Tiquico—Napanpiyaan a Kaparan Aripen

DIAD nanduruman inkagawa, si Tiquico so kaiba nen apostol Pablo a nambiahe tan inmakton mensahero to. Sikato so sakey ya ibabakin napangipiyaay kuarta tan saray responsabilidad na panangasikaso. Lapud ipapabitar na Kasulatan so inkanapanmatalkan to​—kualidad a makana parad amin a Kristiano​—nayarin labay mon sikatoy nagkalalon naamtaan.

Si Pablo so aneskribe ed si Tiquico bilang say “inararo ya agi tan matoor a ministro tan iba [to] a managlingkor ed Katawan.” (Colosas 4:7) Akin ya ontan so impanmoriay apostol ed sikato?

Say Misyon a Pananulong ed Jerusalem

Linmesa ed limog na Kristianos ed Judea so pankaukolan ed materyal nen ngalngalin 55 K.P. Diad tulong na saray kongregasyon ed Europa tan Asia Minor, inorganisa nen Pablo so panangolekta pian natulongan ira. Si Tiquico, a nanlapud luyag na Asia, so walaay betang ed misyon a pananulong.

Kayari ton initer iray instruksion no panon ya usaren iyan kontribusyon, insuheri nen Pablo ya ibaki so napanmatalkan a lalaki ed Jerusalem odino onlad’man a kaiba to, a mangawit ed saray akolekta. (1 Corinto 16:1-4) Sanen sikatoy ombuat ed andukey a biahe manlapud Gresya anggad Jerusalem, sikatoy inibaan na pigaran lalaki, a say sakey ed sikara et mapatnag a si Tiquico. (Gawa 20:4) Nakaukolan so ontan a baleg a grupo lapud awit-awit da so kuartan impiya ed sikara na pigaran kongregasyon. Say pankaukolan parad seguridad so mapatnag a rason, lapud ta pakasesgaan iray managsabat ed maligen ya idalan.​—2 Corinto 11:26.

Lapud inibaan di Aristarco tan Trofimo si Pablo a paonla’d Jerusalem, maseguron isipen na arum ya ontan met so ginawa di Tiquico tan arum nira. (Gawa 21:29; 24:17; 27:1, 2) Lapud kaiba si Tiquico ed sayan programay itutulong, sikatoy sakey ed pigaran insuheri bilang “agi” ya akikimey ed si Tito diad Gresya pian iyareglo so panangolekta tan “tinuro na saray iglesias ya iba [nen Pablo] a manakar dia ed ed kanonotan na saya a grasya.” (2 Corinto 8:18, 19; 12:18) No responsablin agawaan nen Tiquico so pilimeron inkibakian to, seguradon ontan met ed mikadua.

Manlapud Roma Anggad Colosas

Limara odino anemiran taon ed saginonor (60-61 K.P.), iilaloan nen Pablo so kibulos manlapud pilimeron inkapriso to ed Roma. Kaiba to’d saman si Tiquico, a nilasus kilometro manlapud panaayaman to. Natan et ompawil lay Tiquico ed Asia. Diad saman la akapangipawit si Pablo na saray sulat ed saray Kristianon kongregasyon diad satan a lugar tan akapangibaki ed linmimot ya aripen nen Filemon, si Onesimo, ya ompawil ed Colosas. Inawit di Tiquico tan Onesimo so manga taloran sulat a kabiangan la natan ed kanon na Biblia​—say parad saray taga-Efeso, say parad saray taga-Colosas, tan say parad si Filemon. Nayarin nipawit met so sakey a sulat ed kongregasyon na Laodicea, syudad a ngalngali 18 kilometro manlapud Colosas.​—Efeso 6:21; Colosas 4:7-9, 16; Filemon 10-12.

