Panon a Say Too so Magmaliw ya Indengan na Dios?

“SAY Dios pinalsa to so too ed indengan to’n dili, dia ed indengan na Dios sikato so pinalsa to.” Ontan so ibabaga na impuyan a rekord, balet anto so kabaliksan na satan? Panon ya apalsa so inmunan laki tan bii ed indengan na Dios?​—Genesis 1:27.

Kasin mipadpara ra ed Dios diad pisikal? Andi, satan so imposibli. Say too so too, silalaman, tan adesinyon manbilay ed dalin. Say Dios so espiritu, wadman ed ag-naisip a mangatatawen a gloria ya agbalot naasinggeran na siopaman a too. (Exodo 33:18-20; 1 Corinto 15:50) No ontan, panon a say too so apalsa ed indengan na Dios? Diad paraan a say too et inikdan na abilidad a mangagamil ed saray matalonggaring ya atributos na Dios​—aro, hustisya, kakabatan, tan pakayari—​ontan met ed arum niran kalidad.

Saray Kalidad nen Jehova

Saray kalidad nen Jehova a Dios so nidalangirang ed amin a palsa to, balet saratan so nipanengneng a tuloy ed impideneng to ed inmunan sanasawa, si Adan tan si Eva. (Roma 1:20) Say panangaro to so nanenengneng lapud pinalsa to so dalin a matukotukoy pian panayaman na too. Pinalsa nen Jehova para’d laki so sakey ya ayadyarin asawan bii a magmaliw a kaulop to tan ina na saray ilalak to. Impasen toran dua ed sakey a marakep a tanamanan tan inikdan to ra na daakan a bengatlan kaukolan pian mantultuloy a manbilay tan magmaliw a maliket. Say sankamakapakelkelaw ed amin et inikdan ira na Dios na pankanawnawan manbilay ed ando lan ando.​—Genesis 2:7-9, 15-24.

Say kakabatan na Dios so anengneng ed impanubok to ed inmunan sanparis. No sikaray mansiansian membro na sankatalbaan a pamilya nen Jehova tan no sikaray manbilay ya ando lan ando bilang atateng na atooan a rasa, kaukolan a sikaray magmaliw ya alimbawa ed katooran tan tuan panagdayew. Kanian, inikdan ira nen Jehova na pankanawnawan mangidemostra ed kondisyon na puso ra ed silong na sakey a matukoy a subok​—kaukolan ya agda kanen so bunga na kiew a pakaamtaan na maong tan mauges. Agaylan makabat ed biang nen Jehova ya abuloyan so totoon mamaneknek na katutulok da tan aro ra para’d sikato sakbay ya ikdan tora na makapakelkelaw iran pribilihyo a pinegdat to!

Anengneng so inkahustisya na Dios diad panangipaskar to ed atagey iran estandarte ed saray pinalsa to tan diad agto impangikompromiso ed saraman ya estandarte. Satan so anengneng ed impangiter to ed si Adan tan Eva na amin a pankanawnawan manggawa no anto so maptek. Tan sanen sikara so sinmaew a manggawa ed satan, say inkahustisya to so anengneng ed impangukom to ed sikara pian sagmaken so nibagan dusa para’d rebelyon.

Say pakayari nen Jehova so naimano ed impanumpal to ed sentensya to. Si Satanas, say tuson rebelde, so mangipapatnag a si Jehova so matila, tan si Satanas so angiyopresi na baleg iran bengatla ed si Eva no ontunganga ed Dios. (Genesis 3:1-7) Balet agsinumpal nen Satanas so sipan to. Agto naamper si Jehova ed pamataynan ed si Adan tan si Eva manlapud tanamanan na Eden, tan agto naamper so kasumpalan na saray salita na Dios ed si Adan: “Lapu’d sika et dabok ka, dia ed dabok ompawil ka.” (Genesis 3:19) Anggaman ontan, agtampol indapo nen Jehova so sentensyan patey, tan diad saya ya impanengneng to ni aro to. Inabuloyan to si Adan tan si Eva na panaon pian mamawala na ananak a diad panamegley na satan et say orihinal a gagala to para’d katooan so nasumpal ed kaunoran.​—Genesis 1:28.

