‘Nipaakar ed Amin a Bengatla Wala so Aturon Panaon’
“Nipaakar ed amin a bengatla wala so sakey ya [“aturon,” NW] panaon, tan sakey a panaon nipaakar ed balang pegdat ed leksab na tawen.”—ECLESIASTES 3:1.
1. Anton kairapan so walad saray ag-ayadyarin totoo natan, tan anto so resulta na saya ed pigaran kipapasen?
MABETBET ya ikuan na totoo, “Ginawak la komon itan a tampol.” Odino nayarin diad impakamoria ed walan agawa la, “Nanalagar ak ni komon.” Ipapatnag na saratan a reaksion so kairapan na ag-ayadyarin totoo a manetermina ed dugan panaon para ed pigaran bengatlan nepeg a gawaen. Lapud sayan limitasyon, abuybuyak iray relasyon. Nanresulta iya ed pakadismaya tan inkaderya. Tan say sankagrabian ed amin, satan so amakapuy ed pananisia na arum a totoo ed si Jehova tan say organisasyon to.
2, 3. (a) Akin a sakey a kurso na kakabatan so pangawat ed pananetermina nen Jehova ed saray aturon panaon? (b) Anton asimbang a panmoria so nepeg a niwala’d sikatayo no nipaakar ed kasumpalay propesiya ed Biblia?
2 Lapud walaan si Jehova na kakabatan tan aralem a pakatalos ya anggapo ed totoo, sarag ton amtaen lan unona, no labay to, so pansumpalan na amin a nagawa. Naamtaan to so “panganggaan a manlapu ed gapo.” (Isaias 46:10) Kanian, naspot ton napili so sankaabigan a panaon pian nagawaan so antokaman a bengatlan labay ton gawaen. Sirin, imbes a manmatalek itayo ed mismon nalilingon panangipanaon tayo, makabat itayo no awaten tayoy pananetermina nen Jehova ed saray aturon panaon!
3 Alimbawa, saray Kristianon matakken ed espiritual so matoor a manaalagar ed aturon panaon nen Jehova parad kasumpalan na pigaran propesiya ed Biblia. Nansiansia iran okupado ed panaglingkor da ed sikato, a lawas iran sinononot ed prinsipyo na Tagleey 3:26: “Maong a say too manilalo tan mareereen komon a manalagar ed panangilaban nen Jehova.” (Ikompara so Habacuc 3:16.) Ontan met, kombinsido iran say niyabawag lan pangipaakseb nen Jehova ed panangukom to, “anggan manabala, . . . [et] petepeteg ya onsabi, ya agmanbayag.”—Habacuc 2:3.
4. Panon a makatulong ed sikatayo so Amos 3:7 tan Mateo 24:45 pian maanos a manalagar ed si Jehova?
4 Diad biek a dapag, no agtayo natalosan a maong so pigaran teksto odino salaysay ed Biblia a nidatak ed saray palapagan na Watch Tower, makatunongan kasi so pagmaliw tayon agmakankaanos? Sakey a kurso na kakabatan so panalagar ed aturon panaon nen Jehova a mangipalinew ed saray pamaakaran. “Petepeteg anggapo naani gawaen nen Katawan a Jehova, ya agnaani nipuyan so inamot to ed saray aripen to a propeta.” (Amos 3:7) Agaylan abig a sipan! Balet nepeg tayon moriaen ya ipaparungtal nen Jehova so maamot iran pamaakaran to diad panaon a denetermina ton kabkaabigan. Lapud satan a gagala, inautorisaan na Dios so “matoor tan makabat ya aripen” a mangitarya “na [espiritual a] tagano ed panaon a kinepeg to” parad saray totoo to. (Mateo 24:45) Kanian, anggapo sirin so rason pian magmaliw itayon mapaga, odino nagonigon ni ingen, lapud ta agsigpot a nipaliwawa so pigaran pamaakaran. Imbes, makapanmatalek itayo a no maanos itayon manalagar ed si Jehova, itarya to diad panamegley na matoor ya aripen, so nakaukolan “ed panaon a kinepeg to.”
5. Anto so nagunggunaan ed pangikonsideray Eclesiastes 3:1-8?
5 Sinaglawi nen makabat ya Arin Solomon so nipaakar ed 28 a nanduruman bengatla, a balang sakey ed satan et walaay “aturon panaon.” (Eclesiastes 3:1-8, NW) Say pakatalos ed kabaliksan tan ipapabitar na imbaga nen Solomon so ontulong ed sikatayo pian nadetermina so dugan panaon tan aliwan dugan panaon parad pigaran nagawa, unong ed panmoria na Dios. (Hebreos 5:14) Bilang resulta, mangiyabuloy iya ed sikatayo pian nitunos so bilay tayo unong ed satan.
