Tepetepet Manlapud Managbasa

Kasin si Maria a nagmaliw ya ina nen Jesus so malukon la sanen binisita toy kanayon ton si Elizabet?

On, mapatnag a sikatoy malukon la.

Diad Lucas kapitulo 1, nabasa tayon unaan so nipaakar ed si Elizabet, say asawa na saserdoten si Zacarias, ya angiyanak ed si Juan (a managbautismo). Sanen si Elizabet so walad “komanem a bulan, si angel Gabriel” so binmisita ed si Maria pian ipakabat ed sikato a sikatoy manlukon tan mangiyanak na “Anak na Sankatageyan.” (Lucas 1:26, 30-33) Balet kapigan a nagmaliw a malukon si Maria?

Intuloy ya ibabaga na salaysay nen Lucas a si Maria so manlapud saman et nambaroy ya amaarap ed Juda pian bisitaen so malukon a kanayon ton si Elizabet. Sanen say duaran bibii so nanabet, say lukon nen Elizabet (si Juan) so kinmusay. Tinukoy nen Elizabet so ‘bunga na eges nen Maria,’ tan tinawag si Maria bilang “say ina na Katawan ko.” (Lucas 1:39-44) Say makatunongan a konklusyon sirin et si Maria so mannginginew la, a sikatoy malukon la, a sikatoy linma pian minengnengan ed si Elizabet.

Oniay nabasa ed Lucas 1:56: “Et nanayam si Maria ed sikato ed [ngalngalin taloran bulan, NW], tan pinmawil ed abung to.” Sayan bersikulo so agmangiiter na pihon kalkulasyon pian tukoyen so eksakton kalendaryon agew. Ibabaga ton “ngalngalin taloran bulan,” a mangipasen ed si Elizabet ed komasiam a bulan na panlulukon to.

Kayarin akatulong ed si Elizabet legan na saginonor a parte panlulukon to, anempet si Maria ed Nazaret. Posiblin amoria nen Maria a bektan nianak nen Elizabet (si Juan), anganko ta dakel so ombisita, ya arum ed sikara so kakanayon ni ingen. Satan so nayarin magmaliw a makapabaing parad sakey a marikit a malukon. Kaunongan lan kabayag a si Maria so malukon sanen tinmaynan ya amaarap ed Nazaret? Lapud ta sikatoy kaiba nen Elizabet a “ngalngalin taloran bulan,” nayarin si Maria so walalad komatlon bulan odino masasakbay na komapat a bulan na panlulukon to sanen amawil ed Nazaret.