Pakabidbiran “ed Too na Kaugsan”
“Say mauges a sakey so nipatnag, a paandien na Katawan a Jesus.”—2 TESALONICA 2:8.
1, 2. Akin a makanan nabidbir tayo so too na kaugsan?
MANBIBILAY itayo ed panaon na kaugsan. Satan so sankamundoan a kakebbiewan. Inerman a pasen et wala so takot ed saray managgawa na mauges tan say kakebbiewan ya ipresenta ra ed inkatoo tayo tan kayarian. Ingen, wala so mas nagkalalon makapalikdon elemento na kaugsan ya onkikiwas ed dakel iran siglos. Diad Biblia et sikato so tinawag a “too na kaugsan.”
2 Makana so pakabidbir tayo ed sayan too na kaugsan. Akin? Lapud say getma to et say paneral ed maabig a talindeg tayo ed Dios tan say ilalo tayo ed maandon bilay. Panon? Diad pangitulak to ed sikatayon mangikaindan ed katuaan tan manisia ed saray katilaan diad pasen to, sirin isuawi to itayo a manlapud panagdayew ed Dios “diad espiritu tan katuaan.” (Juan 4:23) Mapatnag a manlapud saray kiwas to et sayan partikular ya elemento na mauges so onsusumpa ed Dios tan diad saray gagala to, tan ontan met ed saray dedikadon totoo to.
3. Panoy panawag na Biblia ed imano tayo ed sayan sakey a mauges?
3 Ibabaga na Biblia iyan too na kaugsan diad 2 Tesalonica 2:3. Pinuyanan na espiritu na Dios, nansulat si apostol Pablo: “Anggapo komon so mamalikdo ed sikayo ed anggan anton nengneng, lapud [say agew a paneral nen Jehova ed sayan marelmeng a sistema] so ag-onsabi ya anggad agni onsabin ununa so apostata tan say too na kaugsan so niparungtal.” Dia et impropesiya nen Pablo a say apostasya so natibukel tan ompatnag so sakey a too na kaugsan sakbay na pangangga na sayan sistema. Diad tua, imbaga nen Pablo ed 2Te 2 bersikulo 7: “Say misteryo na sayan kaugsan so onkukurang la.” Sirin nen inmunan siglo, sayan sakey a mauges so ginmapon mangipatnag na inkasikato.
Say Gapowan na Too na Kaugsan
4. Siopa so angigapo tan mananuporta ed too na kaugsan?
4 Siopa so angigapo tan manusuporta ed sayan too na kaugsan? Onebat si Pablo: “Say kiwawala na sakey a mauges so unong ed kurang nen Satanas a tekep na amin a mabiskeg a gawa tan saray tilan tanda tan pakpakelaw tan ed amin ya agmatunong a panagpalikdo ed saraman so natawtaw, bilang sakey a panangibales lapud agda inawat so aro ed katuaan pian sikara komon so nilaban.” (2 Tesalonica 2:9, 10) Sirin si Satanas so ama tan mananusteni ed too na kaugsan. Tan unong a si Satanas so sumpa ed si Jehova, diad saray gagala To, tan diad saray totoo To, ontan met ed too na kaugsan, balanglan satan so namoria to odino andi.
5. Anton pansumpalan so manatalaran ed mauges a sakey tan ed saraman so manumbok ed sikato?
5 Saramay miluluyos ed too na kaugsan so managmak na parehon pansumpalan a singa sikato—kadederal: “Say sakey a mauges so nipatnag, a paandien na Katawan a Jesus . . . tan nitarok ed kaandi diad kipatnag na kiwawala to.” (2 Tesalonica 2:8) Satan a panaon ed kaderal na too na kaugsan tan saray managsuporta to (“saraman so natawtaw”) so onsabin magano “diad kipatnag na Katawan a Jesus a manlapud tawen a tekep na saray mabibiskeg ya angheles to diad mandarlang ya apuy, legan ya itarok to so panangibales ed saraman so agmikabat ed Dios tan ed saraman so agmanguunor ed maong a balita nipaakar ed Katawan a Jesus. Saraya so managmak na maptek a kadudusa ed andi-anggaan a kadederal.”—2 Tesalonica 1:6-9.