“Panaon a Pannangis, tan Panaon a Panelek”
6, 7. (a) Antoy ‘pannanangisan’ na napapagaan a totoo natan? (b) Panon a papakepaen na mundo iray seryoson kipapasen a kidudungetan to?
6 Anggaman wala so “panaon a pannangis, tan panaon a panelek,” siopay agmalabay ed sayay onkomadua nen samay inmuna? (Eclesiastes 3:4) Makapaermen, manbibilay itayo ed mundo a manunan pansesengegay pannanangis tayo. Manunaan iray makapagonigon a balita ed media. Natatalagnaw itayo sano makarengel itayo na saray kalangweran a pinapaltog daray kapara ran estudyante ed eskuelaan, atateng ya angabuso ed ananak da, saray teroristan amatey odino nambaldado ed saray inosentin biktima, tan say kaslakan a natural iran desyang a mameperdi ed bilay tan kaykayarian na totoo. Saray ugugaw a nabibigot tan araldalem lay kamataan da tan saray mankibatiktik a maniibakwit ed lugar da so nipapaimano ed sikatayo diad telebisyon. Saray terminon agni kabisado nensaman a singa say etnikon panaglinis, AIDS, ayuran uusaray makarisgo iran mikrobyo, tan say El Niño so mangogonigon natan ed saray isip tan kapusoan tayo—a balang sakey ed dilin paraan to.
7 Anggapoy duaruwa ed satan, say mundo natan so napno na pakaduknalan tan pakaot-otay puso. Anggaman kuan, pian singa agtanton nidanet so inkagrabe lay situasyon, apasakey lay ipaparungtal na industriya na entertainment ya anggapo met so kakanaan to, garambasal, a diad mabetbet et imoral tan marawal, a denesinyon mangibalang ed sikatayo pian agnalimen so sinagem a sasagmaken na arum. Balet agnepeg a nabaloan so puron liket ed awawey ya anggapoy papagaan lapud tinatapis a lureyan tan agmakabaliksan a paneelekan a papawalaen na saratan a panligliwaan. Say gayaga a bunga na espirituy Dios so bengatlan agnitarya na mundo nen Satanas.—Galacia 5:22, 23; Efeso 5:3, 4.
8. Nepeg kasin iyuna na saray Kristiano natan so pannangis odino paneelekan? Ipaliwawa.
8 Diad pamidbir ed makapasinagem a kipapasen na mundo, natalosan tayo ya aliwan panaon natan pian ikday importansia so paneelekan. Aliwa iyan panaon a pambilay labat parad panligliwaan tan panliliket odino abuloyan a magmaliw a manunaan so ‘pakawalaay panliliket’ nen say pangegemtan ed espiritual iran bengatla. (Ikompara so Eclesiastes 7:2-4.) Nakaukolan a “saray managamil ed mundo, agda komon aagamilen ya alabas,” so kuan nen apostol Pablo. Akin? Lapud “say ugali na sayan mundo nanaebas.” (1 Corinto 7:31) Diad kada agew et manbibilay iray tuan Kristiano a sigpot dan bibidbiren so inkaseryoso na saray panaon a pambibilayan tayo.—Filipos 4:8.
Anggaman Mannanangis, Peteg a Maliket!
9. Anto so niwalan makapaermen a kipapasen sakbay na Delubio, tan antoy kabaliksan na satan ed sikatayo natan?
9 Saray totoon nambilay ed panaon na ingglobon Delubio so andian na seryoson panmoria ed bilay. Nantultuloy ira ed inagew-agew a rotina ra tan agda pannanangisan so “kabaglan na too ed dalin [ya] abalbaleg,” ya iyaleng-aleng da itan legan a “say dalin napno nensaman na karawalan.” (Genesis 6:5, 11) Tinukoy nen Jesus itan a makapaermen a kipapasen, tan impasakbay to ya ontan so awawey ed limog na totoo ed panaon tayo. Oniay impasakbay to: “Singa diad saraman ya agew ed arapen na delap nankakakan ira tan naninum ira, angaasawa ra tan akiaasawa ra anggad agew ya inloob nen Noe ed biong. Tan agda akabkabatan angga ed sinmabi’ delap, et inyanor to ra ya amin; ontan naani so isabi Anak na too.”—Mateo 24:38, 39.
