Saray Duaran Sankabalgan a Balikas na Aro ya Agawa
“Ta ontan la so impangaro na Dios ed mundo ya inter to so bogbogtong ya Anak to, ta pian siopaman a mangagamil na pananisia ed sikato so nayarin . . . nawalaan na bilay ya andi-anggaan.”—JUAN 3:16.
1. Anto so labay ya ibaga na balikas a “Say Dios aro”?
“SAY Dios aro.” Amidduan satan so imbaga nen apostol Juan. (1 Juan 4:8, 16) On, si Jehova a Dios so maaro ed kalaknab a sikato met so makabat, maptek, tan makapanyari. Nagkalalo ni, sikato SO aro. Sikato so katibukelan, say personipikasyon, na aro. Nayarin tepetan mo so inkasika: ‘Kasin kabat ko no akin a satan so katuaan? Kasin nayarian kon iter ed sakey so malinew a salaysay, a suportaan na ebidensya odino alimbawan mamaneknek a Sikato so aro? Tan anto so pisiglaotan na satan ed bilay ko tan kimkimey?’
2. Say Dios so angiter na anton nanengneng a balikas na aro to?
2 Agaylan daakan a panangaro so impabtang nen Jehova a Dios ed atooan a palsa to ed dalin! Manmorekdek ed nagnap a karakpan tan andar na mata tayo, say pakelaw na mabiskeg iran pukel, say biskeg na saray masel tayo, tan say inkasensitibo na pakalikna tayo. Walaan itayo na rason a mangibelyaw ed liknaan na salmista: “Daydayewen taka lapud diad makapataktakot a dalan et siak so makapakelaw a ginawam.” Imanoen, met, iray sankarakpan a kapalandeyan, saray kalmadon agus na malinew a danum, saray kaumaan a walaan na karosasan, tan say maglorian iseselek na agew. “Agaylan karakel na saray gawam, O Jehova! Amin da so ginawam ed kakabatan. Say dalin so napno na kimkimey mo.”—Salmo 139:14; 104:24.
3, 4. Antoran ehemplo so iter na Hebreon Kasulatan ed saray balikas na aro na Dios?
3 Saray balikas na aro na Dios so agtinmunda sanen saray inmunan totoon pinalsa to so nanrebelde. Alimbawa, impanengneng nen Jehova so aro diad impangiyabuloy ed saman a sanasawa a mamawala na saray anak a nayarin mangungguna ed probisyon nen Jehova diad panamegley na “bini” na sipan to. (Genesis 3:15) Saginonor, impaiparaan to ed si Noe so sakey a biong diad kipreserba na rasa na too tan diad arum iran mangaraldalin a pinalsa. (Genesis 6:13-21) Insan impanengneng to so baleg ya aro ed si Abraham, a naamtaan a bilang kaaro nen Jehova. (Genesis 18:19; Isaias 41:8) Diad impangiliktar to ed kapolian nen Abraham a nanlapud inkaaripen ed Ehipto, inter na Dios so malaknab a balikas na aro to, a singa nabasa tayo ed Deuteronomio 7:8: “Saman so lapud panangaro nen Jehova ed sikayo . . . a sikayo so impaway nen Jehova diad mabiskeg a taklay.”
4 Anggaman saray Israelitas so nantultuloy ya angipanengneng na kalamangan tan naulit-ulit ya impanrebelde, agtampol ya indepak na Dios. Noag ingen, sikato so simamaaron kinmerew ed sikara: “Ombeneg kayo ed saray mauges a dalan yo, ta akin a sikayo so ompatey, O abung na Israel?” (Ezequiel 33:11) Anggaman ontan, anggano si Jehova so personipikasyon na aro, sikato met so maptek tan makabat. Sinmabi sirin so panaon sanen saray rebelyoson totoo to so akarateng ed geter na andukey-a-panangitepel to! Sikara so akasabi ed punton “anggapo la so katambal,” kanian sikara so impakautibo to ed Babilonia. (2 Awaran 36:15, 16) Anggan ontan et say aro na Dios so agtinmunda ed ando lan ando. Anengneng to a diad kayari na 70 taon et sakey a nakdaan ed sikara so naabuloyan ya ompawil ed nianakan dan dalin. Ipangasin basaen so Salmo 126 tan nengnengen ditan no panon so liknaan na saray akapawil nipaakar ed satan.
