Iner so Angalaan Da na Biskeg Da?

NO imanoen mon maong so kompapey ed sayan litrato, nanengneng mo a say sakey ed apatiran payak to so agla nauusar. Ingen, mantultuloy nin mamangan tan ontetekkiab so kompapey. Aliwa iyan nikaduman kaso. Naobserbaan a saray kompapey so makapantutultuloy ed inagew-agew ya aktibidades da anggan anggapo lay 70 porsiento na payak da.

Mipadpara, dakel a totoo so mangipapatnag na mapekder ya awawey. Anggaman ed pirmi iran problema ed pisikal tan emosyon, ag-ira onsusuko.​—Ikompara so 2 Corinto 4:16.

Si apostol Pablo so personal ya akasagmak na pirmin ir-irap legan na saray misioneron impanbaroy to. Sikatoy siniplatan, pinekpek, tinupak, tan impriso. Kaaruman ni, walaan na sakey a porma na inkamagapil, anganko sakey a problema ed saray mata to, a naynay itan a “sabit diad laman” parad sikato.​—2 Corinto 12:7-9; Galacia 4:15.

Sakey a Kristianon matatken a manngaran na David ya akipuligesgesan ed pirmin iyaataki na depresyon ed dakel a taon, so manisian importanti ed iyaabig so biskeg nen Jehova. “Mabetbet, a say nan-irapan ya itatalona so ompasen ya oneebas,” so salaysay to. “Sano nipaparap ed ontan a pakadismayaan, onsaral ak ed si Jehova, ta sikato so peteg a manusustini ed siak. Walaray pankanawnawan siak so manpikasi ed dakel ya oras. Sano siak so mitongtong ed si Jehova, say liknaan ko ed inkabegtebegtew tan inkaandi kakanaan so naandipat. Siak so akipuligesgesan ed saray peryodo na pirmin kakapuyan, balet misalamat ak ed si Jehova, manlapud sayan kakapuyan et sinmabi biskeg​—anggan say biskeg pian ontulong ed arum.”

Pinabiskeg nen Jehova a Dios si Pablo. Kanian, nikuanto: “Sano siak so makapuy, insan siak so mabiskeg.” (2 Corinto 12:10) On, saray kakapuyan nen Pablo so angibangat ed sikato ya onsaral ed inter-Dios a biskeg. “Ta amin a bengatla siak so walaan na biskeg diad panamegley na saman so mangiiter na pakayari ed siak,” kuan na apostol. (Filipos 4:13) Seguradon si Jehova so mamapakayari ed ariripen to.