Saray Kaunoran ya Agew—Sakey a Panaon na Panagani
“Tan anengneng ko, tan, nia! sakey ya amputin lurem, tan diad tapew na lurem et sakey so akayurong a singa anak na too, a walaan na binmalitok a balanget ed ulo to tan sakey a makdem a kompay ed lima to.”—Apocalipsis 14:14.
1. Anto so arum ed saray bengatlan nanggawa ed sayan siglo a nikadkaduma?
AGAYLAN magulon panaon iyan koma-20 siglo! Kinaukolan a sungdoan na katooan so duaran maruksan guerra mundial. Saray nagkasikasikmat a bansa so kinusbo na rebolusyon. Say eras so angitarok na lalon kairapan nen say nensaman ed awaran na too. Say panduaruwa ed ekonomya, krimen, polusyon, tan makapakigtot iran sakit so mangiiter na kapagaan ed aligwas na siopaman. Ontan met, say too so akapanggawa ed saray angkakabaleg iran intalona na sientipiko. Agawaan to so impangusar ed biskeg na atom tan akapanakar ni ed tapew na bulan. Tua, say kapolian tayo so nikadkaduma ed dakel iran dalan. Anggaman kuan, sakey a bengatla so ontalindeg a bilang say sankaimportantian a nagawa ed panaon tayo, tan likud ed satan et amin nin arum a bengatla so onkupas ed inkaandi–kakanaan.
2. Anton ebento ya impropesiya nen Daniel so nigeter lan nagawa ed panaon tayo?
2 Sayan tuan managgaway-awaran ya ebento so impasakbay nen komanem a siglo K.K.P. nen propeta Daniel. Talinengen iyan madibinon apuyanan a report: “Intultuloy ko so ninmengneng ed saray pasingawey ed labi, tan, nia! diad saray lurem na katawenan et sakey a singa anak na too so onsasabi; tan sikato so sinmabi ed Kadaanan na saray Agew, tan sikato so inyasingger da ed satan a Sakey. Tan diad sikato et niiter so pananguley tan karlangan tan panarian, pian saray totoo, nasnasyon tan pansasalita so manlingkor ya amin ed sikato.”—Daniel 7:13, 14.
3. (a) Siopa “so Kadaanan na saray Agew,” tan anto so inter to ed “sakey a singa anak na too”? (b) Siopa so sayan sakey a “singa anak na too,” tan panon so inkiwas na saray Judion relihyoson papangulo sanen sayan pakabidbiran so ginawa nen Jesus?
3 “Say Kadaanan na saray Agew” et si Jehova a Dios. Sikato so anengneng nen Daniel ed “saray lurem na katawenan,” salanti, diad ag-nanengneng ya espiritun ayaman, a mangiiter na inkaari ed “sakey a singa anak na too.” Siopa itan a “sakey”? Si Jesus so angebat ed satan a tepet nen 33 K.P. sanen sikato so nabibista ed arap na Sanhedrin. Sikato so impansamba na Judion atagey a saserdote a mangibaga no kasin sikato so Kristo odino andi. Diad ebat, sitetepel ya inyaplika nen Jesus so propesiya nen Daniel ed inkasikato, a kuanto: “Manlapud natan et nanengneng yo so Anak na too a manyudyurong ed nikawanan a lima na pakayari tan onsasabi ed saray lurem na tawen.” Imbes ya ondakmomo ed pinilin Ari nen Jehova, say atagey a saserdote so amakasalanan ed sikato na panag-ayew. Saginonor, saray Judion relihyoson papangulo so anesdes ed si Pontio Pilato a mangondena ed si Jesus diad patey.—Mateo 26:63-65; 27:1, 2, 11-26.
