Panggagayagaan na Pamilya nen Jehova so Mabmablin Pankakasakey
“Nengnengen yo! Alay kaabigan tan alay kaligliwaan na panayam na sanaagi ed inkasaksakey!”—SALMO 133:1.
1. Anto so kipapasen na dakel a pamilya natan?
SAY sankaabungan so walad krisis natan. Dakel a pamilyay napupultot laray bedber na panamaley da. Magmamaliw a kaslakan la so diborsio, tan dakel ya ananak na diborsiadon sanaasawa so naeermenan a tuloy. Minilyon a pamilya so agmaliket tan abuybuyak. Balet, wala so sakey a pamilyan naeeksperiensia to so tuan gayaga tan puron pankakasakey. Satan et say sankatalbaan a pamilya nen Jehova a Dios. Kabiangan ed satan iray minilmilyon ya agnanengneng ya angheles a manusumpal ed nipabtang a kimkimey da a mitunosan ed madibinon linawa. (Salmo 103:20, 21) Balet wala ta so pamilya ed dalin a panggagayagaan to itan a pankakasakey?
2, 3. (a) Siopara natan so kabiangan na sankatalbaan a pamilya na Dios, tan anto so pangiyalilingan tayo ed amin a Tastasi nen Jehova natan? (b) Antoran tepet so singbaten tayo?
2 Oniay insulat nen apostol Pablo: “Italimukor koray pueg ko ed arap na Ama . . . a dia ed sikato so pangalaan na ngaran na amin a sankaamongan ed tawen tan dia ed dalin.” (Efeso 3:14, 15) Kada poli na pamilya ed dalin et otang toy ngaran to ed Dios lapud sikato so say Manamalsa. Anggaman anggaporay atooan a pamilya ed tawen, diad piguratibon panagsalita et say Dios so kasal ed mangatatawen ya organisasyon to, tan si Jesus so nawalaan na espiritual a nobyan pikasakeyan to ed katawenan. (Isaias 54:5; Lucas 20:34, 35; 1 Corinto 15:50; 2 Corinto 11:2) Saray matoor ya alanaan a walad dalin so kabiangan la natan na sankatalbaan a pamilya na Dios, tan say “arum a karnero” nen Jesus, a walaay ilalo ed dalin, so prospektibon membros to. (Juan 10:16; Roma 8:14-17; Say Panag-Bantayan, Enero 15, 1996, pahina 31) Anggaman ontan, amin a Tastasi nen Jehova natan so niyaliling ed nankakasakey a sankamundoan a pamilya.
3 Kabiangan ka ta na makapakelkelaw ya internasyonal a pamilya na ariripen na Dios? No kabiangan ka, panggagayagaan mo so sakey ed saray sankabalgan a bendisyon a nakayarian na siopaman. Minilyon so mamaneknek a say englobon pamilya nen Jehova—say nanengneng ya organisasyon to—so mabungan lugar na kareenan tan pankakasakey ed disierto ed mundo na gulaan tan agpankakasakey. Panon a deskribien so pankakasakey na sankamundoan a pamilya nen Jehova? Tan antoray sengegan a mamabulaslas ed ontan a pankakasakey?
Agaylan Maabig tan Agaylan Dakep!
4. Diad dilin salitam, panon mon isalaysay so ibabaga na Salmo 133 nipaakar ed inaagin pankakasakey?
4 Inapresyan tuloy na salmistan David so inaagin pankakasakey. Sikato so asagyat ni ingen a mangikansion ed satan! Isipen pan sikatoy manutugtog na arpa legan a kakantaen to: “Nengnengen yo! Alay kaabigan tan alay kaligliwaan na panayam na sanaagi ed inkasaksakey! Singa say mabmabli a larak ed ulo, ya onagos angga ed balbas, say balbas ni nen Aaron ya inmagos angga ed saray saloy na kawekawes to. Singa say linaew ed Hermon, tan singa say linaew ya onleksab ed tapew na palpalandey na Sion, ta si Jehova imbaki tod man so kapalaran, salanti bilay ya andi-anggaan.”—Salmo 133:1-3.
