“Paliisan Mo so Labilabir”

SAY Biblia so napno na saray eksperiensia tan saray estoryan nipaakar ed totoo. Agtayo lambengat pangayagaan so panbasa noagta minabang tayo met ed saratan. Si apostol Pablo so nansulat ed Kristianon kongregasyon na Roma: “Saray bengatla a nisulsulat nensaman, nisulat ira ya onkana ed kibanga ’tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.”​—Roma 15:4.

Si Pablo a mismo so akapibiang ed impangisalaysay na saray eksperiensia. Onia so ibabaga na Biblia nipaakar ed si Pablo tan Bernabe ed sampot na inmunan misioneron impanbaroy da: “Sanen akasabi ra [ed Antioquia na Syria], tan atipon da so iglesia, inolit da so saray amin a bengat lan ginawa na Dios ed sikara tan say inpangilukas to ed saray Gentiles na pinto na pananisia.” (Gawa 14:27) Anggapoy duaruwa ya apaseseg a tuloy iray agagi ed sarayan eksperiensia.

Balet, aliwan amin ya eksperiensia so makapabiskeg. Diad silong na panangipuyan, pinasakbayan nen Pablo si Timoteo: “Paliisan mo so labilabir ya ag-manepeg ed Dios tan saray tongtong na saray akukulaw.” (1 Timoteo 4:7) Tan diad si Tito et sikato so nansulat a saray matoor a Kristiano so nepeg ya “ag da imatleken so saray labilabir na saray Judio, tan saray bilibilin na saray totoo ya unarawira ed tua.”​—Tito 1:14.

Anto ta irayan labilabir, odino pabula? Saratan a duan termino so nanlapud Griegon my’thos (“myth”). Kuan na The International Standard Bible Encyclopaedia a dedeskribien na sayan salita so “(relihyoson) estorya ya anggapoy pisisiglaotan ed kapetegan.”

Say mundo ed panaon nen Pablo so napno na ontan iran estorya. Say sakey ya alimbawa et say apokripan libro nen Tobit, angangko ta nisulat a masulok a duan lasus a taon sakbay ed panaon nen Pablo. Sayan estorya so mangisasalaysay nipaakar ed si Tobit, sakey a relihyoson Judio, ya abulag sanen naplag ed saray mata to so tai na sakey a manok ya atap. Diad saginonor, imbaki to so ilalak to, si Tobias, pian mansingil ed pautang. Legan a walad dalan, diad panangidirehi na anghel, nala nen Tobias so puso, altey, tan apgo na sakey a sira. Kayari to et nabet to so sakey a baló ya, anggaman aminpiton danay ya akiasawa et nansiansian sakey a birhen lapud kada masiken to so pinatey na mauges ya espiritu diad labi na kasal. Diad panananggoyor na anghel, inasawa nen Tobias iman a baló tan pinagit to so demonyo diad impamool ed puso tan altey na sira. Diad panamegley na apgo na sira ed saginonor et nipawil so pakanengneng na ama nen Tobias.

Malinew, a sayan estorya so aliwan tua. Nilikud a satan so sakey a pantansya tan anito, walaan itan na lingo. Alimbawa, ibabaga na salaysay ya atasian nen Tobit so impanrebelde na mamaamianen a tribu tan say inkadakep na Israelitas ed Nineve, saray agawgawa ed awaran na Israel a walaay baetan a 257 a taon. Ingen, kuan na estorya a si Tobit so manedad na 112 sanen sikatoy inatey.​—Tobit 1:4, 11; 14:1, The Jerusalem Bible.

Saratan a pabula so arawin tuloy ed katuaan na “uliran na saray maabig a salita” ya inyabawag na matoor iran ariripen na Dios. (2 Timoteo 1:13) Saratan so bunga na imahinasyon, a kasuniyan na maawaran a katuaan, say nengneng na inestorya na agmaridios ya akukulaw. Saraya so estoryan nepeg ya ipulisay na Kristianos.