4. Kapigan so impangawat nen Jesus ed balanget na inkaari, tan anggaman ed anton isusumpa?
4 Sayan getman pangamper ed saray salita nen Jesus so sinmaew sanen sikato so apaoli a manlapud saray inaatey tan sinmegep ed tawen a manalagar ed inggeter nen Jehova a panaon diad pangiter ed sikato na Panarian. (Gawa 2:24, 33, 34; Salmo 110:1, 2) Satan a panaon so sinmabi nen 1914. Unong ed amin ya ebidensya, diad saginonor a kabiangan na saman a taon, inawat nen Jesus so balanget na inkaari a nanlapud “say Kadaanan na saray Agew” tan ginmapon manuley. (Mateo 24:3-42) Say kapkapangyanak a Panarian so nidunget ed ampait ya isusumpa. Balet saray Judion relihyoson papangulo nen inmunan siglo, amin ya asamel a pakayari na nasyones, tan anggan si Satanas tan saray demonyos so agmakayarin mangamper ed linawa na Dios diad kasumpal to. (Salmo 2:2, 4-6; Apocalipsis 12:1-12) Nen 1914 et say mangatatawen a kuro so tinmanol a dugaruga ed eskedyul: “Say panarian na mundo so nagmaliw a panarian na Katawan tayo tan ed Kristo to, tan sikato so manuley a bilang ari ed ando lan ando.” (Apocalipsis 11:15) Nanlapulad saman a petsa, sikatayo la so manbibilay ed “saray kaunoran ya agew” na sayan marelmeng a sistema na bengabengatla.—2 Timoteo 3:1.
Sakey a Panaon na Panagani
5. (a) Unong ed propesiya nen Daniel, siopa so manlingkor ed balobalon abalangetan ya Ari? (b) Anton pasingawey so anengneng nen Juan ya anaglawi met ed si Jesus a bilang sakey a balobalon abalangetan ya Ari?
5 Unong ed propesiya nen Daniel, sanen inawat nen Jesus so balanget to “et saray totoo, nasnasyon tan pansasalita [so] manlingkor ya amin ed sikato.” Panon ya ontan no say katooan bilang intero so angipulisay ed sikato a bilang Ari? Say sakey a dramatikon pasingawey a niparungtal ed si apostol Juan so mangipanengneng ed ebat. Ibabaga ed sikatayo nen Juan so anengneng to: “Nia! sakey ya amputin lurem, tan diad tapew na lurem et sakey so akayurong a singa sakey ya anak na too, a walaan na binmalitok a balanget ed ulo to tan sakey a makdem a kompay ed lima to.” (Apocalipsis 14:14) Miulibay ed pasingawey nen Daniel, si Jesus so anengneng dia ed sakey a lurem tan sikato so abidbir a bilang “sakey . . . a singa anak na too.” Insulong to so balanget na inkaari, balet diad lima to et aliwan sakey a setro noagta sakey a kompay na managani. Akin?
6. Anton kimey so ingganggan nen Jehova ed balobalon abalangetan a Jesus a pibiangan?
6 Ituloy nen Juan: “Tan sananey ya anghel so pinmaway a nanlapud santuaryo na templo, a nankelyaw ed maksil a boses ed samay sakey ya akayurong ed lurem: ‘Egnaan mo so kompay mo tan manani, lapud say oras so sinmabi a panani, ta say panagani ed dalin so nagnap lan aluto.’” Si Jesus, anggaman sakey ya Ari, so siansian manguunor ed saray bilin a manlalapud si Jehova diad “santuaryo na templo.” Sirin sano sikato so gangganen nen Jehova a mibiang ed panaganin kimey legan na kaunoran iran agew, sikato so ontulok. Si Jesus so “angiyunat ed kompay to ed dalin, tan say dalin so naani.”—Apocalipsis 14:15, 16; Hebreos 9:24; 1 Corinto 11:3.
7. (a) Anto “so panagani na dalin”? (b) Anto so gapowan na sayan “panagani”?
7 Anto “so panagani ed dalin”? Sikato so totoon ompaway ed sayan satanicon sistema na bengabengatla a manlingkor ed si Jehova tan diad tinuro ton Ari. Say panagani so onggapo diad panagtipon ed saray nakekeraan na 144,000 a miuley ed si Jesus ed mangatatawen a panarian to. (Mateo 13:37-43) Saraya “so Israel na Dios,” say “ununan-bunga ed Dios tan ed Kordero.” Sikara so sinaliw a “nanlapud amin a tribu tan pansasalita tan totoo tan nasyon.” (Galacia 6:16; Apocalipsis 14:4; 5:9, 10) Diad onia, saray sinansakey a nanlapud amin a “totoo, nasnasyon tan pansasalita” so onggapon manlingkor ed nitronon Jesus.