Kaunoran, say inkahustisya, aro, pakayari, tan kakabatan nen Jehova a Dios so nipatnag ed sipan to ed pamawala na sakey a bini a maneral ed saray gawa nen Satanas tan mametek ed saray makapaermen a resulta na inmunan rebelyon sumpad madibinon inkasoberano. (Genesis 3:15) Agaylan makapakelkelaw so Manamalsa tayo!

Saray Gunaet ed Pangalig ed Dios

Anggaman agla ayadyari, siansian nipatnag na totoo iray kalidad na Dios. Kanian, pinaseseg nen Pablo iray Kristiano ed agew to: “Aligen yo sirin so Dios, singa anak to kayon inararo.” (Efeso 5:1) Anggaman ontan, diad interon awaran, maslak so angipanengneng na baleg ya agpananginunang ed kalidades na Dios. Diad panaon nen Noe, saray totoo so nagmaliw ya ontanlan pikewet a sengegay impandesidi nen Jehova a deralen so amin a totoo nilikud ed si Noe tan say pamilya to. Si Noe so “sakey a too a maptek [matunong] tan nagnap ed saray kapolian to,” tan angidemostra na aro to ed Dios diad impanumpal ed saray ganggan na Dios.a “Ginawa nen Noe [so] unong na amin ya ingangan na Dios ed sikato ontan so ginawa to.” (Genesis 6:9, 22) Impanengneg nen Noe so panangaro para’d kapara ton too tan say kisiglaot to ed inkahustisya diad impagmaliw a “managpulong na katunongan.” (2 Pedro 2:5) Impanengneng to so kakabatan tan suston impangusar ed pisikal a pakayari to diad impanumbok ed panangidirehi na Dios a mamaalagey na baleg a biung, manimpen na tagano ed satan, manugyop na ayayep, tan onloob ed biung diad ganggan nen Jehova. Impanengneng to met so aro para’d inkatunong diad ag-impangiyabuloy ed marelmeng a kakaabay ton mangimpluensya ed sikato.

Dedeskribien na Biblia so dakel niran angidemostra na mipadparan maridios iran kalidad. Say manuna et si Jesu-Kristo, a naspot a walad indengan na Dios, tan sirin makapangibagan: “Say akanengneng ed siak anengneng to so Ama.” (Juan 14:9) Diad kalidades ya impanengneng nen Jesus, say matalonggaring et say aro. Say aro ed Ama to tan ed katooan so amakiwas ed sikaton manaynan ed mangatatawen ya ayaman to tan manbilay bilang sakey a too ed dalin. Saya so amakiwas ed sikaton mangigloria ed Ama to diad panamegley na matunong a kondukta to tan diad pangipulong na maong a balita para’d kilalaban ed katooan. (Mateo 4:23; Juan 13:31) Insan, say aro so amakiwas ed si Jesus a mangiyapay ed ayadyarin bilay to para’d kilalaban na katooan tan, nagkalalon importanti, para’d kialangonan na ngaran na Dios. (Juan 13:1) Diad panbanikel ya aligen so Dios, wala ta ni so siopaman a lalon maabig ya alimbawan tumboken nen say si Jesu-Kristo?​—1 Pedro 2:21.

Panon Tayon Magmaliw a Nagkalalon Singa say Dios Natan?

Natan, panon tayon makapangipanengneng na kalidades na Dios tan diad ontan et onkiwas ed indengan na Dios? Bueno, kunsideraen ya ununa so kalidad ya aro. Inkuan nen Jesus: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon ya nonot mo.” Panon tayon nipanengneng so aro ed Dios? Onebat si apostol Juan: “Saya so aro na Dios, a sumpalen tayo so saray gangan to; tan saray gangan to aliwa ran ambelat.”​—Mateo 22:37; 1 Juan 5:3.

