Amtaen No Panon so Nepeg Mon Iyebat

ARUM iran tepet et singa ra iceberg (angkabaleg a yelo). Say sankabalegan a kabiangan so akalereg. Say manunan isyu so mabetbet a lalon importante nen say mismon tepet.

Anggan sano say nantepet so maganat la ed ebat, say pikabat mo ed no panon so nepeg mon pangebat so nayarin managlawi ed panebek ed no kaunongan so ibaga tan say paraan a pangisalaysay ed tema. (Juan 16:12) Diad arum a kipapasen, singa ed impangipatnag nen Jesus ed saray babangatan to, nayarin ontepet so too na impormasyon ya agto kanepegan odino agpeteg a mangunggona ed sikato.​—Gawa 1:6, 7.

Sikatayo so sisimbawaen na Kasulatan: “Say salita yo komon natekepan lawas na liga, alaokan na asin, pian nakabatan yo no panon so nepeg yo a yebat ed balang sakey.” (Col. 4:6) Sirin, sakbay itayon onebat, kaukolan ya aliwa labat lan say ibaga tayo so konsideraen noagta no panon so pangibaga tayo ed satan.

Tebeken so Punto de Bista na Nantepet

Sinalin patitan na saray Saduceo si Jesus diad impantepet da nipaakar ed kioli na sakey a biin aminpigan akiasawa. Anggaman ontan, amta nen Jesus a sikara so diad tua et agmanisia ed kioli. Kanian diad ebat to, inebatan to so tepet da diad paraan ya anaglawi ed lingon punto de bista a manunan basiyan na satan a tepet. Diad impangusar to ed alay abig a panagkatunongan tan kabisadon Makasulatan a salaysay, impabitar nen Jesus so bengatlan agda nin balot inaral​—malinew ya ebidensyan say Dios so peteg a mamaoli ed saray inaatey. Nikelawan iray sumusumpa ed ebat to kanian natatakot la ran mantepet ni ed sikato.​—Luc. 20:27-40.

Pian naamtaan no panon so nepeg mon pangebat, nepeg a tebeken mo met iray panmoria tan kapagaan na saray mantetepet ed sika. Alimbawa, nayarin sika so tepetan na sakey a kaklase odino katrabaho no akin ya agmo seselebraan so Krismas. Akin et itetepet to? Peteg kasin sikato so interesado ed rason, odino basta uumamengen to labat no kasin sika so naabuloyan a manligliwa? Pian naamtaan, nayarin nakaukolan mon itepet no akin ya intepet to itan. Insan la itan ebatan. Nayarin usaren mo met so pankanawnawan ipanengneng no panon a say panumbok ed panangiwanwan na Biblia et manalimbeng ed sikatayo manlapud saratan ya aspekto na holiday a nansumpal a makapadismaya tan makapabelat ed totoo.

Bilbilang ta sika so naimbitaan a mansalita nipaakar ed saray Tastasi nen Jehova ed sakey a grupo na saray estudyante. Kayari na presentasyon mo, nayarin sika so tepetan da. No saray tepet so ompatnag a masimoon tan diretsaan, nayarin sankaabigan iray ebat a simpli tan direkta. No saray tepet et mangipatnag na panangidumaduma ed komunidad, lalon maabig so nagawaan diad pangiter nin unona na antikey a komento nipaakar ed no anto so nayarin mangimpluensya ed popular iran panmoria ed ontan iran isyu tan no akin a lablabayen na saray Tastasi nen Jehova ya abuloyan so Biblia a mangiletneg na estandarte parad sikara. Mabetbet et makagunggona a moriaen iratan a tepet bilang suheton makapainteres, ya aliwan bilang pamasyodot​—anggaman niparungtal iratan ed ontan a paraan. Say ebat mo, sirin, so mangiter ed sika na pankanawnawan mamalaknab ed punto de bista na dumerengel mo, mangiter ed sikara na suston impormasyon, tan mangipaliwawa ed Makasulatan a basiyan ed sisisiaen tayo.

Panon so ikiwas mo ed sakey ya amo ya agto ka panbakasyonen pian onatendi ed kombension? Unona, ikonsidera iray bengatla manlapud punto de bista to. Kasin makatulong so pangibagam a man-overtime diad arum a panaon? Kasin epektibo no ipaliwawam ed sikato a say niiter ya instruksion ed saray kombension tayo so ontulong ed sikatayon magmaliw a matua, napanmatalkan a komikimey? No ipanengneng mo ya ikokonsideram iray panlabayan to, ompan paborablin ikonsidera to met so namoria ton makana ed bilay mo. Balet anto no labay ton manggawa ka na bengatlan sinasaol? Say malinew a pangibaga ed agmo panlabay tekep na sakey a punto ed Kasulatan so mangipabitar ed talindeg mo. Balet kasin mas maabig so nagawaan no mikatunongan kan unona ed sikato a say sakey a toon malabay a mantila odino mantakew para ed sikato so nayarin mantila met ed sikato odino mantakew manlapud sikato?