8. (a) Diad anton taon so mapatnag ya insabi na panagtipon na saray unor a kabiangan na alanaan ed kasampotan to? (b) Panon, unong ed sananey a pasingawey nen Juan, so pantultuloy na panaganin kimey?
8 Anggaman kuan, agda bukbukor. Si Juan, diad sananey a pasingawey, so akanengneng ed inkatatakan na saray nakekeraan na 144,000. (Apocalipsis 7:1-8) Mapatnag, say panagtipon ed saraya so akumpleto nen ngalngalin 1935. Balet kabekta, inreport nen Juan, anengneng to so “sakey a baleg ya ulop, ya agnayarian na toon bilangen, a nanlapud amin a nasyones tan tribu tan totoo tan pansasalita, a manalalagey ed arap na trono tan ed arap na Kordero.” (Apocalipsis 7:9-17) Sirin say panaganin kimey so mantutultuloy legan a dakel ni a manlapud “saray totoo, nasnasyon tan pansasalita” so onggapon manlingkor ed si Jesus bilang Ari.
9. Siopa irayan balobalo, tan anton arum iran propesiya so manasalambit ed kipatnag da legan “na kaunoran a kabiangan na saray agew”?
9 Sarayan balobalo so onnenengneng ed arapen diad panggayaga ed bilay diad sakey a paraison dalin diad leksab na tinuro nen Jehova ya Ari. (Salmo 37:11, 29; 72:7-9) Say katipon da so nipasakbay ed pigaran arum a propesiya. Si Isaias, alimbawa, so angipasakbay a “diad kaunoran a kabiangan na saray agew” et saray nasyones so unagos ed abung nen Jehova. (Isaias 2:2, 3) Impropesiya nen Aggeo so kayegyeg na nasyones a kaleganan to et “saray kalikaliktan a bengabengatla ed amin a nasyones so onloob.” (Aggeo 2:7) Sinalita nen Zacarias so “samploran lalaki a nanlapud amin a pansasalita na nasyones” a miulop ed saray totoo na Dios. (Zacarias 8:23) Nagkalalo ni, si Jesus a mismo so angipropesiya na nipaakar ed sayan “baleg ya ulop.” Inkuanto: “Sano say Anak na too so onsabi ed gloria to, tan amin ya angheles so kaiba to, saman la et sikato so onyurong ed maglorian trono to. Tan amin a nasyones so natipon ed arap to, tan pambibiiganen to so totoo ed balang sinansakey, a singa say pastol et ibiig toray karnero a manlapud saray kanding. Tan ipasen toray karnero ed nikawanan a lima to, balet saray kanding ed nikawigi to.”—Mateo 25:31-33.
10. (a) Diad anton paraan so kakaani “na panagani na dalin”? (b) Siopa lambengat so mikokoopera ed saray angheles ed sayan kimey?
10 On, amin a katooan so nausisan makanengneng no sioparay “karnero” tan no sioparay “kanding.” Panon so kagawa na sayan panangusisan kimey? Diad pasingawey nen Juan, “say panagani na dalin” so naani a misiglaotan ed saray mabibiskeg a mensahen inyabawag na saray angheles. Sakey ya anghel so mangiyabawag na sakey a mensahe na “andi-anggaan a maong a balita.” Sananey so mangiyabawag ed inkagba na “Babilonia a Baleg.” Tan say komatlo so mamapasakbay na sumpad panagdayew ed “atap ya ayep,” say mapulitikan sistema na bengabengatla nen Satanas. (Apocalipsis 14:6-10) Tua, anggapo so aktual ya akadngel ed boses na sarayan angheles. Balet sikara so nadngel a mitukoyan ed saray mensahen ibebesngaw na saray matoor a totoo. (Mateo 24:14; Isaias 48:20; Zacarias 2:7; Santiago 1:27; 1 Juan 2:15-17) Sirin, malinlinew, saray mensahe so niyaabawag diad panamegley na saray sangi na totoo ed leksab na anghelikon panangiwanwan. Nabidbir so sakey a too a bilang ‘karnero’ odino bilang ‘kanding’ diad panamegley na nengneng na ikiwas to ed saray anghelikon mensahe. Legan na sayan koma-20 siglo, saray Tasi nen Jehova lambengat so akikoopera ed saray angheles ed sayan makanakanan kimey.