Siempre, ta pian natulok iray ganggan nen Jehova, kaukolan ya amta tayo iratan. Lalanoren na satan so panbasa, panaral, tan pandalepdep ed Salita’y Dios, say Biblia, tan literaturan nipaakar ed Biblia. Singa say salmista, nepeg a nibaga tayon: “O agay la so panangarok ed gangan mo! Sikato so dalepdep ko ed amin ya agew.” (Salmo 119:97) Legan ya onaaralem so pakatalos tayo ed Salita’y Dios, sikatayo so napano ed paraan na panagnonot na Dios. Nawalaan tayo na panangaro ed inkatunong tan panamusol ed kaugsan. (Salmo 45:7) Ditan alingo si Adan. Amta to so ganggan nen Jehova, balet agmagenap so panangaro to ed satan pian ompeket ed satan. Sano babasaen so Salita’y Dios, naynay tayon tepetan so inkasikatayo, ‘Panon iyan onaplika ed siak? Anto so nagawaan ko pian say konduktak so nagkalalon mitunosan ed kalidades na Dios?’

Inkuan met nen Jesus: “Aroen mo so kaparam a too [unong] ed sikan dili.” (Mateo 22:39) Balang normal ya indibidual so mangaaro ed inkasikaton dili tan mankaliktan na sankaabigan para’d inkasikato. Satan so agmauges. Balet kasin mangipapanengneng tayo na mipadparan aro ed kaabay tayo? Kasin tutumboken tayo so ganggan a walad Biblia: “Agmo abalaen so maong ed saray kanepegan to, sano wala ed pakayari na limam so pangawa”?​—Uliran 3:27; Galacia 6:10.

Komusta met so kalidad a kakabatan? Say pankaliktan a nipatnag iyan kalidad so mangitonton ed sikatayo pian aralen so Biblia lapud satan so panlalapuan na madibinon kakabatan. Diad Salmo 119:98-100 et nabasa tayo so onia: “Dia ed panamegley na saray gangan mo marondonong ak nen saray kakabusol ko; ta sikara so ibibak lawas. Wala ed siak so dakdakel a pakatalos nen saray amin a managbangat ko; ta saray panamintuaan mo sikara so dalepdep ko. Makatalos ak na dakdakel nen saray totoo a daan, nisengeg ed unoren ko so bilibilin mo.” Diad Uliran 3:18, say kakabatan so nadedeskribe bilang “sakey a kiew na bilay.” No nagamoran tayo so kakabatan tan agamilen itan, awaten tayo so abobon na Dios tan say tumang a bilay ya andi-anggaan.​—Eclesiastes 7:12.

Komusta met so inkahustisya? Diad sayan marelmeng a mundo, say inkahustisya so sakey ya importantin kalidad para’d saramay mamapaliket ed Dios. Inaro nen Jesus so inkatunong (inkahustisya) tan ginula to so kaugsan. (Hebreos 1:9) Ontan met so gagawaen na saray Kristiano natan. Say inkahustisya so mamapakiwas ed sikara pian pablien iray maptek a kalidad. Aarawian daray agmatunong a kurang na sayan mundo tan say panggawa na linawa na Dios so gagawaen dan sankaimportantian ed bilay da.​—1 Juan 2:15-17.

No nipaakar ed pakayari, amin tayo so walaan na magenap ed saya. Natural a walaan tayo na pisikal tan intelektual a pakayari, tan legan a sikatayoy ombubulaslas bilang Kristianos, nababayuboan tayo so pakayari unong ed espiritual a pantalos. Say pakayari tayo so aaruman ni nen Jehova diad panamegley na masanton espiritu to anggad sikatayo, anggaman ompatnag a maletey itayo, et makapanggawa ed linawa nen Jehova. Inkuan nen Pablo: “Nayarian ko a gawaen so ganagana ed saman so mamabiskeg ed siak.” (Filipos 4:13) Satan met lanlamang a biskeg so nagamoran tayo no ipikasi tayo ya ikdan itayo nen Jehova na espiritu.