6. Anton malaknab ya impormasyon so inter nen Pablo nipaakar ed mauges a sakey?
6 Malaknab nin dineskribe nen Pablo iyan sakey a mauges, a kuanto: “Sikato so nigetma ed isusumpa tan ipaatagey to so inkasikato ed siopaman a tatawagen na ‘dios’ odino say galgalangen, ta pian onyurong ed templo Na Dios, a lapag ya ipanengneng to so inkasikato a sakey a dios.” (2 Tesalonica 2:4) Sirin nampasakbay si Pablo a patalindegen nen Satanas so sakey a mauges, sakey a palson puntirya na panangigalang, ya impasen to ni so inkasikato a wala ed tagey na ganggan na Dios.
Panamidbir ed Mauges a Sakey
7. Akin a nibaga tayon si Pablo so agmanutongtong nipaakar ed sakey ya indibidual, tan anto so itatalindeg na too na kaugsan?
7 Kasin sasalitaen nen Pablo so sakey ya indibidual? Andi, lapud inkuanto a sayan “too” so mapatnag ed agew nen Pablo tan mantultuloy ed kiwawala ya angga ed sikato so deralen nen Jehova diad anggaan na sayan sistema. Sirin, sikato la so wala ed dakel laran siglos. Mapatnag, anggapo so literal a toon nambilay ed ontan a karukey. Sirin say balikas a “too na kaugsan” so nepeg a mangitalindeg ed sakey ya ulop, odino klase, na totoo.
8. Siopa so too na kaugsan, tan anto so arum ed saray panamidbiran a nengneng?
8 Siopa iraya? Ipanengneng na ebidensya a sikara so ulop na saray makinon, ambisyoson klero na Kakristianoan, a diad inlabas na saray siglos et impasen da so inkasikaran wala ed tagey a bilang sakey a ganggan ed inkasikaran dili. Saya so nanengneng ed katuaan a walaray nilibulibon nanduruman relihyon tan sektas ed Kakristianoan, a balang sakey et walaan na klero to, ingen balang sakey so misumlangan ed saray arum ed bengatlan pamaakaran na doktrina odino ugali. Sayan naapag-apag a kipapasen so mabitar ya ebidensyan agda tutumboken so ganggan na Dios. Sikara so agnanlapu ed Dios. (Ipareng so Miqueas 2:12; Marcos 3:24; Roma 16:17; 1 Corinto 1:10.) Say pareparehon wala ed amin na sarayan relihyon et sikara so ag-ombebemben a malet ed saray bangat na Biblia, unong ta sinumlang da so totontonen: “Ag-onlalampas ed saray bengatlan nisulat.”—1 Corinto 4:6; nengnengen met so Mateo 15:3, 9, 14.
9. Antoran agmakasulatan a sisisiaen so insandi na mauges a sakey diad saray katuaan na Biblia?
9 Sirin, sayan sakey a mauges so sakey a tugyop a persona: say relihyoson klero na Kakristianoan. Amin da, balanglan saray papa, papari, patriarkas, odino saray managpulong a Protestante, so akibiang ed responsabilidad diad saray relihyoson kasalanan na Kakristianoan. Insalat daray katuaan na Dios a para ed saray paganon katilaan, a mangibabangat ed saray aliwan-makasulatan a doktrina a singa say imortalidad na toon kamarerwa, apuy-na-impierno, purgatoryo, tan Trinidad. Sikara so singa saray relihyoson papangulo ya angibagaan nen Jesus: “Sikayo so nanlapu ed ama yo a Diablo, tan kaliktan yon gawaen iray pilalek na ama yo. . . . Sikato so sakey a matila tan say ama na tila.” (Juan 8:44) Saray gawa ra so mangiparungtal met ed sikara a bilang mauges, lapud sikara so mibiang ed saray aktibidades a manusumlang ed saray ganggan na Dios. Diad saray ontan et inkuan nen Jesus: “Onarawi kayo ed siak, sikayon managgawa na kaugsan.”—Mateo 7:21-23.
Impaatagey da So Inkasikara
10. Anto so pisiglaotan na mauges a sakey diad saray mapulitikan manuley?
10 Ipanengneng na awaran a saraman so wala ed sayan too na kaugsan a klase so angipatnag na kinon tan kapangtaan a sikara so aktual a nandikta ed saray manuley na mundo. Diad sakbong na doktrina ‘na madibinon kanepegan na arari,’ imbaga na klero a sikato so makanan manamegley ed baetan na saray manuley tan Dios. Binalangetan tan inyepas daray arari tan imperador tan akayarin anangguyor ed saray karaklan ya ondapag odino onsumpa ed saray manuley. Diad epekto, inkuan da, a singa ginawa na saramay Judion manunan saserdote ya angipulisay ed si Jesus: “Andian kami na ari noagta si Caesar.” (Juan 19:15) Ingen, malinlinew ya imbangat nen Jesus: “Say panarian ko so aliwan kabiangan na sayan mundo.”—Juan 18:36.