Panangiparaan ed Sankabalgan a Balikas na Aro To
5. Akin a nibagan say impangibaki ed bogbogtong ya Anak to ed dalin so sakey a balikas na aro na Dios?
5 Malaknab ni ed awaran et sinmabi so panaon a pangiter nen Jehova na sankabalgan a balikas na aro to. Saman so tuan manangisakripisyon aro. Diad impangiparaan ed saya, impaiyalis na Dios so bilay na bogbogtong ya Anak to a manlapud maespiritun kiwawala ed tawen diad panag-anakan na Judion birhen a si Maria. (Mateo 1:20-23; Lucas 1:26-35) Nonoten so nikadkaduman inkaapit a linmesa ed baetan nen Jehova tan say Anak to. Nabasa tayo so nipaakar ed sakbay-inkatoon kiwawala nen Jesus diad leksab na simbolo na nipersonan kakabatan: “Siak so wala ed dikingan [na Dios] a bilang uloen a komikimey, tan siak so nikadkaduman nanggayagaan to ed inagew-agew, a siak so nanliketan to ed amin a panaon.” (Uliran 8:30, 31) Sirin agkayo ta mipakna a say impanaynan na bogbogtong ya Anak to ed kiwawala to so sakey a sakripisyo ed si Jehova?
6. Anton inaateng ya interes so walad si Jehova diad mangaraldalin a bilay nen Jesus?
6 Andi-duaruwa, binantayan nen Jehova a tekep na mapetepet tan baleg ya interes so imbaleg na atooan ya anak to a manlapud inkinginew a manpatuloy. Say masanton espiritu na Dios so angampayo ed si Maria ta pian anggapo so nayarin makadesyang ed ombabaleg ya ugaw ed panag-anakan. Inimano nen Jehova a si Jose tan Maria so linma ed Bethlehem diad impansenso ta pian si Jesus so nianak diman diad kasumpalan na Miqueas 5:2. Diad panamegley na sakey ya anghel, pinasakbayan na Dios si Jose nipaakar getman pamatey nen Arin Herodes, ya anagdag ed si Jose tan say pamilya to ya ombatik ed Ehipto ya anggad ipatey nen Herodes. (Mateo 2:13-15) Say Dios so nantultuloy diad interes to ed kurang nen Jesus. Agaylan makapaliket ed Dios so pakanengneng ed manedad na 12-taon a Jesus ya amakelaw ed saray managbangat tan ed arum diad templo ed saray tepet tan ebat!—Lucas 2:42-47.
7. Anton taloran balikas so angiter na ebidensya ed interes na Dios diad ministeryo nen Jesus?
7 Labinwalon taon ed saginonor et si Jehova so mamanbantay sanen si Jesus so sinmingger ed si Juan a Managbautismo pian pabautismoan. Insan sikato so magaygayagan angibaki na masanton espiritu to ed si Jesus tan kuanto: “Saya so Anako, say inad-aro, ya inabobonan ko.” (Mateo 3:17) Anggan siopan Kristianon ama so makapanisip ya agaylan liket na Dios so panumbok ed ministeryo nen Jesus tan imanoen so dalan na impangipaarap to ed amin a dayew diad mangatatawen ya Ama to. Diad sakey ya inkagawa et inawit nen Jesus so arum ya apostoles to diad sakey ya atagey a palandey. Diman et pinasinag nen Jehova si Kristo diad mabiskeg-nen-natural a karlangan, tan imbaga na Ama: “Saya so Anako, say inad-aro, ya inabobonan ko; talineng kayo ed sikato.” (Mateo 17:5) Impadngel nen Jehova so boses to ed komatlon danay diad ebat ed kerew nen Jesus ed Dios a mangigloria ed dilin ngaran to. Inkuan nen Jehova: “Sikato so inggloriak tan sikato so igloriak lamet.” Mapatnag a saya so nibagan manuna diad pankaabigan nen Jesus, para ed arum et inisip dan sakey ya anghel so nansalita, bang saray arum so nanisip a sikato so kinmarol.—Juan 12:28, 29.
8. Panon so liknaan yo nipaakar ed aro na Dios?
8 Anto so nibaga ed sayan antikey a repaso ed saray kiwas na Dios ed Anak to tan diad interes to ed sikato? Nepeg a mabitar a si Jehova so sipapablin angaro ed bogbogtong ya Anak to. Tekep na ontan ed kaisipan, tan apresyaen no panon a ngalngalin anggan siopan toon ateng so manlikna ed sakey ya alenleneg ya anak, imanoen so onggendan ya agawa—say sakripisyon impatey nen Jesus.