5. Diad basiyan na Salmo 133:1, 2, anton panangikompara so naala ed baetan na saray Israelita tan ed kaplesan-agew ya ariripen na Dios?
5 Saratan a salita so niyaplika ed inaagin pankakasakey a nanggayagaan na totoo na Dios nensaman, saray Israelita. Sanen wala ra’d Jerusalem parad taloran tinaon a piesta ra, talagan sikaray saniiban nankakasakey. Anggaman nanduruma so tribu ra, sikaray saksakey a pamilya. Maong so epekto ed sikara na impaniiba ra, singa makarepreskon panlana a larak tekep na ambalingit a samyong. Sanen inkalbo so ontan a larak ed ulo nen Aaron, inmagus itan ed balbas to ya anggad kuelyo na aysing to. Parad saray Israelita, say impaniiba so walaan na maong ya impluensya a kinmayat itan ed amin a nantitipon a totoo. Aresolbi iray agpantatalosan, tan nidalangirang so pankakasakey. Wala so mipadparan pankakasakey ed englobon pamilya nen Jehova natan. Maong so epekto ed espiritualidad na saray membro to lapud maparanay a pililimog. Antokaman ya agpantatalosan odino problema so naandi sano iyaplikay simbawa na Salita na Dios. (Mateo 5:23, 24; 18:15-17) Naaapresyan tuloy na totoo nen Jehova so pakapanpapasesegan a resultay inaagin pankakasakey da.
6, 7. Panon a say pankakasakey na Israel so singa linaew ed Palandey Hermon, tan iner so pakaromogan tayo na bendisyon na Dios natan?
6 Panon a say impaniiban pankakasakey na Israel so singa met ed linaew na Palandey Hermon? Bueno, lapud say toktok na sayan palandey so masulok a 2,800 a metro so kaatagey to ed palatas na dayat, satan so naynay a napno na niebe ed ngalngali interon taon. Say manieben toktok na Hermon so sengegay ibasa na alingasew ed labi tan diad ontan et mamapawala na dakel a linaew a mangipreserba ed tanamanan legan na andukey a panaoy tiagew. Say ambetel a siplog na dagem a manlalapud kapalandeyan na Hermon so makapangisabi ed saratan ya alingasew ya anggad arawin abalaten a lugar na Jerusalem, a saratan so ombasa bilang linaew. Kanian dugaruga so impanalambit na salmista a ‘say linaew ed Hermon so onleksab ed tapew na palpalandey na Sion.’ Alay abig a panonot ed say makarepreskon impluensya a mamabulaslas ed pankakasakey na pamilya na saray managdayew nen Jehova!
7 Sakbay na inkiletneg na Kristianon kongregasyon, say Sion, odino Jerusalem, so sentro na tuan panagdayew. Kanian, ditan ya ingganggan na Dios so pamendisyonan. Lapud say Lapuan na amin a bendisyon so nanayam diad paraan a nirepresenta ed santuaryo diad Jerusalem, manlapu ditan iray bendisyon. Anggaman ontan, lapud say tuan panagdayew so agla nigeter ed sakey a lugar, say bendisyon, aro, tan pankakasakey na ariripen na Dios so naromog ed interon dalin natan. (Juan 13:34, 35) Antoray arum a manunan sengegan a mamapabulaslas ed sayan pankakasakey?