11. Panoy impangipaatagey na saray klero ed inkasikara?
11 Pian ipaatagey da so inkasikara a mas nagkalalo ed tagey na saray kaslakan a totoo, sayan mauges a klase so angadapta ed niduman kawes, gendagendat ya andeket. Nagkalalo ni, inadornoan da so inkasikara ed amin a nengneng na mapasirayew a medalya, a pati saray korona, krus, tan saray mitra. (Ipareng so Mateo 23:5, 6.) Balet si Jesus tan saray patumbok to so andian na ontan a kawes; nankawes ira na singa kawes na saray kaslakan a totoo. Inala met na saray klero iray titulon singa say “Ama,” “Masanton Ama,” “Reberendo,” “Sankareberendoan,” “Say Karlangan To,” tan “Say Katagyan To,” a mangarum ed ‘impangipaatagey da na inkasikara ed labas na siopaman.’ Ingen, imbangat nen Jesus so nipaakar ed saray relihyoson titulo: “Agyo tatawagen so siopaman na ama yo ed dalin.” (Mateo 23:9) Miulibay, si Elihu, diad impanangsang to ed saray mansimpisimpitan a managligliwa nen Job, inkuanto: “Komon ta siak, ipangasim, so agmangipanengneng na panangiduma ed sakey a too; tan diad mangaraldalin a too et siak so agmangipabtang na titulo.”—Job 32:21.
12. Siopa so imbaga nen Pablo a peteg a lilingkoran na saray klero?
12 Sanen si Pablo ed agew to so angibaga a say too na kaugsan so ginmapo la ed kimey to, inkuanto met nipaakar ed saraman so mangipatnag ed awawey na satan a sakey a mauges: “Ta saray ontan a totoo so tilan apostoles, managpalikdon komikimey, a gagawaen da so inkasikaran apostoles nen Kristo. Tan agpankelawan, ta si Satanas a mismo et itultuloy ton papagmaliwen so inkasikato a sakey ya anghel na liwawa. Aliwa sirin a bengatlan baleg no saray miministros to met so mantultuloy a manggagawa ed inkasikaran miministros na inkatunong. Balet say anggaan da so unong ed saray kimey da.”—2 Corinto 11:13-15.
Rebelyon a Sumpad Tuan Panagdayew
13. Anto so apostasya ya impasakbay nen Pablo?
13 Imbaga nen Pablo a sayan too na kaugsan so ombaleg a karingan na apostasya. Diad tua, say inmunan liwawa na pakabidbiran ya inter nen Pablo ed sayan mauges a klase et “say agew nen Jehova [sano deralen nen Jehova iyan marelmeng a sistema na bengabengatla] . . . so ag-onsabi ya anggad onsabi nin ununa so apostasya.” (2 Tesalonica 2:2, 3) Balet anto so kabaliksan na “apostasya”? Diad sayan konteksto, agto kabaliksan lambengat so pakasaew odino iyaarawi a nisesengeg ed kaleteyan ed espiritual. Say Griegon salita dia a nausar ed “apostasya” et kabaliksan to so, diad limog na arum a bengatla, sakey ya “isusuawi” odino sakey “ya iyaalsa.” Pigaran patalos so angusar ed satan a bilang “rebelyon.” Imbaga na bersion nen William Barclay: “Satan ya agew so ag-onsabi ya anggad nagawa so Baleg a Rebelyon.” Satan so tinawag na The Jerusalem Bible a “say Baleg ya Iyaalsa.” Sirin, diad konteksto na sisingbaten nen Pablo, say “apostasya” et kabaliksan to so iyaalsa a sumpad tuan panagdayew.
14. Kapigan so inggapon inkatibukel na apostasya a magunaet?
14 Panon so imbaleg na sayan apostasya, sayan rebelyon? Diad 2 Tesalonica 2:6, insulat nen Pablo, nipaakar ed agew to, nipaakar “ed bengatlan onkiwas a bilang manameget” ed sakey a mauges. Anto ’tan? Sikato so manameget a puersa ed saray apostoles. Say kiwawala ra, a tekep na saray mabibiskeg a langkap da ya impabtang na masanton espiritu, so angamper ed apostasya a manlapud pagmaliw ya epidemiko. (Gawa 2:1-4; 1 Corinto 12:28) Balet sanen saray apostoles so inatey, ed ngalngalin sampot na inmunan siglo, say manangamper a prino so nakal.