Say Sankabalgan a Balikas na Aro
9, 10. Anto so sankabalgan a balikas na aro na Dios ed katooan, ya idanet to so anton Makasulatan a pantasi?
9 Ipapanengneng na Biblia a say mangatatawen ya Ama tayo so walaan na empatya. Nabasa tayo ed Isaias 63:9 nipaakar ed totoo to ya Israel: “Legan na amin a kairapan da sikato so mamapairap ed siak. Tan say dilin igaganggan to so angiliktar ed sikara. Diad aro to tan diad panangabagey to ed sikato a mismo so anondon ed sikara, tan intuloy toran intandoro tan intarok ed amin na saray agew ed abayaglan panaon.” Agaylan nagkalalon makapagonigon ed si Jehova so pakadngel tan pakanengneng ed “mabiskeg ya ey-ey tan saray lua” nen Jesus. (Hebreos 5:7) Si Jesus so nampikasi ed ontan a nengneng diad hardin na Getsemane. Sikato so agawan pinangaw, nidunget ed kunkunwarin bista, pinekpek tan binakbak, tan kinoronaan na sabit. Nodnonoten, say maaron Ama to so makakanengneng ed amin na satan. Anengneng to met a si Jesus so anakbat ed panamateyan a kiew tan banbantayan to met legan a say Anak to so diad kaunoran et nipasak ed saman a kiew. Agtayo lilingwanan a say Dios so akaamper komon ed impanirap na Anak to. Ingen ta inabuloyan nen Jehova si Jesus a manirap a tuloy. Lapud say Dios so walaan na saray liknaan, say pakatasi ed sikato diad sarayan agawgawa so andi-duaruwan nansengegan na sankairapan ya ot-ot a niwala ed sikato odino onwala ed sikato.
10 Nisesengeg ed amin na saray wala ed akauna, nanengneng tayo no panon so kabaliksan na saray salita nen Jesus ed si Nicodemo: “Ta ontan la so impangaro na Dios ed mundo ya inter to so bogbogtong ya Anak to, ta pian siopaman a mangagamil na pananisia ed sikato so nayarin agnaderal noagta nawalaan na bilay ya andi-anggaan.” (Juan 3:16) Diad mipadparan kabaliksan et saray salita nen Juan, say apostol ya inad-aro nen Jesus: “Diad saya et say aro na Dios so nipatnag ed biang tayo, lapud imbaki na Dios so bogbogtong ya Anak to ed mundo . . . a bilang mananakbong a bagat ed saray kasalanan tayo.”—1 Juan 4:9, 10.
11. Panon so impangipabitar nen apostol Pablo na sankabalgan ya aro na Dios?
11 Nayarian yo, sirin, a talosan no akin a si apostol Pablo, diad Roma 5:6-8, so angidanet ed baleg ya aro nen Jehova a Dios diad saray salitan: “Si Kristo, legan a sikatayo ni so maletey, so inatey a para ed saray agmaridios a totoo diad aturon panaon. Ta mairap ya anggan siopa so ompatey a nisengeg ed sakey a toon matunong; peteg, para ed toon maong, angangko, sakey so ompangayan ompatey. Balet ipupurek na Dios so dilin aro to ed sikatayo a, legan a sikatayo ni so makasalanan, si Kristo so inatey a nisesengeg ed sikatayo.” Peteg, diad impangibaki to ed bogbogtong ya Anak to ed dalin, nanirap, tan inatey ed sankaugsan ya ipapatey, si Jehova a Dios so nanggawa ed sankabalgan a balikas na aro to.
Say Komaduan Sankabalgan a Balikas
12, 13. (a) Diad anton dalan a say balikas na aro nen Jesus so nikadkaduma? (b) Panon so impangitawag nen Pablo na imano ed baleg ya aro nen Jesus?
12 ‘Anto,’ nayarin itepet yo, ‘so ontumbok a sankabalgan a balikas na aro?’ Inkuan nen Jesu-Kristo: “Anggapo so walaan na babaleg ya aro nen say saya, a say sakey so mangisuko na bilay to a nisesengeg ed saray kakaaro to.” (Juan 15:13) Tua, diad interon awaran na katooan, wala raman so angisakripisyo na bilay da a nisesengeg ed arum. Balet say ginawa ra so diad limitadon bilay lambengat; agmabayag et sikara so ompatey met lamlamang. Si Jesu-Kristo, anggaman kuan, so sakey a toon ayadyari a walaan na kanepegan ed bilay. Sikato so agnipaarap ed atawir a patey a singa ed amin a katooan; nisay wala so anggan siopan makapuersan mangekal ed bilay nen Jesus ya agto abuloyan. (Juan 10:18; Hebreos 7:26) Nonoten iray salita to: “Isipen yo kasin agko nayarian so onkerew ed Amak a mangiter ed siak ed sayan bekta na masulok a labinduan lehyon na angheles?”—Mateo 26:53; Juan 10:17, 18.