Saray Sengegan a Mamapabulaslas na Pankakasakey
8. Anto so naaralan tayo nipaakar ed pankakasakey diad Juan 17:20, 21?
8 Say pankakasakey na saray managdayew nen Jehova so nibased katutulok ed dugan pakatalos ed Salita na Dios, pati ed saray bangat nen Jesu-Kristo. Diad impangibaki nen Jehova ed Anak to ed mundo pian tasian so katuaan tan pian ompatey ed masakripisyon ipapatey, say dalan so alukasan ed kaporma na nankakasakey a Kristianon kongregasyon. (Juan 3:16; 18:37) Apalinew a kaukolan so puron pankakasakey ed limog na saray membro to sanen impikasi nen Jesus: “Aliwan saraya labat so pikasik, noag saraman met so manisia ed siak ed panamegley na salita ra; pian saksakey iran amin; salanti singa sika, Ama, wala ka ed siak, tan siak ed sika, pian walara met ed sikata, pian say mundo manisia ya inbaki moak.” (Juan 17:20, 21) Talagan adampot na saray patumbok nen Jesus so pankakasakey a mipadpara ed samay wala ed baetan na Dios tan ed Anak to. Niwala itan lapud tinulok da so Salita na Dios tan saray bangat nen Jesus. Satan met lanlamang ya awawey so manunan sengegan na pankakasakey na sankamundoan a pamilya nen Jehova natan.
9. Anto so betang na masanton espiritu ed pankakasakey na totoo nen Jehova?
9 Say sananey nin sengegan a mamapakasakey ed totoo nen Jehova et lapud walaan itayo na masanton espiritu na Dios, odino aktibon puersa. Mamasarag itan ed sikatayon natalosan so niparungtal a katuaan ed Salita nen Jehova tan diad ontan et napanlingkoran tayon nankakasakey. (Juan 16:12, 13) Tutulongan itayo na espiritun paliisan so manamuyak a silalaman a gawgawa a singa say gulaan, imon, petang na sanok, tan pangapag-apag. Imbes, nipapatnag na espiritu na Dios ed sikatayo so manamakasakey iran bunga na aro, gayaga, deen, andukey a panagtepel, kaabigan, kamaongan, pananisia, kaulimekan, tan dangka.—Galacia 5:19-23.
10. (a) Anton panpareho so naala ed baetan na aron wala ed sakey a nankakasakey ya atooan a pamilya tan ed aron napatnagan ed limog na saramay debotado ed si Jehova? (b) Panon so impangibalikas na sakey a membro na Managuley ya Ulop ed liknaan to nipaakar ed pililimog ed espiritual ya agagi to?
10 Saray membro na nankakasakey a pamilya so manaaroan tan panliketan day pankakasakey da. Mipara, saramay kabiangan na nankakasakey a pamilya na saray managdayew nen Jehova so mangaaro ed sikato, ed Anak to, tan ed saray kapananisiaan da. (Marcos 12:30; Juan 21:15-17; 1 Juan 4:21) No panon a say maaron literal a pamilya et panggagayagaan day pandurungo, panliliketan met na saramay debotado ed Dios so kiwala ed saray Kristianon miting, asamblea, tan kombension pian nagunggunaan manlapud maabig a panlilimog tan ekselentin espiritual a tagano. (Mateo 24:45-47; Hebreos 10:24, 25) Aminsan et oniay inkuan na sakey a membro na Mananguley ya Ulop na Tastasi nen Jehova: “Parad say siak, say pilimog ed agagi so sakey ed sankabalgan a liket ed bilay tan lapuan na kapaseseg. Labalabay kon onsabi ed Kingdom Hall a kaiba na saramay unaan, tan onalis ed saramay unor ya onalis, no posibli. Walaan ak na akindalem a gayaga sano pitotongtongay totoo na Dios. Sano kalimog kora, liknaen kon singa kaibak iray pamilyak.” Ontan ta met so liknaan mo?—Salmo 27:4.
11. Diad anton kimey a nagkalalo lan panliliketan na Tastasi nen Jehova, tan antoray resulta ed pangisentro ed serbisyo na Dios ed bilay tayo?