Diad biek a dapag, nayarin sakey kan estudyante ya agmalabay a mibiang ed pigaran agmakasulatan ya aktibidades ed eskuelaan. Tandaan, nayarin dumay panmoriam ed panmoria na maestrom, tan responsabilidad ton kontrolen so klase. Saray angat a nipaarap ed sika et (1) pangimano ed saray kapapagaan to, (2) pangipaliwawa ed talindeg mo ed mapagalang a paraan, tan (3) pagmaliw a mapekder ed kabat mon mamaliket ed si Jehova. Para ed sankaabigan a resulta, nayarin wala so lalon nakaukolan nen say sakey a simpli, direktan pangibaga ed no anto so sisiaen mo. (Uli. 15:28) No sakey kan kalangweran, andi-duaruwan sika so tulongan na amam odino inam a mangiparaan ed bengatlan ibagam.

No maminsan, nayarin nakaukolan mon suppiaten iray panamakasalanan ed sika na sakey a walad pakauley. Nayarin kerewen na sakey a polis, sakey ya opisyal na gobierno, odino sakey a huis ya ebatan moray tepet nipaakar ed katutulok ed sakey a ley, say talindeg mo bilang neutral a Kristiano, odino say awawey mo diad pibibiang ed saray patriotikon seremonya. Panon so iyebat mo? “Dia ed kauyamoan tan aralem a panangigalang,” so isisimbawa na Biblia. (1 Ped. 3:15, NW) Ontan met, tepetan mo so inkasika no akin a sarayan isyu so pampagaan, tan mapagalang a bidbiren itan a kapagaan. Anto ni? Tinukoy nen apostol Pablo so kiyagel ed kanepegan dia ed ley na Romano, kanian nayarin iturom so legal iran kanepegan ya onaplika ed kipapasen mo. (Gawa 22:25-29) Nayarin saray katuaan nipaakar ed talindeg na saray inmunan Kristiano tan saray Tastasi nen Jehova ed sankamundoan so mamalaknab ed punto de bista na opisyal. Odino nayarin ipalinew mo no panon a say panamidbir ed pakauley na Dios so peteg a mamakiwas ed totoo a lalon mapekder ya ontulok ed saray manepeg a ley na totoo. (Roma 13:1-14) Diad ontan a paraan, say balikas na Makasulatan iran rason ed talindeg mo so nayarin paborablin naawat.

Panmoria na Mantepet Nipaakar ed Kasulatan

Sano desidien so iyebat, nayarin nakaukolan mo met a konsideraen so panmoria na mantepet ed Masanton Kasulatan. Saya so ginawa nen Jesus sanen inebatan to so tepet na saray Saduceo nipaakar ed kioli. Diad pakaamtan awaten da lambengat iray sulat nen Moises, si Jesus so nankatunongan ed sakey a salaysay a wala ed Pentateuch, inggapo toy paliwawa to diad impangikuan: “Balet satan so kioli ed bilay na saray inaatey, anggan si Moises impatnag to.” (Luc. 20:37) Nayarin naromog mo met a makagunggona so pangaon ed saray porsyon na Biblia ya awaten na onderengel ed sika tan ed saman so kabisado to.

Anto no say onderengel ed sika et agto momoriaen so Biblia bilang walaan na autoridad? Imanoen so ginawa nen apostol Pablo ed paliwawa to diad Areopago, a singa nikurit ed Gawa 17:22-31. Innabang to so Makasulatan iran katuaan ya agdirektan angaon ed Biblia. No nakaukolan, nayarian mo met a gawaen so ontan. Diad arum iran pasen, nayarin maminpiga ka nin mitongtong ed sakey a too sakbay mon direktan saglawien so Biblia. Sano iparungtal mo la so Biblia, nayarin makabat parad sika ya unonan rasonan ni labat no akin a satan so makanan konsideraen imbes a paletan lan ibagan satan so Salita na Dios. Anggaman ontan, kaukolan a say getmam et malinew a paneknekan so nipaakar ed gagala na Dios tan, kabebekta, abuloyan mo’y onderengel ed sika a natalosan ton dili no anto so ibabaga na Biblia. Say Biblia so nagkalalon makatangguyor nen say antokaman a nayarian tayon ibagan mismo.​—Heb. 4:12.

‘Lawas Atekepan na Liga’

Agaylan matukoy a saray lingkor nen Jehova, a sikaton mismo so maliga, so binagaan a komon et “lawas atekepan na liga, alaokan na asin” so panagsalita ra! (Col. 4:6; Exo. 34:6) Kabaliksan na saya a nepeg itayon mansalita tekep na inkamapangasi, anggan sano ompatnag ya agmatukoy. Say panagsalita tayo so nepeg a makapagayaga, aliwan mapasang odino anggapoy inkataktika.