10. Panon ya impatnag na saray Israelitan nambilay ed panaon nen Aggeo a kinmulang iray panamabli ed aturon panaon nen Jehova?
10 Onliligada’d 1,850 taon kayari na Delap, diad panaon nen Aggeo, dakel ya Israelita so angipatnag na mipadparan kakulangay seryoson panagpaga ed espiritual iran pamaakaran. Lapud okupado ira ed personal a pankaabigan da, agda atebek a say panaon da et panaoy pangiyuna ed intereses nen Jehova. Nabasa tayo: “Saya a baley kuan to, Aliwa nin panaon ya onla itayo, say panaon nipaakar ed abung nen Jehova pian nipaalagey. Saman la sinmabi so salita nen Jehova ed panamegley nen Aggeo a propeta, a kuan to, Sikato ta so panaon a nipaakar ed sikayo lanlamang pian manayam kayo ed saray agobedaan ya abung yo ra, leleg a saya ya abung sikato so mankibalatar? Kanian onia so kuan nen Jehova na saray ehersito: Isipen yo [“iyapasakey yo ed puso yo,” NW] so saray dalan yo.”—Aggeo 1:1-5.
11. Antoran tepet so nayarin matukoy ya itepet tayo’d inkasikatayo?
11 Bilang Tastasi nen Jehova natan, a walaan na saray responsabilidad tan pribilihyo ed arap nen Jehova a singa saramay Israelita ed panaon nen Aggeo, pankaabigan tayo no iyapasakey tayoy kapusoan tayo ed daladalan tayo, a seryoson nonoten so paraan na kabibilay tayo. Kasin ‘pannanangisan’ tayo iray kipapasen ed mundo tan say kabandayan ya itatarok na saraya ed ngaran na Dios? Kasin nasasakitan itayo no ibuburi na totoo so kiwawala na Dios odino butarbutar dan ibabaliwala iray matunong a prinsipyo to? Onkikiwas tayo kasi a singa saramay amarkaan a totoo ya anengneng nen Ezequiel ed pasingawey 2,500 taon lay apalabas? Nipaakar ed sikara et oniay nabasa tayo: “Si Jehova inkuan to ed [samay laki a walaan na tintero na sekretaryo], Onlabas ka ed pegley na syudad, ed kapegleyan na Jerusalem, tan inan mo na tanda so moling na saray lalaki a mansibek tan manakis lapu ed amin a kadimlaan a nagagawa ed kapegleyan to.”— Ezequiel 9:4.
12. Antoy kabaliksan na Ezequiel 9:5, 6 ed saray totoo natan?
12 Onlinew so kabaliksan na sayan salaysay ed sikatayo natan no basaen tayo iray ingganggan ed anemiran lalaki a walaan na saray ayuran panagmanso: “Onlabas kayo ed syudad ed beneg to, tan kabilen yo: agkomon isakit na mata yo, tan agkayo mangasi; pateyen yo a sigpot iray mamasiken, babalolaki tan mamarikit, ugugaw tan bibii; balet agyo singgeran so anggan siopa a too a wala so tanda to; et onggapo kayo ed santuaryok.” (Ezequiel 9:5, 6) Say pakaliktar tayo ed manasingger lan maong a baleg a kairapan so mandependi ed pamidbir tayo a natan lay manunan panaon a pannangis.
13, 14. (a) Anton klase na totoo so inyabawag nen Jesus a maliket? (b) Ipaliwawa pa no akin ya isipen mon matukotukoy iyan deskripsion ed Tastasi nen Jehova.
13 Siempre, say punton ‘pannangisan’ na saray lingkor nen Jehova a makapadismayan kipapasen na saray nagagawa ed mundo et agmangamper ed pagmamaliw dan maliket. Midumaan a tuloy! Diad tua et sikara so sankaliketan a grupo na totoo diad dalin. Intarya nen Jesus so padron na liket sanen inkuanto: “Mapalar iray duruka ed espiritu [“sinononot ed espiritual a pankaukolan da,” NW]; . . . iray mannangis; . . . iray mauyamo: . . . iray narasan tan napgaan unong ed katunongan; . . . iray mapangasi; . . . maralus ed puso; . . . iray managpadeen: . . . iray apasegsegang la nisengeg ed katunongan.” (Mateo 5:3-10) Ipapanengneng na daakan ya ebidensia ya ontukoy iyan deskripsion ed saray Tastasi nen Jehova bilang grupo, a magmaong nen say antokaman nin arum a relihyoson organisasyon.
