ibalikas iray salita nen Solomon nipaakar ed “intiron obligasyon na too”? (b) Antoy nepeg tayon gawaen pian nasumpal tayo so obligasyon tayo ed Dios?
15 Diad panegek ed intiron impansukimat to, oniay inkuan na managpulong, si Solomon: “Saya sikato anggaan na kanonotan; amin, sikara so nadngel: Takotan mo so Dios, tan unoren mo so saray ganggan to; ta saya sikato so katiponan na kanepegan [“intiron obligasyon,” NW] na too. Ta say Dios ipatnag to so balang gawa ed kaukom, pati balang inyamot a bengatla, no sikato kasi maong, odino sikato kasi mauges.” (Eclesiastes 12:13, 14) Say mabunigas a takot odino mapagalang a panangitandoro ed Baleg a Manamalsa tayo so pakasalimbengan tayo, tan ontan met komon ed saray pamilya tayo, manlapud pangegemtan ed matulay a kurso na bilay a mangitarok na pirmin gonigon tan kaermenan ed sikatayo tan ed saray inad-aro tayo’d bilay. Say mabunigas a takot ed Dios et puro tan mismon gapoan na kakabatan tan pikakabat. (Salmo 19:9; Uliran 1:7) No walaan itayoy aralem a pakatalos a nibase’d apuyanan a Salitay Dios tan iyaplika tayoray simbawa na satan ed amin a bengatla, nasumpal tayo so “intiron obligasyon” tayo ed Dios. Andi, aliwa itan a nipaakar ed panangidatdatak na saray obligasyon. Imbes, say nakakaukolan et paiwanwan itayo ed Kasulatan sano sosolbaren iray problema ed bilay tan lawas gawaen iray bengatla unong ed paraan na Dios.
16. No nipaakar ed panangukom, antoy gawaen nen Jehova?
16 Nepeg tayon tandaan ya anggapo so niamot ed pakanengneng na Baleg a Manamalsa tayo. (Uliran 15:3) “Ipatnag to so balang gawa ed kaukom.” On, ukomen na Sankatageyan so amin a bengatla, pati saramay niyamot ed pakanengneng na too. Say pakaamta ed saratan a katuaan et mamakiwas ed sikatayo pian unoren iray ganggan na Dios. Balet say sankabiskegan a mamakiwas ed sikatayo et say aro ed mangatatawen ya Ama tayo, lapud ta oniay insulat nen apostol Juan: “Saya so aro na Dios, a sumpalen tayo so saray ganggan to: tan saray ganggan to aliwa ran ambelat.” (1 Juan 5:3) Tan lapud nigana iray ganggan na Dios pian makatulong ed magnayon a pankaabigan tayo, maseguron aliwa lambengat itan a manepeg noagta talagan makabat so pangunor ed saratan. Aliwan iyan pabelat parad saramay manangaro ed Baleg a Manamalsa. Labay dan sumpalen so obligasyon da ed sikato.
Sumpal Moy Intiron Obligasyon Mo
17. Antoy gawaen tayo no labay tayon talaga a sumpalen so intiron obligasyon tayo ed Dios?
17 No makabat itayo tan pilalek tayon talaga so panumpal ed intiron obligasyon tayo ed Dios, nilikud ni ed pangunor ed saray ganggan to, nawalaan itayoy mapagalang a takot a sikatoy agtayo paermenen. On, “say katatakot ed Jehova sikato so sengeg na kakabatan,” tan saramay manguunor ed saray ganggan to so walaan na “maong a pakatalos.” (Salmo 111:10; Uliran 1:7) Onkiwas itayo sirin a makabat tan unoren si Jehova ed amin a pamaakaran. Lalon importanti iya natan, lapud wadia la so Arin Jesu-Kristo, tan asingger lay agew na panangukom diad panamegley to bilang aturon Ukom na Dios.—Mateo 24:3; 25:31, 32.
18. Anto so pansumpalan tayo no sumpalen tayo so intiron obligasyon tayo ed si Jehova a Dios?
18 Balang sakey ed sikatayo so susurien la natan na Dios. Kasin manonot itayo ed espiritual, odino kasin aabuloyan tayon paleteyen na minumundo iran impluensia so relasyon tayo ed Dios? (1 Corinto 2:10-16; 1 Juan 2:15-17) Balanglan kalangweran odino matakken la, gawaen tayon amin so anggaay nayarian tayo pian napaliket tayo so Baleg a Manamalsa tayo. No unoren tayo si Jehova tan sumpalen tayoray ganggan to, ipulisay tayo iray andi-kakanaan a bengatla na sayan mangangga lan daan a mundo. Diad ontan et narapat tayo so ilalo ya andi-anggaan a bilay diad insipan na Dios a balon sistema na bengabengatla. (2 Pedro 3:13) Agaylan abig irayan iilaloan parad amin a manusumpal ed intiron obligasyon da ed Dios!
Panon Yon Ebatan?
◻ Akin a nibagam ya aliwan kaapaan so amin a bengatla?
◻ Akin a nepeg lan masimoon ya imanoen na sakey a malangwer nin Kristiano so sagradon serbisyo to?
◻ Antoran klase na libro so agmakagunggunan ikday “pirmin panangitalaga”?
◻ Anto so “intiron obligasyon na too”?
[Litrato ed pahina 20]
Aliwan kaapaan so amin a bengatla parad saramay manlilingkor ed si Jehova
[Litrato ed pahina 23]
Aliwan singa say dakerakel a libro ed sayan mundo, say Salitay Dios et makarepresko tan makagungguna