11. Panon kaimportante so panangilaknab ed arawi na sarayan anghelikon mensahe?
11 Say panangilaknab ed sarayan mensahe so lalon manangidesdes a kimey nen say antokaman ni a nagagawa natan. Anggapo so agawaan a pulitikal odino sientipikon nalmoan so akaasingger ed kakanaan. Sarayan mensahe so mangituturo na dalan diad solusyon na amin daray problema na katooan tan ibabaga to so maandon kilalaban na matoor a totoo. Tan, lalon importante, sikara so walaan na kipaakaran diad kapasantos na ngaran nen Jehova.
Say Tinaon a Report
12, 13. Mangiter na arum a detalye a manlapud tinaon a report a mangipapanengneng a sakey a baleg a “panagani” so natitipon la.
12 Sikato no akin a saray Tasi nen Jehova so onnenengneng ed arapen diad pamasa ed tinaon a report ed kimey na muyongan nen Jehova. Panliketan dan nanengneng so mantultuloy ya ebidensya na panamendisyon to ed kimey da. No usisaen yo so 1987 a report, a niprinta ed saray pahina 12 ya anggad 15 ed sayan magasin, nanengneng yo a saray angheles tan saray totoon kakimeyan da so aktibon tuloy nen katantaon.
13 Say maong a balita so nadngel ed 210 daldalin—peteg ya ‘amin a tribu tan nasnasyon tan pansasalita’ ed kaplesan a narandan. (Marcos 13:10) Nagkalalo ni, bilang sakey a pantok, 3,395,612 a nankimey a nankakasakey diad panumpal ed satan—nagkalalo nen say nensaman ed Kristianon awaran. Saray bilang so makapasagyat ya anggan diad arum iran sinansakey a daldalin. Diad Estados Unidos, sakey a balon pantok na 773,219 so adampot. Duara nin arum a bansa, Brazil tan Mexico, so akanengneng ed saray pantok na 216,216 tan 222,168; tan anemira ni, Britanya, Alemanya, Italya, Hapon, Nigeria, tan say Pilipinas, so angireport na saray pantok a linmampas ed 100,000. Diad biek a dapag, saray daldalin a walaan na angkakabaleg a populasyon tan pigpigaran libo lambengat a manangipalapag odino kulang. Say kimey na sarayan matoor a kakamarerwa so importante met a mapalalo legan a pambabanikelan dan pansiansiaen so liwawa na katuaan ya onsinag ed leksab na saray mairap a kipapasen.—Mateo 5:14-16.
14. Anton nengneng na totoo so natitipon ed muyongan nen Jehova?
14 Siempre, saray totoo na Dios so aliwan interesado ed idaak a nisesengeg lambengat ed inkasikara. Kabat da, anggaman kuan, ya amin na saraman so balobalon ondudupag ed muyongan nen Jehova so “kalikaliktan iran bengatla” diad mata nen Jehova. Dakel so “mansibek tan managugol nisesengeg ed saray makapadimlan bengatla” a natatasian da ed Kakristianoan. (Ezequiel 9:4) Sikaran amin so unaagos “ed palandey nen Jehova” lapud labay da so nabangatan ed saray daladalan na Dios. (Isaias 2:2, 3) Agaylan mabiskeg ya ebidensya na panamendisyon nen Jehova—a diad sayan abulok tan materyalistikon sistema na bengabengatla, nilasus nilibulibon balobalo a kada taon a mangipatnag na inkasikara a bilang “kalikaliktan iran bengatla” nen Jehova!
Maganat iran Panaon
15. (a) Panon kabaleg so teritoryan kobrian na kimey na panagpulong? (b) Unong ed pasingawey nen Juan, panon inkaaktibo so “baleg ya ulop”?