Pananubok ed Saray Salita na Katuaan

Dakel natan so manpaparehon estorya. Nansulat si Pablo: “Onsabi panaon ya ag da nitepel so maabig a bangat; no ag ingen . . . itainan da so saray pandengel da ed tua, tan sikara so pandengel da ed saray labilabir.” (2 Timoteo 4:3, 4) Diad pigaran pasen ed dalin, kasmak tan popular iray estoryan nipaakar ed bengabengatlan labas-ed-too. Kanian, saray Kristiano so sikakabat a “salien so saray salita” na relihyoso iran estorya pian amtaen no saratan so mitunosan ed Biblia.​—Job 12:11.

Malinew, dakel so agmitunosan ed Biblia. Alimbawa, diad dakel a kabiangan na mundo kaslakan so pakadngel na saray estoryan manusuporta’d sisiaen a say atooan a kamarerwa so ag-ompatey. Sarayan estorya so manedeskribe no panon ya ompatey so sakey a too, tan manpanengneng lamet balangla diad laman na sakey a kapanyanak ya ugaw, bilang sakey ya espiritu, ayep, odino sakey a too ed duman lugar.

Balet, ipapanengneng na Salita’y Dios a say kamarerwa na too et walaay ipapatey; ompatey iray kamarerwa. (Ezequiel 18:4) Nilikud ed saya, ibabaga na Biblia a saray inatey so andiay bilay ed lubok, agmakayarin mannonot, mansalita, odino manggawa na antokaman. (Eclesiastes 9:5, 10; Roma 6:23) Kanian, saramay napapalikdo na labilabir a mangiyaalibansa na sisiaen a say kamarerwa so ag-ompatey so, singa imbaga nen Pablo et “itainan da so saray pandengel da” manlapud “maabig iran salita” na Biblia.

Saray Estorya na Misteryoso

Arum ya estorya so mangiyaapasakey ed saray gawa na saray manananem tan managsalamangka. Alimbawa, diad arum a parti na Aprika, sarayan ahente na mauges so nibagan akinlongan na makapataktakot iran pakayari, a makayarin pasananeyen so inkasikara odino say arum pian magmaliw iran reptilya, bakes, tan saray manok; makatikkiab ed liwang pian nasumpal daray misyon da; makapanpanengneng tan makapanandipat; makalusot ed saray pader; tan makanengneng ed bengabengatlan nikotkot ed dalin.

Lapud dakel so ontan iran estorya, pati ed kasmak a panisia ed saraya, say arum ed Kristianon kongregasyon so nayarin naimpluensyaan a manisia met a saraya so tua. Nayarin sikaray mangikatunongan a bangta saray normal a totoo so agmakagawa na saratan a bengatla et saramay makaawat na misteryoson pakayari manlapud saray espiritun pinalsa, saray demonyo, so makayari. Say nayarin basiyan para’d sayan konklusyon et say 2 Tesalonica 2:9, 10, a mangibabagan: “Say isabi to mitokoyan ed gawa nen Satanas a pati amin a pakayari tan saray tanda tan saray pamapakelaw a tila, tan pati amin a panagsaol na andikaptekan ed saray natawtaw; lapud ag da inawat so aro na katuaan ta pian sikara komon so nilaban.”

Anggaman tua ya ipapanengneng na sayan kasulatan a si Satanas so makagawa na saray makapanyarin gawa, sasalambiten na saya a si Satanas so autor met na “saray tanda tan saray pamapakelaw a tila,” ontan met ed “panagsaol na andikaptekan.” Mitunosan, ipapanengneng na Biblia a si Satanas so tuson manamalikdo a sikatoy “mantila ed lapag na sankamundoan.” (Apocalipsis 12:9) Sikato so onsiano ed pamalikdo ed totoon manisia ed bengabengatlan aliwan tua.

Lapud saya, anggan saray paneknek tan saray panangipatua na saramay nalalanor ed espiritismo tan panag-anito so mabetbet ya agnapamintuaan. Saratan a totoo so nayarin sisimoon a manisian nanengneng, narengel, odino nasasagmak da so pigaran bengatla; ingen, diad tua et aliwan ontan. Alimbawa, wadtan iray mankuan a sikaray akapitalosan ed espiritu na totoon inatey la. Balet sikaray nalilingo, napapalikdo, biktima ira ed panamalikdo nen Satanas. Kuan na Biblia a saray inatey so “onlasor ed andi simekan.”​—Salmo 115:17.