Si Tiquico so aliwan kartero. Sikatoy napanpiyaan a personal ya ibabaki, lapud ta oniay insulat nen Pablo: “Amin a nipaakar ed siak ipakabat naani ed sikayo nen Tiquico, a say inararo ya agi tan matoor a ministro tan ibak a managlingkor ed Katawan. A sikato so imbakik ed sikayo a nisengeg ed sayan kanonotan, pian nakabatan yo so kipapasen mi, ta pian naligliwa to komon so kapusoan yo.”​—Colosas 4:7, 8.

Ipapabitar nen iskolar ya E. Randolph Richards a say angipawitay sulat “so mabetbet a mangipasabin mismo ed mensahe na nansulat ed saray manresibe nilikud ed sulat. . . . [Say sakey a rason] ed pankaukolay napanmatalkan a pangipawitan [et] sikato so mabetbet a mangaawit na kaaruman ya impormasyon. Nayarin antikey a deskribien na sulat so situasyon, a mabetbet a walad pananantya na nansulat, balet ta iilaloan ya ibinsabinsa na angipawitan ed say manresibe so amin a detalye.” Anggaman say sulat et nayarin manasaglawi ed saray bangat tan bengabengatlan nepeg ya ikday imanon tampol, iyusa-usay napanpiyaan ya ibabaki so kaaruman a detalye.

Saray sulat ed saray taga-Efeso, saray taga-Colosas, tan si Filemon so agtanton manasaglawi ed no panon lay pambibilay nen Pablo. Kanian kaukolan ya idalatdat a mismo nen Tiquico so impormasyon, ya isalaysay iray sirkumstansia nen Pablo ed Roma, tan talosan ton maong iray kipapasen na kongregasyon ta pian nataryaay panamaseseg. Say oniaran mensahe tan responsabilidad so nipiya lambengat ed saramay napanmatalkan a matoor a mangipresenta ed mangipawit. Et ontan si Tiquico.

Panangasikaso ed Arawi Iran Asainmin

Kayari na inkibulos to manlapud guardiadon abung ed Roma, implano nen Pablo ya ibaki si Tiquico odino si Artemas ed si Tito diad isla na Creta. (Tito 1:5; 3:12) Kaleganay mikaduan inkapriso nen Pablo ed Roma (nayarin ngalngali 65 K.P.), si Tiquico so imbaki lamet na apostol diad Efeso, pian posiblin onsandi’d si Timoteo, a nayarin makapanbiahe ed saman a kaiba nen Pablo.​—2 Timoteo 4:9, 12.

Agmalinew no kasin namparan nila nen Tiquico so Creta tan Efeso legan na sayan peryodo. Anggaman kuan, say oniaran impanukoy so mangisusuheri a sikatoy nansiansia a sakey ed saray maapit a kaiba nen Pablo anggad kaunoran iran taon na ministeryo na apostol. No inisip nen Pablo so pangibaki ed sikato diad walay-eebatan tan nayarin mairap iran misyon imbes a di Timoteo tan Tito, mapatnag a si Tiquico so nagmaliw lan matatken a Kristianon manangasikaso. (Ikompara so 1 Timoteo 1:3; Tito 1:10-13.) Say inkamabulos ton manbiahe tan pausar ed arawi iran asainmin so nanggawa’d sikaton mausausar ed si Pablo tan ed intiron Kristianon kongregasyon.

Natan, saray dilin-managsakripisyon Kristiano so mabulos a manlilingkor ed Dios diad lokal iran kongregasyon na Tastasi nen Jehova odino ilulugar day inkasikara pian iyalibansa so intereses na Panarian ed inerman a pasen. Nilibo so malikeliket ya angawat na saray asainmin bilang misionaryo, managbiahen manangasikaso, international servant ed saray proyekton panagpaalagey, diad sankamundoan a hedkuarter na Watch Tower Society, odino ed sakey ed saray sanga to. Singa si Tiquico, ag-ira tanton naiimano, balet ta makukuli iran komikimey, ‘matoor a ministros’ a papablien na Dios tan inad-aro na arum a Kristiano bilang saray napanpiyaan a ‘kaiban managlingkor ed Katawan.’