14 Nagkalalo la, manlapula’d nipawil lamet so tuan panagdayew nen 1919, saray maliket a totoo nen Jehova so walaay rason pian ‘manelek.’ Diad espiritual a paraan, naeksperiensia ra met so makapasayaksak a naeksperiensia na saramay pinmawil manlapud Babilonia nen komanem a siglo K.K.P.: “Sanen impulang nen Jehova ed Sion so saray ompapawil, singa kami saraman so mankugip. Dia ed satan say sangi mi napno na pakakalek, tan say dila mi napno na pankankanta: . . . Si Jehova nanggawa na angkakabaleg a pamaakaran ya onkana ed sikatayo; a lapu ed saraya manliket itayo.” (Salmo 126:1-3) Siansia, anggaman diad espiritual a paraan et maneelek ira, sikakabat a nononoten na saray Tastasi nen Jehova so inkaseryoso na panaon. No nagmaliw lan peteg so balon mundo tan ‘abembenan lan malet [na saray manaayam ed dalin] so bilay, a sikato so bilay a peteg,’ sirin panaon la’d satan pian andi-anggaan lan nasalatan na paneelekan so pannanangis.—1 Timoteo 6:19; Apocalipsis 21:3, 4.
‘Panaon a Panlakap, tan Panaon ya Agpanlakap’
15. Akin a mapili iray Kristiano no sioparay kaaroen da?
15 Saray Kristiano so mapili no siopay kaaroen da. Sinononot ira ed pasakbay nen Pablo: “Agkayo patitilaan: saray mauges a kaulop deralen da so saray maong ya ugugali.” (1 Corinto 15:33) Tan impaimano nen makabat ya Arin Solomon: “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.”—Uliran 13:20.
16, 17. Panon so panmoria na Tastasi nen Jehova ed pikakaaro, pidi-date, tan panangasawa, tan akin?
16 Pipilien na saray lingkor nen Jehova bilang kakaaro iramay mangaaro met ed si Jehova tan ed inkatunong to. Anggaman aapresiaen tan panggagayagaan day piuulop ed kakaaro ra, makabat dan papaliisay maluklukak a panmoria ed pidi-date a kasmak ed pigaran bansa natan. Imbes a nigalet ed satan a singa labat panliketan ya anggapoy pankaugsan, momoriaen da so pidi-date bilang seryoson kundang ed panangasawa a nepeg lambengat a gawaen sano akaparaan lay sakey ed pisikal, mental, tan espiritual a paraan—tan bulos met unong ed Kasulatan—a miasawa.—1 Corinto 7:36.
17 Nayarin ipasen na arum a karaanan la itan a panmoria no nipaakar ed pidi-date tan panangasawa. Balet agpapaimpluensiaan iray Tastasi nen Jehova ed saray kalimog da nipaakar ed pampili na kakaaro odino ed pandesisyon dan mi-date tan miasawa. Amta ran “say kakabatan napatnagan la ed saray gawa to.” (Mateo 11:19) Lawas kabat nen Jehova so sankaabigan, kanian seseryosoen da so simbawa to a mangasawa “dia ed linawa na Katawan lambengat.” (1 Corinto 7:39; 2 Corinto 6:14) Ag-ira maganat a miasawa a walaay lingon panisip a sarag toy midiborsio odino misian no aliwan matalona so panamaley. Ipapanaon day pananap na manepeg a naasawa, a momoriaen dan diad bektan sinambaan da lay nipaakar ed panangasawa, onaplika so ganggan nen Jehova: “Kanian aliwa la ran duara, noag saksakey a laman. Say impantipon na Dios sirin, aleg a sianen na too.”—Mateo 19:6; Marcos 10:9.
18. Anto so onkanan pangigapoan na maliket a panangasawa?
18 Say panangasawa et legay-bilay ya impipaknaan a makanepegay maalwar a panagplano. Makatunongan ya itepet na sakey a too ed inkasikato, ‘Kasin sikaton talaga so manepeg a parad siak?’ Balet say importanti met a kaukolan ton itepet et, ‘Manepeg ak kasi ed sikato? Kasin sakey ak a Kristianon matakken ed espiritual a sarag kon asikasoen so espiritual iran pankaukolan to?’ Say duaran prospektibon manasawa so walaay obligasyon ed arap nen Jehova a magmaliw a mabiskeg ed espiritual, a makayarin manibukel ed putel ya inkasiknol na panamaley a makanepegay panangabobon na Dios. Napaneknekan na nilibon Kristianon sanasawa a lapu ed kaimportantian na panangiter nen say pangawat, say sigpot-panaon a ministeryo so sakey ya ekselentin pangigapoan na maliket a panangasawa.