Panangipulong na Maong a Balita

Say panangipanengneng tayo ed apatiran manunan atributo na Dios so sankanengneng ed panutulok tayo ed ganggan: “Onla kayo sirin, tan mangawa kayo na saray babangatan ed amin a naciones, ya binyagan yo ra ed ngara’y Ama, tan say Anak, tan say Espiritu Santo, ya ibangat yo ra’n mangonor na amin a bengabengatla ya ingangan ko ed sikayo. Tan nia, walaak a naynay ed sikayo, ya anga ed kasampotan na mundo.” (Mateo 28:19, 20) Say ontan a kimey na panagbangat so mangitatarok na bilay ed saramay onkiwas. Agaylan maabig a panangipanengneng na aro para’d saramay, diad baleg a kabiangan a diad gapo et agtayo nakakabatan!

Sakey ni, say ontan a panagbangat so kurang na kakabatan. Satan so mamapawala na bengabengatlan magnayon. Anto ni sananey a kimey a nibagan: “Ta no gawaen mo so saraya, nilaban mo so inkasika tan saray ondengel met ed sika.” (1 Timoteo 4:16) Anggaporay natalo ed panaggaway-babangatan a kimey. Parehon saramay ondengel tan saramay manbangat so makagamor na andi-anggaan iran bendisyon.

No nipaakar ed inkahustisya, saray Kristiano so mangibabangat na maptek tan matunong iran prinsipyo ed saray estudyante ra na Biblia. Sikaray tutulongan tayo pian manlingkor ed si Jehova, “say Dios na inkahustisya.” (Malaquias 2:17, NW) Saramay angidedika natan na bilay da pian panlingkoran si Jehova tan gagawaen itan tekep na katooran so niyabawag a matunong, maptek, a mamaarap ed kililiktar da ed Armagedon.​—Roma 3:24; Santiago 2:24-26.

Agaylan panangidemostra na pakayari so panagpulong tan panagbangat na maong a balita ed sankamundoan! (Mateo 24:14) Kaukolan so panagsungdo pian makapantultuloy a manpulong ed saray teritorya a ditan et maslak so agmalabay ya ondengel. Balet si Jehova, diad panamegley na espiritu to, so mangiiter na biskeg a nakakaukolan pian makapansungdo angga ed anggaan.​—Isaias 40:30, 31; Mateo 24:13; Lucas 11:13.

Tua, bilang ag-ayadyarin ilalak nen Adan, agtayo nayarian ya agamilen irayan maabig a kalidad ed naspot a paraan. Balet, tandaan, say too so agawa unong ed indengan na Dios, tan no panbanikelan tayon magmaliw a nagkalalon kapara na Dios, diad sakey a kabiangan et susumpalen tayo so rason na kiwawala tayo. (Eclesiastes 12:13) No panggugunaetan tayon gawaen so anggaay nayarian tayo tan onkerew na kaperdona no sikatayoy nankasalanan, sikatayo so makapanilalo a makaliktar a mamaarap ed matunong a balon mundo na Dios, a ditan et sikatayo so makagamor na inkayadyari. Diad ontan et sikatayo so manayam ed sakey a paraison dalin a panayaman na ayadyarin totoo, ya amin et pakanengnengan na saray kalidad nen Jehova a Dios. Agaylan gayaga! Diad kaunoran, diad sankasigpotan a pantalos na balikas, saray totoo so magmaliw ya indengan na Dios.

[Paimano ed leksab]

[Litrato ed pahina 25]

Impanengneng ed sikatayo nen Jesus no panon a bayuboan iray madibinon kalidad nen Jehova

[Litrato ed pahina 26]

Diad kaunoran, saray totoo diad sankasigpotan a pantalos so magmaliw ya indengan na Dios