Agmakasulatan a Kleron Klase So Atibukel
15. Anton oksuyan so inletneg nen Jesus a para ed Kristianon kongregasyon?
15 Say kongregasyon ya inletneg nen Jesus so binmaleg legan na inmunan siglo ed leksab na panangiwanwan na saray mamatatken (manangasikaso) tan ministeryal ya ariripen. (Mateo 20:25-27; 1 Timoteo 3:1-13; Tito 1:5-9) Saraya so inagwat a nanlapud kongregasyon. Sikara so makayarin espiritual a lalaki ya andian na nikadkaduman teologon panagpasal, a singa si Jesus so andian na ontan ya inkipasal. Peteg, saray kalaban to so nankelaw: “Panon na sayan too ya awalaan na pikakabat ed saray sulat, anta sikato so agnanaral ed saray eskuelaan?” (Juan 7:15) Tan nipaakar ed saray apostoles, saray relihyoson manuley so angibaga met na ontan: “Natan sanen anengneng da so inkakpel nen Pedro tan Juan a mansalita, tan amorekdek da a sikara so lalakin agnanaral tan kabanyakan, sikara so nankelaw. Tan sikara so ginmapon akabidbir ed sikara a kabkaiba nen Jesus.”—Gawa 4:13.
16. Panon a say apostasya so nansengegan na insuawi a manlapud inmunan-siglon Kristianon padron a para ed organisasyon na kongregasyon?
16 Anggaman kuan, say apostasya so angitarok ed saray kaisipan a sinengeg ed Judion klero tan kabekta et nanlapud paganon relihyoson letnegan na Roma. Legan a linmabas so panaon tan agawa so imbeneg ed tuan pananisia, atibukel so agmakasulatan a kleron klase. Say binalangetan a papa so ginmapon nanuley ed sakey a kolehyo na kardinales, a sikara met so inala ed saray nilasuslasus ya obispo tan arsobispo, a sikara met so impaatagey a manlapud saray impasal-ed-seminaryon papari. Sirin, agnambayag kayari na inmunan siglo, sakey a mistikon kleron klase so nanuley ed Kakristianoan. Sayan klase so ag-impadron ed saray inmunan-Kristianon mamatatken tan ministeryal ya ariripen noagta impadron ed saray paganon relihyoson sistema.
17. Kapigan, nagkalautla, ya apabiskeg so pakayari na sakey a mauges?
17 Asakbay a singa say komatlon siglo K.P., saray ordinaryon mananisia so impasen a komaduan-klasen kipapasen na laigo. Say apostatan too na kaugsan so nankalkalnan amemben ed saray renda na pakayari. Sayan pakayari so apabiskeg legan na uley nen Romanon imperador Constantino, nagkalautla ed kayari na Konsilyo ed Nicaea nen 325 K.P. Insan say Iglesia tan Estado so impansiknol. Sirin, say too na kaugsan—say klero na Kakristianoan—so nagmaliw a dakel-iran-siglon andukey a linya na saray apostata diad iyaalsa a sumpad tuan Dios, si Jehova. Saray ganggan tan oksuyan a tinumbok da so kayarian da tan aliwan kayarian na Dios.
Saray Paganon Bangat
18. Antoran managmudmoran paganon bangat so inadapta na mauges a sakey?
18 Say imbaleg na too na kaugsan so binmayes met ed saray paganon bangat. Alimbawa, say misteryo, agnatalosan a Trinitaryanon Dios so insandi ed samay Sakey ya angikuan: “Siak si Jehova. Satan so ngaran ko; tan agko iter so dilin gloriak ed siopaman.” “Siak si Jehova, tan anggapo la so sananey. Nilikud ed siak et anggapo so Dios.” (Isaias 42:8; 45:5) Sayan impangisandi na too, anggan pagano, ed saray kaisipan diad saray katuaan na Dios so ninatnat a mangisakup a malaknab ed ayew: say panagdayew ed mapaabeban Maria ed Biblia a bilang “Ina na Dios” na Kakristianoan. Sirin, saray manangiyalibansa ed ontan iran palson bangabangat, say kleron klase, so nagmaliw a sankamanunaan “iran sisanya” ya intanem nen Satanas diad panalin pamatey ed maabig a binin intanem nen Kristo.—Mateo 13:36-39.