11 Naliliketan so nankakasakey a pamilya ed pankimey a saniiba. Mipadpara, panggagayagaan na saramay kabiangan na pamilya na saray managdayew nen Jehova so pankakasakey dan panusumpal ed panangipulong na Panarian tan panaggaway babangatan a kimey da. (Mateo 24:14; 28:19, 20) Say regular a pibibiang ed satan so mamaapit ed sikatayo ed arum nin Tastasi nen Jehova. Say pangisentro ed serbisyo ed Dios ed bilay tayo tan say panuporta ed amin a kimey na totoo to so mamaaligwas met ed espiritu na pamilya ed limog tayo.
Importanti so Teokratikon Uksoy
12. Antoray pakabidbiran na sakey a maliket tan nankakasakey a pamilya, tan antoran areglo so amabulaslas ed pankakasakey diad inmunan siglo iran Kristianon kongregasyon?
12 Say pamilyan walaay malet balet ta maaron panangidaulo tan mauksoy so maseguron mankasakey tan manliket. (Efeso 5:22, 33; 6:1) Si Jehova so Dios na mareen ya uksoy, tan amin na saramay kabiangan na pamilya to so mangipapasen ed sikato bilang say “Sankatageyan.” (Daniel 7:18, 22, 25, 27; 1 Corinto 14:33) Bibidbiren da met a tinuro toy Anak to, si Jesu-Kristo, a mananawir na amin a bengatla tan inpabtang ed sikato so amin ya autoridad diad tawen tan ed dalin. (Mateo 28:18; Hebreos 1:1, 2) Lapud si Kristo so Ulo na satan, say Kristianon kongregasyon so organisasyon a mauksoy tan nankakasakey. (Efeso 5:23) Pian naasikaso so aktibidades na saray inmunan-siglon kongregasyon, wala ed saman so mananguley ya ulop a tugyopen na saray apostol tan arum niran matatken ed espiritual a “mamasiken.” Kada kongregasyon so walaan na aturo iran manangasikaso, odino mamatatken, tan ministeryal ya ariripen. (Gawa 15:6; Filipos 1:1) Say itulok ed saramay mangidadaulo so amabulaslas na pankakasakey.—Hebreos 13:17.
13. Panon a tatangguyoren nen Jehova so totoo, tan antoray resulta manlapud saya?
13 Balet kasin amin iyan totontonen et mangisusuheri a say pankakasakey na saray managdayew nen Jehova et lapud epektibo, anggapoy-liknaan a panangidaulo? Maseguron andi! Anggapoy bengatlan agmaaro nipaakar ed Dios odino ed organisasyon to. Tatangguyoren nen Jehova so totoo diad pangipanengneng na aro, tan tinaon et nilasus nilibo so boluntaryo tan sigagayagan magmamaliw a kabiangan na organisasyon nen Jehova diad panpabautismo ra bilang simbolo na interon-impapuson dedikasyon da ed Dios. Say mental ya awawey da so singa ed si Josue, a pinaseseg toray kaparan Israelitas: “Manpili kayo ed sayan agew no siopa so panlingkoran yo . . . Balet nipaakar ed siak tan say abung ko, manlingkor kami ed Jehova.”—Josue 24:15.
14. Akin a nibaga tayo a say organisasyon nen Jehova so teokratiko?
14 Bilang kabiangan na pamilya nen Jehova, ag-itayo lambengat magayaga noagta maligen met. On, say organisasyon to so teokratiko. Say Panarian na Dios so teokrasya (manlapud Griegon the·osʹ, dios, tan kraʹtos, sakey ya uley). Uley itan na Dios, inordinaan tan inletneg to. Say alanaan a “masantos a nasyon” nen Jehova so pasakop ed uley to tan diad ontan et teokratiko met. (1 Pedro 2:9) Lapud say Baleg a Teokrata, si Jehova, so Ukom tayo, Manangiter-Ganggan, tan Ari, nepeg a maligen so liknaan tayo. (Isaias 33:22) Ingen, anto no onlesay agpantatalosan a kasigensigenan na gayaga, kaligenan, tan pankakasakey tayo?
Onkikiwas so Mananguley ya Ulop
15, 16. Anton agpantatalosan so linmesa ed inmunan siglo, tan akin?