Dakel a totoo so nadedesdes a maong, tan inagew-agew a sikaray nipapaarap ed maabuson panagsalita. Sano mitongtong itayo ed ontan iran totoo, nayarin mansalita iran sipapasang. Panoy nepeg tayon iyebat? Kuan na Biblia: “Say mabanayar ya ebat ipaliis to so sanok.” Say ontan ya ebat so mamalemek met ed sakey a walaan na masumpan punto de bista. (Uli. 15:1; 25:15) Parad totoon agew-agew a manasagmak na inkaramsak, say paraan tan boses a mangibalikas ed inkamapangasi so nayarin makapasagyat a tuloy, a sengegan la itan na italineng da ed maong a balitan tarok tayo.

Ag-itayo interesado a misuppiatan ed saraman so agmanrerespeto ed katuaan. Imbes, say pilalek tayo et say mikatunongan manlapud Kasulatan diad saray totoon malabay. Antokaman so kipapasen a naabet tayo, lawas tayon nonoten a nepeg tayo so onebat diad mauyamo tan walaay kombiksion a saray mabmablin sipan na Dios so napanmatalkan.​—1 Tes. 1:5.

Saray Personal a Desisyon tan Pamaakaran na Konsiensia

Sano tepeten na iyaaralan na Biblia odino kapananisiaan no anto so nepeg ton gawaen ed sakey ya espesipikon situasyon, panon so nepeg mon iyebat? Nayarin antam no anto so personal mon gawaen. Balet balang sakey a too so nepeg a manakbat ed responsabilidad ed saray dilin desisyon to ed bilay. (Gal. 6:5) Impaliwawa nen apostol Pablo ya impaseseg to so “katutulok panamegley na pananisia” ed totoon pinulongan to. (Roma 16:26, NW) Satan so maabig ya ehemplon tumboken tayo. Say sakey a toon mandesisyon pian paliketen labat so manbabangat ed sikato na Biblia odino sananey a too et manlilingkor ed totoo, aliwan manbibilay unong ed pananisia. (Gal. 1:10) Kanian say simple, direktan ebat so nayarin agmakagunggonan tuloy ed samay sakey a mantetepet.

Panon, sirin, so nayarin iyebat mo ed paraan a mitukoyan ed saray pananontonan na Biblia? Nayarin ipaimanom iray matukoy a prinsipyo na Biblia tan saray ehemplon wala ed kuritan na Biblia. Diad arum a kipapasen, nayarin ipanengneng mo ed sikato no panon so pansukimat ta pian naromog ton mismo iratan a prinsipyo tan ehemplo. Nayarian mo ni ingen ya isingbat iray prinsipyo tan say kablian na saray ehemplo balet ta ag-iratan iyaaplika ed walan kipapasen. Tepetan so too no kasin wala ed saratan so bengatlan nayarin ontulong ed sikaton makabat a makapandesisyon. Sikato so pasesegen mon mangonsidera unong ed liwawa na sarayan prinsipyo tan ehemplo ed no anton kurang so makapaliket ed si Jehova. Diad ontan et sikato so tutulongan mon ‘mangipasal ed saray dilin pakayari ton manebek a mangibiig ed maong tan mauges.’​—Heb. 5:14.

Panagkomento ed Saray Miting diad Kongregasyon

Saray miting ed Kristianon kongregasyon so mabetbet a mangiter ed sikatayo na saray pankanawnawa pian niyabawag tayo ed publiko so pananisia tayo. Say sakey a dalan pian nagawaan tayo itan et say pankomento diad pangebat ed saray tepet. Panon so nepeg tayon pankomento? Diad pilalek tayon benditoen, odino mansalitan maabig nipaakar ed si Jehova. Ontan so ginawa nen salmista David sanen “wala ed limog na atiptipon ya ulop.” (Sal. 26:12, NW) Sikatayo met so nepeg a mankomento ed paraan a mamaseseg ed saray kapananisiaan, a sagyaten ira “ed aro tan dia ed saray maabig a gawa,” singa impaseseg nen apostol Pablo. (Heb. 10:23-25) Say masakbay lan panaral ed leksion so makatulong ed sikatayon manggawa ed saya.

Sano natawag a mankomento, gawaen a simpli, malinew, tan antikey so komento. Agkokobrian so interon parapo; managlawi na sakey labat a punto. No antikey labat so iyebat mo, naikdan so arum na pankanawnawan mangiter na kaaruman a komento. Nagkalalo lan makagunggona so pangipabitar ed saray teksto a nisita ed materyal. Sano gawaen itan, panggunaetan ya ipaimano ed porsyon na tekston onaplika ed punton sisingbaten. Aralen so mankomento ed dilin salitam imbes a direktan basaen ed parapo. Agka napapagaan no say komentom et aliwan dugaruga. Sagpaminsan a nagawa so ontan ed siopaman a mankomento.

Mapatnag a say pakaamta ed no panon so nepeg tayon pangebat et lalanoren to so mas ni nen say pakaamta ed mismon ebat. Nakaukolan na satan so pakatebek. Balet agaylan makapenek sano impapuson onebat ka tan satan so manenyeg ed puso na arum!​—Uli. 15:23.