19. Panoy inkapingpinglis na Kakristianoan diad inlabas na saray siglos, balet anto so nantultuloy?
19 Legan a saray inkaapag-apag tan impanbubuyak so agawa, say Kakristianoan so apingpinglis ed saray nilasuslasus iran relihyon tan sektas. Balet kada balon relihyon odino sekta, nilikud iray pigara, so amasiansia ed klero-laigon inkaapag. Sirin, say too na kaugsan a klase so nantultuloy ya anggad sayan agew. Tan siansia nin mantutultuloy a mangiletneg na inkasikato ed tagey na saray kaslakan a totoo a tekep na saray nikadkaduman kawes to tan ataragey-tanol iran titulo. Mabitar, ag-inlablabas nen Pablo sanen inkuanto a say too na kaugsan a klase so mangigloria ed inkasikato tan ipaatagey to so inkasikato ed singa-dios a posisyon.
Say Inkapapa
20. Panoy impaneskribe na sakey a Katolikon sengegan ed papa?
20 Sakey ya ehemplo ed ontan a panangigloria et say inkapapa ed Roma. Sakey ya eklesiastikon diksionaryo nen Lucio Ferraris, impalapag ed Italya, so aneskribe ed papa “ed ontanlan dignidad tan inkaatagey a sikato so aliwan basta too noagta, a singa panangibaga, Dios, tan say Sandi na Dios.” Say balanget to so triplin balanget “a bilang ari na tawen, ed dalin tan ed impierno.” Say parehon diksionaryo so angituloy: “Say papa so, a singa panangibaga, Dios ed dalin, say mogmon prinsipe na matoor ed Kristo, say sankabalgan ya ari ed amin ya arari.” Inyarum to: “Say papa so makayari no maminsan ya onsumlang ed madibinon ganggan.” Ontan met, say The New Catholic Dictionary so mangibabaga nipaakar ed papa: “Saray embahador to so walaan na talunggaring ed arum iran membro na diplomatikon ulop.”
21. Pandumaanen so aksion na papa ed saraman so aksion nen Pedro tan sakey ya anghel.
21 Aliwan singa saray babangatan nen Jesus, say papa so mabetbet a mangisulong na sankaartian a kawes tan abrasaen to so pangipasirayew na totoo. Abuloyan na papa so totoon ondakmomo ed sikato, manpinsiw ed singsing to, tan sikato so awiten da ed saray takeb da diad nikadkaduman yurongan. Agaylan kaapaan so impatnag na papa diad saray siglos! Niduman peteg ed mapaabeban simplisidad nen Pedro, ya angikuan ed si Cornelio, say Romanon opisyal na sundalo a tinmalimukor ed saray sali nen Pedro pian mangirayew ed sikato: “Onalagey ka, . . . siak lambengat so sakey a too”! (Gawa 10:25, 26, say Katolikon Jerusalem Bible) Tan agaylan miduma ed anghel ya angiter ed si apostol Juan na Puyan! Sinali nen Juan so ondakmomon mandayew ed saman ya anghel, balet imbaga na anghel: “Manalwar ka! Agmo ’tan gagawaen! Siak so sakey lambengat a kaparam ya aripen tan ed saray agagim a propetas tan ed saraman so manusumpal ed saray salita na sayan lukot. Idayew so Dios.”—Apocalipsis 22:8, 9.
22. Diad anton Makasulatan a totontonen so nayarin pakabidbiran ed mauges a sakey?
22 Kasin sayan panangipasirayew ed kleron klase so mabiskeg a tuloy met? Saya so nadetermina tayo diad pangiyaplika ed totontonen ya inter nen Jesus diad pamidbiran ed saray palson propetas: “Diad panamegley na saray bunga ra et nabidbir yo ra.” (Mateo 7:15, 16) Anto, sirin, so bunga na klero ed inlabas na saray siglos tan diad dilin koma-20 siglo tayo? Anto so pansumpalan na sayan too na kaugsan, tan siopa so mibiang ed satan a pansumpalan? Anto so responsabilidad na saraman so tuan tinmakot ed Dios nipaakar ed sayan mauges a sakey? Saray onggendan ya artikulo so manalaysay ed sarayan punto.
Tepetepet ed Repaso:
◻ Anto so too na kaugsan, tan kapigan so impatnag to?
◻ Panon so pangipabidbir na Biblia ed autor na sayan mauges a klase?
◻ Panoy impangipaatagey na klero ed inkasikara ed tagey na saray totoo?
◻ Antoran apostatan bangat tan agagamil so tinibukel na klero?
◻ Panon a say awawey na papa so miduma ed si Pedro tan samay sakey ya anghel?
[Litrato ed pahina 12]
Si apostol Pedro, aliwan singa saray papa, so ag-angabuloy ed sakey a toon ondakmomo ed sikato