15 Pian napansiansia so pankakasakey na pamilya, tunggal paminsan et kaukolan a resolbien so agpantatalosan. Iyan la bilang a nensaman et wala so problema ed espiritual a kaukolan a naresolbi pian napansiansia so pankakasakey na pamilya na saray managdayew na Dios diad inmunan-siglo K.P. Anto so nepeg a gawaen? Kinmiwas so mananguley ya ulop, a mandedesisyon nipaakar ed espiritual iran pamaakaran. Walaan itayo na Makasulatan a rekord na ontan ya inkagawa.
16 Nen ngalngali 49 K.P., say mananguley ya ulop so nantitipon ed Jerusalem ta pian resolbien so sakey a seryoson problema tan pian napansiansia so pankakasakey ed “kaamong na Dios.” (Efeso 2:19) Manga 13 taon ed asasakbay, pinulongan nen apostol Pedro si Cornelio, tan saray inmunan Hentil, odino totoo na nasyones, so nagmaliw a bautismadon mananisia. (Gawa, kapitulo 10) Legan na inmunan panmisioneron baroy nen Pablo, dakel a Hentil so angabrasa ed Inkakristiano. (Gawa 13:1–14:28) Diad tua, sakey a kongregasyon na Hentil a Kristianos so niletneg diad Antiokia, Syria. Sinisia na pigaran Kristianon Judio a saray akombertin Hentil so nepeg a manpagalsim tan ontumbok ed Mosaikon Ganggan, balet say arum so ag-akipakna. (Gawa 15:1-5) Sayan agpantatalosan so nansumpal lawari ed sigpot ya agpankakasakey, kaporma ni ingen na manbibiigan iran kongregasyon na Judio tan Hentil. Say mananguley ya ulop so kinmiwas a tampol pian napansiansia so Kristianon pankakasakey.
17. Anton mantunosan a teokratikon uksoyan so adeskribe ed Gawa kapitulo 15?
17 Unong ed Gawa 15:6-22, “nantitipon so saray apostoles tan saray mamasiken pian motekteken da so sayan bengatla.” Wadman met iray arum, pati say delegasyon a nanlapud Antiokia. Inmunan insalaysay nen Pedro a ‘dengelen na saray Hentiles manlapud sangi to so salita na evangelio tan pian manisia ra.’ Insan “amin a karakel” so tinmalineng legan “ya inolit [di Bernabe tan Pablo] . . . so saray tanda tan makapakelaw a ginawa na Dios ed Hentil ed panamegley da.” Insan nansuheri si Santiago no panon a naresolbi so problema. Kayari impandesisyon na mananguley ya ulop, nibaga ed sikatayo: “Diad saman apaabig na saray apostoles tan saray mamasiken, pati say lapag ya iglesia, a maong no manpili ra ed saray lalaki ya iba ra, et ibaki da ra ed Antiokia, pati si Pablo tan si Bernabe.” Saramay ‘apili’—Judas tan Silas—so angawit na makapaseseg a sulat ed saray kapananisiaan.
18. Anto so desisyon na mananguley ya ulop nipaakar ed Mosaikon Ganggan, tan panon iyan angapekta ed saray Kristianon Judio tan Hentil?
18 Say sulat a mangipapaamta ed desisyon na mananguley ya ulop so ginmapo ed onia iran salita: “Sikami ya apostol tan mamasiken, agagi, ipabano mi ed saray agagi ya wala ed saray Hentil ed Antiokia, tan Siria tan Cilicia.” Inatendian na arum ya agagi iyan maawaran a miting, balet mapatnag a say mananguley ya ulop so tugyopen na “apostol tan mamasiken.” Inwanwan ira na espiritu na Dios, ta sasalitaen na sulat: “Ta say espiritu santo tan sikami so agmangipasakbat ed sikayo na babaleg ya awit nen sarayan bengatlan kaukolan, ya onarawi kayo ed saray bengatlan nibagat ed saray talintao, tan saray dala, tan ed bengatla a nalner, tan ed pilalawan.” (Gawa 15:23-29) Agkinaukolan iray Kristiano a manpagalsim tan manumbok ed Mosaikon Ganggan. Sayan desisyon so tinmulong ed saray Judio tan Hentil a Kristiano ya onkiwas tan mansalita a walaay pankakasakey. Nanggayaga iray kongregasyon, tan nantultuloy so mabmablin pankakasakey, a singa met nagagawa ed sankadalinan a pamilya na Dios diad kigigiya to ed espiritual diad silong na Mananguley ya Ulop na Tastasi nen Jehova.—Gawa 15:30-35.