13 Naapresya tayo nin malaknab so aron alanor diad ginawa nen Jesus diad inengneng ed onggendan ya agawa: Tinaynan to so maglorian kiwawala to a bilang sakey ya espiritun pinalsa ed katawenan a kawalaan to a bilang maapit a kaulop tan kaiban komikimey na sankatalbaan a Soberano tan Ari ed ando lan ando. Ingen, diad andi-siblet ya aro, ginawa nen Jesus so singa imbaga nen apostol Pablo ed sikatayo: “Anggaman sikato so wala ed indengan na Dios, [sikato] so angipasen na pangegemtan, salanti, a sikato so mipara ed Dios. Andi, noagta nilukpos to so inkasikato tan inala to so indengan na sakey ya aripen tan nagmaliw a kapadpara na totoo. Nagkalalo nen say satan, sanen aromog to so inkasikato ed indengan na sakey a too, impaabeba to so inkasikato tan nagmaliw a matulok ya anggad patey, on, ipapatey ed panamairapan a kiew.”—Filipos 2:6-8.
14. Panon so impamaneknek nen propeta Isaias ed baleg a balikas na aro nen Jesus?
14 Agta saman so sakey a balikas na aro? Peteg—komadua lambengat ed saman so ginawa nen Jehova a Dios, say mangatatawen ya Ama to. Saray mapropetikon salita ed Isaias kapitulo 53 so mamatua ed amin a sinungdoan nen Jesus: “Sikato so minudmora tan pinaliisan na totoo, sakey a toon nigana ed ot-ot tan diad impikabat to ed sakit. . . . Peteg a saray sakit tayo so intarok to a mismo; tan no nipaakar ed saray ot-ot tayo, et sikara so intepel to. Balet sikatayo a dili so imbilang to a bakbak, kinabil na Dios tan pinairap. Balet sikato so sinugat a nisengeg ed impakalukso tayo; a sikato so dinesyang a nisesengeg ed saray inkauges tayo. . . . Lapud saray sugat to so nagmaliw a katambalan tayo. . . . Inter to so kamarerwa to ya anggad ipapatey.”—Isaias 53:3-5, 12.
15, 16. A saman so sakey a sakripisyo ed si Jesus so nanengneng a manlapud antoran salita to?
15 Nisengeg ed amin ya agawa ed impatey to, si Jesus so nampikasi ed hardin na Getsemane: “Amak, no nayari, sayan kopa so palabasen mo. Ingen, aliwan say linawak, noagta say linawam.” (Mateo 26:39) Anto so kekerewen nen Jesus sanen saraman a salita so imbalikas to? Kasin labay ton paliisan so pagmaliw a “Kordero na Dios a mangekal ed kasalanan na mundo”? (Juan 1:29) Aliwan ontan so labay ton ibaga, ta abayagla et imbaga to ed saray babangatan to a sikato so manirap tan ompatey, anggan impanengneng to ni so nengneng na pateyan to. (Mateo 16:21; Juan 3:14) Sirin wala ed kanonotan nen Jesus so sananey a bengatla sanen saman so impikasi to.
16 Andi-duaruwa a si Jesus so sinononot ed kapakasalanan to na panag-ayew ya anengneng ton nidapo ed sikato, say sankaugsan a krimen a nayarin pankasalananan na sakey a Judio. Akin a sikato so sinononot nipaakar ed palson panamakasalanan? Lapud say ipatey to ed leksab na ontan a sirkumstansya so mangitarok na kabalawan ed mangatatawen ya Ama to. On, say andi-tilol ya Anak na Dios, ya angaron tuloy ed inkatunong tan nanggula ed kaugsan tan linma ed dalin a mangigloria ed ngaran nen Ama to, so pateyen natan na saray dilin totoo na Dios a bilang manag-ayew ed si Jehova a Dios.—Hebreos 1:9; Juan 17:4.