19. Akin a mansiasiansian walad kasuloan so arum a Kristiano?
19 Arum a Kristiano so ‘aglinmakap’ diad impansiansia ran walad kasuloan nisesengeg ed maong a balita. (Eclesiastes 3:5, NW) Agni angasawa so arum angga ed nalikas da lan kualipikado lara’d espiritual pian onkaraw ed manepeg a kapareha. Balet komon ta nonoten tayo met iramay walad kasuloan a Kristiano a manpipirawat na maapit a relasyon insan nagunggunaan lapud panamaley ingen ta agni ra akaromog na kapareha. Makaseguro itayon napaliket si Jehova ed agda pangikompromiso ed madibino iran prinsipyo diad pangegemtan dan miasawa. Maabig met no apresiaen tayo so panmamatoor da tan matukoy a pasesegen ira unong ed kanepegan da.
20. Akin ya anggan saray sanasawa et tunggal paminsan ya ‘agmanlakapan’?
20 Kaukolan kasin anggan saray sanasawa et tunggal paminsan ya ‘agmanlakapan’? Ompatnag ya ontan ed pigaran aspekto, a singa impaimano nen Pablo: “Kuan ko ya, agagi, ta say panaon apatikeyan la, ta pian manlapu ed natan, saray lalaki a walaan na asawa, magmaliw ira a singa anggapo so asawa ra.” (1 Corinto 7:29) Unong ed satan, kaukolan no maminsan ya iyuna iray teokratikon responsabilidad imbes ed saray napanggayagaan tan bendision ed panamaley. Say asimbang a panmoria ed sayan pamaakaran so agmamaletey ed panamaley noagta mamabiskeg ed satan lapud onkanan panonot ed sankapareha a si Jehova so nepeg a lawas manunaan a persona a mamapaelet ed relasyon da.—Eclesiastes 4:12.
21. Akin ya agtayo nepeg a husgaan so sanasawa nipaakar ed panag-ilalak?
21 Niarum ni, agni nanilalak iray arum a sanasawa ta pian mas bulos iran mantultuloy ed panaglingkor da ed Dios. Mankabaliksan iya na sakripisyo ed biang da, tan tumangan ira nen Jehova unong ed satan. Dugaruga, anggaman impaseseg na Biblia so pagmaliw a walad kasuloan makasengeg ed maong a balita, agto direktan kinomentoan so pansiansian agmanilalak makasengeg met lanlamang ed satan. (Mateo 19:10-12; 1 Corinto 7:38; ikompara so Mateo 24:19 tan Lucas 23:28-30.) Kanian, nepeg a mandesisyon a mismo iray sanaasawa unong ed personal a sirkumstansia tan dilin konsiensia ra. Antokaman so nayarin desisyon da, agnepeg a kritikoen iray sanasawa.
22. Anto so importantin determinaen tayo?
22 On, ‘amin a bengatla wala so aturon panaon, tan sakey a panaon nipaakar ed balang pegdat ed leksab na tawen.’ Wala ni ingen so “panaon nipaakar ed bakal, tan panaon nipaakar ed deen.” (Eclesiastes 3:1, 8) Ipaliwawa na onggendan ya artikulo no akin ya importanti ed sikatayo so panetermina no dinan ed satan a dua so panaon to la natan.
Kasin Nipaliwawam?
◻ Akin a makanan naamtaan tayo a diad ‘amin a bengatla et wala so aturon panaon’?
◻ Akin a natan so manunan “panaon a pannangis”?
◻ Akin a saray Kristiano, anggaman ‘mannanangis’ et petepeteg a maliket?
◻ Panon ya ipapatnag natan na arum a Kristiano a momoriaen day kaplesan a panaon bilang ‘panaon ya ag-onlakap’?
[Saray litrato ed pahina 6, 7]
Anggaman ‘mannangis’ iray Kristiano lapu ed saray kipapasen na mundo . . .
. . . diad tua et sikara so sankaliketan a totoo ed mundo
[Litrato ed pahina 8]
Say sigpot-panaon a ministeryo so ekselentin napangiletnegan ed maliket a panamaley