Manlingkor ed Teokratikon Pankakasakey
19. Akin a binmulaslas so pankakasakey ed pamilya na saray managdayew nen Jehova?
19 Ombulaslas so pankakasakey sano saray membro na pamilya so mikoopera ed sakey tan sakey. Tua met itan ed pamilya na saray managdayew nen Jehova. Bilang teokratiko, saray matatken tan arum nira ed inmunan-siglon kongregasyon so nanlingkor ed Dios a sigpot ya akikoopera ed mananguley ya ulop tan angaksobi ed saray desisyon to. Diad tulong na mananguley ya ulop, saray mamatatken so ‘angipulong ed salita’ tan saray membro na saray kongregasyon diad interamenti so ‘nansalita a nankakasakey.’ (2 Timoteo 4:1, 2; 1 Corinto 1:10) Kanian pareho iran Makasulatan a katuaan so niparungtal diad ministeryo tan diad saray Kristianon miting, balanglan diad Jerusalem, Antiokia, Roma, Corinto, odino inerman a pasen. Say ontan a teokratikon pankakasakey so wala met natan.
20. Pian napansiansia so Kristianon pankakasakey tayo, anto so nepeg tayon gawaen?
20 Pian napansiansia so pankakasakey tayo, nepeg ya amin tayon kabiangan na englobon pamilya nen Jehova et panbanikelan tayon ipanengneng so teokratikon aro. (1 Juan 4:16) Kaukolan itayon manpasakop ed linawa na Dios tan ipanengneng so aralem a respeto parad ‘say matoor ya aripen’ tan say Mananguley ya Ulop. Singa say dedikasyon tayo ed Dios, siempre, say katutulok tayo so mabulos tan magayaga. (1 Juan 5:3) Agaylan matukotukoy so impangisuldong na salmista ed gayaga tan katutulok! Inkanta to: “Idayew yo si Jehova. Mapalar so too ya antakot to si Jehova, a maliket a tuloy ed saray ganggan to.”—Salmo 112:1.
21. Panon tayon napaneknekan so inkasikatayo a teokratiko?
21 Si Jesus, say Ulo na kongregasyon, so sigsigpot a teokratiko tan lawas manusumpal ed linawa na Ama to. (Juan 5:30) Tumboken tayo sirin so Pinagkauliran tayo diad paraan a teokratiko tan mankakasakey a manumpal ed linawa nen Jehova diad sigpot a pikoopera ed organisasyon To. Diad ontan tekep na impapuson gayaga tan pisasalamat, niyaniweng tayo so kanta na salmista: “Nengnengen yo! Alay kaabigan tan alay kaligliwaan na panayam na sanaagi ed inkasaksakey!”
Panon so Pangebat Yo?
◻ Panon a naisisiglaot ed Salmo 133 so Kristianon pankakasakey tayo?
◻ Antoray pigaran sengegan a mamabulaslas na pankakasakey?
◻ Akin a say teokratikon uksoy so importanti ed pankakasakey na totoo na Dios?
◻ Panon a kinmiwas so inmunan-siglon mananguley ya ulop a napansiansia so pankakasakey?
◻ Anto so kabaliksan ed sika na panlingkor ed teokratikon pankakasakey?
[Litrato ed pahina 13]
Kinmiwas so mananguley ya ulop pian napansiansia so pankakasakey