15 Say kimey na panagpulong na saray Tasi nen Jehova so maganat. Akin? Nisengeg ed sakey a bengatla, say teritorya so abalbaleg. Say “maong a balita” so nepeg a niyabawag “ed amin a nasyon tan tribu tan pansasalita tan totoo.” (Apocalipsis 14:6) Diad parabolo nen Jesus, saray totoo ed “amin a nasyones” so nanaapag ed “karnero” tan “kanding.” Wala so dakel a kimey a gawaen. Agaylan matukoy, sirin, a say “baleg ya ulop” ya anengneng nen Juan so mangidadayew ed Dios diad “agew tan labi ed templo to.” (Apocalipsis 7:15) Diad kasumpalan na sayan pasingawey, sayan “baleg ya ulop,” mikikimey a mitutunosan ed saray alanaan ya agagi ra, so nireport ya angusar na dagup na 739,019,286 oras ed kimey na panagpulong nen katantaon—sakey a bilang ya abalbaleg a tuloy a tebeken. Diad sankamundoan, saya so angirepresenta ed sakey a promedio na masulok a 18 oras ed kapag bulan a kada manangipalapag. Saya so ipareng ed promedio a 12 oras a kada bulan ed apalabas lambengat a samploran taon, tan nanengneng yo a say kurang na kimey na panagpulong so ondadaak. Panon so kikumpara na personal a promedio yo ed sankamundoan a promedio?
16. (a) Anto so maabig a dalan diad “pangipulong ed salita . . . a magangganat”? (b) Kaunongan karakel so akibiang ed sayan kimey nen katantaon?
16 Imanoen, met, say balon pantok na auxiliary tan regular payunir: 650,095. Kabaliksan na saya a wala so mas dakel a payunir ed lawak nen katantaon nen say manangipalapag nen 1955. Kasin sakey ka ed saratan a payunir? No ontan, naromog mo so sankaabigan a dalan diad pangiyaplikan personal ed simbawa nen Pablo: “Ipulong so salita, gawaen mo a magangganat.” (2 Timoteo 4:2) Akin ya ag-iplano so pibiang ed kimey na panagpayunir ed anggano sakey bulan legan na 1988 a taon na serbisyo?
Saray Ilaloan ed Lalon Ibulaslas
17. Antoran bilang so mangipanengneng a say ilalo ed arapen ya idaak so maabig?
17 Say ilalo ed arapen ya ibubulaslas so tuan sankaabigan. Say bilang na panangiyaral ed Biblia so 3,005,048—tan kada iyaaralan na Biblia so sakey a potensyal a ‘kalikaliktan iran bengatla’! Nagkalalo ni, 8,965,221 so inmatendi ed selebrasyon ed Pangdem na Katawan nen Abril. Karaklan ed saratan ya inmatendi so aliwan Tasi nen Jehova. Arum so balobalon interesadon totoo. Sikara so inabrasan maong tan apaseseg a mantultuloy a manggawa na maabig ya aligwas. Arum so nayarin inmatendi ed saratan ya okasyon ed pigara lan danay nensaman. Mapatnag a panggagayagaan da so pililimog ed saray Tasi nen Jehova balet agda ni alikna so pankaukolan na panggawa na nagkalalo nen say satan.
18. Unong ed saray propesiya nen Jesus tan si Zacarias, anto so nepeg a gawaen na sakey a too pian nibilang a sakey ed saray “karnero” nen Jehova?
18 Saratan so nakomendaan nisesengeg ed interes da ed katuaan na Biblia. Balet nonoten, diad parabolo nen Jesus ed “karnero” ya onla ed andi-anggaan a bilay et saraman so mangipanengneng na inkamatulong ed saray alanaan ya agagi nen Jesus tan mikoopera ed sikara. (Mateo 25:34-40, 46) Diad propesiya nen Zacarias, say kumpleton bilang a “samploran lalaki” so niyabawag ya anggapo so panangikibot: “Mila kami ed sikayon totoo, lapud nadngelan mi a say Dios so wala ed sikayo a totoo.” (Zacarias 8:23) Sikara so aliwan basta walaan na makaaron awawey. Sikara so “binmemben” ed saray totoo na Dios tan akila ed sikara, indedika ra so inkasikara a manlingkor ed Dios na saraya. Diad agew tayo, saya so mangisasakup ed sigpot a kalanlanor ed muyongan nen Jehova.