17. Akin a say nengneng na ipapatey a nidungetan nen Jesus so napaneknekan ya ontan lan subok ed sikato?
17 Asasakbay ed ministeryo to et imbaga nen Jesus: “Peteg, siak so walaan na bautismo a kabautismoan, tan agayla so panirap ko ya anggad kasumpal to!” (Lucas 12:50) Natan so pantok na sayan bautismo. Mapatnag no akin a say linget to so nagmaliw a singa tedter na dala sanen sikato so nampikasi. (Lucas 22:44) Nagkalalo ni, wala so abalbaleg ya awit a nipasakbat ed saray abala to ed saman a labi, sakey a pabelat ya agtayo nayarian a tebeken. Amta to a nakaukolan to so mansiansian matoor lapud no sikato so onsaew, agaylan tampal ed lupa nen Jehova itan! Nayarin nibaga nen Satanas a sikato so duga tan si Jehova a Dios so lingo. Balet agaylan tampal ed lupa nen Satanas a Diablo lapud si Jesus so nansiansian matoor ya anggad patey! Diman et pinaneknekan ton si Satanas so sakey a mauges, maramsak, tan abalbaleg a matila.—Uliran 27:11.
18. Akin a si Jesus so wala ed leksab na teriblen kairapan ed saman a labi?
18 Si Jehova a Dios so walaan na ontan a talek ed katooran na Anak to ya impasakbay ton si Jesus so mansiansian matoor. (Isaias 53:9-12) Ingen kabat met nen Jesus a say awit na panamemben na katooran so nipasakbat ed sikato. Nayarin sikato so onsaew. Nayarin sikato so nankasalanan. (Lucas 12:50) Say dilin maandon bilay to tan ed interon rasa na too so akabitin ed simbangan diad saman a labi. Agaylan teriblen kairapan so onman ya agawa! No si Jesus so kinmapuy tan nankasalanan, agto nayarian so onkerew na panangasi diad letnegan na sananey a bagat, a singa nayarin gawaen na saray ag-ayadyarin pinalsa.
19. Anto so agawaan nen Jesus diad andi-siblet a kurang to?
19 Peteg, say impansungdo nen Jesus nen Nisan 14, 33 K.P., so sankabalgan a balikas na andi-siblet ya aro a ginawa na anggan siopan too, a komadua lambengat ed saman so ginawa nen Jehova a Dios. Tan agaylan engranden bengatla so agawaan to ed sikatayo diad impatey to! Diad impatey to et sikato so nagmaliw a “say Kordero na Dios a mangekal na kasalanan na mundo.” (Juan 1:29) Nilukasan to so dalan ed 144,000 a patumbok ton magmaliw ya arari tan saserdote tan miuley ed sikato diad sanlibon taon. (Apocalipsis 20:4, 6) Niarum ni, say “baleg ya ulop” na “arum a karnero” natan so nagugunggunaan ed bagat nen Kristo tan makapanilalon makaliktar ed anggaan na sayan daan a sistema na bengabengatla. Saraya so ununan manggayaga ed bendisyon na mangaraldalin a paraiso. Andi-duaruan wala met so binilbilyon ed katooan a napaoli bilang resulta na ginawa nen Jesus. Sikara, met, so nawalaan na pankanawnawan manggayaga ed maandon bilay diad mangaraldalin a Paraiso. (Apocalipsis 7:9-14; Juan 10:16; 5:28, 29) Peteg, “anggaman panon karakel iray sipan na Dios, sikara so nagmaliw ya On ed panamegley to,” salanti, diad panamegley nen Jesu-Kristo.—2 Corinto 1:20.
20. Panon so ikiwas tayo ed duaran sankabalgan a balikas na aro diad biang nen Jehova a Dios tan si Jesu-Kristo?
20 Seguradon sankamanepegan ya ipanengneng tayo so apresasyon ed amin a ginawa nen Jehova a Dios tan si Jesu-Kristo ed sikatayo diad impangiter to ed sikatayo na sarayan sankabalgan ed amin a balikas na aro. Utang tayo ed sikara so ontan ya apresasyon, tan pian sikatayo so tuan mangungguna ed nagnap, nepeg ya ibalikas tayo so ontan ya apresasyon. Say onggendan ya artikulo so mangipanengneng na arum ed saray sankaabigan a dalan a saya so nagawaan tayo.
Kasin Nanonotan Yo?
◻ Antoran balikas na aro na Dios so nanengneng na amin a katooan?
◻ Panoy pikabat tayo a si Jehova so nanirap sanen anengneng to so Anak ton maniirap?
◻ Panon a say impatey a nisesengeg ed saray totoo so miduma ed saramay arum a nayarin angisakripisyo na bilay da?
◻ Panon so nepeg a kaapektaan tayo diad aron impanengneng nen Jehova tan si Jesus ed sikatayo?