Lapud awaran na Diablo ed panamalikdo, say pagmaliw a tua na saray estorya na misteryoso so makanepegan ya ikuentan napanduaruwaan ed antokaman a kaso. Maslak so inimbento na maaniton imahinasyon, a naaaruman diad tuloytuloy a panangestorya.

Say pangulit-ulit ed saratan a pabula so mangiyalibansa ed intereses na ama na katilaan, si Satanas a Diablo. (Juan 8:44) Sasagyaten na saraya so interes ed okultismo a makapadimla ed si Jehova. (Deuteronomio 18:10-12) Papalikdoen na saya iray totoo ed singano pakasalpotan ed takot tan anito. Agpankelawan a sinimbawa nen Pablo iray Kristiano ya “ag da arapen so saray labilabir.”​—1 Timoteo 1:3, 4.

Panangipulisay ed Panamaneknek na Saray Demonyo

Anggaman ontan, anto no saray estorya et ompatnag a walaay katuaan? No maminsan walaray eksperiensian mangisasalaysay nipaakar ed saray espiritu odino saray espiritista a mamibidbir ed inka-supremo nen Jehova tan inkapeteg na saray Tasi to. Nepeg ta ya ulit-uliten na saray Kristiano iratan ya estorya?

Andi, agda nepeg ya uliten itan. Ibabaga na Biblia, a sanen say makapadimla iran espiritu so kinmelyaw a si Jesus so Anak na Dios et “inbilin ton malmalet ed sikara ya sikato’y ag da ipakabat.” (Marcos 3:12) Ontan met, sanen say demonyon walaan na panagparles so anagdag ed kalangweran a biin mangipakabat a si Pablo tan si Bernabe so “ariripen na Sankatageyan a Dios” tan manangipalapag na “dalan na kilalaban,” say espiritu so pinapaway nen Pablo ed sikato. (Gawa 16:16-18) Anggan si Jesus, si Pablo, nisay siopaman a managsulat ed Biblia et ag-angiyabuloy ed saray demonyo a mamaneknek nipaakar ed gagala na Dios odino ed pinili ton ariripen.

Ontan met, a makatantanda a si Jesu-Kristo so nanayam ed pasen na saray espiritu sakbay a linma dia ed dalin. Kabkabat ton personal si Satanas. Balet, agniligliwa nen Jesus iray babangatan to diad pangestorya nipaakar ed aktibidades nen Satanas, nisay angiter na saray detalye ed nagawaan tan agnagawaan na Diablo. Si Satanas tan saray demonyos to so agkaaro nen Jesus. Sikaray impulisay, rebelde, managgula ed bengabengatlan masanto, tan kakabusol na Dios.

Ibabaga ed sikatayo na Biblia so kaukolan tayon amtaen. Satan so mangisasalaysay no sioparay demonyo, no panon dan palikdoen iray totoo, tan no panon tayon naarawian ira. Ipapanengneng na saya a si Jehova tan si Jesus so mas makapanyari nen saray demonyo. Tan ibabangat to ed sikatayo a no sikatayo so sitotoor a manlingkor ed si Jehova, saray marelmeng ya espiritu so agmakapanggawa ed sikatayo na antokaman a permanentin pakasakitan.​—Santiago 4:7.

Sirin, makatunongan so ipaliis na saray Kristiano ed labilabir, saray estoryan mansumpal lambengat ed pangiyalibansa ed intereses na saramay onsusumpa ed Dios. No panon a si Jesus et ‘tinasian to so katuaan,’ ontan met iray patumbok to natan. (Juan 18:37) Sikakabat dan tutumboken so simbawa na Biblia: “Ganagana ’ray bengatlan matua . . . murekdek yo so saraya’n bengatla.”​—Filipos 4:8.

[Litrato ed pahina 31]

Amin a nengneng na okultismo so kaukolan a mapekder ya arawian na saray tuan Kristiano