Agla Manbayag
19, 20. (a) Unong ed pasingawey nen Juan, anto so nagawa sano say panagtipon “ed panagani na dalin” so nasumpal la? (b) Anto so kabaliksan na saya ed amin na saraman so ag-onsuko ed si Jesus a bilang Ari?
19 Say kimey na panagani so maganat nisesengeg ed komaduan rason. Agla mabayag et sikato la so nasumpal. (Mateo 24:32-34) Anto so nagawa ed satan? Basaen so ontumbok ya agawa ed pasingawey nen Juan: “Tan sananey nin anghel so pinmaway a nanlapu ed santuaryo na templo a wala ed tawen, sikato, met, so walaan na makdem a kompay. Tan sananey nin anghel so pinmaway a nanlapu ed altar tan sikato so walaan na pakauley ed apuy. Tan sikato so tinmawag ed maksil a boses ed samay sakey a walaan na makdem a kompay, a kuanto: ‘Egnaan mo so kompay mo tan tiponen iray pugnel na ubas na dalin, lapud saray ubas to so aluto la.’ Tan say anghel so angiyunat ed kompay to ed dalin tan tinipon to so ubas na dalin tan imbantak to ed baleg a panagpespesan na alak na sanok na Dios.”—Apocalipsis 14:17-19.
20 Kayarin say panagani na “kalikaliktan iran bengatla” so natipon, anggapo la so rason na pantultuloy ed kiwawala na sayan abulok a daan a mundo. “Say ubas na dalin,” sayan interon satanicon minumundon sistema na bengabengatla nen Satanas, so napupo tan naderal. Diad satan a panaon, anggan saray sumusumpa so napaskar a mamidbir ed tinuron Ari nen Jehova. Insulat nen Juan: “Nia! Sikato [Jesus] so onsasabi ed saray lurem, tan amin a mata so makanengneng ed sikato, tan saraman so anugat ed sikato; tan amin a tribu na dalin so mandageyem ed ermen nisesengeg ed sikato.” (Apocalipsis 1:7; Mateo 24:30) Sirin, saray salita nen Jesus ed saray Judion relihyoson papangulo, a sikara so matalunggaring ed limog na “saraman so anugat ed sikato,” so nasumpal. (Mateo 26:64) Siempre, saratan a relihyoson mansimpisimpitan so agnapaolin “makanengneg” a personal ed si Jesus. (Mateo 23:33) Balet amin natan a mangipapanengneng na satan ya espiritu tan agmangawat ed tinuro nen Jehova ya Ari so napaskar a mamidbir ed sikato sano sikato so onsabin maneral ed saray nasyones diad Armagedon.—Apocalipsis 19:11-16, 19-21.
21. Akin a saray totoo na Dios so mankimey na impasya a mitukoyan ed saray mangatatawen ya angheles?
21 Peteg, say kililiktar na sinansakey a totoo so nipupusta. Sikatayo so walaan na ambelat a responsabilidad diad pagmaliw a kaiban komikimey na saray angheles. Balet agaylan baleg a pribilehyo! Komon ta sikatayo so mantultuloy a mankimey na impasya a mitukoyan ed saray mangatatawen ya angheles legan a pambanikelan tayon anapen so amin na saray malakarnero, “saray kalikaliktan iran bengatla” nen Jehova, sakbay a manampot so kimey na panagani.
Kasin Nipaliwawa Yo?
◻ Anto so manunan agawa ya angga ed sayan koma-20 siglo?
◻ Anto so “panagani na dalin,” tan panon so katitipon to?
◻ Anto so arum iran ugugali na saray “karnero” nen Jehova?
◻ Panoy pangipanengneng na tinaon a report ed panamendisyon nen Jehova ed panaganin kimey?
◻ Akin a say kimey na panagpulong so maganat?
[Tsart ed Pahina 6-9]
1987 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)